Deuteronomy 34
The Book of Deuteronomy
܀ ܬܢܝܢ ܢܡܘܣܐ ܠܕ ܀
1 ܘܰܣܠܶܩ ܡܽܘܫܶܐ ܡܶܢ ܥܰܪܒܽܘܬ ܡܽܘܐܳܒ ܠܛܽܘܪܳܐ ܕܢܳܒܽܘ. ܠܪܺܝܫ ܪܳܡܬܳܐ ܕܠܽܘܩܒܰܠ ܐܺܝܪܺܝܚܽܘ. ܘܚܰܘܝܶܗ ܡܳܪܝܳܐ ܟܽܠܳܗ ܐܰܪܥܳܐ ܕܓܶܠܥܳܕ. ܘܰܕܓܳܕ. ܘܰܥܕܰܡܳܐ ܠܕܳܢ.
2 ܘܟܽܠܶܗ ܢܰܦܬܳܠܺܝ. ܘܟܽܠܳܗ̇ ܐܰܪܥܳܐ ܕܰܐܦܪܶܝܡ. ܘܰܕܡܢܰܫܶܐ. ܘܟܽܠܳܗ̇ ܐܰܪܥܳܐ ܕܺܝܗܽܘܕܳܐ. ܥܕܰܡܳܐ ܠܝܰܡܳܐ ܐ̱ܚܪܳܝܳܐ ܘܰܠܬܰܝܡܢܳܐ.
3 ܘܰܠܟܳܟܳܪ ܕܒܰܦܩܰܥܬܳܐ ܕܺܐܝܪܺܝܚܽܘ ܩܪܺܝܬܳܐ ܕܕܶܩ̈ܠܶܐ. ܥܕܰܡܳܐ ܠܨܳܥܳܪ.
4 ܘܶܐܡܰܪ ܠܶܗ ܡܳܪܝܳܐ. ܗܳܕܳܐ ܗ̱ܝ ܐܰܪܥܳܐ ܕܺܝܡܺܝܬ ܠܰܐܒܪܳܗܳܡ. ܘܠܺܐܝܣܚܳܩ. ܘܰܠܝܰܥܩܽܘܒ. ܘܶܐܡܪܶܬ ܕܰܠܙܰܪܥܟܽܘܢ ܐܶܬܠܺܝܗ̇. ܚܰܘܺܝܬܳܗ̇ ܠܳܟ ܒܥܰܝܢܰܝ̈ܟ. ܘܰܠܬܰܡܳܢ ܠܳܐ ܬܶܥܽܘܠ.
5 ܘܡܺܝܬ ܬܰܡܳܢ ܡܽܘܫܶܐ ܥܰܒܕܶܗ ܕܡܳܪܝܳܐ ܒܰܐܪܥܳܐ ܕܡܽܘܐܳܒ. ܒܡܶܠܰܬ ܦܽܘܡܶܗ ܕܡܳܪܝܳܐ.
6 ܘܩܰܒܪܶܗ ܒܢܰܚܠܳܐ ܒܰܐܪܥܳܐ ܕܡܽܘܐܳܒ. ܠܽܘܩܒܰܠ ܒܶܝܬ ܦܥܽܘܪ. ܘܠܳܐ ܝܺܕܰܥ ܐ̱ܢܳܫ ܩܰܒܪܶܗ ܥܕܰܡܳܐ ܠܝܰܘܡܳܢܳܐ.
7 ܘܡܽܘܫܶܐ ܒܰܪ ܡܳܐܐ ܗܘܳܐ ܘܥܶܣܪܺܝܢ ܫܢܺܝ̈ܢ ܟܰܕ ܡܺܝܬ. ܠܳܐ ܝܶܩܪܰܬ ܥܰܝܢܶܗ. ܘܠܳܐ ܐܶܬܩܰܡܰܛܘ ܦܰܟܰܘ̈ܗܝ.
8 ܘܰܒܟܰܐܗܝ ܒܢܰܝ̈ ܝܺܣܪܳܐܶܝܠ ܠܡܽܘܫܶܐ ܒܥܰܪܒܽܘܬ ܡܽܘܐܳܒ ܬܠܳܬܺܝܢ ܝܰܘܡܺܝ̈ܢ. ܘܰܫܠܶܡܘ ܝܰܘ̈ܡܰܝ ܒܟܳܬܳܐ ܕܶܐܒܠܶܗ ܕܡܽܘܫܶܐ.
9 ܘܝܶܫܽܘܥ ܒܰܪܢܽܘܢ ܐܶܬܡܠܺܝ ܪܽܘܚܳܐ ܕܚܶܟܡܬܳܐ. ܡܶܛܽܠ ܕܣܳܡ ܡܽܘܫܶܐ ܐܺܝܕܰܘ̈ܗܝ ܥܠܰܘܗܝ. ܘܫܳܡܥܺܝܢ ܗܘܰܘ ܠܶܗ ܒܢܰܝ̈ ܝܺܣܪܳܐܶܝܠ. ܘܥܳܒܕܺܝܢ ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ.
10 ܘܬܽܘܒ ܠܳܐ ܩܳܡ ܢܒܺܝܳܐ ܒܺܝܣܪܳܐܶܝܠ ܐܰܝܟ ܡܽܘܫܶܐ. ܕܝܰܕܥܶܗ ܡܳܪܝܳܐ ܐܰܦܺܝ̈ܢ ܠܽܘܩܒܰܠ ܐܰܦܺܝ̈ܢ.
11 ܒܟܽܠܗܶܝܢ ܐܳܬܘ̈ܳܬܳܐ ܘܬܶܕܡܖ̈ܳܬܳܐ ܕܫܰܕܪܶܗ ܡܳܪܝܳܐ ܠܡܶܥܒܰܕ ܒܰܐܪܥܳܐ ܕܡܶܨܪܶܝܢ. ܠܦܶܪܥܽܘܢ ܘܰܠܟܽܠܗܽܘܢ ܥܰܒܕܰܘ̈ܗܝ ܘܰܠܟܽܠܳܗ̇ ܐܰܪܥܶܗ.
12 ܘܰܠܟܽܠܳܗ̇ ܐܺܝܕܳܐ ܥܰܫܺܝܢܬܳܐ. ܘܰܠܟܽܠܶܗ ܚܶܙܘܳܐ ܪܰܒܳܐ. ܕܰܥܒܰܕ ܡܽܘܫܶܐ ܠܥܺܝܢ ܟܽܠܶܗ ܝܺܣܪܳܐܶܝܠ.