2 Peter 2
Second Epistle of Peter
܀ ܐܓܪܬܐ ܕܬܪ̈ܬܝܢ ܕܦܛܪܘܣ ܒ ܀
1- ܗܘܰܘ ܕܶܝܢ ܐܳܦ ܢܒܺܝ̈ܶܐ ܕܰܓ̈ܳܠܶܐ ܒܥܳܠܡܳܐ܆ ܐܰܝܟ ܕܳܐܦ ܒܟܽܘܢ ܢܶܗܘܽܘܢ ܡܰܠܦܳܢ̈ܶܐ ܕܰܓ̈ܳܠܶܐ܁ ܐܰܝܠܶܝܢ ܕܡܰܥܠܺܝܢ ܐܶܪ̈ܶܣܺܝܣ ܕܰܐܒܕܳܢܳܐ. ܘܰܒܡܳܪܳܐ ܕܰܙܒܰܢ ܐܶܢܽܘܢ܁ ܟܳܦܪܺܝܢ. ܟܰܕ ܡܰܝܬܶܝܢ ܥܰܠ ܢܰܦܫܗܽܘܢ ܐܰܒܕܳܢܳܐ ܡܣܰܪܗܒܳܐ.
2- ܘܣܰܓܺܝ̈ܶܐܐ ܢܺܐܙܽܠ̱ܘܢ܁ ܒܳܬܰܪ ܛܰܢܦܘ̈ܳܬܳܐ ܕܺܝܠܗܽܘܢ܇ ܗܳܠܶܝܢ ܕܡܶܛܽܠܳܬܗܽܘܢ ܐܽܘܪܚܳܐ ܕܰܫܪܳܪܳܐ ܬܶܬܓܰܕܰܦ.
3- ܘܰܒܥܳܠܽܘܒܽܘܬܳܐ܁ ܕܡ̈ܶܠܶܐ ܕܒܰܪ̈ܳܝܶܐ ܢܶܬܬܰܓܪܽܘܢ ܒܗܽܘܢ. ܗܳܢܽܘܢ ܕܕܺܝܢܗܽܘܢ ܡܶܢ ܩܕܺܝܡ ܠܳܐ ܒܳܛܶܠ܆ ܘܰܐܒܕܳܢܗܽܘܢ ܠܳܐ ܢܳܐܶܡ܀
4- ܐܶܢ ܓܶܝܪ ܐܰܠܳܗܳܐ ܥܰܠ ܡ̈ܰܠܰܐܟܶܐ ܕܰܚܛܰܘ ܠܳܐ ܚܳܣ܇ ܐܶܠܳܐ ܒܫܺܫ̈ܠܳܬܳܐ ܕܥܰܡܛܳܢܳܐ ܥܰܓܶܢ ܐܶܢܽܘܢ ܒܬܰܚ̈ܬܳܝܳܬܳܐ܇ ܘܰܐܫܠܶܡ ܐܶܢܽܘܢ ܕܢܶܬܢܰܛܪܽܘܢ ܠܕܺܝܢܳܐ ܕܫܽܘܢܳܩܳܐ܆
5- ܘܥܰܠ ܥܳܠܡܳܐ ܩܰܕܡܳܝܳܐ ܠܳܐ ܚܳܣ܇ ܐܶܠܳܐ ܠܢܽܘܚ ܕܰܬܡܳܢܝܳܐ ܟܳܪܽܘܙܳܐ ܕܟܺܐܢܽܘܬܳܐ ܢܛܰܪ܆ ܟܰܕ ܛܰܘܦܳܢܳܐ ܥܰܠ ܥܳܠܡܳܐ ܕܪ̈ܰܫܺܝܥܶܐ ܐܰܝܬܺܝ܆
6- ܘܟܰܕ ܠܰܡܕܺܝ̈ܢܳܬܳܐ ܕܰܣܕܽܘܡ ܘܰܕܥܳܡܽܘܪܳܐ ܐܰܘܩܶܕ܇ ܘܒܰܗܦܽܘܟܝܳܐ ܚܰܝܶܒ ܐܶܢܶܝܢ܇ ܟܰܕ ܬܰܚܘܺܝܬܳܐ ܠܪ̈ܰܫܺܝܥܶܐ ܕܰܥܬܺܝܕܺܝܢ ܕܢܶܗܘܽܘܢ ܣܳܡ܆
7- ܐܳܦ ܠܠܽܘܛ ܙܰܕܺܝܩܳܐ܆ ܕܡܶܬܩܰܦܰܚ ܗ̱ܘܳܐ ܡܶܢ ܗܦܽܘܟܝܳܐ ܕܰܒܛܰܢܦܽܘܬܳܐ ܕܗܳܠܶܝܢ ܕܰܕܠܳܐ ܢܳܡܽܘܣܳܐ ܐܺܝܬܰܝܗܽܘܢ ܗ̱ܘܰܘ܁ ܦܰܨܺܝ܆
8- ܒܰܚܙܳܬܳܐ ܓܶܝܪ ܘܰܒܫܶܡܥܳܐ܁ ܟܰܕ ܥܳܡܰܪ ܗ̱ܘܳܐ ܟܺܐܢܳܐ ܒܰܝܢܳܬܗܽܘܢ܆ ܝܽܘܡ ܡܶܢ ܝܽܘܡ܁ ܠܢܰܦܫܶܗ ܙܰܕܺܝܩܽܘܬܶܗ܆ ܒܰܥ̈ܒܳܕܶܐ ܕܠܳܐ ܢܳܡܽܘܣ ܡܫܰܢܶܩ ܗ̱ܘܳܐ܆
9- ܝܳܕܰܥ ܗ̱ܘ ܡܳܪܝܳܐ ܕܢܶܦܪܽܘܩ ܡܶܢ ܐܽܘܠܨܳܢܳܐ ܠܰܐܝܠܶܝܢ ܕܕܳܚܠܺܝܢ ܠܶܗ. ܠܥܰܘ̈ܳܠܶܐ ܕܶܝܢ܁ ܠܝܰܘܡܳܐ ܕܕܺܝܢܳܐ ܟܰܕ ܡܶܫܬܰܢܩܺܝܢ ܢܶܛܽܘܪ܆
10- ܝܰܬܺܝܪܳܐܺܝܬ ܕܶܝܢ ܠܰܐܝܠܶܝܢ ܕܒܳܬܰܪ ܒܶܣܪܳܐ ܒܰܪ̈ܓܺܝܓܳܬܳܐ ܕܛܰܡܽܐܘܬܳܐ ܐܳܙܺܠ̱ܝܢ܇ ܘܥܰܠ ܡܳܪܽܘܬܳܐ ܡܒܰܣܪܺܝܢ܇ ܡܰܪ̈ܳܚܶܐ ܘܰܡܫܰܩ̈ܠܶܐ܇ ܕܡܶܢ ܬܶܫܒܽܘܚܬܶܗ ܠܳܐ ܙܳܝܥܺܝܢ ܟܰܕ ܡܓܰܕܦܺܝܢ܀
11- ܐܰܝܟܳܐ ܕܡ̈ܰܠܰܐܟܶܐ ܕܰܒܚܰܝܠܳܐ ܘܰܒܥܽܘܫܢܳܐ ܪܰܘܪ̈ܒܺܝܢ ܡܶܢܗܽܘܢ܆ ܕܠܳܐ ܡܰܝܬܶܝܢ ܥܠܰܝܗܽܘܢ ܕܺܝܢܳܐ ܕܓܽܘܕܳܦܳܐ ܕܥܰܠ ܡܳܪܝܳܐ.
12- ܗܳܠܶܝܢ ܕܶܝܢ ܕܰܐܝܟ ܚܰܝ̈ܘܳܬܳܐ ܚܰܪ̈ܫܳܬܳܐ ܗܘܰܘ ܒܰܟܝܳܢܳܐ ܠܚܰܪܒܳܐ ܘܠܰܚܒܳܠܳܐ܇ ܟܰܕ ܒܰܐܝܠܶܝܢ ܕܠܳܐ ܝܳܕܥܺܝܢ ܡܓܰܕܦܺܝܢ܆ ܒܰܚܒܳܠܳܐ ܕܺܝܠܗܽܘܢ ܢܶܬܚܰܒܠܽܘܢ.
13- ܟܰܕ ܐܰܝܠܶܝܢ ܕܗܳܘܶܐ ܒܗܽܘܢ ܥܰܘܠܳܐ܆ ܐܰܓܪܳܐ ܕܥܰܘܠܳܐ܁ ܗܰܢܺܝܽܘܬܳܐ ܚܫܺܝܒ ܠܗܽܘܢ܇ ܒܽܘܣܳܡܳܐ ܕܗܳܘܶܐ ܒܺܐܝܡܳܡܳܐ. ܡܟܰܬܡ̈ܶܐ ܘܡܰܠܝ̈ܰܝ ܡܽܘ̈ܡܶܐ. ܕܟܰܕ ܡܶܬܒܰܣܡܺܝܢ ܒܰܢ̈ܝܳܚܳܬܗܽܘܢ܆ ܡܶܬܦܰܢܩܺܝܢ.
14- ܟܰܕ ܥܰܝ̈ܢܶܐ ܐܺܝܬ ܠܗܽܘܢ ܕܡܰܠ̈ܝܳܢ ܓܰܘܪܳܐ܁ ܘܰܚܛܳܗ̈ܶܐ ܕܠܳܐ ܡܰܘܦܶܝܢ. ܟܰܕ ܡܫܰܕܠܺܝܢ ܠܢܰܦ̈ܫܳܬܳܐ ܕܠܳܐ ܣܡܺܝ̈ܟܳܢ. ܘܠܶܒܳܐ ܕܰܡܕܰܪܰܫ ܒܥܳܠܽܘܒܽܘܬܳܐ ܐܺܝܬ ܠܗܽܘܢ. ܒܢܰܝ̈ܳܐ ܕܠܰܘܛܬܳܐ.
15- ܕܠܳܐ ܫܒܰܩܘ ܐܽܘܪܚܳܐ܆ ܫܓܰܘ ܘܶܐܙܰܠܘ ܒܽܐܘܪܚܳܐ ܕܒܶܠܥܰܡ ܒܰܪ ܒܥܽܘܪ܇ ܗܰܘ ܕܰܐܓܪܳܐ ܕܥܰܘܠܳܐ ܐܰܚܶܒ.
16- ܡܰܟܣܳܢܽܘܬܳܐ ܕܶܝܢ ܗܘܳܬ ܠܳܗ̇ ܠܡܶܬܥܰܒܪܳܢܽܘܬܶܗ܆ ܠܰܐܬܳܢܳܐ ܕܠܳܐ ܩܳܠܳܐ܇ ܕܟܰܕ ܒܩܳܠܳܐ ܕܰܒܢܰܝ̈ܢܳܫܳܐ܁ ܡܰܠܠܰܬ ܟܠܳܬ ܠܫܳܛܝܽܘܬܶܗ ܕܰܢܒܺܝܳܐ܀
17- ܗܳܠܶܝܢ ܐܶܢܶܝܢ ܡܥܺܝ̈ܢܶܐ ܕܠܳܐ ܡܰܝ̈ܳܐ܆ ܥܢܳܢ̈ܶܐ ܕܶܝܢ ܕܡܶܢ ܥܰܠܥܳܠܳܐ ܡܶܬܪ̈ܰܕܦܳܢ. ܗܳܠܶܝܢ ܕܥܰܡܛܳܢܳܐ ܕܚܶܫܽܘܟܳܐ ܢܛܺܝܪ ܠܗܽܘܢ.
18- ܟܰܕ ܓܶܝܪ ܓܽܘܢ̈ܚܶܐ ܕܰܣܪܺܝܩܽܘܬܳܐ ܡܡܰܠܠܺܝܢ܆ ܡܫܰܕܠܺܝܢ ܒܰܪ̈ܓܺܝܓܳܬܳܐ ܛܰܢ̈ܦܳܬܳܐ ܕܒܶܣܪܳܐ܆ ܠܰܐܝܠܶܝܢ ܕܒܰܡܠܶܐ ܥܳܪܩܺܝܢ ܩܰܠܺܝܠ܁ ܡܶܢ ܐܰܝܠܶܝܢ ܕܰܒܛܳܥܝܽܘܬܳܐ ܡܶܬܗܰܦܟܺܝܢ.
19- ܘܚܺܐܪܽܘܬܳܐ ܠܗܽܘܢ ܡܶܫܬܰܘܕܶܝܢ܆ ܟܰܕ ܗܶܢܽܘܢ ܥܰܒ̈ܕܶܐ ܐܺܝܬܰܝܗܽܘܢ ܕܰܚܒܳܠܳܐ. ܠܗܰܘ ܓܶܝܪ ܡܶܕܶܡ ܕܐ̱ܢܳܫ ܙܟܳܐ ܡܶܢܶܗ܆ ܠܗܳܢܳܐ ܐܳܦ ܡܫܰܥܒܰܕ.
20- ܐܶܢ ܓܶܝܪ ܟܰܕ ܥܪܰܩܘ ܡܶܢ ܛܰܢ̈ܦܘܳܬܶܗ ܕܥܳܠܡܳܐ ܒܫܽܘܘܕܳܥܶܗ ܕܡܳܪܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܇ ܒܗܶܝܢ ܒܗܳܠܶܝܢ ܟܰܕ ܡܶܬܥܰܪܙܠܺܝܢ܁ ܬܽܘܒ ܡܶܙܕܟܶܝܢ܆ ܗܘܳܬ ܠܳܗ̇ ܚܰܪܬܗܽܘܢ܇ ܕܒܺܝܫܳܐ ܡܶܢ ܩܰܕܡܳܝܬܳܐ.
21- ܦܰܩܳܚ ܗ̱ܘܳܐ ܠܗܽܘܢ ܓܶܝܪ ܕܠܳܐ ܢܶܫܬܰܘܕܥܽܘܢ ܠܽܐܘܪܚܳܐ ܕܙܰܕܺܝܩܽܘܬܳܐ܆ ܐܰܘ ܕܟܰܕ ܐܶܫܬܰܘܕܰܥܘ܁ ܠܒܳܬܪܳܐ ܠܳܐ ܢܶܗܦܟܽܘܢ ܡܶܢ ܦܽܘܩܕܳܢܳܐ ܩܰܕܺܝܫܳܐ ܕܶܐܫܬܠܶܡ ܠܗܽܘܢ.
22- ܓܳܕܫܳܐ ܠܗܽܘܢ ܕܶܝܢ ܗܳܠܶܝܢ ܕܡܰܬܠܳܐ ܫܰܪܺܝܪܳܐ܆ ܕܟܰܠܒܳܐ ܕܰܗܦܰܟ ܥܰܠ ܬܝܽܘܒܶܗ܆ ܘܰܚܙܺܝܪܬܳܐ ܕܰܣܚܳܬ ܒܥܽܘܪܓܳܠܳܐ ܕܰܣܝܳܢܳܐ܀