2 Peter 3
Second Epistle of Peter
܀ ܐܓܪܬܐ ܕܬܪ̈ܬܝܢ ܕܦܛܪܘܣ ܓ ܀
1- ܗܳܕܶܐ ܡܶܢ ܟܰܕܽܘ ܚܰܒܺܝ̈ܒܰܝ܆ ܐܶܓܰܪܬܳܐ ܕܬܰܪܬܶܝܢ܁ ܟܳܬܶܒ ܐ̱ܢܳܐ ܠܟܽܘܢ. ܗܳܠܶܝܢ ܕܰܒܗܶܝܢ ܡܥܺܝܪ ܐ̱ܢܳܐ ܒܥ̱ܽܘܗܕܳܢܳܐ ܠܪܶܥܝܳܢܟܽܘܢ ܫܰܦܝܳܐ܆
2- ܕܬܰܥ̱ܗܕܽܘܢ ܠܡ̈ܶܠܶܐ ܕܩܰܕܶܡ̈ܝ ܐܶܬܶܐܡܰܪ̈ܝ ܡܶܢ ܢܒܺܝ̈ܶܐ ܩܰܕܺܝ̈ܫܶܐ܇ ܘܰܠܦܽܘܩܕܳܢܶܗ ܕܡܳܪܰܢ ܘܦܳܪܽܘܩܰܢ ܕܰܒܝܰܕ ܫܠܺܝ̈ܚܶܐ܇
3- ܟܰܕ ܗܳܕܶܐ ܠܽܘܩܕܰܡ ܝܳܕܥܺܝܢ ܐܢ̱ܬܽܘܢ܆ ܕܢܺܐܬܽܘܢ ܒܚܰܪܬܳܐ ܕܝܰܘ̈ܡܳܬܳܐ ܡܒܰܙܚ̈ܳܢܶܐ ܕܰܡܒܰܙܚܺܝܢ܁ ܟܰܕ ܐܰܝܟ ܪ̈ܓܺܝܓܳܬܳܐ ܕܺܝܠܗܽܘܢ ܡܗܰܠܟܺܝܢ
4- ܘܳܐܡܪܺܝܢ܆ ܕܰܐܝܟܳܐ ܐܺܝܬܰܘܗ̱ܝ ܡܽܘܠܟܳܢܳܐ ܕܡܶܐܬܺܝܬܶܗ؟ ܡܶܢ ܟܰܕ ܓܶܝܪ ܐܰܒܳܗ̈ܳܬܰܢ ܫܟܶܒܘ܆ ܟܰܕ ܒܡܶܕܶܡ ܗܳܟܰܢܳܐ ܡܟܰܬܰܪ ܡܶܢ ܫܽܘܪܳܝܳܗ̇ ܕܰܒܪܺܝܬܳܐ!
5- ܛܳܥܝܳܐ ܠܗܽܘܢ ܗܳܕܶܐ܁ ܟܰܕ ܨܳܒܶܝܢ܆ ܕܰܫܡܰܝܳܐ ܐܺܝܬܰܝܗܽܘܢ ܗ̱ܘܰܘ ܡܶܢ ܩܕܺܝܡ ܘܰܐܪܥܳܐ. ܡܶܢ ܡܰܝ̈ܳܐ ܘܰܒܝܰܕ ܡܰܝ̈ܳܐ ܩܳܡܰܬ܇ ܒܡܶܠܬܳܐ ܕܰܐܠܳܗܳܐ܇
6- ܗܳܠܶܝܢ ܕܒܺܐܝ̈ܕܰܝܗܽܘܢ ܥܳܠܡܳܐ ܕܗܳܝܕܶܝܢ܁ ܛܳܦ ܒܡܰܝ̈ܳܐ. ܘܶܐܒܰܕ.
7- ܫܡܰܝܳܐ ܕܶܝܢ ܕܗܳܫܳܐ ܘܰܐܪܥܳܐ܁ ܒܡܶܠܬܳܐ ܕܺܝܠܶܗ ܐܰܣܺܝܪܺܝܢ܁ ܟܰܕ ܠܢܽܘܪܳܐ ܡܶܬܢܰܛܪܺܝܢ܇ ܠܝܰܘܡܳܐ ܕܕܺܝܢܳܐ ܘܕܰܐܒܕܳܢܳܐ ܕܰܒܢܰܝ̈ܢܳܫܳܐ ܪ̈ܰܫܺܝܥܶܐ܀
8- ܗܳܕܶܐ ܕܶܝܢ ܚܕܳܐ܁ ܠܳܐ ܬܶܛܥܽܘܢ ܚܰܒܺܝ̈ܒܰܝ܆ ܕܚܰܕ ܝܰܘܡܳܐ ܠܡܳܪܝܳܐ܁ ܐܰܝܟ ܐܳܠܶܦ ܫܢܺܝ̈ܢ ܐܺܝܬܰܘܗ̱ܝ܇ ܘܳܐܠܶܦ ܫܢܺܝ̈ܢ ܐܰܝܟ ܝܰܘܡܳܐ ܚܰܕ.
9- ܠܳܐ ܡܶܫܬܰܘܚܰܪ ܡܳܪܝܳܐ ܒܡܽܘ̈ܠܟܳܢܰܘܗ̱ܝ ܐܰܝܟ ܕܐ̱ܢܳܫܺܝ̈ܢ ܫܽܘܘܚܳܪܳܐ ܡܰܣܒܪܺܝܢ܇ ܐܶܠܳܐ ܡܰܓܰܪ ܪܽܘܚܶܗ ܡܶܛܽܠܳܬܟܽܘܢ܆ ܒܰܕܠܳܐ ܨܳܒܶܐ ܕܐ̱ܢܳܫ ܢܺܐܒܰܕ܇ ܐܶܠܳܐ ܟܽܠ ܐ̱ܢܳܫ ܠܰܬܝܳܒܽܘܬܳܐ ܢܺܐܬܶܐ.
10- ܐܳܬܶܐ ܕܶܝܢ ܝܰܘܡܶܗ ܕܡܳܪܝܳܐ܁ ܐܰܝܟ ܓܰܢܳܒܳܐ܆ ܗܰܘ ܕܒܶܗ ܫܡܰܝ̈ܳܐ ܡܶܢ ܫܶܠܝ ܥܳܒܪܺܝܢ. ܐܶܣܛܽܘ̈ܟܣܶܐ ܕܶܝܢ ܟܰܕ ܝܳܩܕܺܝܢ܁ ܢܶܫܬܪܽܘܢ. ܘܰܐܪܥܳܐ ܘܰܥ̈ܒܳܕܶܐ ܕܒܳܗ̇. ܠܳܐ ܬܶܫܬܟܰܚ܀
11- ܟܰܕ ܗܳܟܺܝܠ ܗܳܠܶܝܢ ܟܽܠܗܽܘܢ ܡܶܫܬܪܶܝܢ܆ ܕܰܐܝܟ ܐܰܝܠܶܝܢ ܙܳܕܶܩ ܠܟܽܘܢ ܕܬܶܗܘܽܘܢ܁ ܒܗܽܘܦܳܟܰܝ̈ܟܽܘܢ ܩܰܕܺܝ̈ܫܶܐ ܘܰܒܕܶܚܠܰܬ ܐܰܠܳܗܳܐ܇
12- ܟܰܕ ܡܣܰܟܶܝܢ ܐܢ̱ܬܽܘܢ ܘܰܡܣܰܘܚܺܝܢ ܐܢ̱ܬܽܘܢ ܠܡܶܐܬܺܝܬܶܗ ܕܝܰܘܡܶܗ ܕܡܳܪܝܳܐ܇ ܗܰܘ ܕܒܶܗ ܫܡܰܝܳܐ܁ ܟܰܕ ܡܶܬܒܰܚܪܺܝܢ ܒܢܽܘܪܳܐ. ܢܶܫܬܪܽܘܢ܆ ܘܶܐܣܛܽܘ̈ܟܣܶܐ܁ ܟܰܕ ܝܳܩܕܺܝܢ. ܢܫܽܘܚܽܘܢ.
13- ܫܡܰܝ̈ܳܐ ܕܶܝܢ ܚܰܕ̱̈ܬܶܐ ܘܰܐܪܥܳܐ ܚܕܰܬܳܐ܆ ܐܰܝܟ ܡܽܘܠܟܳܢܳܐ ܕܺܝܠܶܗ. ܡܣܰܟܶܝܢܰܢ܇ ܗܳܠܶܝܢ ܕܰܒܗܽܘܢ ܙܰܕܺܝܩܽܘܬܳܐ ܓܳܡܪܳܐ܀
14- ܡܶܛܽܠ ܗܳܢܳܐ ܚܰܒܺܝ̈ܒܰܝ܆ ܟܰܕ ܠܗܳܠܶܝܢ ܡܣܰܟܶܝܢ ܐܢ̱ܬܽܘܢ܆ ܝܺܨܰܦܘ ܕܰܕܠܳܐ ܟܽܘܬܡܳܐ ܘܰܕܠܳܐ ܡܽܘܡܳܐ܇ ܠܶܗ ܬܶܫܬܰܟܚܽܘܢ ܒܰܫܠܳܡܳܐ.
15- ܘܰܠܡܰܓܪܰܬ ܪܽܘܚܶܗ ܕܡܳܪܝܳܐ܁ ܦܽܘܪܩܳܢܳܐ ܬܶܚܫܒܽܘܢ܇ ܐܰܝܟܰܢܳܐ ܕܳܐܦ ܐܰܚܽܘܢ ܚܰܒܺܝܒܳܐ ܦܰܘܠܳܘܣ܇ ܕܰܐܝܟ ܚܶܟܡܬܳܐ ܕܶܐܬܚܰܫܒܰܬ ܠܶܗ. ܟܬܰܒ ܠܟܽܘܢ܇
16- ܐܰܝܟܰܢܳܐ ܕܰܒܟܽܠܗܶܝܢ ܐܶܓܪ̈ܳܬܶܗ ܡܰܠܶܠ ܒܗܶܝܢ ܥܰܠ ܗܳܠܶܝܢ. ܐܰܝܠܶܝܢ ܕܺܐܝܬ ܒܗܶܝܢ ܡܶܕܶܡ ܕܰܥܣܶܩ ܠܣܽܘܟܳܠܳܐ. ܗܳܠܶܝܢ ܕܰܐܝܠܶܝܢ ܕܰܕܠܳܐ ܝܽܘܠܦܳܢܳܐ ܐܶܢܽܘܢ ܘܠܳܐ ܣܡܺܝܟܺܝܢ܆ ܡܥܰܩܡܺܝܢ ܠܗܶܝܢ܇ ܐܰܝܟ ܕܳܐܦ ܠܗܳܠܶܝܢ ܟܬܳܒ̈ܶܐ ܕܫܰܪܟܳܐ. ܠܘܳܬ ܐܰܒܕܳܢܳܐ ܕܺܝܠܗܽܘܢ܀
17- ܐܰܢ̱ܬܽܘܢ ܗܳܟܺܝܠ ܚܰܒܺܝ̈ܒܰܝ܆ ܟܰܕ ܡܩܰܕܡܺܝܢ ܐܢ̱ܬܽܘܢ ܝܳܕܥܺܝܢ܁ ܛܰܪܘ ܢܰܦܫܟܽܘܢ܆ ܕܕܰܠܡܳܐ ܟܰܕ ܐܳܙܺܠ̱ܝܢ ܐܢ̱ܬܽܘܢ ܒܳܬܰܪ ܛܳܥܝܽܘܬܳܐ܆ ܬܶܦܠܽܘܢ ܡܶܢ ܣܳܡܟܳܐ ܕܺܝܠܟܽܘܢ.
18- ܗܘܰܝܬܽܘܢ ܕܶܝܢ ܡܶܬܪܰܒܶܝܢ ܒܛܰܝܒܽܘܬܳܐ܆ ܘܒܺܝܕܰܥܬܳܐ ܕܡܳܪܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܁ ܘܕܰܐܠܳܗܳܐ ܐܰܒܳܐ܇ ܕܠܶܗ ܬܶܫܒܽܘܚܬܳܐ ܐܳܦ ܗܳܫܳܐ ܘܰܒܟܽܠܙܒܰܢ ܘܰܠܝܰܘ̈ܡܰܝ ܥܳܠܡܳܐ. ܐܰܡܺܝܢ܀