Jude 1
Epistle of Jude
܀ ܐܓܪܬܐ ܕܝܗܘܕܐ ܐ ܀
1- ܝܺܗܽܘܕܳܐ ܥܰܒܕܳܐ ܕܝܶܫܽܘܥ ܡܫܺܝܚܳܐ܇ ܐܰܚܳܐ ܕܶܝܢ ܕܝܰܥܩܽܘܒ܆ ܠܥܰܡ̱̈ܡܶܐ ܩܪ̈ܰܝܳܐ ܕܒܰܐܠܳܗܳܐ ܐܰܒܳܐ ܪܚܺܝܡܺܝܢ܇ ܘܰܒܝܶܫܽܘܥ ܡܫܺܝܚܳܐ ܢܛܺܝܪܺܝܢ.
2- ܪ̈ܰܚܡܶܐ ܘܰܫܠܳܡܳܐ ܘܚܽܘܒܳܐ ܢܶܣܓܶܐ ܠܟܽܘܢ܀
3- ܚܰܒܺܝ̈ܒܰܝ܆ ܟܰܕ ܟܽܠܳܗ̇ ܝܰܨܺܝܦܽܘܬܳܐ ܥܳܒܶܕ ܐ̱ܢܳܐ ܠܡܶܟܬܰܒ ܠܟܽܘܢ܁ ܥܰܠ ܚܰܝ̈ܶܐ ܕܺܝܠܰܢ ܕܓܰܘܳܐ܆ ܐܰܢܰܢܩܺܐ ܐܺܝܬ ܠܺܝ ܠܡܶܟܬܰܒ ܠܟܽܘܢ܇ ܟܰܕ ܡܦܺܝܣ ܐ̱ܢܳܐ܆ ܕܰܐܓܽܘܢܳܐ ܬܶܥܒܕܽܘܢ ܚܠܳܦ ܗܰܝܡܳܢܽܘܬܳܐ܇ ܐܰܝܕܳܐ ܕܰܚܕܳܐ ܙܒܰܢ ܐܶܫܬܰܠܡܰܬ ܠܩܰܕܺܝ̈ܫܶܐ.
4- ܩܢܰܘ ܓܶܝܪ ܐ̱ܢܳܫܺܝ̈ܢ ܡܰܥܠܳܢܽܘܬܳܐ܇ ܐܰܝܠܶܝܢ ܕܡܶܢ ܫܽܘܪܳܝܳܐ ܩܰܕܶܡܘ ܐܶܬܟܬܶܒܘ ܒܚܽܘܝܳܒܳܐ ܗܳܢܳܐ. ܐ̱ܢܳܫ̈ܳܐ ܪ̈ܰܫܺܝܥܶܐ. ܕܰܠܛܰܝܒܽܘܬܶܗ ܕܰܐܠܳܗܰܢ ܡܰܗܦܟܺܝܢ ܠܛܰܢܦܽܘܬܳܐ. ܘܰܒܗܰܘ ܕܺܐܝܬܰܘܗ̱ܝ ܒܰܠܚܽܘܕܰܘܗ̱ܝ ܡܳܪܳܐ ܐܰܠܳܗܳܐ ܘܡܳܪܰܢ ܝܶܫܽܘܥ ܡܫܺܝܚܳܐ. ܟܳܦܪܺܝܢ܀
5- ܠܡܰܥ̱ܗܳܕܽܘܬܟܽܘܢ ܕܶܝܢ ܨܳܒܶܐ ܐ̱ܢܳܐ܇ ܟܰܕ ܝܳܕܥܺܝܢ ܐܢ̱ܬܽܘܢ ܟܽܠܟܽܘܢ܆ ܕܰܐܠܳܗܳܐ ܟܰܕ ܚܕܳܐ ܙܒܰܢ ܠܥܰܡܳܐ ܡܶܢ ܡܶܨܪܶܝܢ ܦܪܰܩ܆ ܗܳܝ ܕܬܰܪܬܶܝܢ ܠܰܐܝܠܶܝܢ ܕܠܳܐ ܗܰܝܡܶܢܘ ܐܰܘܒܶܕ.
6- ܘܰܠܡ̈ܰܠܰܐܟܶܐ ܐܰܝܠܶܝܢ ܕܠܳܐ ܢܛܰܪܘ ܪܺܝܫܳܢܽܘܬܗܽܘܢ܇ ܐܶܠܳܐ ܫܒܰܩܘ ܥܽܘܡܪܳܐ ܕܺܝܠܗܽܘܢ܆ ܠܕܺܝܢܳܐ ܕܝܰܘܡܳܐ ܪܰܒܳܐ܁ ܒܰܐܣܽܘܪ̈ܶܐ ܠܳܐ ܝܺܕܺܝ̈ܥܶܐ܁ ܬܚܶܝܬ ܥܰܡܛܳܢܳܐ ܢܳܛܰܪ.
7- ܐܰܝܟܰܢܳܐ ܕܰܣܕܽܘܡ ܘܥܳܡܽܘܪܳܐ ܘܰܡܕܺܝ̈ܢܳܬܳܐ ܕܰܚܕܳܪ̈ܰܝܗܶܝܢ܇ ܕܒܳܗ̇ ܒܰܕܡܽܘܬܳܐ ܕܗܳܠܶܝܢ ܙܰܢܺܝ̈ ܘܶܐܙܰܠ ܒܳܬܰܪ ܒܶܣܪܳܐ ܐ̱ܚܪܺܢܳܐ܆ ܣܺܝ̈ܡܳܢ ܬܚܶܝܬ ܕܢܽܘܪܳܐ ܕܰܠܥܳܠܰܡ܁ ܟܰܕ ܡܚܰܝ̈ܒܳܢ ܠܕܺܝܢܳܐ܀
8- ܒܳܗ̇ ܒܰܕܡܽܘܬܳܐ ܐܳܦ ܗܳܠܶܝܢ ܕܰܒܚܶܠܡ̈ܶܐ ܡܶܫܬܪܰܓܪܓܺܝܢ܆ ܠܒܶܣܪܳܐ ܡܰܢ ܡܛܰܢܦܺܝܢ. ܠܡܳܪܽܘܬܳܐ ܕܶܝܢ ܛܳܠܡܺܝܢ. ܘܰܠܬܶܫܒܽܘܚܬܳܐ ܡܓܰܕܦܺܝܢ.
9- ܡܺܝܟܳܐܶܝܠ ܕܶܝܢ ܪܺܝܫ ܡ̈ܰܠܰܐܟܶܐ܇ ܗܰܘ ܕܥܰܡ ܐܳܟܶܠܩܰܪܨܳܐ ܟܰܕ ܕܳܐܶܢ܁ ܡܡܰܠܶܠ ܗ̱ܘܳܐ ܡܶܛܽܠ ܦܰܓܪܶܗ ܕܡܽܘܫܶܐ܆ ܠܳܐ ܐܰܡܪܰܚ ܕܢܰܝܬܶܐ ܥܠܰܘܗ̱ܝ ܕܺܝܢܳܐ ܕܓܽܘܕܳܦܳܐ. ܐܶܠܳܐ ܐܶܡܰܪ܆ ܕܢܶܓܥܽܘܪ ܒܳܟ ܡܳܪܝܳܐ.
10- ܗܳܠܶܝܢ ܕܶܝܢ܁ ܒܰܐܝܠܶܝܢ ܕܠܳܐ ܝܳܕܥܺܝܢ. ܡܓܰܕܦܺܝܢ. ܒܰܐܝܠܶܝܢ ܕܶܝܢ ܕܰܟܝܳܢܳܐܺܝܬ ܐܰܝܟ ܚܰܝ̈ܘܳܬܳܐ ܚܰܪ̈ܫܳܬܳܐ ܡܦܳܣܺܝܢ܆ ܒܗܶܝܢ ܡܶܬܚܰܒܠܺܝܢ.
11- ܘܳܝ ܠܗܽܘܢ ܕܒܽܐܘܪܚܶܗ ܕܩܳܐܶܝܢ ܐܶܙܰܠܘ. ܘܒܳܬܰܪ ܛܳܥܝܽܘܬܶܗ ܕܒܶܠܥܰܡ ܒܰܐܓܪܳܐ ܐܶܫܬܰܪܰܚܘ. ܘܰܒܥܶܨܝܳܝܽܘܬܶܗ ܕܩܽܘܪܳܚ ܐܶܒܰܕܘ.
12- ܗܳܠܶܝܢ ܐܺܝܬܰܝܗܽܘܢ ܐܰܝܠܶܝܢ ܕܒܰܢ̈ܝܳܚܳܬܗܽܘܢ ܟܰܕ ܡܟܰܬܡܺܝܢ܁ ܡܶܬܦܰܪܦܥܺܝܢ. ܟܰܕ ܕܠܳܐ ܕܶܚܠܬܳܐ ܢܰܦܫܗܽܘܢ ܪܳܥܶܝܢ. ܥܢܳܢ̈ܶܐ ܕܠܳܐ ܡܶܛܪܳܐ ܕܡܶܢ ܪ̈ܽܘܚܶܐ ܦܳܗ̈ܝܳܢ. ܐܺܝܠܳܢ̈ܶܐ ܕܰܐܘܦܺܝ ܐܶܒܗܽܘܢ. ܕܺܐܝܬܰܝܗܽܘܢ ܕܠܳܐ ܦܺܐܪ̈ܶܐ. ܕܡܺܝܬܘ ܬܶܢܝܳܢܽܘܬ. ܘܰܣܠܶܩܘ ܡܶܢ ܥܶܩܳܪ̈ܰܝܗܽܘܢ.
13- ܓ̈ܰܠ̱ܠܶܐ ܥܰܙܺܝ̈ܙܶܐ ܕܝܰܡܳܐ܇ ܕܰܒܝܰܕ ܪܳܡܽܘܬܗܽܘܢ ܡܚܰܘܶܝܢ ܒܶܗܬܰܬܗܽܘܢ. ܟܰܘ̈ܟܒܶܐ ܡܰܛܥ̈ܝܳܢܶܐ. ܠܗܳܠܶܝܢ ܕܥܰܡܛܳܢܳܐ ܕܚܶܫܽܘܟܳܐ ܠܥܳܠܰܡ ܠܗܽܘܢ ܢܛܺܝܪ܀
14- ܐܶܬܢܰܒܺܝ ܕܶܝܢ ܐܳܦ ܠܗܳܠܶܝܢ܆ ܗܰܘ ܕܺܐܝܬܰܘܗ̱ܝ ܫܰܒܥܳܐ ܡܶܢ ܐܳܕܳܡ܁ ܚܢܽܘܟ ܟܰܕ ܐܳܡܰܪ܆ ܕܗܳܐ ܡܳܪܝܳܐ ܐܳܬܶܐ ܒܪ̈ܶܒܘܳܬܳܐ ܕܩܰܕܺܝ̈ܫܶܐ܆
15- ܕܢܶܥܒܶܕ ܕܺܝܢܳܐ ܥܰܠ ܟܽܠ܆ ܘܢܰܟܶܣ ܠܗܽܘܢ ܠܪ̈ܰܫܺܝܥܶܐ܇ ܡܶܛܽܠ ܥ̈ܒܳܕܶܐ ܐܰܝܠܶܝܢ ܕܶܐܬܬܰܪܫܰܥܘ. ܘܡܶܛܽܠ ܟܽܠܗܶܝܢ ܡ̈ܶܠܶܐ ܩܰܫ̈ܝܳܬܳܐ܁ ܐܰܝܠܶܝܢ ܕܡܰܠܶܠܘ ܚܰܛܳܝ̈ܶܐ ܪ̈ܰܫܺܝܥܶܐ.
16- ܗܳܠܶܝܢ ܐܶܢܽܘܢ ܕܡܰܪܛܢܺܝܢ ܘܥܳܕܠܺܝܢ ܒܟܽܠ ܨܒܽܘ܇ ܟܰܕ ܐܰܝܟ ܪ̈ܓܺܝܓܳܬܳܐ ܕܺܝܠܗܽܘܢ ܡܗܰܠܟܺܝܢ. ܘܦܽܘܡܗܽܘܢ ܡܡܰܠܶܠ ܓܢܺܝ̈ܚܳܬܳܐ܆ ܘܰܡܫܰܒܚܺܝܢ ܠܦܰܪ̈ܨܽܘܦܶܐ ܡܶܛܽܠ ܝܽܘܬܪ̈ܳܢܶܐ܀
17- ܐܰܢ̱ܬܽܘܢ ܕܶܝܢ ܚܰܒܺܝ̈ܒܰܝ܆ ܐܶܬܕܰܟِܪܘ ܠܡ̈ܶܠܶܐ ܐܰܝܠܶܝܢ ܕܩܰܕܶܡ̈ܝ ܐܶܬܶܐܡܰܪ̈ܝ ܡܶܢ ܫܠܺܝ̈ܚܰܘܗ̱ܝ ܕܡܳܪܰܢ ܝܶܫܽܘܥ ܡܫܺܝܚܳܐ܇
18- ܕܳܐܡܪܺܝܢ ܗ̱ܘܰܘ ܠܟܽܘܢ܆ ܕܰܒܚܰܪܬܳܐ ܕܙܰܒܢ̈ܶܐ ܢܶܗܘܽܘܢ ܐܰܝܠܶܝܢ ܕܰܡܒܰܙܚܺܝܢ܇ ܕܰܐܝܟ ܪ̈ܓܺܝܓܳܬܗܽܘܢ ܕܺܝܠܗܽܘܢ ܐܳܙܺܠ̱ܝܢ ܒܳܬܰܪ ܪܽܘܫܥܳܐ.
19- ܗܳܠܶܝܢ ܐܺܝܬܰܝܗܽܘܢ ܐܰܝܠܶܝܢ ܕܰܡܦܰܪܫܺܝܢ. ܢܰܦܫܳܢܳܝ̈ܶܐ. ܕܪܽܘܚܳܐ ܠܰܝܬ ܒܗܽܘܢ.
20- ܐܰܢ̱ܬܽܘܢ ܕܶܝܢ ܚܰܒܺܝ̈ܒܰܝ܆ ܒܗܰܝܡܳܢܽܘܬܳܐ ܕܺܝܠܟܽܘܢ ܩܰܕܺܝܫܬܳܐ܁ ܐܶܬܒܰܢܰܘ ܡܶܢ ܕܪܺܝܫ ܒܪܽܘܚܳܐ ܩܰܕܺܝܫܳܐ ܟܰܕ ܡܨܰܠܶܝܢܰܢ.
21- ܢܰܦܫܰܢ ܕܶܝܢ ܒܚܽܘܒܳܐ ܕܰܐܠܳܗܳܐ ܢܶܛܰܪ܁ ܟܰܕ ܡܣܰܟܶܝܢܰܢ ܠܰܚܢܳܢܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܇ ܠܚܰܝ̈ܶܐ ܕܺܝܠܰܢ ܕܰܠܥܳܠܰܡ.
22- ܘܰܠܡܶܢܗܽܘܢ ܡܰܢ ܡܶܢ ܢܽܘܪܳܐ ܚܛܽܘܦܘ.
23- ܟܰܕ ܕܶܝܢ ܡܶܬܬܘܶܝܢ܁ ܪܰܚܶܡܘ ܥܠܰܝܗܽܘܢ ܒܕܶܚܠܬܳܐ܇ ܟܰܕ ܣܳܢܶܝܢ ܐܢ̱ܬܽܘܢ ܐܳܦ ܠܟܽܘܬܺܝܢܳܐ ܕܡܶܢ ܒܶܣܪܳܐ ܕܰܡܟܰܬܡܳܐ܀
24- ܠܗܰܘ ܕܶܝܢ ܕܡܶܫܟܰܚ ܕܰܢܢܰܛܰܪܟܽܘܢ ܠܰܢ ܕܠܳܐ ܫܽܘܪܰܥܬܳܐ ܘܰܕܠܳܐ ܟܽܘܬܡܳܐ܇ ܘܰܢܩܽܘܡ ܕܠܳܐ ܡܽܘܡܳܐ܇
25- ܒܰܠܚܽܘܕܰܘܗ̱ܝ ܐܰܠܳܗܳܐ ܦܳܪܽܘܩܰܢ܁ ܒܝܰܕ ܝܶܫܽܘܥ ܡܫܺܝܚܳܐ ܡܳܪܰܢ܇ ܩܕܳܡ ܬܶܫܒܽܘܚܬܶܗ ܒܚܰܕܽܘܬܳܐ܆ ܠܶܗ ܫܽܘܒܚܳܐ ܘܽܐܘܚܕܳܢܳܐ ܘܺܐܝܩܳܪܳܐ ܘܪܰܒܽܘܬܳܐ܁ ܐܳܦ ܗܳܫܳܐ ܘܰܒܟܽܠܗܽܘܢ ܥܳܠܡ̈ܶܐ ܠܥܳܠܰܡ ܥܳܠܡܺܝܢ. ܐܰܡܺܝܢ܀