3 John 1
Third Epistle of John
܀ ܐܓܪܬܐ ܕܬܠܬ ܕܝܘܚܢܢ ܐ ܀
1- ܩܰܫܺܝܫܳܐ܁ ܠܓܰܐܺܝܳܘܣ ܚܰܒܺܝܒ܆ ܠܗܰܘ ܕܳܐܦ ܕܶܐܢܳܐ ܡܰܚܶܒ ܐ̱ܢܳܐ ܒܰܫܪܳܪܳܐ܀
2- ܚܰܒܺܝܒܝ܆ ܒܟܽܠ ܡܶܕܶܡ ܡܨܰܠܶܐ ܐ̱ܢܳܐ ܥܠܰܝܟ܆ ܕܬܶܨܠܰܚ ܘܬܶܗܘܶܐ ܚܠܺܝܡ܇ ܐܰܝܟ ܡܳܐ ܕܡܰܨܠܚܳܐ ܢܰܦܫܳܟ.
3- ܚܕܺܝܬ ܓܶܝܪ ܣܰܓܺܝ܆ ܕܳܐܬܶܝܢ ܐܰܚ̈ܶܐ ܘܣܳܗܕܺܝܢ ܥܰܠ ܫܪܳܪܳܟ܇ ܐܰܝܟ ܡܳܐ ܕܰܐܢ̱ܬ ܒܰܫܪܳܪܳܐ ܡܗܰܠܶܟ ܐܰܢ̱ܬ.
4- ܕܪܰܒܳܐ ܡܶܢ ܗܳܕܶܐ ܚܰܕܽܘܬܳܐ܁ ܠܰܝܬ ܠܺܝ܆ ܕܶܐܫܡܰܥ ܕܰܒܢܰܝ̈ܳܐ ܕܺܝܠܝ ܒܰܫܪܳܪܳܐ ܡܗܰܠܟܺܝܢ܀
5- ܚܰܒܺܝܒܰܢ܆ ܒܗܰܝܡܳܢܽܘܬܳܐ ܥܳܒܶܕ ܐܰܢ̱ܬ ܗܰܘ ܡܶܕܶܡ ܕܣܳܥܰܪ ܐܰܢ̱ܬ ܠܘܳܬ ܐܰܚ̈ܶܐ܇ ܘܝܰܬܺܝܪܳܐܺܝܬ ܕܺܐܝܬܰܝܗܽܘܢ ܐܰܟܣ̈ܢܳܝܶܐ܇
6- ܐܰܝܠܶܝܢ ܕܰܐܣܗܶܕܘ ܥܰܠ ܚܽܘܒܳܟ ܩܕܳܡ ܟܽܠܳܗ̇ ܥܺܕܬܳܐ. ܠܗܳܢܽܘܢ ܕܫܰܦܺܝܪ ܥܳܒܶܕ ܐܰܢ̱ܬ܆ ܕܡܰܥܗܶܕ ܐܰܢ̱ܬ ܠܗܽܘܢ܇ ܐܰܝܟ ܡܳܐ ܕܰܦܐܶܐ ܠܰܐܠܳܗܳܐ.
7- ܚܠܳܦ ܓܶܝܪ ܫܡܶܗ܁ ܢܦܰܩܘ܇ ܟܰܕ ܡܶܕܶܡ ܠܳܐ ܢܣܰܒܘ ܡܶܢ ܥܰܡ̱̈ܡܶܐ.
8- ܚܢܰܢ ܗܳܟܺܝܠ ܚܰܝܳܒܺܝܢܰܢ ܠܰܡܩܰܒܳܠܽܘ ܠܕܰܐܝܟ ܗܳܠܶܝܢ܆ ܕܰܡܥܰܕܪ̈ܳܢܶܐ ܢܶܗܘܶܐ ܠܰܫܪܳܪܳܐ܀
9- ܒܳܥܶܐ ܗ̱ܘܺܝܬ ܕܶܐܟܬܽܘܒ ܠܥܺܕܬܳܐ. ܐܶܠܳܐ ܗܰܘ ܕܪܳܚܶܡ ܕܢܶܗܘܶܐ ܩܰܕܡܳܝܳܐ ܕܺܝܠܗܽܘܢ܁ ܕܺܝܳܘܛܪܶܦܺܝܣ܆ ܠܳܐ ܡܩܰܒܶܠ ܠܰܢ.
10- ܡܶܛܽܠ ܗܳܢܳܐ ܐܶܢ ܗܽܘ ܕܺܐܬܶܐ܆ ܐܶܥ̱ܗܰܕ ܥ̈ܒܳܕܰܘܗ̱ܝ ܗܳܢܽܘܢ ܕܰܥܒܰܕ܇ ܕܰܒܡ̈ܶܠܶܐ ܒܺܝ̈ܫܳܬܳܐ ܣܳܬܰܪ ܠܰܢ. ܘܟܰܕ ܠܳܐ ܣܦܰܩ ܠܶܗ ܗܳܠܶܝܢ܆ ܠܳܐ ܗܽܘ ܡܩܰܒܶܠ ܠܰܐܚ̈ܶܐ܆ ܘܠܰܐܝܠܶܝܢ ܕܰܡܩܰܒܠܺܝܢ܁ ܟܳܠܶܐ ܘܡܰܦܶܩ ܡܶܢ ܥܺܕܬܳܐ܀
11- ܚܰܒܺܝܒܰܢ܆ ܠܳܐ ܬܶܬܕܰܡܶܐ ܒܒܺܝܫܬܳܐ܁ ܐܶܠܳܐ ܒܛܳܒܬܳܐ. ܗܰܘ ܕܥܳܒܶܕ ܛܳܒܬܳܐ܆ ܡܶܢ ܐܰܠܳܗܳܐ ܐܺܝܬܰܘܗ̱ܝ. ܗܰܘ ܕܥܳܒܶܕ ܒܺܝܫܬܳܐ܆ ܠܳܐ ܚܙܳܝܗ̱ܝ ܠܰܐܠܳܗܳܐ.
12- ܥܰܠ ܕܺܡܺܝܛܪܺܝܳܘܣ܁ ܐܺܝܬܽ ܗ̱ܘ ܣܳܗܕܽܘܬܳܐ ܡܶܢ ܟܽܠܢܳܫ܁ ܘܡܶܢܳܗ̇ ܕܥܺܕܬܳܐ ܘܡܶܢܶܗ ܕܰܫܪܳܪܳܐ. ܐܳܦ ܚܢܰܢ ܕܶܝܢ ܣܳܗܕܺܝܢܰܢ܆ ܘܝܳܕܰܥ ܐܰܢ̱ܬ ܣܳܗܕܽܘܬܳܐ ܕܺܝܠܰܢ ܫܰܪܺܝܪܳܐ ܗ̱ܝ܀
13- ܣܰܓܺܝ̈ܳܐܬܳܐ ܐܺܝܬ ܗ̱ܘܳܐ ܠܺܝ ܠܡܶܟܬܰܒ ܠܳܟ܆ ܐܶܠܳܐ ܠܳܐ ܒܳܥܶܐ ܐ̱ܢܳܐ ܕܰܒܝܰܕ ܕܝܽܘܬܳܐ ܘܩܰܢܝܳܐ ܐܶܟܬܽܘܒ ܠܳܟ.
14- ܡܣܰܒܰܪ ܐ̱ܢܳܐ ܕܶܝܢ܆ ܕܒܰܥܓܰܠ ܐܶܚܙܶܝܟ܇ ܘܦܽܘܡܳܐ ܠܘܳܬ ܦܽܘܡܳܐ ܢܡܰܠܶܠ܀
15- ܫܠܳܡܳܐ ܢܶܗܘܶܐ ܥܰܡܳܟ. ܫܳܐܠܺܝܢ ܫܠܳܡܳܟ ܪ̈ܳܚܡܶܐ. ܫܰܐܠ ܫܠܳܡܳܐ ܕܪ̈ܳܚܡܶܐ ܕܟܽܠܢܳܫ ܒܰܫܡܶܗ܀