Baruch ben Neriah 3
The Letter of Baruch ben Neriah
܀ ܒܪܘܟ ܒܪ ܢܪܝܐ ܓ ܀
1 ܘܗܳܫܳܐ ܐܰܚܰܝ̈ ܡܰܘܕܰܥ ܐ̱ܢܳܐ ܠܟܽܘܢ. ܕܟܰܕ ܚܰܕܪܽܘܗ̇ ܒܥܶܠܕܒܳܒ̈ܶܐ ܠܰܡܕܺܝܢ̱ܬܳܐ: ܐܶܫܬܰܕܰܪܘ ܡܰܠܰܐܟ̈ܶܐ ܕܰܡܪܰܝܡܳܐ: ܘܣܰܚܶܦܘ ܚܶܣܢܰܘ̈ܗ̱ܝ ܕܫܽܘܪܳܐ ܥܰܫܺܝܢܳܐ. ܘܰܗܓܰܡܘ ܙܳܘ̈ܝܳܬܳܐ ܥܰܫܺܝ̈ܢܳܬܳܐ ܕܦܰܪܙܠܳܐ: ܗܳܠܶܝܢ ܕܠܳܐ ܡܶܫܟ̈ܚܳܢ ܗ̱ܘܰܝ̈ ܕܢܶܬܥܰܩܪ̈ܳܢ.
2 ܒܪܰܡ ܕܶܝܢ ܡܳܐܢ̈ܶܐ ܡܶܢ ܡܳܐܢ̈ܶܐ ܕܩܽܘܕܫܳܐ ܛܰܫܺܝܘ: ܐܰܝܟ ܕܠܳܐ ܢܶܣܬܰܝܒܽܘܢ ܡܶܢ ܒܥܶܠܕܒܳܒ̈ܶܐ.
3 ܟܰܕ ܥܒܰܕܘ ܗܳܠܶܝܢ: ܗܳܝܕܶܝܢ ܐܰܫܠܶܡܘ ܠܗܽܘܢ ܠܰܒܥܶܠܕܒܳܒ̈ܶܐ: ܫܽܘܪܳܐ ܟܰܕ ܣܚܺܝܦ. ܘܒܰܝܬܳܐ ܟܰܕ ܒܙܺܝܙ. ܘܗܰܝܟܠܳܐ ܟܰܕ ܡܰܘܩܰܕ. ܘܥܰܡܳܐ ܕܶܐܙܕܟܺܝ ܡܶܛܽܠ ܕܶܐܫܬܠܶܡ. ܕܠܳܐ ܢܶܗܘܽܘܢ ܡܶܫܬܰܒܗܪܺܝܢ ܒܥܶܠܕܒܳܒ̈ܶܐ ܘܳܐܡܪܺܝܢ: ܕܗܳܟܰܢܳܐ ܐܶܬܡܨܶܝܢ ܒܚܰܝܠܳܐ: ܥܕܰܡܳܐ ܕܳܐܦ ܠܒܰܝܬܶܗ ܕܰܡܪܰܝܡܳܐ ܢܰܚܪܶܒ ܒܰܩܪܳܒܳܐ.
4 ܘܳܐܦ ܠܰܐܚܰܝ̈ܗܽܘܢ ܦܟܰܪܘ ܘܰܐܘܒܶܠܘ ܠܒܳܒܶܠ. ܘܰܐܥܡܰܪܘ ܐܶܢܽܘܢ ܬܰܡܳܢ.
5 ܘܶܐܫܬܚܰܪܢ ܚܢܰܢ ܗܳܪܟܳܐ ܩܰܠܺܝܠ ܙܥܽܘܖ̈ܶܐ.
6 ܗܳܕܳܐ ܗ̱ܝ ܥܳܩܬܳܐ ܕܟܶܬܒܶܬ ܠܟܽܘܢ ܥܠܶܝܗ̇.
7 ܫܰܪܺܝܪܳܐܺܝܬ ܓܶܝܪ ܝܳܕܰܥ ܐ̱ܢܳܐ: ܕܰܡܒܰܝܰܐ ܗ̱ܘܳܐ ܠܟܽܘܢ ܥܽܘܡܪܳܗ̇ ܕܨܶܗܝܽܘܢ: ܟܡܳܐ ܕܝܳܕܥܺܝܢ ܗ̱ܘܰܝܬܽܘܢ ܕܡܰܨܠܚܳܐ ܗ̱ܘܳܬ: ܝܰܬܺܝܪ ܡܶܢ ܥܳܩܬܳܐ ܕܰܡܥܳܩܺܝܢ ܗ̱ܘܰܝܬܽܘܢ ܕܰܐܪܚܶܩܬܽܘܢ ܡܶܢܳܗ̇.