Habakkuk 1
The Book of Habakkuk
܀ ܚܒܩܘܩ ܐ ܀
1 ܚܶܙܘܳܐ ܕܰܚ̣ܙܳܐ ܚܰܒܩܽܘܩ ܢܒܺܝܳܐ.
2 ܥܕܰܡܳܐ ܠܶܐܡܰܬܝ ܡܳܪܝܳܐ ܓܳܥܶܐ ܐ̱ܢܳܐ ܘܠܳܐ ܫܳܡܰܥ ܐܰܢ̱ܬ: ܘܩܳܥܳܐ ܐ̱ܢܳܐ ܠܘܳܬܳܟ ܥܰܠ ܚܳܛܽܘ̈ܦܶܐ ܘܠܳܐ ܡܦܰܨܶܐ ܐܰܢ̱ܬ.
3 ܠܡܳܢܳܐ ܚܰܘܺܝܬܳܢܝ ܥܰܘܠܳܐ ܘܥܶܬܳܐ: ܘܚܳܙܶܐ ܐ̱ܢܳܐ ܚܛܽܘܦܝܳܐ ܘܒܺܝܫܬܳܐ: ܩܕܳܡܝ ܗܘܳܐ ܕܺܝܢܳܐ: ܘܕܰܝܳܢܳܐ ܩܰܒܶܠ ܫܽܘܚܕܳܐ.
4 ܡܶܛܽܠ ܗܳܢܳܐ ܦܳܓ ܢܳܡܽܘܣܳܐ: ܘܠܳܐ ܢ̣ܦܰܩ ܕܺܝܢܳܐ ܒܙܰܕܺܝܩܳܐ: ܘܰܢ̣ܦܰܩ ܕܺܝܢܳܐ ܕܒܰܪ ܒܺܝܫ ܒܺܝܫ ܠܙܰܕܺܝܩܳܐ: ܘܰܢ̣ܦܰܩ ܕܺܝܢܳܐ ܟܰܕ ܡܥܰܩܰܡ.
5 ܚܙܰܘ ܡܰܖ̈ܳܚܶܐ: ܘܚܽܘܪܘ ܘܶܐܬܕܰܡܰܪܘ: ܘܰܬܡܰܗܘ: ܡܶܛܽܠ ܕܰܥܒܳܕܳܐ ܥܳܒܶܕ ܐ̱ܢܳܐ ܒܝܰܘܡܰܝ̈ܟܽܘܢ: ܘܠܳܐ ܡܗܰܝܡܢܺܝܢ ܐܢ̱ܬܽܘܢ ܐܶܢ ܐ̱ܢܳܫ ܡܶܫܬܰܥܶܐ ܠܟܽܘܢ.
6 ܡܶܛܽܠ ܕܗܳܐ ܐܶܢܳܐ ܡܩܺܝܡ ܐ̱ܢܳܐ ܠܟܰܠܕܳܝ̈ܶܐ: ܥܰܡܳܐ ܡܰܪܳܚܳܐ ܘܡܰܪܺܝܪܳܐ: ܕܳܐܙܶܠ ܒܰܦܬܳܝܳܗ̇ ܕܰܐܪܥܳܐ ܠܡܺܐܪܰܬ ܡܰܫܟܢ̈ܶܐ ܕܠܳܐ ܕܺܝܠܶܗ.
7 ܥܰܫܺܝܢܽ ܗ̱ܘ ܘܰܕܚܺܝܠ: ܘܕܺܝܢܶܗ ܡܶܢܶܗ: ܘܚܶܙܘܶܗ ܡܰܦܰܩ.
8 ܩܰܠܺܝܠܺܝܢ ܖ̈ܰܟܫܶܗ ܡܶܢ ܢܶܫܖ̈ܶܐ: ܘܚܰܪܺܝܦܺܝܢ ܡܶܢ ܕܺܐܒ̈ܶܐ ܕܪܰܡܫܳܐ: ܘܰܢܛܽܘܣܽܘܢ ܦܰܖ̈ܳܫܰܘܗܝ ܘܢܺܐܬܽܘܢ ܦܰܖ̈ܳܫܰܘܗܝ ܡܶܢ ܪܽܘܚܩܳܐ: ܘܰܢܛܽܘܣܽܘܢ ܐܰܝܟ ܢܶܫܪܳܐ ܕܰܟܦܶܢ ܠܡܶܐܟܽܘܠܬܳܐ.
9 ܟܽܠܗܽܘܢ ܠܰܚܛܽܘܦܝܳܐ ܐܳܬܶܝܢ: ܚܶܙܘܳܐ ܕܰܐܦܰܝ̈ܗܽܘܢ ܥܰܫܺܝܢ: ܘܟܳܢܫܺܝܢ ܫܒܺܝܬܳܐ ܐܰܝܟ ܚܳܠܳܐ.
10 ܘܗܽܘ ܒܡܰܠ̈ܟܶܐ ܡܡܰܝܶܩ: ܘܰܒܫܰܠܺܝܛܳܢ̈ܶܐ ܡܒܰܙܰܚ: ܘܥܰܠ ܟܽܠ ܟܰܖ̈ܟܺܝܢ ܓܳܚܶܟ: ܘܰܡܩܰܒܰܪ ܥܰܦܪܳܐ ܘܳܐܚܶܕ ܠܶܗ.
11 ܗܳܝܕܶܝܢ ܬܶܚܠܰܦ ܪܽܘܚܶܗ ܘܬܶܥܒܰܪ: ܘܢܶܬܚܰܝܰܒ ܚܰܝܠܶܗ ܠܰܐܠܳܗܶܗ.
12 ܡܶܛܽܠ ܕܰܐܢ̱ܬ ܗ̱ܘ ܡܶܢ ܪܺܝܫܺܝܬܳܐ ܡܳܪܝܳܐ ܐܰܠܳܗܝ ܩܰܕܺܝܫܳܐ: ܕܠܳܐ ܢܳܡܽܘܣ ܐܰܢ̱ܬ ܡܳܪܝܳܐ: ܣܳܡܬܳܝܗܝ ܠܕܺܝܢܳܐ ܘܰܓܒܰܠܬܳܢܝ ܠܡܰܟܳܣܽܘܬܶܗ.
13 ܕܰܟ̈ܝܳܢ ܐܶܢܶܝܢ ܥܰܝܢܰܝ̈ܟ ܘܠܳܐ ܚܳܙ̈ܝܳܢ ܒܺܝܫܬܳܐ: ܘܠܰܡܚܳܪ ܒܥܰܘ̈ܳܠܶܐ ܠܳܐ ܡܶܫܟܰܚ ܐܰܢ̱ܬ: ܠܡܳܢܳܐ ܐܰܢ̱ܬ ܒܡܰܖ̈ܳܚܶܐ ܘܫܰܬܺܝܩ ܐܰܢ̱ܬ: ܟܰܕ ܒܳܠܰܥ ܥܰܘܳܠܳܐ ܠܙܰܕܺܝܩܳܐ.
14 ܘܰܥܒܰܕܬ ܐܶܢܽܘܢ ܠܰܒܢܰܝ̈ܢܳܫܳܐ ܐܰܝܟ ܢܽܘ̈ܢܶܐ ܕܰܒܝܰܡܳܐ: ܘܰܐܝܟ ܖ̈ܰܚܫܳܐ ܕܠܰܝܬ ܠܶܗ ܡܕܰܒܪܳܢܳܐ.
15 ܕܟܽܠܶܗ ܒܨܶܢܳܪܬܳܐ ܣܳܠܶܩ: ܘܡܶܬܢܓܶܕ ܒܰܡܨܺܝܕܬܳܐ ܘܡܶܬܟܢܶܫ ܒܓܰܘܦܳܐ: ܘܟܰܕ ܟܢܰܫ ܚܕܺܝ ܘܕܳܨ.
16 ܘܕܰܒܰܚ ܠܰܡܨܺܝܕܬܶܗ: ܘܣܳܡ ܒܶܣ̈ܡܶܐ ܠܓܰܘܦܶܗ: ܡܶܛܽܠ ܕܰܒܗܶܝܢ ܫܶܡܢܰܬ ܡܢܳܬܶܗ ܘܡܶܐܟܽܘܠܬܶܗ ܓܒܺܝܬܳܐ.
17 ܡܶܛܽܠܗܳܢܳܐ ܫܳܕܶܐ ܡܨܺܝܕܬܶܗ ܒܟܽܠܙܒܰܢ: ܘܩܳܛܶܠ ܥܰܡ̈ܡܶܐ ܘܠܳܐ ܚܳܐܶܣ.