Habakkuk 3
The Book of Habakkuk
܀ ܚܒܩܘܩ ܓ ܀
1 ܡܳܪܝܳܐ ܫܶܡܥܶܬ ܫܡܳܟ ܘܕܶܚܠܶܬ.
2 ܡܳܪܝܳܐ ܥܒܳܕܰܝ̈ܟ ܒܓܘ ܫܢܰܝ̈ܳܐ ܕܚܰܝ̈ܶܐ: ܒܓܰܘ ܫܢܰܝ̈ܳܐ ܬܶܬܺܝܕܰܥ: ܒܪܽܘܓܙܳܐ ܖ̈ܰܚܡܰܝܟ ܐܶܬܕܰܟܪ.
3 ܐܰܠܳܗܳܐ ܡܶܢ ܬܰܝܡܢܳܐ ܐܶܬܳܐ: ܘܩܰܕܺܝܫܳܐ ܡܶܢ ܛܽܘܪܳܐ ܕܦܳܪܳܢ: ܐܶܬܟܰܣܺܝܘ ܫܡܰܝܳܐ ܡܶܢ ܙܺܝܘܶܗ ܕܰܡܫܰܒܚܳܐ: ܘܬܶܫܒܽܘܚܬܶܗ ܐܶܬܡܰܠܝܰܬ ܐܰܪܥܳܐ.
4 ܘܙܰܗܪܶܗ ܐܰܝܟ ܢܽܘܗܪܳܐ ܢܶܗܘܶܐ: ܒܰܩܪܺܝܬܳܐ ܕܺܐܝܕܰܘ̈ܗܝ ܢܣܺܝܡ ܥܽܘܫܢܶܗ ܒܠܰܩܚܳܐ.
5 ܩܕܳܡܰܘܗܝ ܐܳܙܶܠ ܡܰܘܬܳܐ: ܘܢܳܦܩܳܐ ܛܰܝܪܳܐ ܠܪܶܓܠܶܗ.
6 ܩܳܡ ܘܡܰܫܚܳܗ̇ ܠܰܐܪܥܳܐ: ܚܳܪ ܘܰܕܓܰܠܘ ܥܰܡ̈ܡܶܐ: ܐܶܬܒܰܕܰܪܘ ܛܽܘܖ̈ܶܐ ܕܡܶܢ ܥܳܠܰܡ: ܘܶܐܬܡܰܟܰܟ ܖ̈ܳܡܳܬܳܐ ܕܡܶܢ ܥܳܠܡܺܝܢ: ܕܺܝܠܶܗ ܐܶܢܶܝܢ ܗܶܠ̈ܟܳܬܳܐ ܕܡܶܢ ܥܳܠܰܡ.
7 ܬܚܶܝܬ ܐܽܘܢ ܚܙܺܝ݀ܬ ܡܰܫܟܢܳܐ ܕܟܽܘܫܳܢ: ܢܙܽܘ̈ܥܳܢ ܝܳܖ̈ܺܝܥܳܬܳܐ ܕܰܐܪܥܳܐ ܕܡܶܕܝܰܢ.
8 ܥܰܠ ܢܰܗܖ̈ܰܘܳܬܳܐ ܪܓܶܙ ܡܳܪܝܳܐ: ܒܢܰܗܖ̈ܰܘܳܬܳܐ ܪܽܘܓܙܳܟ: ܘܰܒܝܰܡܳܐ ܚܺܐܦܳܟ: ܪܟܶܒܬ ܥܰܠ ܪܰܟܫܳܟ ܘܥܰܠ ܡܰܪܟܰܒܬܳܐ ܕܦܽܘܪܩܳܢܳܟ.
9 ܡܶܬܬܥܳܪܽܘ ܬܶܬܥܺܝܪ ܩܶܫܬܳܟ: ܘܢܶܣܒܥܽܘܢ ܓܶܐܖ̈ܶܐ ܒܡܺܐܡܪܳܟ ܡܫܰܒܚܳܐ: ܘܰܐܪܥܳܐ ܒܢܰܗܖ̈ܰܘܳܬܳܐ ܬܶܬܚܰܪܰܬܝ.
10 ܚܙܰܐܽܘܟ ܛܽܘܖ̈ܶܐ ܘܙܳܥܳܘ: ܘܙܳܪܺܝܦܬܳܐ ܕܡܰܝ̈ܳܐ ܥܶܒܪܰܬ: ܘܰܐܪܺܝܡ ܬܗܽܘܡܳܐ ܩܳܠܶܗ: ܘܪܰܘܡܳܐ ܕܺܐܝܕܰܘ̈ܗܝ ܫܩܰܠܘ
11 ܫܶܡܫܳܐ ܘܣܰܗܪܳܐ ܩܳܡܘ ܒܡܶܕܝܳܖ̈ܰܝܗܽܘܢ: ܘܰܒܢܽܘܗܪܳܐ ܕܓܶܐܖ̈ܰܝܟ ܡܗܰܠܟܺܝܢ: ܘܰܒܙܰܗܪܳܐ ܕܒܰܖ̈ܩܶܐ ܕܢܰܝ̈ܙܟܰܝܟ.
12 ܒܚܶܡܬܳܟ ܬܶܕܪܽܘܟ ܥܰܠ ܐܰܪܥܳܐ: ܘܰܒܪܽܘܓܙܳܟ ܬܕܽܘܫ ܥܰܡ̈ܡܶܐ.
13 ܢܦܰܩܬ ܠܡܶܦܪܰܩ ܠܥܰܡܳܟ: ܘܰܠܡܶܦܪܰܩ ܠܰܡܫܺܝܚܳܟ: ܦܣܰܩܬ ܪܺܝܫܐ ܡܶܢ ܒܰܝܬܶܗ ܕܥܰܘܳܠܳܐ: ܘܰܐܫܠܰܚܬܳܝܗܝ ܡܶܢ ܫܶܬܶܐܣܰܘ̈ܗܝ ܘܰܥܕܰܡܳܐ ܠܨܰܘܪܶܗ ܠܥܳܠܡܺܝܢ.
14 ܦܰܚܶܬܬ ܒܚܽܘܛܖ̈ܰܘܗܝ ܖ̈ܺܝܫܶܐ ܕܫܰܠܺܝܛܳܢܰܘܗܝ: ܕܶܐܬܬܟܶܠܘ ܒܫܰܚܺܝܢܽܘܬܗܽܘܢ ܕܢܶܐܟܠܽܘܢ ܒܛܽܘܫܝܳܐ ܠܡܶܣܟܺܢ̈ܶܐ.
15 ܕܪܰܟܬ ܒܝܰܡܳܐ ܥܰܠ ܖ̈ܰܟܫܳܟ: ܘܟܶܢܫܳܐ ܕܡܰܝ̈ܳܐ ܣܰܓܺܝ̈ܐܶܐ.
16 ܫܶܡܥܶ݀ܬ. ܘܙܳܥܰܬ ܟܰܪܣܝ ܠܽܘܩܒܰܠ ܡܰܡܠܠܳܐ ܕܣܶܦ̈ܘܳܬܝ: ܥ̣ܰܠ ܪܬܺܝܬܳܐ ܒܓܰܖ̈ܡܰܝ: ܘܒܽܘܖ̈ܟܰܝ ܙܳܥ ܕܒܰܕܶܩ ܠܺܝ ܘܚܰܘܝܰܢܝ ܝܰܘܡܳܐ ܕܽܐܘܠܨܳܢܳܐ ܕܳܐܬܶܐ ܥܰܠ ܥܰܡܳܐ.
17 ܡܶܛܽܠ ܕܬܺܬܳܐ ܠܳܐ ܦܶܪܥܰܬ: ܘܠܰܝܬ ܛܰܖ̈ܦܶܐ ܒܰܓܦܶܬܳܐ: ܟܰܕܶܒ ܐܶܒܶܗ ܕܙܰܝܬܳܐ: ܘܶܐܕܖ̈ܶܐ ܥܒܰܕܘ ܥܒܽܘܪܳܐ: ܓܶܡܪܰܬ ܥܳܢ̈ܳܐ ܡܶܢ ܓܙܳܖ̈ܶܐ: ܘܠܰܝܬ ܬܰܘܖ̈ܶܐ ܒܒܰܩܖ̈ܶܐ.
18 ܐܶܢܳܐ ܕܶܝܢ ܒܡܳܪܝܳܐ ܐܶܕܽܘܨ: ܘܶܐܪܘܰܙ ܒܰܐܠܳܗܳܐ ܦܳܪܽܘܩܝ.
19 ܡܳܪܶܐ ܡܳܖ̈ܰܘܳܬܳܐ ܚܰܝܠܝ̱: ܕܰܥܒܰܕ ܖ̈ܶܓܠܰܝ ܐܰܝܟ ܕܰܐܝܠܳܐ: ܘܥܰܠ ܪܰܘܡܝ ܐܰܩܺܝܡܰܢܝ: ܕܶܐܙܡܰܪ ܒܬܶܫ̈ܒܚܳܬܶܗ.