Nehemiah 8
The Book of Nehemiah
܀ ܢܚܡܝܐ ܚ ܀
1 ܘܶܐܬܟܰܢܰܫܘ ܥܰܡܳܐ ܟܽܠܶܗ: ܐܰܝܟ ܚܰܕ ܓܰܒܪܳܐ: ܠܫܽܘܩܳܐ ܕܺܐܝܬ ܩܕܳܡ ܬܰܪܥܳܐ ܕܡܰܝ̈ܳܐ. ܘܳܐܡܪܺܝܢ ܠܥܰܙܪܳܐ ܣܳܦܪܳܐ: ܠܡܰܚܬܳܝܽܘ ܣܶܦܪܳܐ ܕܢܳܡܽܘܣܳܐ ܕܡܽܘܫܶܐ: ܕܰܦܩܰܕ ܡܳܪܝܳܐ ܥܰܠ ܒܢܰܝ̈ ܝܺܣܪܳܐܶܝܠ.
2 ܘܰܐܝܬܺܝ ܥܰܙܪܳܐ ܣܶܦܪܳܐ ܕܢܳܡܽܘܣܳܐ ܩܕܳܡ ܥܰܡܳܐ. ܘܶܐܬܟܰܢܰܫܘ ܥܰܡܳܐ ܡܶܢ ܓܰܒܖ̈ܶܐ ܘܰܥܕܰܡܳܐ ܠܢܶܫ̈ܶܐ: ܘܟܽܠܡܰܢ ܕܶܐܬܛܰܝܰܒ ܠܡܶܫܡܰܥ: ܒܚܰܕ ܒܝܰܪܚܳܐ ܫܒܺܝܥܳܝܳܐ.
3 ܘܰܩ̣ܪܳܐ ܣܶܦܪܳܐ ܒܫܽܘܩܳܐ ܒܬܰܪܥܳܐ ܕܡܰܝ̈ܳܐ: ܡܶܢ ܨܰܦܪܳܐ ܠܦܶܠܓܶܗ ܕܝܰܘܡܳܐ: ܩܕܳܡ ܓܰܒܖ̈ܶܐ ܘܢܶܫ̈ܶܐ: ܘܰܩܕܳܡ ܐܰܝܠܶܝܢ ܕܫܳܡܥܺܝܢ ܘܶܐܕܢܰܝ̈ܗܽܘܢ ܕܥܰܡܳܐ ܨܰܠ̈ܝܳܢ ܗ̱ܘܰܝ̈: ܘܨܳܝ̈ܬܳܢ ܠܦܽܘܩܕܳܢܳܐ ܕܢܳܡܽܘܣܳܐ.
4 ܘܩܳܡ̣ ܥܰܙܪܳܐ ܣܳܦܪܳܐ ܥܰܠ ܡܰܓܕܠܳܐ ܕܩܰܝܣܳܐ ܕܰܥܒܰܕ: ܕܢܶܗܘܶܐ ܡܡܰܠܶܠ ܥܠܰܘܗܝ. ܘܩܳܡ̣ ܠܘܳܬܶܗ ܡܰܬܺܝܬܳܐ: ܘܰܫܡܽܘܥ: ܘܚܰܢܰܢܝܳܐ: ܐܘܪܺܝܳܐ: ܘܚܶܠܰܩܝܳܐ: ܘܰܡܥܰܣܝܳܐ: ܩ̣ܳܡܘ ܡܶܢ ܝܰܡܺܝܢܶܗ ܘܡܶܢ ܣܶܡܳܠܶܗ: ܩܳܡ̣ ܦܳܪܝܳܐ: ܘܡܺܝܫܳܐܶܝܠ: ܘܰܡܠܰܟܝܳܐ: ܘܰܚܫܽܘܡ: ܘܰܚܫܰܒܝܳܐ: ܘܰܙܟܰܪܝܳܐ: ܘܡܰܫܠܰܡ.
5 ܘܰܦܬܰܚ ܥܰܙܪܳܐ ܣܳܦܪܳܐ: ܟܬܳܒܳܐ ܕܢܳܡܽܘܣܳܐ ܠܥܺܝܢ ܟܽܠܶܗ ܥܰܡܳܐ. ܘܟܰܕ ܦ̣ܬܰܚ: ܩܳܡ ܟܽܠܶܗ ܥܰܡܳܐ.
6 ܘܒܰܪܶܟ ܥܰܙܪܳܐ ܠܡܳܪܝܳܐ ܐܰܠܳܗܳܐ ܪܰܒܳܐ. ܘܰܥܢܰܘ ܟܽܠܶܗ ܥܰܡܳܐ ܘܳܐܡܪܺܝܢ: ܐܰܡܺܝܢ ܘܰܐܡܺܝܢ. ܘܟܰܕ ܐܰܪܺܝܡܘ ܐܺܝܕܰܝ̈ܗܽܘܢ: ܩܥܰܕܘ ܘܰܣܓܶܕܘ ܩܕܳܡ ܡܳܪܝܳܐ ܥܰܠ ܐܰܦܰܝ̈ܗܽܘܢ ܥܕܰܡܳܐ ܠܰܐܪܥܳܐ.
7 ܘܝܶܫܽܘܥ ܘܰܒܢܰܘ̈ܗܝ: ܘܰܣܪܰܒܝܳܐ: ܘܝܰܡܺܝܢ: ܘܰܥܩܽܘܦ: ܘܫܰܒܬܰܝ: ܘܗܽܘܕܝܳܐ: ܘܰܡܥܰܣܝܳܐ: ܘܰܩܠܰܛܝܳܐ: ܘܥܰܙܰܪܝܳܐ: ܘܝܽܘܙܳܒܳܪ: ܘܚܰܢܳܢܺܝ. ܘܰܦܢܳܝܳܐ: ܘܠܶܘ̈ܳܝܶܐ: ܡܫܰܡܫܺܝܢ ܠܥܰܡܳܐ ܒܢܳܡܽܘܣܳܐ. ܘܥܰܡܳܐ ܩܳܝܡܺܝܢ ܥܰܠ ܕܽܘܟܬܗܽܘܢ.
8 ܘܰܩ̣ܪܰܘ ܒܰܟܬܳܒܳܐ ܕܢܳܡܽܘܣܳܐ ܕܡܳܪܝܳܐ ܟܰܕ ܦܪܺܝܣ. ܘܶܐܬܛܦܺܝܣܘ ܒܶܗ: ܘܶܐܣܬܰܟܰܠܘ ܒܩܶܪܝܳܢܶܗ.
9 ܘܶܐܡܰܪ ܢܚܰܡܝܳܐ ܪܺܝܫܐ ܕܟܽܘܡܖ̈ܶܐ: ܘܥܰܙܪܳܐ ܟܽܘܡܖ̈ܶܐ ܘܣܳܦܪܳܐ: ܘܠܶܘ̈ܳܝܶܐ ܐܰܝܠܶܝܢ ܕܰܡܫܰܡܫܺܝܢ ܗ̱ܘܰܘ ܠܥܰܡܳܐ: ܐܳܡܪܺܝܢ ܠܟܽܠܶܗ ܥܰܡܳܐ: ܝܰܘܡܳܢܳܐ ܩܰܕܺܝܫ ܗ̱ܘ̣ ܩܕܳܡ ܡܳܪܝܳܐ ܐܰܠܳܗܳܟܽܘܢ. ܠܳܐ ܬܶܟܪܶܐ ܠܟܽܘܢ: ܘܠܳܐ ܬܶܒܟܽܘܢ. ܡܶܛܽܠ ܕܒܳܟܶܝܢ ܗ̱ܘܰܘ ܓܶܝܪ ܟܽܠܶܗ ܥܰܡܳܐ: ܟܰܕ ܫܳܡܥܺܝܢ ܗ̱ܘܰܘ ܟܬܳܒܳܐ ܕܢܳܡܽܘܣܳܐ.
10 ܘܶܐܡܰܪܘ ܠܗܽܘܢ: ܙܶܠܘ ܐܰܟܽܘܠܘ ܘܶܐܫܬܰܘ. ܘܫܰܕܰܪܘ ܡܶܐܟܽܘܠܬܳܐ ܠܡܰܢ ܕܠܳܐ ܡܛܰܝܒܳܐ ܠܶܗ. ܡܶܛܽܠ ܕܩܰܕܺܝܫ ܗ̱ܘ̣ ܝܰܘܡܳܢܳܐ ܩܕܳܡ ܡܳܪܝܳܐ. ܝܰܘܡܳܢܳܐ ܠܳܐ ܬܶܟܪܶܐ ܠܟܽܘܢ: ܡܶܛܽܠ ܕܝܰܘܡܰܐ ܗ̱ܘ ܕܚܰܕܽܘܬܳܐ ܕܡܳܪܝܳܐ. ܘܗܽܘ ܢܶܗܘܶܐ ܥܰܕܽܘܪܟܽܘܢ.
11 ܘܠܶܘ̈ܳܝܶܐ ܡܫܰܬܩܺܝܢ ܠܟܽܠܶܗ ܥܰܡܳܐ: ܘܳܐܡܪܺܝܢ: ܫܬܽܘܩܘ: ܡܶܛܽܠ ܕܝܰܘܡܳܢܳܐ ܡܩܰܕܰܫ ܗ̱ܘ̣: ܘܠܳܐ ܬܶܒܟܽܘܢ.
12 ܘܶܐܙܰܠܘ ܟܽܠܶܗ ܥܰܡܳܐ ܠܡܶܐܟܰܠ ܘܰܠܡܶܫܬܳܐ: ܘܠܰܡܫܰܕܳܪܽܘ ܡܶܐܟܽܘܠܬܳܐ ܠܰܐܝܠܶܝܢ ܕܠܰܝܬ ܠܗܽܘܢ: ܘܰܠܡܶܥܒܰܕ ܚܰܕܽܘܬܳܐ ܪܰܒܬܳܐ. ܘܶܐܬܛܦܺܝܣܘ ܒܡ̈ܶܠܶܐ ܐܰܝܠܶܝܢ ܕܰܐܘܕܰܥܘ ܐܶܢܽܘܢ.
13 ܘܰܒܝܰܘܡܳܐ ܕܰܬܪܶܝܢ: ܐܶܬܟܰܢܰܫܘ ܪܺܝܫܝ ܐܰܒܳܗ̈ܶܐ ܕܟܽܠܶܗ ܥܰܡܳܐ: ܘܟܽܘܡܖ̈ܶܐ ܘܠܶܘ̈ܳܝܶܐ ܠܘܳܬ ܥܰܙܪܳܐ ܣܳܦܪܳܐ: ܠܡܶܬܛܦܳܣܽܘ ܡܶܢܶܗ ܥܰܠ ܟܬܳܒܳܐ ܕܢܳܡܽܘܣܳܐ.
14 ܘܶܐܫܟܰܚܘ ܒܰܟܬܳܒܳܐ ܕܢܳܡܽܘܣܳܐ: ܕܦܰܩܶܕ ܡܳܪܝܳܐ ܠܡܽܘܫܶܐ: ܕܢܶܬܒܽܘܢ ܒܢܰܝ̈ ܝܺܣܪܳܐܶܝܠ ܒܰܡ̈ܛܰܠܠܶܐ: ܒܥܺܐܕܳܐ ܒܝܰܪܚܳܐ ܕܬܶܫܪܺܝܢ.
15 ܘܰܕܢܶܫܡܥܽܘܢ ܟܽܠܡܶܕܶܡ ܕܰܟܬܰܒ ܡܽܘܫܶܐ ܒܢܳܡܽܘܣܳܐ. ܘܰܩܪܰܘ ܟܳܖ̈ܽܘܙܶܐ ܒܟܽܠܗܶܝܢ ܩܽܘܖ̈ܺܝܗܽܘܢ ܘܒܽܐܘܪܺܫܠܶܡ ܘܳܐܡܪܺܝܢ: ܣܰܩܘ ܠܛܽܘܪܳܐ ܐܰܝܬܰܘ ܩܰܝ̈ܣܶܐ ܕܙܰܝ̈ܬܶܐ: ܘܩܰܝ̈ܣܶܐ ܕܓܰܘܙܳܐ: ܘܛܰܖ̈ܦܶܐ ܕܶܐܛܖ̈ܽܘܓܶܐ: ܘܣܰܘ̈ܟܶܐ ܕܥܰܖ̈ܒܶܐ. ܘܰܥܒܶܕܘ ܡܛܰܠ̈ܠܶܐ: ܐܰܝܟܰܢܳܐ ܕܰܟܬܺܝܒ ܒܰܟܬܳܒܳܐ ܕܢܳܡܽܘܣܳܐ ܕܡܽܘܫܶܐ.
16 ܘܰܢ̣ܦܰܩܘ ܥܰܡܳܐ: ܘܰܐܝܬܺܝܘ: ܘܰܥܒܰܕܘ ܠܗܽܘܢ ܓܒܰܪ ܓܒܰܪ ܥܰܠ ܐܶܓܳܖ̈ܰܝܗܽܘܢ ܘܰܒܕܳܖ̈ܰܝܗܽܘܢ: ܘܰܒܕܳܪܬܳܐ ܕܒܰܝܬܶܗ ܕܡܳܪܝܳܐ: ܘܰܒܫܽܘܩܳܐ ܕܬܰܪܥܳܐ ܕܡܰܝ̈ܳܐ: ܘܰܒܫܽܘܩܳܐ ܕܬܰܪܥܳܐ ܕܰܐܦܪܶܝܡ.
17 ܘܰܥܒܰܕܘ ܟܽܠܶܗ ܥܰܡܳܐ ܕܰܗܦܰܟܘ ܡܶܢ ܫܶܒܝܳܐ ܡܛܰܠ̈ܠܶܐ: ܘܺܝܬܶܒܘ ܒܰܡܛܰܠ̈ܠܶܐ ܡܶܛܽܠ ܕܠܳܐ ܥܒܰܕܘ ܒܢܰܝ̈ ܝܺܣܪܳܐܶܝܠ ܗܳܟܰܢܳܐ: ܡܶܢ ܝܰܘ̈ܡܳܬܶܗ ܕܝܶܫܽܘܥ ܒܰܪܢܽܘܢ: ܥܕܰܡܳܐ ܠܶܗ ܠܝܰܘܡܳܐ ܗܳܢܳܐ. ܘܰܗܘܳܬ ܚܰܕܽܘܬܳܐ ܪܰܒܬܳܐ ܕܛܳܒ.
18 ܘܩܳܪܶܝܢ ܗ̱ܘܰܘ ܒܰܟܬܳܒܳܐ ܕܢܳܡܽܘܣܶܗ ܕܡܽܘܫܶܐ: ܟܽܠ ܝܽܘܡ ܒܝܽܘܡ: ܡܶܢ ܝܰܘܡܳܐ ܩܰܕܡܳܝܳܐ: ܥܕܰܡܳܐ ܠܝܰܘܡܳܐ ܐ̱ܚܪܳܝܳܐ. ܘܰܥ̣ܒܰܕܘ ܥܺܐܕܳܐ ܫܰܒܥܳܐ ܝܰܘ̈ܡܺܝܢ ܘܰܒܝܰܘܡܳܐ ܕܰܬܡܳܢܝܳܐ: ܐܶܬܟܰܢܰܫܘ ܐܰܝܟܰܢܳܐ ܕܰܟܬܺܝܒ ܠܗܽܘܢ.