Nehemiah 9
The Book of Nehemiah
܀ ܢܚܡܝܐ ܛ ܀
1 ܘܰܒܝܰܘܡܳܐ ܕܰܐܪܒܥܳܐ ܘܥܶܣܪܺܝܢ ܒܶܗ ܒܝܰܪܚܳܐ ܗܳܢܳܐ: ܐܶܬܟܰܢܰܫܘ ܒܢܰܝ̈ ܝܺܣܪܳܐܶܝܠ ܒܨܰܘܡܳܐ ܘܰܒܣܰܩ̈ܶܐ. ܘܰܐܪܡܺܝܘ ܩܶܛܡܳܐ ܥܠܰܝܗܽܘܢ.
2 ܘܶܐܬܦܪܶܫ ܙܰܪܥܳܐ ܕܺܝܣܪܳܐܶܝܠ ܡܶܢ ܟܽܠܗܽܘܢ ܥܰܡ̈ܡܶܐ ܘܩ̣ܳܡܘ ܘܰܐܘܕܺܝܘ ܥܰܠ ܚܛܳܗܰܝ̈ܗܽܘܢ: ܘܥܰܠ ܚܛܳܗ̈ܶܐ ܕܰܐܒܳܗܰܝ̈ܗܽܘܢ.
3 ܘܩ̣ܳܡܘ ܥܰܠ ܕܽܘܟܬܗܽܘܢ ܘܩܳܪܶܝܢ ܗ̱ܘܰܘ ܒܰܟܬܳܒܳܐ ܕܢܳܡܽܘܣܳܐ ܕܡܳܪܝܳܐ ܐܰܠܳܗܗܽܘܢ ܪܽܘܒܥܶܗ ܕܝܰܘܡܳܐ ܩܳܪܶܝܢ: ܘܪܽܘܒܥܶܗ ܕܝܰܘܡܳܐ ܡܰܘܕܶܝܢ: ܘܣܳܓܕܺܝܢ ܩܕܳܡ ܡܳܪܝܳܐ ܐܰܠܳܗܗܽܘܢ.
4 ܘܩ̣ܳܡܘ ܪܺܝܫܐ ܥܰܠ ܠܶܘ̈ܳܝܶܐ: ܝܶܫܽܘܥ ܘܩܰܕܡܳܐܶܝܠ: ܒܰܢܺܝ: ܚܫܰܒܝܳܐ: ܘܰܫܪܰܒܝܳܐ: ܘܟܰܒܢܺܝ: ܘܗܽܘܕܳܝܳܐ: ܘܰܫܒܰܢܝܳܐ: ܘܰܦܬܰܚܝܳܐ. ܘܨܰܠܺܝܘ ܩܕܳܡ ܡܳܪܝܳܐ ܐܰܠܳܗܗܽܘܢ ܒܩܳܠܳܐ ܪܳܡܳܐ.
5 ܘܳܐܡܪܺܝܢ ܠܶܘ̈ܳܝܶܐ: ܝܶܫܽܘܥ: ܘܩܰܕܡܳܐܶܝܠ: ܒܰܢܺܝ: ܚܫܰܒܝܳܐ: ܘܰܫܪܰܒܝܳܐ: ܘܗܽܘܕܳܝܳܐ: ܘܰܫܟܰܢܝܳܐ: ܘܰܦܬܰܚܝܳܐ. ܘܩܳܡܘ ܘܒܰܪܶܟܘ ܠܡܳܪܝܳܐ ܐܰܠܳܗܗܽܘܢ: ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ: ܘܰܒܪܺܝܟ ܫܡܳܐ ܕܺܐܝܩܳܪܶܗ: ܘܰܡܪܰܡܪܰܡ ܥܰܠ ܟܽܠ ܒܶܖ̈ܝܳܬܳܐ ܒܬܶܫܒ̈ܚܳܬܳܐ.
6 ܐܰܢ̱ܬ ܗ̄ܘ ܡܳܪܝܳܐ ܒܰܠܚܽܘܕܰܝܟ: ܐܰܢ̱ܬ ܥܒܰܕܬ ܫܡܰܝܳܐ ܘܰܫܡܰܝ̈ ܫܡܰܝܳܐ: ܘܟܽܠܗܽܘܢ ܚܰܝܠܘܳܬܗܽܘܢ: ܘܰܐܪܥܳܐ ܘܟܽܠ ܡܶܕܶܡ ܕܺܐܝܬ ܥܠܶܝܗ̇: ܘܡܰܝ̈ܳܐ ܘܟܽܠܡܶܕܶܡ ܕܺܐܝܬ ܒܗܽܘܢ. ܘܰܐܢ̱ܬܝ ܗ̄ܘ̣ ܕܡܰܚܶܐ ܠܟܽܠܗܽܘܢ ܘܚܰܝܠܰܘ̈ܳܬܳܐ ܕܰܫܡܰܝܳܐ ܠܳܟ ܗ̱ܘ̣ ܣܳܓܕܺܝܢ.
7 ܐܰܢ̱ܬ ܗ̱ܘ̣ ܡܳܪܝܳܐ ܐܰܠܳܗܳܐ ܕܰܓܒܰܝܬ ܠܰܐܒܪܰܡ. ܘܰܐܦܶܩܬܳܝܗܝ ܡܶܢ ܐܽܘܪ ܕܟܽܠܕܳܝ̈ܶܐ. ܘܫܰܚܠܦܰܬ ܫܡܶܗ ܐܰܒܪܳܗܳܡ.
8 ܘܶܐܫܟܰܚܬ ܠܶܒܶܗ ܕܟܶܐ ܩܕܳܡܝܟ. ܘܺܝܡܰܝܬ ܠܶܗ ܡܰܘܡܳܬܳܐ: ܠܡܶܬܰܠ ܠܶܗ ܐܰܪܥܳܐ ܕܰܟܢܰܥ̈ܢܳܝܶܐ: ܘܰܕܚܺܝ̈ܬܳܝܶܐ: ܘܕܰܐܡܽܘܖ̈ܳܝܶܐ: ܘܰܕܦܰܖ̈ܙܳܝܶܐ: ܘܰܕܚܰܘܳܝ̈ܶܐ: ܘܰܕܝܰܒܽܘܣܳܝ̈ܶܐ: ܘܰܕܓܰܖ̈ܓܽܘܣܳܝܶܐ: ܠܡܶܬܠܶܗ ܠܶܗ ܘܰܠܙܰܪܥܶܗ. ܘܰܐܫܰܪܬ ܡܶܠܰܝ̈ܟ ܥܰܡܶܗ: ܡܶܛܽܠ ܕܙܰܕܺܝܩ ܐܰܢ̱ܬ.
9 ܘܰܚܙܰܝܬ ܫܽܘܥܒܳܕܳܐ ܕܰܐܒܳܗܰܝ̈ܢ ܕܰܒܡܶܨܪܶܝܢ. ܘܰܫܡܰܥܬ ܝܺܠܰܠܬܗܽܘܢ ܥܰܠ ܝܰܡܳܐ ܕܣܽܘܦ.
10 ܘܰܥܒܰܕܬ ܐܳܬܘ̈ܳܬܳܐ ܘܬܶܕܡܖ̈ܳܬܳܐ ܒܦܶܪܥܽܘܢ ܘܰܒܟܽܠܶܗ ܚܰܝܠܶܗ: ܘܰܒܟܽܠܶܗ ܥܰܡܳܐ ܕܰܐܪܥܶܗ ܡܶܛܽܠ ܕܺܝܕܰܥܬ ܕܰܐܥܠܺܝܘ ܒܗܽܘܢ ܒܥܰܡܳܟ: ܘܰܥܒܰܕܬ ܠܳܟ ܫܡܳܐ ܐܰܝܟ ܕܝܰܘܡܳܢܳܐ.
11 ܘܝܰܡܳܐ ܬܪܰܥܬ ܩܕܳܡܝܗܽܘܢ. ܘܰܥܒܰܪܘ ܒܓܰܘ ܝܰܡܳܐ ܒܝܰܒܫܳܐ. ܘܰܠܖ̈ܳܕܽܘܦܰܝܗܽܘܢ ܛܰܒܰܥܬ ܒܥܽܘܡܩܰܘ̈ܗܝ ܕܝܰܡܳܐ: ܐܰܝܟ ܕܛܳܒܥܳܐ ܟܺܐܦܳܐ ܒܡܰܝ̈ܳܐ ܥܰܫܺܝ̈ܢܶܐ.
12 ܘܰܒܥܰܡܽܘܕܳܐ ܕܰܥܢܳܢܳܐ ܕܰܒܪܬ ܐܶܢܽܘܢ ܒܺܐܝܡܳܡܳܐ: ܘܒܶܐܣܛܽܘܢܳܐ ܕܢܽܘܪܳܐ ܒܠܺܠܝܳܐ: ܠܡܰܢܗܳܪܽܘ ܠܗܽܘܢ ܐܽܘܪܚܳܐ: ܠܰܡܗܰܠܳܟܽܘ ܒܳܗ̇.
13 ܘܥܰܠ ܛܽܘܪܳܐ ܕܣܺܝܢܰܝ ܢܚܶܬܬ ܘܡܰܠܠܬ ܥܰܡܗܽܘܢ ܡܶܢ ܫܡܰܝܳܐ. ܘܝܰܗܒܬ ܠܗܽܘܢ ܕܺܝܢ̈ܶܐ ܬܖ̈ܺܝܨܶܐ: ܘܢܳܡܽܘ̈ܣܶܐ ܕܰܫܪܳܪܳܐ: ܘܰܩܝܳܡ̈ܶܐ ܘܦܽܘܩ̈ܕܳܢܶܐ ܕܛܳܒܺܝܢ.
14 ܘܫܰܒܬܳܐ ܕܩܽܘܕܫܳܟ ܐܰܘܕܰܥܬ ܐܶܢܽܘܢ ܘܦܽܘܩ̈ܕܳܢܶܐ ܘܰܩܝܳܡ̈ܶܐ ܘܢܳܡܽܘ̈ܣܶܐ ܕܦܰܩܶܕܬ ܐܶܢܽܘܢ ܒܺܐܝܕܳܐ ܕܡܽܘܫܶܐ ܥܰܒܕܳܟ.
15 ܘܠܰܚܡܳܐ ܡܶܢ ܫܡܰܝܳܐ. ܝܰܗܒܬ ܠܗܽܘܢ ܠܟܰܦܢܗܽܘܢ ܘܡܰܝ̈ܳܐ ܡܶܢ ܟܺܐܦܳܐ ܝܰܗܒܬ̇ ܠܗܽܘܢ. ܠܨܰܗܺܝܗܽܘܢ ܘܶܐܡܰܪܬ ܠܗܽܘܢ ܠܡܶܥܰܠ ܘܰܠܡܺܐܪܰܬ ܐܰܪܥܳܐ: ܕܰܐܬܩܢܰܬ ܐܺܝܕܳܟ ܠܡܶܬܰܠ ܠܗܽܘܢ.
16 ܗܶܢܽܘܢ ܕܶܝܢ ܘܰܐܒܳܗܰܝ̈ܗܽܘܢ ܐܰܥܠܺܝܘ: ܘܩܰܫܺܝܘ ܩܕܳܠܗܽܘܢ: ܘܠܳܐ ܨܳܬܘ ܠܦܽܘܩ̈ܕܳܢܰܝܟ.
17 ܘܠܳܐ ܨܒܳܘ ܠܡܶܫܡܰܥ: ܘܠܳܐ ܐܶܬܕܟܰܪܘ ܬܶܕܡܖ̈ܳܬܳܟ ܕܰܥܒܰܕܬ ܠܗܽܘܢ. ܘܰܗܦܰܟ ܠܒܶܗܽܘܢ ܠܰܥܒܳܕܰܝ̈ܗܽܘܢ ܒܺܝ̈ܫܶܐ ܘܰܐܢ̱ܬ ܐܰܠܳܗܳܐ ܫܳܒܽܘܩܳܐ ܘܪܶܚܡܬܢܳܐ ܘܚܰܢܳܢܳܐ: ܪܰܚܺܝܩ ܪܽܘܓܙܳܐ ܘܩܰܪܺܝܒ ܒܳܥܽܘܬܳܐ: ܠܳܐ ܫܒܰܩܬ ܐܶܢܽܘܢ.
18 ܡܶܛܽܠ ܕܗܶܢܽܘܢ ܥܒܰܕܘ ܥܶܓܠܳܐ ܕܢܶܣܟܬܳܐ: ܘܳܐܡܪܺܝܢ: ܗܳܢܰܘ ܐܰܠܳܗܳܟ ܝܺܣܪܳܐܶܝܠ: ܕܰܐܣܩܳܟ ܡܶܢ ܐܰܪܥܳܐ ܕܡܶܨܪܶܝܢ. ܘܰܥܒܰܕܘ ܒܺܝ̈ܫܳܬܳܐ ܪܰܘܖ̈ܒܳܬܳܐ.
19 ܘܰܐܢ̱ܬ ܒܖ̈ܰܚܡܰܝܟ ܣܰܓܺܝ̈ܐܶܐ ܠܳܐ ܫܒܰܩܬ ܐܶܢܽܘܢ ܒܡܰܕܒܪܳܐ. ܘܥܰܡܽܘܕܳܐ ܕܰܥܢܳܢܳܐ ܠܳܐ ܥܒܰܪ ܡܶܢܗܽܘܢ ܒܺܐܝܡܳܡܳܐ: ܠܰܡܕܰܒܳܪܽܘ ܐܶܢܽܘܢ ܒܽܐܘܪܚܳܐ. ܘܶܐܣܛܽܘܢܳܐ ܕܢܽܘܪܳܐ ܒܠܺܠܝܳܐ: ܠܡܰܢܗܳܪܽܘ ܠܗܽܘܢ ܐܽܘܪܚܳܐ: ܕܢܺܐܙܽܠܘܢ ܒܳܗ̇.
20 ܘܪܽܘܚܳܟ ܛܳܒܬܳܐ ܝܰܗ̱ܒܬ ܐܶܢܽܘܢ ܠܡܰܠܳܦܽܘ ܐܶܢܽܘܢ. ܘܡܰܢܢܳܐ ܠܳܐ ܟܠܰܝܬ ܡܶܢ ܦܽܘܡܗܽܘܢ. ܘܡܰܝ̈ܳܐ ܝܰܗܒܬ ܠܗܽܘܢ ܠܨܰܗܺܝܗܽܘܢ.
21 ܘܰܐܪܒܥܺܝܢ ܫܢܺܝ̈ܢ ܡܶܕܶܡ ܠܳܐ ܚܣܰܪ ܠܗܽܘܢ ܒܡܰܕܒܪܳܐ. ܢܰܚܬܰܝ̈ܗܽܘܢ ܠܳܐ ܒܠܺܝܘ: ܘܰܡܣܳܢܰܝ̈ܗܽܘܢ ܠܳܐ ܐܶܬܒܰܙܰܥܘ.
22 ܘܝܰܗܒܬ ܠܗܽܘܢ ܡܰܠ̈ܟܘܳܬܳܐ ܕܥܰܡ̈ܡܶܐ. ܘܦܰܠܶܓܬ ܐܶܢܶܝܢ ܠܗܽܘܢ ܠܪܺܝܫ ܐ̱ܢܳܫ. ܘܺܝܪܶܬܘ ܐܰܪܥܳܐ ܕܣܺܝܚܽܘܢ: ܘܰܐܪܥܳܐ ܕܡܰܠܟܳܐ ܕܚܶܫܒܽܘܢ: ܘܰܐܪܥܳܐ ܕܥܽܘܓ ܡܰܠܟܳܐ ܕܒܰܝܫܳܢ.
23 ܘܰܒܢܰܝ̈ܗܽܘܢ ܐܰܣܓܺܝܬ ܐܰܝܟ ܟܰܘ̈ܟܒܶܐ ܕܒܰܫܡܰܝܳܐ. ܘܰܐܥܶܠܬ ܐܶܢܽܘܢ ܠܰܐܪܥܳܐ ܕܶܐܡܰܪܬ ܠܰܐܒܳܗܰܝ̈ܗܽܘܢ ܠܡܶܥܰܠ ܠܶܗ ܘܰܠܡܺܐܪܬܳܗ̇.
24 ܘܥܰܠܘ ܒ̈ܢܰܝܳܐ: ܘܺܝܪܶܬܘ ܐܰܪܥܳܐ. ܘܬܰܒܰܪܬ ܩܕܳܡܝܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ ܕܰܟܢܰܥ̈ܢܳܝܶܐ. ܘܰܐܫܠܶܡܬ ܐܶܢܽܘܢ ܒܺܐܝܕܰܝ̈ܗܽܘܢ: ܠܗܽܘܢ ܘܰܠܡܰܠܟܰܝ̈ܗܽܘܢ: ܘܰܠܥܰܡ̈ܡܶܐ ܕܰܐܪܥܳܐ: ܠܡܶܥܒܰܕ ܒܗܽܘܢ ܐܰܝܟ ܨܶܒܝܳܢܗܽܘܢ.
25 ܘܶܐܚܰܕܘ ܩܽܘܖ̈ܝܳܐ ܬܰܩܺܝ̈ܦܳܬܳܐ: ܘܰܐܪܥܳܐ ܫܰܡܺܝܢܬܳܐ: ܘܒ̈ܳܬܶܐ ܕܰܡܠܶܝܢ ܟܽܠܗܶܝܢ ܛܳܒ̈ܳܬܳܐ: ܘܓܽܘ̈ܒܶܐ ܚܦܺܝܖ̈ܶܐ: ܘܟܰܖ̈ܡܶܐ: ܘܙܰܝ̈ܬܶܐ: ܘܺܐܝܠܳܢ̈ܶܐ: ܘܡܶܐܟܽܘܠܬܳܐ ܣܰܓܺܝܐܬܳܐ. ܘܶܐܟܰܠܘ: ܘܰܣܒܰܥܘ: ܘܰܫܡܶܢܘ: ܘܶܐܬܦܰܢܰܩܘ ܒܛܽܘܒܳܟ ܪܰܒܳܐ.
26 ܘܰܗܦܰܟܘ ܘܕܰܓܶܠܘ ܒܳܟ. ܘܰܫܕܰܐܗܝ ܠܢܳܡܽܘܣܳܟ ܠܒܰܪ ܡܶܢ ܬܰܪܥܺܝܬܗܽܘܢ ܘܠܰܒܢܰܝ̈ܟ ܩܰܛܶܠܘ: ܥܰܠ ܕܶܐܡܰܪܘ ܠܗܽܘܢ ܠܡܶܗܦܰܟ ܠܘܳܬܳܟ. ܘܰܥܒܰܕܘ ܒܺܝ̈ܫܳܬܳܐ ܪܰܘܖ̈ܒܳܬܳܐ.
27 ܘܰܐܫܠܶܡܬ ܐܶܢܽܘܢ ܒܝܰܕ ܒܥܶܠܕܒܳܒܰܝ̈ܗܽܘܢ: ܘܰܐܥܺܝܩܘ ܠܗܽܘܢ. ܘܰܒܥܶܕܳܢܳܐ ܕܽܐܘܠܨܳܢܳܐ ܒܥܰܘ ܡܶܢܟ: ܘܰܫܡܰܥܬ ܐܶܢܽܘܢ ܡܶܢ ܫܡܰܝܳܐ: ܐܰܝܟ ܖ̈ܰܚܡܰܝܟ ܣܰܓܺܝ̈ܐܶܐ. ܘܰܐܩܺܝܡܬ ܠܗܽܘܢ ܦܳܪܽܘܩܳܐ. ܘܰܦܪܰܩ ܐܶܢܽܘܢ ܡܶܢ ܐܺܝܕܳܐ ܕܳܐܠܽܘܨܰܝ̈ܗܽܘܢ.
28 ܘܟܰܕ ܐܰܪܘܰܚܬ ܠܗܽܘܢ: ܗܦܰܟܘ ܠܡܶܥܒܰܕ ܕܰܣܢܶܐ ܩܕܳܡܝܟ. ܘܰܫܒܰܩܬ ܐܶܢܽܘܢ ܒܝܰܕ ܒܥܶܠܕܒܳܒܰܝ̈ܗܽܘܢ. ܘܫܰܥܒܶܕܘ ܐܶܢܽܘܢ. ܘܰܗܦܰܟܘ ܘܨܰܠܺܝܘ ܩܕܳܡܰܝܟ. ܘܰܐܢ̱ܬ ܡܶܢ ܫܡܰܝܳܐ ܫܡܰܥܬ: ܘܰܦܪܰܩܬ ܐܶܢܽܘܢ ܒܟܽܠܙܒܰܢ: ܐܰܝܟ ܣܰܓܺܝܐܽܘܬ ܖ̈ܰܚܡܰܝܟ.
29 ܘܰܐܣܗܶܕܬ ܒܗܽܘܢ: ܠܡܰܗܦܳܟܽܘ ܐܶܢܽܘܢ ܠܢܳܡܽܘܣܳܟ. ܘܗܶܢܽܘܢ ܐܰܥܠܺܝܘ: ܘܠܳܐ ܫܡܰܥܘ ܠܦܽܘܩ̈ܕܳܢܰܝܟ ܘܰܒܕܺܝܢܰܝ̈ܟ ܚܛܰܘ ܒܗܽܘܢ. ܕܶܐܢ ܥܳܒܶܕ ܠܗܽܘܢ ܒܰܪܢܳܫܳܐ: ܚܳܝܶܐ ܒܗܽܘܢ. ܘܰܥܒܰܕܘ ܠܗܽܘܢ ܟܰܬܦܳܐ ܡܳܪܽܘܕܬܳܐ. ܘܰܩܕܳܠܗܽܘܢ ܩܰܫܺܝܘ: ܘܠܳܐ ܫܡܰܥܘ.
30 ܘܰܐܟܪܶܙܬ ܥܠܰܝܗܽܘܢ ܫܢܰܝ̈ܳܐ ܣܰܓܺܝ̈ܳܐܬܳܐ. ܘܶܐܣܗܶܕܬ ܒܗܽܘܢ ܒܪܽܘܚܳܟ: ܒܺܐܝܕܳܐ ܕܰܢܒܺܝܰܝ̈ܟ. ܘܠܳܐ ܫ̣ܡܰܥܘ ܘܰܐܫܠܶܡܬ ܐܶܢܽܘܢ ܒܺܐܝܕܳܐ ܕܥܰܡ̈ܡܶܐ ܕܰܡܕܺܝ̈ܢܳܬܳܐ.
31 ܘܡܶܛܽܠ ܖ̈ܰܚܡܰܝܟ ܣܰܓܺܝ̈ܐܶܐ: ܠܳܐ ܐܰܘܒܶܕܬ ܐܶܢܽܘܢ. ܘܠܳܐ ܫܒܰܩܬ ܐܶܢܽܘܢ ܡܶܛܽܠ ܕܰܐܠܳܗܳܐ ܐܰܢ̱ܬ ܚܰܢܳܢܳܐ ܘܪܶܚܡܬܢܳܐ.
32 ܡܶܟܺܝܠ: ܐܰܠܳܗܰܢ ܐܰܠܳܗܳܐ ܪܰܒܳܐ ܘܓܰܢ̱ܒܳܪܳܐ ܘܰܕܚܺܝܠܳܐ: ܢܳܛܰܪ ܡܰܘܡܳܬܳܐ ܘܰܫܪܳܪܳܐ. ܠܳܐ ܢܶܬܟܰܣܶܐ ܡܶܢ ܩܕܳܡܰܝܟ ܟܽܠܶܗ ܐܽܘܠܨܳܢܳܐ ܕܶܐܬܳܐ ܥܠܰܝܢ: ܘܥܰܠ ܡܰܠܟܰܝ̈ܢ: ܘܥܰܠ ܪܰܘܖ̈ܒܳܢܰܝܢ: ܘܥܰܠ ܟܽܘܡܖ̈ܰܝܢ: ܘܥܰܠ ܢܒܺܝܰܝ̈ܢ: ܘܥܰܠ ܐܰܒܳܗܰܝ̈ܢ: ܘܥܰܠ ܟܽܠܶܗ ܥܰܡܳܐ: ܡܶܢ ܝܰܘܡܰܘ̈ܗܝ ܕܡܰܠܟܳܐ ܕܳܐܬܽܘܪ ܘܰܥܕܰܡܳܐ ܠܝܰܘܡܳܢܳܐ.
33 ܘܰܐܢ̱ܬ ܙܰܕܺܝܩ ܥܰܠ ܟܽܠ ܡܶܕܶܡ ܕܶܐܬܳܐ ܥܠܰܝܢ. ܡܶܛܽܠ ܕܰܒܩܽܘܫܬܳܐ ܐܰܢ̱ܬ ܓܶܝܪ ܥܒܰܕܬ. ܘܰܚܢܰܢ ܐܰܥܠܺܝܢܰܢ.
34 ܘܡܰܠܟܰܝ̈ܢ: ܘܪܰܘܖ̈ܒܳܢܰܝܢ: ܘܟܽܘܡܖ̈ܰܝܢ: ܘܰܐܒܳܗܰܝ̈ܢ: ܠܳܐ ܥ̣ܒܰܕ ܢܳܡܽܘܣܳܟ ܘܠܳܐ ܨܳܬܘ ܠܦܽܘܩ̈ܕܳܢܰܝܟ ܘܰܠܣܳܗ̈ܕܘܳܬܳܟ: ܕܰܐܣܗܶܕܬ ܒܗܽܘܢ.
35 ܘܰܟܦܰܪܘ ܒܡܰܠܟܽܘܬܳܟ ܘܰܒܛܽܘܒܳܟ ܪܰܒܳܐ ܕܝܰܗܒܬ ܠܗܽܘܢ: ܒܰܐܪܥܳܐ ܛܳܒܬܳܐ ܘܫܰܡܺܝܢܬܳܐ ܕܝܰܗܒܬ ܠܗܽܘܢ. ܘܠܳܐ ܦܰܠܚܽܘܟ: ܘܠܳܐ ܗܦܰܟܘ ܡܶܢ ܥܒܳܕܰܝ̈ܗܽܘܢ ܒܺܝ̈ܫܶܐ.
36 ܡܶܛܽܠ ܗܳܢܳܐ ܝܰܘܡܳܢܳܐ ܥܰܒ̈ܕܶܐ. ܘܰܐܪܥܳܐ ܕܝܰܗܒܬ ܠܰܐܒܳܗܰܝ̈ܢ ܠܡܶܐܟܰܠ ܐܶܒܳܗ̇ ܘܛܽܘܒܳܗ̇: ܗܳܐ ܚܢܰܢ ܐܰܝܟ ܥܰܒ̈ܕܶܐ ܦܳܠܚܺܝܢ ܒܓܰܘܳܗ̇.
37 ܘܥܰܠ̈ܠܳܬܳܗ̇ ܢܳܣܒܺܝܢ ܡܰܠ̈ܟܶܐ ܕܰܐܩܺܝܡܬ ܥܠܰܝܢ: ܡܶܛܽܠ ܚܛܳܗܰܝ̈ܢ ܘܥܰܠ ܦܰܓܖ̈ܰܝܢ ܗܶܢܽܘܢ ܫܰܠܺܝܛܺܝܢ: ܘܥܰܠ ܒܥܺܝܪܰܢ: ܐܰܝܟ ܨܶܒܝܳܢܗܽܘܢ ܘܒܽܐܘܠܨܳܢܳܐ ܪܰܒܳܐ ܫܪܶܝܢܰܢ.
38 ܘܰܒܟܽܠܗܶܝܢ ܗܳܠܶܝܢ ܝܳܡܶܝܢ ܚܢܰܢ ܒܰܫܪܳܪܳܐ ܘܡܰܣܗܕܺܝܢ ܥܰܠ ܚܳܬܡܳܐ: ܩܰܫܺܝ̈ܫܰܝܢ: ܘܠܶܘ̈ܳܝܶܐ: ܘܟܽܘܡܖ̈ܰܝܢ: ܘܟܽܠ ܐܰܝܠܶܝܢ ܕܰܚܝܰܘ ܡܶܢܢ.