Zephaniah 3
The Book of Zephaniah
܀ ܨܦܢܝܐ ܓ ܀
1 ܐܽܘܝ ܡܕܺܝܢ̱ܬܳܐ ܝܺܕܺܝܥܬܳܐ ܘܰܦܪܺܝܩܬܳܐ: ܡܕܺܝܢ̱ܬܶܗ ܕܝܰܘܢܳܢ.
2 ܕܠܳܐ ܫܶܡܥܰܬ ܒܩܳܠܳܐ: ܘܠܳܐ ܩܰܒܠܰܬ ܡܰܪܕܽܘܬܳܐ: ܘܰܒܡܳܪܝܳܐ ܠܳܐ ܣܰܒܪܰܬ: ܘܰܠܘܳܬ ܐܰܠܳܗܳܗ̇ ܠܳܐ ܩܶܪܒܰܬ.
3 ܪܰܘܖ̈ܒܳܢܶܝܗ̇ ܒܓܰܘܳܗ̇ ܐܰܝܟ ܐܰܖ̈ܝܰܘܳܬܳܐ ܢܳܗܡܺܝܢ: ܘܕܰܝܳܢܶܝ̈ܗ̇ ܐܰܝܟ ܕܶܐܒ̈ܶܐ ܕܪܰܡܫܳܐ: ܘܠܳܐ ܡܟܰܬܪܺܝܢ ܠܨܰܦܪܳܐ.
4 ܢܒܺܝ̈ܝܶܗ̇ ܦܰܚܙܺܝܢ: ܘܓܰܒܖ̈ܶܐ ܐܶܢܽܘܢ ܥܰܘ̈ܳܠܶܐ: ܟܳܗ̈ܢܶܝܗ̇ ܛܰܘܶܫܘ ܡܰܩܕܫܳܐ: ܘܰܚܛܰܦܘ ܢܳܡܽܘܣܳܐ.
5 ܘܡܳܪܝܳܐ ܙܰܕܺܝܩܳܐ ܒܓܰܘܳܗ̇ ܘܠܳܐ ܥܳܒܶܕ ܥܰܘܠܳܐ: ܒܨܰܦܪܳܐ ܘܰܒܨܰܦܪܳܐ ܕܺܝܢܰܘ̈ܗܝ: ܝܳܗܶܒ ܒܢܽܘܗܪܳܐ ܘܠܳܐ ܡܫܰܘܚܰܪ: ܘܥܰܘܳܠܳܐ ܠܳܐ ܝܳܕܰܥ ܒܶܗܬܬܳܐ.
6 ܐܰܘܒܕܶܬ ܥܰܡ̈ܡܶܐ: ܘܶܐܬܚܒܠܰܬ ܕܳܘܺܝܬܳܐ: ܐܰܚܪܒܶ݀ܬ ܫܽܘܩܰܝ̈ܗܽܘܢ ܡܶܢ ܒܠܰܝ ܕܥܳܒܰܪ: ܨܕܰܝ̈ ܡܕܺܝ̈ܢܳܬܗܽܘܢ ܡܶܢ ܒܠܰܝ ܐ̱ܢܳܫ: ܘܡܶܢ ܒܠܰܝ ܕܝܳܬܶܒ.
7 ܐܶܡܪܶܬ ܕܠܺܝ ܬܶܕܚܠܽܘܢ: ܘܡܶܢܝ ܬܩܰܒܠܽܘܢ ܡܰܪܕܽܘܬܳܐ: ܘܠܳܐ ܢܺܐܒܰܕ ܡܶܢ ܥܰܝܢܶܝ̈ܗ̇ ܟܽܠܡܶܕܶܡ ܕܦܰܩܕܶܬ ܥܠܶܝܗ̇: ܐܶܬܛܰܝܰܒܘ ܘܰܩܪܽܘܒܘ ܘܚܰܒܶܠܘ ܟܽܠܗܶܝܢ ܨܶܢ̈ܥܳܬܗܽܘܢ.
8 ܡܶܟܺܝܠ ܣܰܟܰܘ ܠܺܝ ܐܳܡܰܪ ܡܳܪܝܳܐ: ܠܝܰܘܡܳܐ ܕܩܳܐܶܡ ܐ̱ܢܳܐ ܠܣܳܗܕܽܘܬܳܐ: ܡܶܛܽܠ ܕܡܰܛܺܝ ܕܺܝܢܝ ܠܰܡܟܰܢܳܫܽܘ ܥܰܡ̈ܡܶܐ: ܘܠܰܡܩܰܪܳܒܽܘ ܡܰܠ̈ܟܘܳܬܳܐ: ܠܡܶܐܫܰܕ ܥܠܰܝܗܽܘܢ ܪܽܘܓܙܝ: ܘܟܽܠܳܗ̇ ܚܶܡܬܳܐ ܕܪܽܘܓܙܝ: ܡܶܛܽܠ ܕܰܒܢܽܘܪܳܐ ܕܰܛܢܳܢܝ ܬܶܬܶܐܟܶܠ ܟܽܠܳܗ̇ ܐܰܪܥܳܐ.
9 ܘܗܳܝܕܶܝܢ ܐܰܗܦܶܟ ܥܰܠ ܥܰܡ̈ܡܶܐ ܣܶܦܬܳܐ ܓܒܺܝܬܳܐ: ܕܢܶܩܪܽܘܢ ܟܽܠܗܽܘܢ ܒܰܫܡܶܗ ܕܡܳܪܝܳܐ: ܘܢܶܦܠܚܽܘܢܶܗ ܒܢܺܝܪܳܐ ܚܰܕ.
10 ܡܶܢ ܥܒܳܪ ܢܰܗܖ̈ܰܘܳܬܳܐ ܕܟܽܘܫ ܢܰܝܬܽܘܢ ܠܺܝ ܕܶܒܚ̈ܶܐ: ܒܝܰܘܡܳܐ ܗܰܘ.
11 ܠܳܐ ܬܶܒܗܬܺܝܢ ܡܶܢ ܟܽܠܗܶܝܢ ܨܶܢ̈ܥܳܬܶܟܝ ܕܰܐܥܠܺܝܬܝ ܒܺܝ: ܘܗܳܝܕܶܝܢ ܐܰܥܒܰܪ ܡܶܢܶܟܝ ܥܽܘܫܢܳܐ ܕܓܰܐܝܽܘܬܶܟܝ: ܘܠܳܐ ܬܰܘܣܦܺܝܢ ܬܽܘܒ ܠܡܶܬܪܰܘܪܳܒܽܘ ܥܰܠ ܛܽܘܪܳܐ ܕܩܽܘܕܫܝ.
12 ܘܰܐܘܬܰܪ ܒܓܰܘܶܟܝ ܥܰܡܳܐ ܡܶܣܟܺܢܳܐ ܘܡܰܟܺܝܟܳܐ: ܘܰܢܣܰܒܪܽܘܢ ܒܰܫܡܶܗ ܕܡܳܪܝܳܐ.
13 ܘܰܐܝܠܶܝܢ ܕܶܐܫܬܚܰܪܘ ܡܶܢ ܒܶܝܬ ܝܺܣܪܳܐܶܝܠ: ܠܳܐ ܢܶܥܒܕܽܘܢ ܥܰܘܠܳܐ: ܘܠܳܐ ܢܡܰܠܠܽܘܢ ܕܰܓܳܠܽܘܬܳܐ: ܘܠܳܐ ܢܶܫܬܟܰܚ ܒܦܽܘܡܗܽܘܢ ܠܶܫܳܢܳܐ ܕܢܶܟܠܳܐ: ܡܶܛܽܠ ܕܗܶܢܽܘܢ ܢܶܪܥܽܘܢ ܘܢܶܪܒܥܽܘܢ: ܘܠܳܐ ܢܶܗܘܶܐ ܠܗܽܘܢ ܡܰܗܪܳܢܳܐ.
14 ܫܰܒܰܚܝ ܒܰܪܬ ܨܶܗܝܽܘܢ: ܘܝܰܒܶܒ ܝܺܣܪܳܐܶܝܠ: ܚܕܳܝ ܘܕܽܘܨܝ ܒܟܽܠܶܗ ܠܶܒܶܟܝ ܒܰܪܬ ܐܽܘܪܺܫܠܶܡ.
15 ܐܰܥܒܰܪ ܡܳܪܝܳܐ ܕܺܝܢܰܝ̈ܟܝ: ܘܰܐܦܪܶܩ ܡܶܢܶܟܝ ܒܥܶܠܕܒܳܒܰܝ̈ܟܝ ܡܰܠܟܶܗ ܕܺܝܣܪܳܐܶܝܠ: ܡܳܪܝܳܐ ܒܓܰܘܶܟܝ ܬܽܘܒ ܠܳܐ ܬܶܚܙܶܝܢ ܒܺܝܫܬܳܐ.
16 ܒܶܗ ܒܝܰܘܡܳܐ ܗܰܘ: ܢܶܬܶܐܡܰܪ ܠܽܐܘܪܺܫܠܶܡ ܠܳܐ ܬܶܕܚܠܺܝܢ: ܘܰܠܨܶܗܝܽܘܢ ܠܳܐ ܢܶܬܖ̈ܰܦܝܳܢ ܐܺܝܕܰܝ̈ܟܝ.
17 ܡܳܪܝܳܐ ܐܰܠܳܗܳܟܝ ܒܓܰܘܶܟܝ: ܓܰܢ̱ܒܳܪܳܐ ܘܦܳܪܽܘܩܳܐ: ܢܒܰܣܡܶܟܝ ܒܚܰܕܽܘܬܳܐ ܘܰܢܚܰܕܬܶܟܝ ܒܚܽܘܒܶܗ: ܘܰܢܕܰܝܨܶܟܝ ܒܬܶܫܒܽܘܚܬܳܐ ܐܰܝܟ ܕܰܒܝܰܘܡܳܐ ܕܥܰܕܥܶܕܳܐ.
18 ܘܰܐܥܒܰܪ ܡܶܢܟܝ ܐܰܝܠܶܝܢ ܕܰܡܡܰܠܠܺܝܢ ܗ̱ܘܰܘ ܥܠܰܝܟܝ ܚܶܣܕܳܐ.
19 ܗܳܐ ܥܳܒܶܕ ܐ̱ܢܳܐ ܠܟܽܠܗܽܘܢ: ܟܰܕ ܡܡܰܟܟܺܝܢ ܒܓܰܘܶܟܝ ܒܙܰܒܢܳܐ ܗܰܘ: ܘܶܐܦܪܽܘܩ ܠܰܟܒܺܝܫܬܳܐ: ܘܰܠܪܰܚܺܝܩܬܳܐ ܐܶܟܰܢܶܫ: ܘܶܐܥܒܶܕ ܐܶܢܽܘܢ ܠܰܫܡܳܐ ܘܰܠܬܶܫܒܽܘܚܬܳܐ ܒܟܽܠܳܗ̇ ܐܰܪܥܳܐ ܕܒܶܗܬܰܬܗܽܘܢ.
20 ܒܶܗ ܒܙܰܒܢܳܐ ܗܰܘ ܐܰܝܬܺܝܟܽܘܢ: ܘܒܶܗ ܒܙܰܒܢܳܐ ܗܰܘ ܐܶܟܰܢܶܫܟܽܘܢ: ܘܶܐܬܶܠܟܽܘܢ ܠܰܫܡܳܐ ܘܰܠܬܶܫܒܽܘܚܬܳܐ ܒܟܽܠܗܽܘܢ ܥܰܡ̈ܡܶܐ ܕܰܐܪܥܳܐ: ܡܳܐ ܕܡܰܗܦܶܟ ܐ̱ܢܳܐ ܫܒܺܝܬܟܽܘܢ ܠܥܰܝܢܰܝ̈ܗܽܘܢ ܐܳܡܰܪ ܡܳܪܝܳܐ.