1 John 1
First Epistle of John
܀ ܐܓܪܬܐ ܩܕܡܝܬܐ ܕܝܘܚܢܢ ܐ ܀
1- ܡܣܰܒܪܺܝܢܰܢ ܠܟܽܘܢ܆ ܠܗܰܘ ܕܺܐܝܬܰܘܗ̱ܝ ܗ̱ܘܳܐ ܡܶܢ ܒܪܺܝܫܺܝܬ܇ ܗܰܘ ܕܰܫܡܰܥܢ ܘܰܚܙܰܝܢܳܝܗ̱ܝ ܒܥܰܝ̈ܢܰܝܢ. ܚܙܰܝܢ ܘܓܰܫܢ ܒܺܐܝ̈ܕܰܝܢ܆ ܗܰܘ ܕܺܐܝܬܰܘܗ̱ܝ ܡܶܠܬܳܐ ܕܚܰܝ̈ܶܐ.
2- ܘܚܰܝ̈ܶܐ ܐܶܬܓܠܺܝܘ. ܘܰܚܙܰܝܢ ܘܣܳܗܕܺܝܢܰܢ. ܘܡܰܟܪܙܺܝܢܰܢ ܠܟܽܘܢ ܚܰܝ̈ܶܐ ܕܰܠܥܳܠܰܡ܇ ܗܳܢܽܘܢ ܕܺܐܝܬܰܝܗܽܘܢ ܗ̱ܘܰܘ ܠܘܳܬ ܐܰܒܳܐ. ܘܶܐܬܓܠܺܝܘ ܠܰܢ.
3- ܘܡܶܕܶܡ ܕܰܚܙܰܝܢ ܘܰܫܡܰܥܢ܆ ܡܰܘܕܥܺܝܢܰܢ ܐܳܦ ܠܟܽܘܢ܇ ܕܬܶܗܘܶܐ ܠܟܽܘܢ ܫܰܘܬܳܦܽܘܬܳܐ ܥܰܡܰܢ. ܘܫܰܘܬܳܦܽܘܬܰܢ ܕܶܝܢ ܕܺܝܠܰܢ ܐܺܝܬܶܝܗ̇܆ ܥܰܡ ܐܰܒܳܐ ܘܥܰܡ ܒܪܶܗ ܝܶܫܽܘܥ ܡܫܺܝܚܳܐ.
4- ܘܗܳܠܶܝܢ ܟܳܬܒܺܝܢܰܢ ܠܟܽܘܢ܆ ܕܚܰܕܽܘܬܰܢ ܕܰܒܟܽܘܢ ܬܶܗܘܶܐ ܡܫܰܡܠܝܳܐ܀
5- ܘܗܳܕܳܐ ܗ̱ܝ ܣܒܰܪܬܳܐ ܕܰܫܡܰܥܢ ܡܶܢܶܗ܇ ܘܰܡܣܰܒܪܺܝܢܰܢ ܠܟܽܘܢ܆ ܕܰܐܠܳܗܳܐ ܢܽܘܗܪܰܐ ܗ̱ܘ܆ ܘܚܶܫܽܘܟܳܐ ܟܽܠ ܟܽܠܶܗ ܠܰܝܬ ܒܶܗ.
6- ܘܶܐܢ ܐܳܡܪܺܝܢܰܢ ܕܫܰܘܬܳܦܽܘܬܳܐ ܐܺܝܬ ܠܰܢ ܥܰܡܶܗ ܘܰܡܗܰܠܟܺܝܢܰܢ ܒܚܶܫܽܘܟܳܐ܆ ܕܰܓ̈ܳܠܶܐ ܚܢܰܢ ܘܠܰܘ ܒܰܫܪܳܪܳܐ ܪܳܕܶܝܢܰܢ.
7- ܐܶܢ ܕܶܝܢ ܒܢܽܘܗܪܳܐ ܡܗܰܠܟܺܝܢܰܢ ܐܰܝܟ ܕܗܽܘ ܐܺܝܬܰܘܗ̱ܝ ܒܢܽܘܗܪܳܐ܆ ܐܺܝܬ ܠܰܢ ܫܰܘܬܳܦܽܘܬܳܐ ܥܰܡ ܚܕ̈ܳܕܶܐ܇ ܘܰܕܡܳܐ ܕܝܶܫܽܘܥ ܒܪܶܗ ܡܕܰܟܶܐ ܠܰܢ ܡܶܢ ܟܽܠܗܽܘܢ ܚܛܳܗܰܝ̈ܢ.
8- ܘܶܐܢ ܢܺܐܡܰܪ ܕܠܰܝܬ ܠܰܢ ܚܛܺܝܬܳܐ܆ ܢܰܦܫܰܢ ܡܰܛܥܶܝܢܰܢ. ܘܰܫܪܳܪܳܐ ܠܰܝܬ ܒܰܢ.
9- ܐܶܢ ܕܶܝܢ ܡܰܘܕܶܝܢܰܢ ܒܰܚܛܳܗܰܝ̈ܢ܆ ܡܗܰܝܡܰܢܽ ܗ̱ܘ ܘܙܰܕܺܝܩ܁ ܕܢܶܫܒܽܘܩ ܠܰܢ ܚܛܳܗܰܝ̈ܢ܇ ܘܰܢܕܰܟܶܝܢ ܡܶܢ ܟܽܠܶܗ ܥܰܘܠܰܢ.
10- ܘܶܐܢ ܐܳܡܪܺܝܢܰܢ ܕܠܳܐ ܚܛܰܝܢ܆ ܥܳܒܕܺܝܢܰܢ ܠܶܗ ܕܰܓܳܠܳܐ. ܘܡܶܠܬܶܗ ܠܰܝܬ ܠܘܳܬܰܢ܀