Esther 1
The Book of Esther
܀ ܐܣܬܝܪ ܐ ܀
1 ܘܰܗܘܳܐ ܒܝܰܘܡܰܘ̈ܗܝ ܕܰܐܚܫܺܝܪܺܝܫ ܗܰܘ ܒܪܶܗ ܕܰܐܚܫܺܝܪܺܝܫ: ܕܰܐܡܠܶܟ ܡܶܢ ܗܽܘܕ: ܘܰܥܕܰܡܳܐ ܠܟܽܘܫ: ܥܰܠ ܡܳܐܐ ܘܥܶܣܪܺܝܢ ܡܕܺܝ̈ܢܳܢ.
2 ܒܝܰܘ̈ܡܳܬܳܐ ܗܳܢܽܘܢ: ܟܰܕ ܝܳܬܶܒ ܗ̱ܘܳܐ ܡܰܠܟܳܐ ܐܰܚܫܺܝܪܺܝܫ ܥܰܠ ܟܽܘܪܣܝܳܐ ܕܡܰܠܟܽܘܬܶܗ: ܕܰܒܫܽܘܫܰܢ ܒܺܝܪܬܳܐ.
3 ܒܰܫܢܰܬ ܬܠܳܬ ܕܡܰܠܟܽܘܬܶܗ: ܥܒܰܕ ܡܰܫܬܝܳܐ ܪܰܒܳܐ ܠܟܽܠܗܽܘܢ ܪܰܘܖ̈ܒܳܢܰܘܗܝ: ܘܥܰܒܕܰܘ̈ܗܝ: ܚܺܝܠ ܦܳܖ̈ܣܳܝܶܐ ܘܡܳܕܳܝ̈ܶܐ ܘܦܰܖ̈ܬܘܳܝܶܐ. ܘܪܰܘܖ̈ܒܳܢܶܐ ܕܡܰܠܟܳܐ ܩܕܳܡܰܘܗܝ: ܘܪܰܘܖ̈ܒܳܢܶܐ ܕܰܡܕܺܝ̈ܢܳܬܳܐ.
4 ܟܰܕ ܚܰܘܺܝ ܥܽܘܬܪܳܐ ܘܺܐܝܩܳܪܳܐ ܕܡܰܠܟܽܘܬܶܗ: ܘܺܐܝܩܳܪܳܐ ܕܬܶܫܒܽܘܚܬܳܐ ܕܪܰܒܽܘܬܶܗ ܝܰܘ̈ܡܳܬܳܐ ܣܰܓܺܝ̈ܐܶܐ: ܡܳܐܐ ܘܰܬܡܳܢܺܝܢ ܝܰܘ̈ܡܺܝܢ.
5 ܘܟܰܕ ܫ̣ܰܠܶܡܘ ܝܰܘ̈ܡܳܬܳܐ ܗܳܢܽܘܢ: ܥ̣ܒܰܕ ܡܰܠܟܳܐ ܠܟܽܠ ܥܰܡܳܐ ܕܶܐܫܬܟܰܚ ܒܫܽܘܫܰܢ ܒܺܝܪܬܳܐ: ܡܶܢ ܙܥܽܘܪܳܐ ܘܰܥܕܰܡܳܐ ܠܪܰܒܳܐ: ܡܰܫܬܝܳܐ ܫܰܒܥܳܐ ܝܰܘ̈ܡܺܝܢ: ܒܕܳܪܰܬ ܓܰܢܰܬ ܒܰܝܬܽܘܢܳܐ ܕܡܰܠܟܳܐ.
6 ܘܰܢܓܺܝ̈ܕܳܢ ܘܺܐܠ̈ܐܷ ܕܰܥܡܰܪ ܟܽܘܒܳܐ: ܕܬܶܟܠܬܳܐ: ܘܰܡܬܺܝ̈ܚܳܢ ܒܚܰܒ̈ܠܶܐ ܕܒܽܘܨܳܐ ܘܕܰܐܪܓܘܳܢܳܐ ܥܰܠ ܓܺܝ̈ܓܠܶܐ ܕܟܶܣܦܳܐ: ܘܥܰܠ ܥܰܡܽܘܕܳܐ ܕܶܐܫܟܳܪܥܳܐ. ܘܥܰܖ̈ܣܳܬܳܐ ܕܕܰܗܒܳܐ ܘܰܕܣܺܐܡܳܐ ܖ̈ܰܡܝܳܢ ܥܰܠ ܖ̈ܨܺܝܦܳܬܳܐ ܕܫܺܝܫܳܐ: ܘܬܶܫܘ̈ܝܳܬܳܐ ܕܒܽܘܨܳܐ ܘܰܕܫܺܐܪܳܝܳܐ.
7 ܘܡܰܫܩܶܝܢ ܒܡܳܐܢ̈ܶܐ ܕܕܰܗܒܳܐ: ܘܡܳܐܢ̈ܶܐ ܡܶܢ ܡܳܐܢ̈ܶܐ ܦܪܺܝܫܺܝܢ: ܘܚܰܡܪܳܐ ܕܡܰܠܟܽܘܬܳܐ ܣܰܓܺܝ: ܐܰܝܟ ܐܺܝܕܳܐ ܕܡܰܠܟܳܐ.
8 ܘܡܰܫܬܝܳܐ ܒܢܳܡܽܘܣܳܐ: ܘܠܰܝܬ ܕܳܐܠܶܨ. ܡܶܛܽܠ ܕܗܳܟܰܢܳܐ ܦ̣ܩܰܕ ܡܰܠܟܳܐ: ܠܟܽܠ ܕܪܰܒ ܒܒܰܝܬܶܗ: ܕܢܶܥܒܕܽܘܢ ܨܶܒܝܳܢܳܐ ܕܟܽܠ ܐ̱ܢܳܫ.
9 ܘܘܰܫܬܺܝ ܡܰܠܟܬܳܐ ܥܶܒܕܰܬ ܐܳܦ ܗܺܝ ܡܰܫܬܝܳܐ ܪܰܒܳܐ ܠܟܽܠܗܶܝܢ ܢܶܫ̈ܶܐ ܒܒܶܝܬ ܡܰܠܟܽܘܬܶܗ ܕܡܰܠܟܳܐ ܐܰܚܫܺܝܪܺܝܫ.
10 ܘܰܒܝܰܘܡܳܐ ܫܒܺܝܥܳܝܳܐ ܟܰܕ ܫܦܰܪ ܠܶܒܶܗ ܕܡܰܠܟܳܐ ܒܚܰܡܪܳܐ: ܐܶܡܰܪ ܠܰܡܗܰܝܡܢ̈ܶܐ ܠܒܶܙܬܳܐ: ܘܰܠܪܰܚܒܽܘܢܳܐ: ܘܰܠܒܶܓܬܳܐ: ܘܠܰܐܓܒܽܘܬܳܐ: ܘܰܠܬܰܪܰܫ: ܘܰܠܙܳܬܰܪ: ܘܰܠܟܰܪܟܰܫ: ܫܰܒܥܳܐ ܡܗܰܝܡܢ̈ܶܐ ܕܰܡܫܰܡܫܺܝܢ ܩܕܳܡ ܡܰܠܟܳܐ ܐܰܚܫܺܝܪܺܝܫ.
11 ܠܡܰܥܳܠܽܘ ܠܘܰܫܬܺܝ ܡܰܠܟܽܘܬܳܐ ܩܕܳܡ ܡܰܠܟܳܐ ܒܬܳܓܳܐ ܕܡܰܠܟܽܘܬܳܗ̇: ܠܰܡܚܰܘܳܝܽܘ ܠܥܰܡ̈ܡܶܐ ܘܰܠܪܰܘܖ̈ܒܳܢܶܐ ܫܽܘܦܪܳܗ̇: ܡܶܛܽܠ ܕܫܰܦܺܝܪ ܗ̱ܘܳܐ ܚܶܙܘܳܗ̇.
12 ܘܠܳܐ ܨܒܳܬ ܘܰܫܬܺܝ ܡܰܠܟܬܳܐ ܠܡܶܥܰܠ: ܒܦܶܬܓܳܡܳܐ ܕܫܰܕܰܪ ܥܠܶܝܗ̇ ܡܰܠܟܳܐ ܒܺܐܝܕܳܐ ܕܰܡܗܰܝܡܢ̈ܶܐ: ܘܰܪܓܶܙ ܡܰܠܟܳܐ ܛܳܒ. ܘܚܶܡܬܶܗ ܡܶܬܓܰܘܙܠܳܐ ܗ̱ܘܳܬ.
13 ܘܶܐܡܰܪ ܡܰܠܟܳܐ ܠܚܰܟܺܝ̈ܡܶܐ ܒܢܰܝ̈ ܝܳܕܥܰܝ̈ ܙܰܒ̈ܢܶܐ: ܡܶܛܽܠ ܕܗܳܟܰܢܰܐ ܗ̱ܘ ܢܳܡܽܘܣܶܗ ܐܳܡܰܪ ܗ̱ܘܳܐ ܩܕܳܡ ܟܽܠ ܕܝܳܕܥܺܝܢ ܗ̱ܘܰܘ ܢܳܡܽܘ̈ܣܶܐ ܘܕܺܝܢ̈ܶܐ.
14 ܘܠܰܕܩܰܪܺܝܒܺܝܢ ܠܶܗ: ܒܰܢܪܢܰܫܰܝ: ܘܰܐܫܬܰܪ: ܘܰܐܪܡܽܘܬ: ܘܰܪܡܽܘܣ: ܘܬܰܪܫܺܝܫ: ܘܡܰܣܪܝܳܐ: ܘܰܡܥܰܘܟܳܢ: ܪܰܘܖ̈ܒܳܢܶܐ ܕܦܳܪܶܣ ܘܰܕܡܳܕܰܝ. ܕܝܳܬܒܺܝܢ ܩܕܳܡ ܡܰܠܟܳܐ: ܘܡܶܬܚܙܶܝܢ ܩܕܳܡܰܘܗܝ: ܒܬܰܪܥܳܐ ܕܡܰܠܟܽܘܬܳܐ.
15 ܐܶܡܰܪܘ: ܕܡܳܢܳܐ ܘܳܠܶܐ ܠܡܶܥܒܰܕ ܠܶܗ ܠܡܰܠܟܬܳܐ ܘܰܫܬܺܝ: ܥܰܠ ܕܠܳܐ ܥܶܒܕܰܬ ܡܶܠܬܶܗ ܕܡܰܠܟܳܐ ܐܰܚܫܺܝܪܺܝܫ: ܕܰܫܠܰܚ ܒܺܐܝܕܳܐ ܕܰܡܗܰܝܡܢ̈ܶܐ.
16 ܘܶܐܡܰܪ ܡܥܰܘܟܳܢ ܩܕܳܡ ܡܰܠܟܳܐ: ܘܰܩܕܳܡ ܪܰܘܖ̈ܒܳܢܶܐ: ܠܳܐ ܗ̱ܘܳܐ ܥܰܠ ܡܰܠܟܳܐ ܒܰܠܚܽܘܕ ܒܰܣܪܰܬ ܘܰܫܬܺܝ ܡܰܠܟܬܳܐ: ܐܶܠܳܐ ܥܰܠ ܟܽܠܗܽܘܢ ܪܰܘܖ̈ܒܳܢܶܐ: ܘܥܰܠ ܟܽܠܗܽܘܢ ܥܰܡ̈ܡܶܐ ܕܰܒܟܽܠܗܶܝܢ ܡܕܺܝ̈ܢܳܬܳܐ ܕܡܰܠܟܳܐ ܐܰܚܫܺܝܪܺܝܫ.
17 ܘܟܰܕ ܢܶܦܽܘܩ ܛܶܒܳܐ ܘܡܶܠܬܳܐ ܗܳܕܶܐ ܥܰܠ ܟܽܠܗܶܝܢ ܢܶܫ̈ܶܐ: ܢܶܗܘ̈ܝܳܢ ܫܳܝ̈ܛܳܢ ܘܒܳܣܖ̈ܳܢ ܓܰܒܖ̈ܰܝܗܶܝܢ ܒܥܰܝܢܰܝ̈ܗܶܝܢ: ܘܢܶܗܘ̈ܝܳܢ ܐܳܡܖ̈ܳܢ ܕܡܰܠܟܳܐ ܐܰܚܫܺܝܪܺܝܫ ܦ̣ܩܰܕ ܠܡܰܥܳܠܽܘ ܠܘܰܫܬܺܝ ܡܰܠܟܬܳܐ ܩܕܳܡܰܘܗܝ: ܘܠܳܐ ܥܶܠܰܬ.
18 ܝܰܘܡܳܢܳܐ ܢܺܐܡܪܽܘܢ ܪܰܘܖ̈ܒܳܢܶܐ ܕܦܳܪܶܣ ܘܰܕܡܳܕܰܝ ܕܰܫܡܰܥܘ ܦܶܬܓܳܡܳܗ̇ ܕܡܰܠܟܬܳܐ ܡܶܢ ܟܽܠܗܽܘܢ ܪܰܘܖ̈ܒܳܢܶܐ ܕܡܰܠܟܳܐ: ܘܟܽܠܶܗ ܒܣܺܝܪܽܘܬܳܐ ܘܪܽܘܓܙܳܐ.
19 ܐܶܢ ܥܰܠ ܡܰܠܟܳܐ ܫܰܦܺܝܪ ܢܶܦܽܘܩ ܦܶܬܓܳܡܳܐ ܕܡܰܠܟܽܘܬܳܐ ܡܶܢ ܩܕܳܡܰܘܗܝ: ܘܢܶܬܟܬܶܒ ܒܢܳܡܽܘܣ ܡܳܕܰܝ ܘܦܳܪܶܣ ܕܠܳܐ ܥܳܒܰܪ. ܘܬܽܘܒ ܠܳܐ ܬܶܥܽܘܠ ܘܰܫܬܺܝ ܡܰܠܟܬܳܐ ܠܘܳܬ ܡܰܠܟܳܐ ܐܰܚܫܺܝܪܺܝܫ. ܘܡܰܠܟܽܘܬܳܗ̇ ܢܶܬܶܠ ܡܰܠܟܳܐ ܠܰܚܒܰܪܬܳܗ̇ ܕܛܳܒܳܐ ܡܶܢܳܗ̇.
20 ܘܢܶܫܬܡܰܥ ܦܶܬܓܳܡܳܐ ܕܡܰܠܟܳܐ. ܘܢܶܥܒܰܪ ܒܟܽܠܶܗ ܡܰܠܟܽܘܬܳܐ: ܡܶܛܽܠ ܕܪܰܒܳܐ ܗ̱ܝ: ܘܟܽܠܗܶܝܢ ܢܶܫ̈ܶܐ ܢܶܥ̈ܒܕܳܢ ܐܺܝܩܳܪܳܐ ܠܓܰܒܖ̈ܰܝܗܶܝܢ: ܡܶܢ ܪܰܒܳܐ ܘܰܥܕܰܡܳܐ ܠܰܙܥܽܘܪܳܐ.
21 ܘܰܫܦܰܪ ܦܶܬܓܳܡܳܐ ܗܳܢܳܐ ܒܥܰܝܢܰܘ̈ܗܝ ܕܡܰܠܟܳܐ ܘܰܕܪܰܘܖ̈ܒܳܢܰܘܗܝ. ܘܰܥܒܰܕ ܡܰܠܟܳܐ ܐܰܝܟ ܦܶܬܓܳܡܶܗ ܕܰܡܥܰܘܟܳܢ.
22 ܘܫܰܕܰܪ ܐܶܓܖ̈ܳܬܳܐ ܠܟܽܠܗܶܝܢ ܡܕܺܝ̈ܢܳܬܶܗ ܕܡܰܠܟܳܐ: ܠܰܡܕܺܝܢ̱ܬܳܐ ܐܰܝܟ ܟܬܳܒܳܗ̇: ܘܰܠܥܰܡܳܐ ܐܰܝܟ ܠܶܫܳܢܶܗ: ܠܡܶܗܘܳܐ ܟܽܠ ܓܒܰܪ ܫܰܠܺܝܛ ܒܒܰܝܬܶܗ: ܘܰܡܡܰܠܶܠ ܐܰܝܟ ܠܶܫܳܢ ܥܰܡܶܗ.