Esther 9
The Book of Esther
܀ ܐܣܬܝܪ ܛ ܀
1 ܘܰܒܝܰܪܚܳܐ ܕܰܬܪܶܥܣܰܪ ܕܗܽܘ ܐܳܕܳܪ ܒܰܬܠܳܬܰܥܶܣܖ̈ܶܐ: ܟܰܕ ܡܰܛܺܝ ܙܰܒܢܳܐ ܕܦܶܬܓܳܡܳܐ ܕܡܰܠܟܳܐ ܘܦܽܘܩܕܳܢܶܗ ܠܡܶܬܥܒܳܕܽܘ ܠܰܒܥܶܠܕܒܳܒܰܝ̈ܗܽܘܢ: ܐܶܫܬܰܚܠܦܰܬ ܥܒܺܝܕܬܳܐ: ܕܢܶܫܬܰܠܛܽܘܢ ܝܽܗܘܕܳܝ̈ܶܐ ܒܣܳܢܐܰܝ̈ܗܽܘܢ.
2 ܘܶܐܬܟܰܢܰܫܘ ܝܽܗ̱ܘܕܳܝ̈ܶܐ ܒܩܽܘܖ̈ܺܝܗܽܘܢ: ܘܰܒܟܽܠܗܶܝܢ ܡܕܺܝ̈ܢܳܬܳܐ ܕܡܰܠܟܳܐ ܐܰܚܫܺܝܪܺܝܫ: ܕܢܰܘܫܛܽܘܢ ܐܺܝܕܳܐ ܒܥܳܒܕܰܝ̈ ܒܺܝ̈ܫܳܬܗܽܘܢ ܘܐ̱ܢܳܫ ܠܳܐ ܩܳܡ̣ ܩܕܳܡܰܝܗܽܘܢ: ܡܶܛܽܠ ܕܢܶܦܠܰܬ ܕܶܚܠܰܬܗܽܘܢ ܥܰܠ ܟܽܠܗܽܘܢ ܥܰܡ̈ܡܶܐ.
3 ܘܟܽܠܗܽܘܢ ܪܰܘܖ̈ܒܳܢܶܐ ܕܰܡܕܺܝ̈ܢܳܬܳܐ: ܘܖ̈ܰܒܰܝ ܚܰܝ̈ܠܶܐ: ܘܡܳܖ̈ܰܘܳܬܳܐ: ܘܥܳܒܕܰܝ̈ ܥܒܳܕܳܐ ܕܡܰܠܟܳܐ: ܡܝܰܩܪܺܝܢ ܠܝܽܗܘ̈ܕܳܝܶܐ. ܡܶܛܽܠ ܕܢܶܦܠܰܬ ܕܶܚܠܬܳܐ ܕܡܰܠܟܳܐ ܥܠܰܝܗܽܘܢ.
4 ܡܶܛܽܠ ܕܺܝܪܶܒ ܡܽܘܪܕܟܰܝ ܠܘܳܬ ܡܰܠܟܳܐ. ܘܰܫܡܶܗ ܐܳܙܶܠ ܗ̱ܘܳܐ ܒܟܽܠܗܶܝܢ ܡܰܠܟܘ̈ܳܬܳܐ: ܡܶܛܽܠ ܕܓܰܒܪܳܐ ܡܽܘܪܕܟܰܝ ܐܳܙܶܠ ܗ̱ܘܳܐ ܘܺܝܪܶܒ.
5 ܘܰܡܚܰܘ ܝܽܗ̱ܘܕܳܝ̈ܶܐ ܒܟܽܠܗܽܘܢ ܒܥܶܠܕܒܳܒܰܝ̈ܗܽܘܢ ܡܚܽܘܬܳܐ ܕܚܰܪܒܳܐ: ܘܰܕܩܶܛܠܳܐ: ܘܕܰܐܒܕܳܢܳܐ. ܘܰܥܒܰܕܘ ܒܣܳܢܰܐܝ̈ܗܽܘܢ ܐܰܝܟ ܨܶܒܝܳܢܗܽܘܢ
6 ܒܫܽܘܫܰܢ ܒܺܝܪܬܳܐ: ܩܛܰܠܘ ܝܽܗ̱ܘܕܳܝ̈ܶܐ ܚܰܡܶܫܡܳܐܐ ܓܰܒܖ̈ܺܝܢ.
7 ܘܰܠܫܰܦܺܝܪܽܘܬ: ܘܰܠܕܰܠܟܽܘܢ: ܘܰܠܐܶܣܦܽܘܬ.
8 ܘܰܠܦܰܪܛܠܰܛ: ܘܠܰܕܠܳܝܳܐ: ܘܰܠܕܺܝܪܳܐ.
9 ܘܰܠܦܺܝܣܽܘܬ: ܘܰܠܕܺܝܣܰܝ: ܘܠܳܐܕܪܺܝ: ܘܰܠܙܽܘܬ.
10 ܥܶܣܪܳܐ ܒܢܰܘ̈ܗܝ ܕܗܳܡܳܢ ܐܰܓܳܓܳܝܳܐ. ܒܥܶܠܕܒܳܒܳܐ ܕܺܝܗܽܘ̈ܕܳܝܶܐ ܩܛܰܠܘ. ܘܰܠܒܶܙܬܳܐ ܠܳܐ ܐܰܘܫܶܛܘ ܐܺܝܕܰܝ̈ܗܽܘܢ.
11 ܒܗܰܘ ܝܰܘܡܳܐ ܥܰܠ ܡܶܢܝܳܢܳܐ ܕܰܩܛܺܝ̈ܠܶܐ ܒܫܽܘܫܰܢ ܒܺܝܪܬܳܐ ܩܕܳܡ ܡܰܠܟܳܐ.
12 ܘܶܐܡܰܪ ܠܶܐܣܬܺܝܪ ܡܰܠܟܬܳܐ ܒܫܽܘܫܰܢ ܒܺܝܪܬܳܐ: ܩܛܰܠܘ ܝܽܗܘ̈ܕܳܝܶܐ: ܘܰܐܘܒܶܕܘ ܚܰܡܶܫܡܳܐܐ ܓܰܒܖ̈ܺܝܢ: ܘܠܰܥܣܰܪ ܒܢܰܘ̈ܗܝ ܕܗܳܡܳܢ. ܘܰܒܫܰܪܟܳܐ ܕܰܡܕܺܝ̈ܢܳܬܳܐ ܡܳܢܳܐ ܥܒܰܕܘ. ܘܡܳܢܳܐ ܗ̱ܝ ܫܶܐܠܬܶܟܝ: ܢܶܬܥܒܶܕ ܠܶܟܝ. ܘܡܳܢܳܐ ܗ̱ܝ ܒܳܥܽܘܬܶܟܝ: ܢܶܬܺܝܗܶܒ ܠܶܟܝ.
13 ܘܶܐܡܪܰܬ ܐܶܣܬܺܝܪ: ܢܶܬܺܝܗܶܒ ܡܚܳܪ ܠܝܽܗܘ̈ܕܳܝܶܐ ܕܢܶܥܒܕܽܘܢ ܐܰܝܟ ܕܝܰܘܡܳܢܳܐ. ܘܰܠܥܶܣܪܳܐ ܒܢܰܘ̈ܗܝ ܕܗܳܡܳܢ ܢܶܬܠܽܘܢ ܐܶܢܽܘܢ ܥܰܠ ܩܰܝܣܳܐ.
14 ܘܶܐܡܰܪ ܡܰܠܟܳܐ. ܢܶܥܒܕܽܘܢ ܗܳܟܰܢܳܐ ܘܶܐܬܦܩܶܕ ܦܽܘܩܕܳܢܳܐ ܒܫܽܘܫܰܢ ܘܰܠܥܶܣܪܳܐ ܒܢܰܘ̈ܗܝ ܕܗܳܡܳܢ ܬܠܰܘ ܥܰܠ ܩܰܝܣܳܐ.
15 ܘܶܐܬܟܰܢܰܫܘ ܝܽܗ̱ܘܕܳܝ̈ܶܐ ܕܰܒܫܽܘܫܰܢ ܐܳܦ ܒܰܐܪܒܰܥܶܣܖ̈ܶܐ ܒܶܗ ܒܝܰܪܚܳܐ. ܘܩܰܛܶܠܘ ܒܫܽܘܫܰܢ ܬܠܳܬܡܳܐܐ ܓܰܒܖ̈ܺܝܢ. ܘܰܠܒܶܙܬܳܐ ܠܳܐ ܐܰܘܫܶܛܘ ܐܺܝܕܰܝ̈ܗܽܘܢ.
16 ܘܫܰܪܟܳܐ ܕܺܝܗܽܘ̈ܕܳܝܶܐ ܕܒܰܡܕܺܝ̈ܢܳܬܳܐ ܕܡܰܠܟܳܐ ܐܶܬܟܰܢܰܫܘ ܘܩ̣ܳܡܘ ܠܢܰܦܫܗܽܘܢ: ܘܶܐܬܬܢܺܝܚܘ ܡܶܢ ܒܥܶܠܕܒܳܒܰܝ̈ܗܽܘܢ. ܘܰܩܛܰܠܘ ܡܶܢ ܣܳܢܰܐܝ̈ܗܽܘܢ: ܫܰܒܥܺܝܢ ܘܚܰܡܫܳܐ ܐܰܠܦܺܝ̈ܢ. ܘܰܠܒܶܙܬܳܐ ܠܳܐ ܐܰܘܫܶܛܘ ܐܺܝܕܰܝ̈ܗܽܘܢ.
17 ܒܰܬܠܳܬ ܥܶܣܪܳܐ ܒܝܰܪܚܳܐ ܐܳܕܳܪ: ܘܶܐܬܬܢܺܝܚܘ ܒܰܐܪܒܰܥܶܣܖ̈ܶܐ ܒܶܗ ܒܝܰܪܚܳܐ.
18 ܘܥܰܒܕܽܘܗܝ ܝܰܘܡܳܐ ܕܡܰܫܬܝܳܐ ܘܰܕܚܰܕܽܘܬܳܐ.
19 ܡܶܛܽܠ ܗܳܢܳܐ ܝܽܗܘ̈ܕܳܝܶܐ ܡܒܰܕܖ̈ܶܐ ܝܳܬܒܰܝ̈ ܩܽܘܖ̈ܝܳܐ ܡܒܰܕܖ̈ܳܬܳܐ: ܥܳܒܕܺܝܢ ܒܰܐܪܒܰܥܣܖ̈ܶܐ ܒܳܐܕܳܪ ܚܰܕܽܘܬܳܐ: ܘܡܰܫܬܝܳܐ ܘܝܰܘܡܳܐ ܛܳܒܳܐ. ܘܰܡܫܰܕܪܺܝܢ ܡܢܰܘ̈ܳܬܳܐ ܓܒܰܪ ܠܚܰܒܪܶܗ.
20 ܘܰܟܬܰܒ ܡܽܘܪܕܟܰܝ ܡ̈ܶܠܶܐ ܗܳܠܶܝܢ. ܘܫܰܕܰܪ ܐܶܓܖ̈ܳܬܳܐ ܠܟܽܠܗܽܘܢ ܝܽܗ̱ܘܕܳܝ̈ܶܐ ܕܰܒܟܽܠܗܶܝܢ ܡܕܺܝ̈ܢܳܬܳܐ ܕܡܰܠܟܳܐ ܐܰܚܫܺܝܪܺܝܫ: ܕܩܰܖ̈ܺܝܒܳܢ ܘܰܕܖ̈ܰܚܺܝܩܳܢ.
21 ܕܰܢܩܰܒܠܽܘܢ ܥܠܰܝܗܽܘܢ ܕܢܶܗܘܽܘܢ ܥܳܒܕܺܝܢ ܒܰܐܪܒܰܥܶܣܖ̈ܶܐ ܘܰܒܟܶܣܐܳܐ ܒܳܐܕܳܪ ܟܽܠ ܫܢܳܐ ܒܰܫܢܳܐ.
22 ܐܰܝܟ ܝܰܘ̈ܡܳܬܳܐ ܕܶܐܬܬܢܺܝܚܘ ܒܗܽܘܢ ܝܽܗ̱ܘܕܳܝ̈ܶܐ ܡܶܢ ܒܥܶܠܕܒܳܒܰܝ̈ܗܽܘܢ: ܝܰܪܚܳܐ ܕܶܐܫܬܰܚܠܰܦ ܡܶܢ ܕܽܘܘܳܢܳܐ ܠܚܰܕܽܘܬܳܐ: ܘܡܶܢ ܐܶܒܠܳܐ ܠܝܰܘܡܳܐ ܛܳܒܐ. ܕܢܶܥܒܕܽܘܢ ܐܶܢܽܘܢ ܠܝܰܘ̈ܡܳܬܳܐ ܕܡܰܫܬܝܳܐ ܘܰܕܚܰܕܽܘܬܳܐ: ܘܕܰܢܫܰܕܪܽܘܢ ܡܢܰܘ̈ܳܬܳܐ ܐ̱ܢܳܫ ܠܚܰܒܪܶܗ: ܘܡܰܘܗ̈ܒܳܬܳܐ ܠܒܳܝ̇ܫܳܐ.
23 ܘܩܰܒܶܠܘ ܝܽܗ̱ܘܕܳܝ̈ܶܐ ܥܠܰܝܗܽܘܢ ܡܶܕܶܡ ܕܫܰܪܺܝܘ ܠܡܶܥܒܰܕ: ܘܡܶܕܶܡ ܕܰܟ̣ܬܰܒ ܡܽܘܪܕܟܰܝ.
24 ܡܶܛܽܠ ܗܳܡܳܢ ܒܰܪ ܗܰܡܰܕܰܬ ܐܰܓܳܓܳܝܳܐ: ܒܥܶܠܕܒܳܒܳܐ ܕܟܽܠܗܽܘܢ ܝܽܗ̱ܘܕܳܝ̈ܶܐ: ܕܶܐܬܚܰܫܰܒ ܥܰܠ ܝܽܗ̱ܘܕܳܝ̈ܶܐ ܕܢܰܘܒܶܕ ܐܶܢܽܘܢ. ܘܰܐܪܡܺܝ ܦܶܨ̈ܶܐ ܕܢܶܚܪܽܘܒ ܐܶܢܽܘܢ.
25 ܘܡܳܐ ܕܥܳܐܠܳܐ ܗ̱ܘܳܬ ܐܶܣܬܺܝܪ ܩܕܳܡ ܡܰܠܟܳܐ: ܐܳܡܰܪ ܗ̱ܘܳܐ ܣܳܦܪܳܐ ܢܶܗ̈ܦܟܳܢ ܡܰܚܫ̈ܒܳܬܳܐ ܒܺܝ̈ܫܳܬܳܐ ܥܰܠ ܪܺܝܫܶܗ ܕܡܰܢ ܐܶܬܚܰܫܰܒ ܥܰܠ ܝܽܗ̱ܘܕܳܝ̈ܶܐ: ܘܢܶܬܠܽܘܢܳܝܗܝ ܘܠܰܒܢܰܘ̈ܗܝ ܥܰܠ ܩܰܝܣܳܐ.
26 ܡܶܛܽܠ ܗܳܢܳܐ ܩܪܳܐ ܐܶܢܽܘܢ ܠܝܰܘ̈ܡܳܬܳܐ ܗܳܢܽܘܢ ܦܽܘܖ̈ܳܝܶܐ: ܥܰܠ ܫܶܡ ܦܶܨܚܳܐ ܡܶܛܽܠ ܡ̈ܶܠܶܐ ܕܶܐܓܰܪܬܳܐ ܗܳܕܶܐ: ܘܥܰܠ ܡܶܕܶܡ ܕܰܚܙܰܘ: ܘܥܰܠ ܡܶܕܶܡ ܕܰܓܕܰܫ ܠܗܽܘܢ.
27 ܘܩܰܒܶܠܘ ܝܽܗ̱ܘܕܳܝ̈ܶܐ ܥܠܰܝܗܽܘܢ: ܘܥܰܠ ܙܰܪܥܗܽܘܢ: ܘܥܰܠ ܟܽܠ ܕܡܶܬܠܰܘܶܐ ܠܗܽܘܢ: ܕܠܳܐ ܢܶܒܛܰܠ: ܕܢܶܗܘܽܘܢ ܥܳܒܕܺܝܢ ܗܳܠܶܝܢ ܬܪܶܝܢ ܝܰܘ̈ܡܺܝܢ ܐܰܝܟ ܕܰܟܬܺܝܒܺܝܢ ܒܙܰܒܢܗܽܘܢ ܒܟܽܠ ܫܢܳܐ.
28 ܘܝܰܘ̈ܡܳܬܳܐ ܗܳܠܶܝܢ ܡܶܬܕܰܟܪܺܝܢ ܘܡܶܬܥܰܒܕܺܝܢ ܒܟܽܠ ܫܰܖ̈ܒܳܬܳܐ ܘܰܡܕܺܝ̈ܢܳܬܳܐ: ܘܩܽܘܖ̈ܝܳܐ. ܘܝܰܘ̈ܡܳܬܳܐ ܕܦܽܘܖ̈ܳܝܶܐ ܗܳܠܶܝܢ ܠܳܐ ܢܶܥܒܪܽܘܢ ܡܶܢ ܓܰܘ ܝܽܗ̱ܘܕܳܝ̈ܶܐ. ܘܕܽܘܟܪܳܢܗܽܘܢ ܠܳܐ ܢܶܥܒܰܪ ܡܶܢ ܙܰܪܥܗܽܘܢ.
29 ܘܟܶܬܒܰܬ ܐܶܣܬܺܝܪ ܡܰܠܟܬܳܐ ܒܰܪܬ ܐܰܒܺܝܚܶܠ: ܘܡܽܘܪܕܟܰܝ ܝܽܗܘܕܳܝܳܐ ܟܽܠܗܶܝܢ ܫܰܪܺܝܖ̈ܳܬܳܐ: ܕܢܰܫܪܽܘܢ ܐܶܓܰܪܬܳܐ ܗܳܕܶܐ ܕܦܽܘܖ̈ܳܝܶܐ.
30 ܘܫܰܕܰܪܘ ܐܶܓܖ̈ܳܬܳܐ ܠܟܽܠܗܽܘܢ ܝܽܗ̱ܘܕܳܝ̈ܶܐ: ܠܰܡܳܐܐ ܘܥܶܣܪܺܝܢ ܘܰܫܒܰܥ ܡܕܺܝ̈ܢܳܢ ܕܡܰܠܟܽܘܬܶܗ ܕܰܐܚܫܺܝܪܺܝܫ ܡܰܠܟܳܐ: ܡ̈ܶܠܶܐ ܕܰܫܪܳܪܳܐ ܘܕܰܫܠܳܡܳܐ.
31 ܕܢܰܫܪܽܘܢ ܝܰܘ̈ܡܳܬܳܐ ܕܦܽܘܖ̈ܳܝܶܐ ܗܳܠܶܝܢ ܒܙܰܒܢ̱ܗܽܘܢ: ܐܰܝܟ ܕܰܐܫܰܪܘ ܥܠܰܝܗܽܘܢ ܡܽܘܪܕܟܰܝ ܝܽܗܘܕܳܝܳܐ ܘܶܐܣܬܺܝܪ ܡܰܠܟܬܳܐ: ܐܰܝܟ ܕܰܐܫܪܽܘܢ ܗܶܢܽܘܢ ܥܠܰܝܗܽܘܢ ܘܥܰܠ ܒܢܰܝ̈ܗܽܘܢ ܦܽܘܩܕܳܢܳܐ: ܘܨܰܘܡܗܽܘܢ ܘܰܨܠܽܘܬܗܽܘܢ.
32 ܘܡܺܐܡܪܳܗ̇ ܕܶܐܣܬܺܝܪ ܐܰܫܰܪ ܥܰܠ ܡ̈ܶܠܶܐ ܗܳܠܶܝܢ ܕܦܽܘܖ̈ܳܝܶܐ: ܘܶܐܬܟܬܶܒ ܒܣܶܦܪܳܐ.