Esther 3
The Book of Esther
܀ ܐܣܬܝܪ ܓ ܀
1 ܘܒܳܬܰܪ ܡ̈ܶܠܶܐ ܗܳܠܶܝܢ ܐܰܘܪܶܒ ܡܰܠܟܳܐ ܐܰܚܫܺܝܪܺܝܫ ܠܶܗܡܳܢ ܒܰܪ ܗܰܡܰܕܰܬ ܐܰܓܳܓܳܝܳܐ: ܘܰܐܪܺܝܡ ܟܽܘܪܣܝܶܗ ܠܥܶܠ ܡܶܢ ܟܽܠܗܽܘܢ ܪܰܘܖ̈ܒܳܢܶܐ ܕܥܰܡܶܗ.
2 ܘܟܽܠܗܽܘܢ ܥܰܒ̈ܕܶܐ ܕܡܰܠܟܳܐ ܕܰܒܬܰܪܥܳܐ ܕܡܰܠܟܳܐ ܒܳܪܟܺܝܢ ܗ̱ܘܰܘ ܘܣܳܓܕܺܝܢ ܠܶܗܡܳܢ. ܡܶܛܽܠ ܕܗܳܟܰܢܳܐ ܦܩܰܕ ܥܠܰܘܗܝ ܡܰܠܟܳܐ. ܘܡܽܘܪܕܟܰܝ ܠܳܐ ܒܳܪܶܟ ܗ̱ܘܳܐ ܘܣܳܓܶܕ.
3 ܘܳܐܡܪܺܝܢ ܥܰܒ̈ܕܶܐ ܕܡܰܠܟܳܐ ܒܬܰܪܥܳܐ ܕܡܰܠܟܳܐ ܠܡܽܘܪܕܟܰܝ: ܠܡܳܢܳܐ ܥܳܒܰܪ ܐܰܢ̱ܬ ܥܰܠ ܦܽܘܩܕܳܢܳܐ ܕܡܰܠܟܳܐ.
4 ܘܟܰܕ ܐܳܡܪܺܝܢ ܗ̱ܘܰܘ ܒܟܽܠܝܽܘܡ: ܘܠܳܐ ܫܳܡܰܥ ܗ̱ܘܳܐ ܠܗܽܘܢ: ܚܰܘܺܝܘ ܠܶܗܡܳܢ ܕܢܶܕܥܽܘܢ ܐܶܢ ܫܰܪܺܝܖ̈ܳܢ ܡܶܠܰܘ̈ܗܝ ܕܡܽܘܪܕܟܰܝ: ܡܶܛܽܠ ܕܚܰܘܺܝ ܐܶܢܽܘܢ ܕܝܽܗܘܕܳܝܰܐ ܗ̱ܘ.
5 ܘܰܚܙܳܐ ܗܳܡܳܢ ܕܡܽܘܪܕܟܰܝ ܠܳܐ ܒܳܪܶܟ ܗ̱ܘܳܐ ܘܣܳܓܶܕ ܠܶܗ. ܘܶܐܬܡܠܺܝ ܗܳܡܳܢ ܚܶܡܬܳܐ ܥܰܠ ܡܽܘܪܕܟܰܝ.
6 ܘܰܒܨܺܝܪܳܐ ܗ̱ܘܳܬ ܥܒܺܝܕܬܳܐ: ܕܢܰܘܫܶܛ ܐܺܝܕܶܗ ܥܰܠ ܡܽܘܪܕܟܰܝ ܒܰܠܚܽܘܕܰܘܗܝ ܡܶܛܽܠ ܕܚܰܘܝܽܘܗܝ ܥܰܡܶܗ ܕܡܽܘܪܕܟܰܝ ܘܰܒܥܳܐ ܗܳܡܳܢ ܕܢܰܘܒܶܕ ܠܟܽܠܗܽܘܢ ܝܽܗ̱ܘܕܳܝ̈ܶܐ ܕܰܒܟܽܠܶܗ ܡܰܠܟܽܘܬܶܗ ܕܰܐܚܫܺܝܪܺܝܫ: ܥܰܡܶܗ ܕܡܽܘܪܕܟܰܝ.
7 ܒܝܰܪܚܳܐ ܩܰܕܡܳܝܳܐ ܕܗܽܘ ܢܺܝܣܳܢ: ܒܰܫܢܰܬ ܬܰܪܬܰܥܶܣܖ̈ܶܐ ܕܡܰܠܟܳܐ ܐܰܚܫܺܝܪܺܝܫ: ܐܰܪܡܺܝ ܦܶܨ̈ܶܐ. ܘܰܗܽܘܝ̈ ܦܶܨ̈ܶܐ ܩܕܳܡ ܗܳܡܳܢ: ܡܶܢ ܝܽܘܡ ܠܝܽܘܡ: ܘܡܶܢ ܝܺܪܰܚ ܠܺܝܪܰܚ: ܒܝܰܪܚܳܐ ܕܰܬܪܶܥܣܰܪ ܕܗܽܘ ܐܳܕܳܪ.
8 ܐܶܡܰܪ ܗܳܡܳܢ ܠܡܰܠܟܳܐ: ܐܰܚܫܺܝܪܺܝܫ: ܐܺܝܬ ܥܰܡܳܐ ܡܒܰܕܰܪ ܘܰܡܒܰܙܰܩ ܒܟܽܠܗܶܝܢ ܡܕܺܝ̈ܢܳܬܶܗ ܕܡܰܠܟܳܐ ܐܰܚܫܺܝܪܺܝܫ. ܢܳܡܽܘܣܰܝ̈ܗܽܘܢ ܦܪܺܝܫܺܝܢ ܡܶܢ ܟܽܠ ܥܰܡ. ܘܢܳܡܽܘܣܳܐ ܕܡܰܠܟܳܐ ܠܳܐ ܥܳܒܕܺܝܢ. ܘܰܠܡܰܠܟܳܐ ܠܳܐ ܘܳܠܶܐ ܕܢܶܫܒܽܘܩ ܐܶܢܽܘܢ.
9 ܐܶܢ ܥܰܠ ܡܰܠܟܳܐ ܫܰܦܺܝܪ: ܢܶܟܬܽܘܒ ܕܢܺܐܒܕܽܘܢ. ܘܥܶܣܪܳܐ ܐܰܠܦܺܝ̈ܢ ܟܰܟܖ̈ܶܐ ܕܟܶܣܦܳܐ ܐܶܬܩܽܘܠ ܥܰܠ ܐܺܝܕܳܐ ܕܥܳܒܕܰܝ̈ ܠܡܰܥܳܠܽܘ ܠܓܰܙܳܐ ܕܡܰܠܟܳܐ.
10 ܫ̣ܩܰܠ ܡܰܠܟܳܐ ܥܶܙܰܩܬܳܐ ܡܶܢ ܐܺܝܕܶܗ. ܘܝܰܗܒ ܠܶܗܡܳܢ ܒܰܪ ܗܰܡܰܕܰܬ ܐܰܓܳܓܳܝܳܐ ܒܥܶܠܕܒܳܒܳܐ ܕܺܝܗܽܘ̈ܕܳܝܶܐ.
11 ܘܶܐܡܰܪ ܡܰܠܟܳܐ: ܟܶܣܦܳܟ ܝܺܗܺܝܒ ܠܳܟ: ܘܥܰܡܳܐ: ܠܡܶܥܒܰܕ ܠܶܗ ܟܽܠ ܡܶܕܶܡ ܕܫܰܦܺܝܪ ܒܥܰܝܢܰܝ̈ܟ.
12 ܘܶܐܬܩܪܺܝ ܣܶܦܪܳܐ ܕܡܰܠܟܳܐ ܒܝܰܘܡܳܐ ܗܰܘ. ܒܝܰܪܚܳܐ ܩܰܕܡܳܝܳܐ: ܒܰܬܠܳܬܰܥܶܣܖ̈ܶܐ ܒܶܗ ܒܝܰܪܚܳܐ: ܐܶܬܟܬܶܒ ܟܽܠ ܡܶܕܶܡ ܕܰܦܩܰܕ ܗܳܡܳܢ ܠܪܰܒ ܚܰܝ̈ܠܶܐ ܕܡܰܠܟܳܐ: ܘܰܠܡܳܖ̈ܰܘܳܬܳܐ ܕܰܒܟܽܠ ܡܕܺܝܢܳܐ ܘܰܡܕܺܝܢܳܐ: ܘܰܠܖ̈ܰܘܖ̈ܒܳܢܰܝ ܥܰܡ̈ܡܶܐ: ܡܕܺܝܢ̱ܬܳܐ ܐܰܝܟ ܟܬܳܒܳܐ: ܘܰܠܥܰܡܳܐ ܐܰܝܟ ܠܶܫܳܢܶܗ. ܒܫܶܡ ܡܰܠܟܳܐ ܐܰܚܫܺܝܪܺܝܫ ܐܶܬܟܬܶܒ: ܘܶܐܬܚܬܶܡ ܒܥܶܙܰܩܬܶܗ ܕܡܰܠܟܳܐ.
13 ܘܶܐܫܬܰܕܰܪ ܐܰܓܖ̈ܳܬܳܐ ܒܝܰܕ ܖ̈ܰܗܳܛܶܐ ܠܟܽܠܗܶܝܢ ܡܕܺܝ̈ܢܳܬܳܐ ܕܡܰܠܟܳܐ: ܠܡܶܚܪܰܒ ܘܰܠܡܶܩܛܰܠ ܘܰܠܡܰܘܒܳܕܽܘ ܠܟܽܠܗܽܘܢ ܝܽܗܘܕܳܝ̈ܶܐ ܡܶܢ ܥܠܰܝܡ̈ܶܐ ܘܰܥܕܰܡܳܐ ܠܣܳܒ̈ܶܐ: ܘܰܛܠܳܝ̈ܶܐ ܘܢܶܫ̈ܶܐ ܒܚܰܕ ܝܽܘܡ ܒܰܬܠܳܬܰܥܶܣܖ̈ܶܐ ܒܝܰܪܚܳܐ ܐܳܕܳܪ. ܘܢܶܟܣܰܝ̈ܗܽܘܢ ܠܒܶܙܬܳܐ. ܒܚܰܕ ܝܽܘܡ: ܒܺܝܪܰܚ ܐܳܕܳܪ ܒܰܬܠܳܬܰܥܶܣܖ̈ܶܐ ܐܶܬܟܬܶܒ.
14 ܘܦܰܪܫܰܓܢܶܗ ܕܰܟܬܳܒܳܐ ܐܶܬܺܝܗܶܒ ܒܟܽܠ ܡܕܺܝܢܳܐ ܘܰܡܕܺܝܢܳܐ. ܘܰܦܩܰܕ ܠܟܽܠܗܽܘܢ ܥܰܡ̈ܡܶܐ. ܕܢܶܗܘܽܘܢ ܡܛܰܝܒ̈ܶܐ ܠܝܰܘܡܳܐ ܗܳܢܳܐ.
15 ܘܖ̈ܰܗܳܛܶܐ ܢܦ̣ܰܩܘ ܡܣܰܪܗܒܺܝܢ ܒܦܽܘܩܕܳܢܳܐ ܕܡܰܠܟܳܐ: ܘܦܶܬܓܳܡܳܐ ܐܶܬܦܩܶܕ ܒܫܽܘܫܰܢ ܒܺܝܪܬܳܐ. ܘܡܰܠܟܳܐ ܘܗܳܡܳܢ ܐܶܣܬܡܶܟܘ ܠܡܶܫܬܳܐ ܐܰܟܚܕܳܐ: ܘܰܡܕܺܝܢ̱ܬܳܐ ܫܽܘܫܰܢ ܐܶܫܬܰܓܫܰܬ.