Ezra 3
The Book of Ezra
܀ ܥܙܪܐ ܓ ܀
1 ܘܡܰܛܺܝ ܝܰܪܚܳܐ ܫܒܺܝܥܳܝܳܐ: ܘܰܒܢܰܝ̈ ܝܺܣܪܳܐܶܝܠ ܒܩܽܘܖ̈ܺܝܗܽܘܢ. ܘܶܐܬܟܰܢܰܫܘ ܥܰܡܳܐ ܐܰܝܟ ܓܰܒܪܳܐ ܚܰܕ: ܠܡܶܣܰܩ ܠܽܐܘܪܺܫܠܶܡ.
2 ܘܩ̣ܳܡܘ ܝܶܫܽܘܥ ܒܰܪ ܝܽܘܙܳܕܳܩ ܘܰܐܚܰܘ̈ܗܝ ܟܽܘܡܖ̈ܶܐ: ܘܙܽܘܪܒܳܒܶܠ ܒܰܪ ܫܶܠܰܬܐܶܝܠ ܘܰܐܚܰܘ̈ܗܝ. ܘܰܒܢܰܘ ܡܰܕܒܚܳܐ ܠܰܐܠܳܗܳܐ ܕܺܝܣܪܳܐܶܝܠ ܠܡܰܣܳܩܽܘ ܥܠܰܘܗܝ ܥ̈ܠܰܘܳܬܳܐ: ܐܰܝܟܰܢܳܐ ܕܰܟܬܺܝܒ ܒܢܳܡܽܘܣܳܐ ܕܡܽܘܫܶܐ ܢܒܺܝܳܐ ܕܰܐܠܳܗܳܐ.
3 ܘܶܐܬܬܰܩܰܢ ܡܰܕܒܚܳܐ ܥܰܠ ܡܰܬܩܢܶܗ. ܡܶܛܽܠ ܕܕܶܚܠܬܳܐ ܪܰܒܬܳܐ ܗ̱ܘܳܬ ܥܠܰܝܗܽܘܢ ܡܶܢ ܥܰܡ̈ܡܶܐ ܕܥܳܡܪܺܝܢ ܒܰܡܕܺܝ̈ܢܳܬܳܐ ܘܰܐܣܶܩܘ ܥܠܰܘܗܝ ܥ̈ܠܰܘܳܬܳܐ ܠܡܳܪܝܳܐ: ܥܠܳܬܳܐ ܠܨܰܦܪܳܐ ܘܰܠܪܰܡܫܳܐ.
4 ܘܰܥܒܰܕܘ ܥܺܐܕܳܐ ܕܰܡܛܰܠ̈ܠܶܐ ܐܰܝܟ ܕܰܟܬܺܝܒ: ܘܰܥ̈ܠܰܘܳܬܳܐ ܝܽܘܡ ܒܝܽܘܡ ܒܡܶܢܝܳܢܳܐ ܐܰܝܟ ܢܳܡܽܘܣܳܐ: ܚܽܘܫܒܳܢ ܝܽܘܡ ܒܝܰܘܡܶܗ.
5 ܘܒܳܬܰܪܟܶܢ ܥܠܳܬܳܐ ܐܰܡܺܝܢܬܳܐ ܠܝܰܖ̈ܚܶܐ: ܘܰܠܟܽܠ ܥܰܕܥܺܕܰܘ̈ܗܝ ܕܡܳܪܝܳܐ ܡܩܰܕܫ̈ܶܐ: ܘܰܠܟܽܠ ܡܰܢ ܕܨܳܒܶܐ ܨܶܒܝܳܢܳܐ ܕܡܳܪܝܳܐ.
6 ܡܶܢ ܚܰܕ ܒܝܰܪܚܳܐ ܫܒܺܝܥܳܝܳܐ: ܫܰܪܺܝܘ ܠܡܰܣܳܩܽܘ ܥܠܳܬܳܐ ܠܡܳܪܝܳܐ. ܘܗܰܝܟܠܳܐ ܕܡܳܪܝܳܐ ܥܕܰܡܳܐ ܠܶܗܫܳܐ ܠܳܐ ܐܶܬܓܰܡܰܪ.
7 ܘܝܰܗܒܘ ܟܶܣܦܳܐ ܠܦܳܣܽܘ̈ܠܶܐ: ܘܰܠܢܰܓܳܖ̈ܶܐ: ܘܰܠܡܶܐܟܠܳܐ ܘܰܠܡܰܫܬܝܳܐ: ܘܡܶܫܚܳܐ ܠܨܽܘܖ̈ܳܝܶܐ ܘܰܠܨܰܝܕܢܳܝ̈ܶܐ: ܠܡܰܝܬܳܝܽܘ ܩܰܝ̈ܣܶܐ ܕܰܐܖ̈ܙܶܐ ܡܶܢ ܠܶܒܢܳܢ ܒܝܰܡܳܐ ܠܝܽܘܦܺܐ: ܐܰܝܟܰܢܳܐ ܕܰܟܬܰܒ ܟܽܘܪܳܫ ܡܰܠܟܳܐ ܕܦܳܪܶܣ ܥܠܰܝܗܽܘܢ.
8 ܒܫܰܢ̱ܬܳܐ ܕܬܰܪܬܶܝܢ ܟܰܕ ܥ̣ܰܠܘ ܠܒܰܝܬܶܗ ܕܡܳܪܝܳܐ ܕܒܽܐܘܪܺܫܠܶܡ: ܒܝܰܪܚܳܐ ܕܰܬܪܶܝܢ: ܫܰܕܰܪ ܙܽܘܪܒܳܒܶܠ ܒܰܪ ܫܠܰܬܐܶܝܠ ܘܝܶܫܽܘܥ ܒܰܪ ܝܽܘܙܳܕܳܩ ܘܫܰܪܟܳܐ ܕܰܐܚܰܝ̈ܗܽܘܢ: ܘܟܽܘܡܖ̈ܶܐ ܘܠܶܘ̈ܳܝܶܐ: ܘܟܽܠ ܕܥ̣ܰܠܘ ܡܶܢ ܫܒܺܝܬܳܐ ܠܽܐܘܪܺܫܠܶܡ. ܘܰܐܩܺܝܡܘ ܠܠܶܘ̈ܳܝܶܐ ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ: ܠܡܶܗܘܳܐ ܒܝܰܘܡܳܐ ܥܰܠ ܥܒܺܝܕܬܳܐ ܕܒܰܝܬܳܐ ܕܡܳܪܝܳܐ.
9 ܘܩܳܡ ܝܶܫܽܘܥ ܘܰܐܚܰܘ̈ܗܝ ܘܰܒܢܰܘ̈ܗܝ: ܘܩܰܕܡܝܳܐ ܘܰܒܢܰܘ̈ܗܝ: ܘܰܒܢܰܝ̈ ܗܽܘܕܺܝܳܐ ܐܰܟܚܕܳܐ: ܕܢܶܗܘܽܘܢ ܥܳܒܕܺܝܢ ܥܒܺܝ̈ܕܳܬܳܐ ܕܒܰܝܬܶܗ ܕܡܳܪܝܳܐ: ܒܢܰܝ̈ ܗܶܢܕܳܪ ܘܰܒܢܰܝ̈ܗܽܘܢ ܘܰܐܚܰܝ̈ܗܽܘܢ ܠܶܘ̈ܳܝܶܐ.
10 ܘܰܐܪܡܺܝܘ ܫܶܬܶܐܣܬܳܐ ܕܒܶܢܝܳܢܳܐ ܕܗܰܝܟܠܶܗ ܕܡܳܪܝܳܐ. ܘܩ̣ܳܡܘ ܟܳܗ̈ܢܶܐ ܟܰܕ ܠܒܺܝܫܺܝܢ: ܘܰܐܚܺܝܕܺܝܢ ܩܰܖ̈ܢܳܬܳܐ ܕܕܶܟܖ̈ܶܐ: ܘܩܳܪܶܝܢ ܒܗܶܝܢ. ܘܠܶܘ̈ܳܝܶܐ ܒܢܰܝ̈ ܐܳܣܳܦ: ܒܫܺܝܦܽܘܖ̈ܶܐ ܠܰܡܫܰܒܳܚܽܘ ܠܡܳܪܝܳܐ: ܥܰܠ ܐܺܝܕܰܘ̈ܗܝ ܕܕܰܘܺܝܕ ܡܰܠܟܳܐ ܕܺܝܣܪܳܐܶܝܠ.
11 ܘܒܰܪܶܟܘ ܒܬܰܘܕܺܝܬܳܐ: ܘܰܒܬܶܫ̈ܒܚܳܬܳܐ ܠܡܳܪܝܳܐ: ܡܶܛܽܠ ܕܛܳܒ ܗ̱ܘ ܘܰܠܥܳܠܰܡ ܛܰܝܒܽܘܬܶܗ ܥܰܠ ܝܺܣܪܳܐܶܝܠ ܘܟܽܠܶܗ ܥܰܡܳܐ ܝܰܒܶܒܘ ܝܽܘܒܳܒܳܐ ܪܰܒܳܐ ܒܬܶܫܒܽܘܚܬܳܐ ܠܡܳܪܝܳܐ: ܥܰܠ ܫܽܘܟܽܠܳܠܳܐ ܕܒܰܝܬܶܗ ܕܡܳܪܝܳܐ.
12 ܘܣܰܓܺܝ̈ܐܶܐ ܡܶܢ ܟܽܘܡܖ̈ܶܐ ܘܠܶܘ̈ܳܝܶܐ: ܘܖ̈ܺܝܫܝ ܐܰܒܳܗ̈ܶܐ ܩܰܫܺܝ̈ܫܶܐ: ܕܰܚܙܰܘ ܠܒܰܝܬܳܐ ܗܳܢܳܐ ܒܺܐܝܩܳܪܶܗ ܪܰܒܳܐ ܩܰܕܡܳܝܳܐ: ܟܰܕ ܓܡܰܪ ܒܰܝܬܳܐ ܗܳܢܳܐ: ܒܟܰܘ ܒܩܳܠܳܐ ܪܳܡܳܐ. ܘܣܰܓܺܝܐܺܝܢ ܕܰܡܪܺܝܡܺܝܢ ܗ̱ܘܰܘ ܩܳܠܰܝ̈ܗܽܘܢ: ܒܩܰܖ̈ܢܳܬܳܐ ܘܰܒܚܰܕܽܘܬܳܐ.
13 ܘܠܰܝܬ ܥܰܡܳܐ ܕܫܳܡܥܺܝܢ ܒܩܳܠܳܐ ܕܩܰܖ̈ܢܳܬܳܐ. ܡܶܛܽܠ ܕܥܰܡܳܐ ܩܳܪܶܝܢ ܗ̱ܘܰܘ ܒܩܰܖ̈ܢܳܬܳܐ ܒܩܳܠܳܐ ܪܳܡܳܐ. ܘܩܳܠܳܐ ܕܒܶܟܝܳܐ ܡܶܫܬܡܰܥ ܗ̱ܘܳܐ ܠܪܽܘܚܩܳܐ.