Ezra 6
The Book of Ezra
܀ ܥܙܪܐ ܘ ܀
1 ܗܳܝܕܶܝܢ ܕܳܪܺܝܳܘܫ ܡܰܠܟܳܐ ܦ̣ܩܰܕ: ܘܰܩ̣ܪܳܐ ܒܰܟܬܒ̈ܶܐ ܕܺܐܝܬ ܒܶܝܬ ܓܰܙܳܐ ܬܰܡܳܢ ܒܒܳܒܶܠ.
2 ܘܶܐܫܟܰܚ ܒܰܐܚܡܳܬܳܢ ܡܕܺܝܢ̱ܬܳܐ ܕܺܐܝܬ ܒܡܳܕܰܝ: ܡܓܰܠܬܳܐ ܚܕܳܐ. ܘܗܳܟܰܢܳܐ ܟܬܺܝܒ ܒܓܰܘܶܗ ܕܟܶܪܟܳܐ.
3 ܒܰܫܢܰܬ ܚܕܳܐ ܠܟܽܘܪܳܫ ܡܰܠܟܳܐ: ܟܽܘܪܳܫ ܡܰܠܟܳܐ ܣܳܡ ܢܳܡܽܘܣܳܐ: ܘܰܦܩܰܕ ܕܒܰܝܬܳܐ ܕܰܐܠܶܗܐ ܕܺܐܝܬ ܒܽܐܘܪܺܫܠܶܡ ܢܶܬܒܢܶܐ: ܐܰܬܪܳܐ ܕܕܶܒܚ̈ܶܐ ܕܳܒܚܺܝܢ. ܘܫܶܬܶܐܣܰܘ̈ܗܝ ܕܡܶܢ ܪܰܘܡܶܗ: ܐܰܡܺܝ̈ܢ ܫܬܺܝܢ. ܘܰܦܬܳܝܶܗ ܐܰܡܺܝ̈ܢ ܥܶܣܪܺܝܢ.
4 ܡܪܰܒܥܳܐ ܕܟܺܐܦ̈ܶܐ ܬܠܳܬܳܐ. ܘܬܰܪܥܳܐ ܕܩܰܝܣܳܐ ܚܰܕܬܳܐ. ܘܳܐܦ ܢܦܰܩܬܳܐ ܡܶܢ ܒܶܝܬ ܡܰܠܟܳܐ ܡܶܬܝܰܗܒܳܐ.
5 ܘܳܐܦ ܡܳܐܢ̈ܶܐ ܕܒܶܝܬ ܐܰܠܳܗܳܐ ܕܕܰܗܒܳܐ ܘܰܕܣܺܐܡܳܐ: ܕܰܐܦܶܩ ܐܶܢܽܘܢ ܢܒܽܘܟܰܕܢܳܨܰܪ ܡܰܠܟܳܐ: ܘܰܐܘܒܶܠ ܐܶܢܽܘܢ ܠܒܳܒܶܠ: ܐܶܬܺܝܗܶܒܘ ܘܶܐܬܘ ܠܕܽܘܟܰܬܗܽܘܢ ܠܶܗܝܟܠܳܐ ܕܒܽܐܘܪܺܫܠܶܡ ܠܰܐܬܪܗܽܘܢ ܘܶܐܬܚܡܶܠܘ ܒܒܰܝܬܳܐ ܕܰܐܠܶܗܐ.
6 ܡܶܟܺܝܠ ܬܰܬܢܰܝ ܫܰܠܺܝܛܳܐ ܕܒܰܥܒܰܪ ܢܰܗܪܳܐ: ܘܶܐܫܬܰܢܒܽܘܙܳܢ ܘܚܰܒܖ̈ܰܘܗܝ ܫܰܠܺܝ̈ܛܶܐ ܕܒܰܥܒܰܪ ܢܰܗܪܳܐ: ܪܰܚܺܝܩܺܝܢ ܗܘܰܝܬܽܘܢ ܡܶܢ ܬܰܡܳܢ.
7 ܫܒܽܘܩܘ ܠܰܥܒܺܝܕܬܳܐ ܕܒܶܝܬ ܐܰܠܳܗܳܐ: ܕܢܶܥܒܕܽܘܢܳܗ̇ ܝܽܗܘܕܳܝ̈ܶܐ: ܘܠܰܫܒܺܝܬܳܐ ܕܝܽܗ̱ܘ̈ܕܳܝ̈ܶܐ. ܕܒܶܝܬ ܐܰܠܳܗܳܐ ܢܶܬܒܢܶܐ ܥܰܠ ܐܰܬܪܶܗ.
8 ܘܡܶܢ ܩܕܳܡܝ ܣܺܝܡ ܢܳܡܽܘܣܳܐ: ܠܡܳܐ ܕܶܝܢ ܬܰܗܪܽܘܢ ܥܰܡ ܫܒܺܝܬܳܐ ܕܝܽܗܘ̈ܕܳܝܶܐ: ܠܡܶܒܢܳܐ ܒܰܝܬܳܐ ܕܰܐܠܳܗܳܐ. ܗܰܘ ܕܡܶܢ ܢܶܟܣܰܝ̈ ܡܰܠܟܳܐ: ܘܡܰܕܰܐܬܳܐ ܕܒܰܥܒܰܪ ܢܰܗܪܳܐ: ܬܶܗܘܶܐ ܢܦܰܩܳܐ: ܘܡܶܬܝܰܗܒܳܐ ܠܓܰܒܖ̈ܶܐ ܗܳܠܶܝܢ. ܘܰܥܒܳܕܳܐ ܠܳܐ ܢܶܗܘܽܘܢ ܡܒܰܛܠܺܝܢ.
9 ܘܡܶܕܶܡ ܕܨܳܒܶܝܢ ܗܰܒܘ ܠܗܽܘܢ. ܘܡܶܕܶܡ ܠܳܐ ܬܚܰܣܪܽܘܢ ܠܗܽܘܢ. ܒܢܰܝ̈ ܬܰܘܖ̈ܶܐ ܘܕܶܟܖ̈ܶܐ ܘܶܐܡܖ̈ܶܐ: ܠܰܥܠܳܬ ܐܰܠܳܗ ܫܡܰܝܳܐ. ܚܶܛ̈ܶܐ ܘܡܶܠܚܳܐ ܘܚܰܡܪܳܐ ܘܡܶܫܚܳܐ: ܐܰܝܟܰܢܳܐ ܕܦܳܩܕܺܝܢ ܟܽܘܡܖ̈ܶܐ ܕܒܽܐܘܪܺܫܠܶܡ: ܢܶܗܘܽܘܢ ܡܰܝܬܶܝܢ ܠܗܽܘܢ ܟܽܠܝܽܘܡ ܒܝܽܘܡ ܘܠܳܐ ܢܶܗܘܽܘܢ ܛܳܥܶܝܢ.
10 ܘܗܶܢܽܘܢ ܢܶܗܘܽܘܢ ܡܩܰܪܒܺܝܢ ܩܽܘܖ̈ܒܳܢܶܐ ܠܰܐܠܳܗ ܫܡܰܝܳܐ. ܘܰܡܨܰܠܺܝܢ ܥܰܠ ܡܰܠܟܳܐ ܘܰܒܢܰܘ̈ܗܝ.
11 ܘܡܶܢ ܩܕܳܡܝ ܣܺܝܡ ܢܳܡܽܘܣܳܐ: ܕܟܽܠܢܳܫ ܕܰܢܫܰܢܶܐ ܦܶܬܓܳܡܳܐ ܗܳܢܳܐ: ܢܶܫܬܡܶܛ ܩܰܝܣܳܐ ܡܶܢ ܒܰܝܬܶܗ. ܘܢܶܥܒܕܽܘܢ ܠܶܗ ܙܩܺܝܦܳܐ: ܘܢܶܙܩܦܽܘܢܳܝܗܝ ܥܠܰܘܗܝ. ܘܒܰܝܬܶܗ ܠܙܶܒܠܳܐ ܢܶܬܺܝܗܶܒ ܡܶܛܽܠ ܗܳܕܶܐ.
12 ܘܰܐܠܳܗܳܐ ܕܶܐܫܟܰܚܢ ܫܡܶܗ ܬܰܡܳܢ: ܬܰܡܳܢ ܢܶܥܡܰܪ. ܘܟܽܠ ܡܰܠܟܳܐ ܘܥܰܡܳܐ ܕܢܰܘܫܶܛ ܐܺܝܕܶܗ ܠܰܡܫܰܢܳܝܽܘ ܘܠܰܡܚܰܒܳܠܽܘ ܒܰܝܬܳܐ ܗܳܢܳܐ ܕܰܐܠܳܗܳܐ ܕܒܽܐܘܪܺܫܠܶܡ: ܐܶܢܳܐ ܕܳܪܺܝܳܘܫ ܣܳܡܶܬ ܢܳܡܽܘܣܳܐ ܕܒܰܥܓܰܠ ܢܺܐܒܰܕ.
13 ܗܳܝܕܶܝܢ ܬܰܬܢܰܝ ܫܰܠܺܝܛܳܐ ܕܒܰܥܒܰܪ ܢܰܗܪܳܐ. ܘܶܐܫܬܰܢܒܽܘܙܳܢ ܘܚܰܒܖ̈ܰܘܗܝ: ܡܶܕܶܡ ܕܰܫܠܰܚ ܐܰܝܟ ܢܳܡܽܘܣܳܐ: ܒܰܥܓܰܠ ܥܒܰܕܘ.
14 ܘܰܫܒܺܝܬܳܐ ܕܺܝܗܽܘܕܳܐ ܥܳܒܕܺܝܢ ܘܡܰܣܩܺܝܢ ܠܪܺܝܫ: ܒܰܢܒܺܝܽܘܬܶܗ ܕܚܰܓܰܝ ܢܒܺܝܳܐ: ܘܰܙܟܰܪܝܳܐ ܒܰܪ ܥܰܕܽܘ. ܘܰܒܢܰܘ ܘܫܰܟܠܶܠܘ ܡܶܢ ܢܳܡܽܘܣܳܐ ܕܰܐܠܳܗܳܐ ܕܺܝܣܪܳܐܶܝܠ: ܘܡܶܢ ܢܳܡܽܘܣܳܐ ܕܟܽܘܪܳܫ ܘܰܕܕܳܪܺܝܳܘܫ: ܘܡܶܢ ܢܳܡܽܘܣܳܐ ܕܰܐܪܛܰܚܫܫܶܬ ܡܰܠܟܳܐ ܕܦܳܪܶܣ.
15 ܘܰܓܡܰܪ ܒܰܝܬܳܐ ܗܳܢܳܐ ܒܝܽܘܡ ܬܠܳܬܳܐ ܒܺܝܪܰܚ ܐܳܕܳܪ: ܗܺܝ ܗܺܝ ܫܢܰܬ ܫܶܬ ܠܡܰܠܟܽܘܬܶܗ ܕܕܳܪܺܝܳܘܫ ܡܰܠܟܳܐ.
16 ܘܰܥܒܰܕܘ ܒܢܰܝ̈ ܝܺܣܪܳܐܶܝܠ ܟܽܘܡܖ̈ܶܐ ܘܠܶܘ̈ܳܝܶܐ: ܘܫܰܪܟܳܐ ܕܰܒܢܰܝ̈ ܝܺܗܽܘܕܳܐ: ܥܺܐܕܳܐ ܠܒܰܝܬܳܐ ܗܳܢܳܐ ܕܒܶܝܬ ܐܰܠܳܗܳܐ ܒܚܰܕܽܘܬܳܐ.
17 ܘܩܰܪܶܒܘ ܠܥܺܐܕܳܐ ܕܒܰܝܬܳܐ ܕܰܐܠܳܗܳܐ: ܬܰܘܖ̈ܶܐ ܡܳܐܐ: ܘܕܶܟܖ̈ܶܐ ܡܰܐܬܶܝܢ: ܘܶܐܡܖ̈ܶܐ ܐܰܪܒܰܥ ܡܳܐܐ ܨܶܦܖ̈ܳܝܶܐ ܕܥܶܙ̈ܶܐ ܠܡܶܫܒܰܩ ܚܛܳܗ̈ܶܐ ܕܰܒܢܰܝ̈ ܝܺܣܪܳܐܶܝܠ: ܬܪܶܥܣܰܪ ܒܡܶܢܝܳܢܳܐ ܕܫܰܒ̈ܛܶܐ ܕܺܝܣܪܳܐܶܝܠ.
18 ܘܰܐܩܺܝܡܘ ܠܟܽܘܡܖ̈ܶܐ ܒܬܶܫܡܶܫܬܗܽܘܢ: ܘܠܶܘ̈ܳܝܶܐ ܒܬܶܫܡܶܫܬܗܽܘܢ: ܥܰܠ ܥܒܺܝܕܬܳܐ ܕܒܰܝܬܳܐ ܕܰܐܠܳܗܳܐ ܕܒܽܐܘܪܺܫܠܶܡ: ܐܰܝܟ ܕܰܟܬܺܝܒ ܒܰܟܬܳܒܳܐ ܕܢܳܡܽܘܣܳܐ ܕܡܽܘܫܶܐ.
19 ܘܰܥܒܰܕܘ ܒܢܰܝ̈ ܫܒܺܝܬܳܐ ܦܨܰܚ ܒܰܐܪܒܰܥܶܣܖ̈ܶܐ ܒܝܰܪܚܳܐ ܩܰܕܡܳܝܳܐ.
20 ܡܶܛܽܠ ܕܶܐܬܕܰܟܺܝܘ ܟܳܗ̈ܢܶܐ ܘܠܶܘ̈ܳܝܶܐ. ܐܰܟܚܕܳܐ ܟܽܠܗܽܘܢ ܐܶܬܕܰܟܺܝܘ. ܘܰܩ̣ܛܰܠܘ ܐܶܡܖ̈ܶܐ ܒܦܶܨܚܳܐ ܠܰܒܢܰܝ̈ ܫܒܺܝܬܳܐ: ܘܠܰܐܚܰܝ̈ܗܽܘܢ ܟܽܘܡܖ̈ܶܐ ܘܳܐܦ ܠܗܽܘܢ.
21 ܘܶܐܟܰܠܘ ܒܢܰܝ̈ ܝܺܣܪܳܐܶܝܠ ܐܰܝܠܶܝܢ ܕܰܣ̣ܠܶܩܘ ܡܶܢ ܫܒܺܝܬܳܐ ܕܒܳܒܶܠ: ܟܽܠ ܕܰܦ̣ܪܰܫܘ ܡܶܢ ܛܰܡܐܽܘܬܳܐ ܕܥܰܡ̈ܡܶܐ ܕܰܐܪܥܳܐ: ܠܰܡܨܰܠܳܝܽܘ ܩܕܳܡ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ.
22 ܘܰܥܒܰܕܘ ܥܺܐܕܳܐ ܕܦܰܛܺܝܖ̈ܶܐ ܫܰܒܥܳܐ ܝܰܘ̈ܡܺܝܢ ܒܚܰܕܽܘܬܳܐ ܡܶܛܽܠ ܕܚܰܕܺܝ ܐܶܢܽܘܢ ܡܳܪܝܳܐ. ܘܰܐܗܦܰܟ ܠܶܒܳܐ ܕܡܰܠܟܳܐ ܕܳܐܬܽܘܪ ܠܘܳܬܗܽܘܢ: ܠܰܡܚܰܙܳܩܽܘ ܐܺܝܕܰܝ̈ܗܽܘܢ ܒܰܥܒܳܕܳܐ ܕܒܰܝܬܶܗ ܕܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ.