Ezra 9
The Book of Ezra
܀ ܥܙܪܐ ܛ ܀
1 ܘܟܰܕ ܫܠܶܡ ܗܳܠܶܝܢ ܟܽܠܗܶܝܢ: ܩܪܶܒܘ ܠܘܳܬܝ ܩܰܫܺܝ̈ܫܶܐ ܘܳܐܡܪܺܝܢ: ܠܳܐ ܐܶܬܦܪܶܫܘ ܥܰܡܳܐ ܕܺܝܣܪܳܐܶܝܠ: ܘܟܽܘܡܖ̈ܶܐ ܘܠܶܘ̈ܳܝܶܐ ܡܶܢ ܥܰܡ̈ܡܶܐ ܕܰܡܕܺܝ̈ܢܳܬܳܐ ܒܛܰܡܽܐܘܬܗܽܘܢ ܕܰܟܢܰܥܢܳܝ̈ܶܐ: ܘܚܳܬܳܝ̈ܶܐ: ܘܥܰܡ̈ܽܘܢܳܝܶܐ: ܘܦܰܖ̈ܙܳܝܶܐ: ܘܝܰܒ̈ܽܘܣܳܝܶܐ: ܘܡܶܨܖ̈ܳܝܶܐ: ܘܡܽܘܐܒܳܝ̈ܶܐ: ܘܳܐܡܽܘܖ̈ܳܝܶܐ.
2 ܡܶܛܽܠ ܕܰܢܣܰܒܘ ܡܶܢ ܒܢ̈ܳܬܗܽܘܢ ܠܗܽܘܢ ܘܠܰܒܢܰܝ̈ܗܽܘܢ ܘܶܐܬܚܰܠܰܛ ܙܰܪܥܳܐ ܩܰܕܺܝܫܳܐ ܒܥܰܡ̈ܡܶܐ ܕܰܡܕܺܝ̈ܢܳܬܳܐ ܘܺܐܝܕܳܐ ܕܩܰܫܺܝ̈ܫܶܐ ܘܰܕܠܶܘ̈ܳܝܶܐ: ܒܥܰܘܠܳܐ ܗܳܢܳܐ ܩܰܕܡܳܝܰܬ.
3 ܗܳܝܕܶܝܢ ܟܰܕ ܫܶܡܥܶ݀ܬ ܡܶܠܬܳܐ ܗܳܕܶܐ: ܣܰܕܩܶ݀ܬ ܢܰܚ̈ܬܰܝ ܘܰܟܠܡܺܝܕܝ: ܘܡܶܠܓܶ݀ܬ ܣܰܥܪܳܐ ܕܪܺܝܫܝ ܘܰܕܕܰܩܢܝ. ܘܝܳܬܶܒ ܗ̱ܘܺܝ݀ܬ ܘܬܰܡܺܝܗ.
4 ܘܶܐܬܟܰܢܰܫܘ ܠܘܳܬܝ ܟܽܠ ܐܰܝܠܶܝܢ ܕܰܒܛܺܝܠ ܗ̱ܘܰܘ ܠܗܽܘܢ ܥܰܠ ܡܶܠܬܳܐ ܕܰܐܠܳܗܳܐ ܕܺܝܣܪܳܐܶܝܠ: ܥܰܠ ܥܰܘܠܳܐ ܕܰܐܥܠܺܝܘ ܒܢܰܝ̈ ܫܒܺܝܬܳܐ. ܘܶܐܢܳܐ ܝܳܬܶܒ ܗ̱ܘܺܝܬ ܘܬܰܡܺܝܗ̇ ܥܕܰܡܳܐ ܠܰܬܫܰܥ ܫܳܥܺܝ̈ܢ.
5 ܘܰܒܥܶܕܳܢܳܐ ܕܰܬܫܰܥ ܫܳܥܺܝ̈ܢ: ܩܳܡܶ݀ܬ ܡܶܢ ܥܳܩܰܬܝ: ܘܡܶܢ ܣܽܘܕܳܩ ܢܰܚ̈ܬܰܝ. ܘܒܶܪܟܶ݀ܬ ܥܰܠ ܒܽܘܖ̈ܟܰܝ. ܘܦܶܪܣܶ݀ܬ ܐܺܝ̈ܕܰܝ ܒܰܨܠܽܘܬܳܐ: ܩܕܳܡ ܡܳܪܝܳܐ ܐܰܠܳܗܳܐ ܘܶܐܡܪܶܬ.
6 ܐܰܠܳܗܝ: ܒܳܗܬܺܝܢܰܢ ܠܰܡܪܳܡܽܘ ܐܰܦܰܝ̈ܢ ܠܘܳܬܳܟ ܐܰܠܶܗܢ: ܡܶܛܽܠ ܕܚܰܘ̈ܒܰܝܢ ܣܓܺܝܘ ܠܥܶܠ ܡܶܢ ܪܺܝܫܰܢ. ܘܰܚܛܳܗܰܝ̈ܢ ܪܰܘܖ̈ܒܶܐ ܣܠܶܩܘ ܥܕܰܡܳܐ ܠܰܫܡܰܝܳܐ.
7 ܡܶܢ ܝܰܘ̈ܡܰܝ ܐܰܒܳܗ̈ܳܬܰܢ ܚܢܰܢ ܐܶܫܬܟܰܚܢ ܒܰܚܛܳܗ̈ܶܐ ܪܰܘܖ̈ܒܶܐ ܥܕܰܡܳܐ ܠܝܰܘܡܳܢܳܐ. ܡܶܛܽܠ ܕܰܐܣܓܺܝܢ ܠܡܶܚܛܳܐ ܚܢܰܢ ܘܰܐܒܳܗܰܝ̈ܢ ܘܡܰܠܟܰܝ̈ܢ ܘܟܽܘܡܖ̈ܰܝܢ. ܡܶܛܽܠ ܗܳܢܳܐ ܐܶܫܬܠܶܡܢ ܠܚܰܪܒܳܐ ܘܰܠܒܶܙܬܳܐ: ܘܰܠܫܶܒܝܳܐ: ܘܰܠܒܶܗܬܬܳܐ ܕܰܐܦ̈ܶܐ: ܒܳܐܝܕܳܐ ܕܡܰܠ̈ܟܶܐ ܕܰܡܕܺܝ̈ܢܳܬܳܐ: ܘܒܺܐܝܕܳܐ ܕܰܒܥܶܠܕܒܳܒܰܝ̈ܢ: ܐܰܝܟ ܕܝܰܘܡܳܢܳܐ.
8 ܘܡܶܟܺܝܠ ܥܰܕ ܩܰܠܺܝܠ ܙܥܽܘܪ: ܗܘܰܘ ܖ̈ܰܚܡܺܝܢ ܡܶܢ ܩܕܳܡ ܐܰܠܳܗܰܢ. ܠܡܰܘܬܳܪܽܘ ܡܶܢܢ ܫܰܪܟܳܢܳܐ: ܘܰܠܡܶܬܰܠ ܠܰܢ ܕܽܘܟܬܳܐ ܒܰܐܬܪܳܐ ܕܩܽܘܕܫܶܗ. ܘܰܠܡܰܢܗܳܪܽܘ ܥܰܝܢܰܝ̈ܢ ܐܰܠܳܗܰܢ: ܘܰܠܡܶܬܰܠ ܚܰܝ̈ܶܐ ܩܰܠܺܝܠ ܒܥܰܒܕܽܘܬܰܢ.
9 ܡܶܛܽܠ ܕܥܰܒ̈ܕܶܐ ܚܢܰܢ: ܘܰܒܥܰܒܕܽܘܬܰܢ ܠܳܐ ܐܶܫܬܒܶܩܢ ܡܶܢ ܐܰܠܳܗܰܢ. ܘܝܰܗܒܰܢ ܐܰܠܳܗܰܢ ܠܖ̈ܰܚܡܶܐ ܩܕܳܡ ܡܰܠ̈ܟܶܐ ܕܦܳܪܶܣ: ܕܝܰܗܒܘ ܠܰܢ ܦܽܘܪܢܳܣܰܢ ܕܝܰܘܡܳܐ. ܘܰܢܪܰܡܪܶܡ ܒܰܝܬܳܐ ܕܰܐܠܳܗܰܢ ܘܰܢܩܺܝܡ ܚܰܖ̈ܒܳܬܶܗ. ܘܢܶܬܶܠ ܠܰܢ ܣܝܳܓܳܐ ܒܰܝܗܽܘܕ ܘܒܽܐܘܪܺܫܠܶܡ.
10 ܘܡܶܟܺܝܠ ܡܳܢܳܐ ܢܺܐܡܰܪ ܩܕܳܡܝܟ ܐܰܠܳܗܰܢ: ܒܳܬܰܪ ܗܳܠܶܝܢ ܟܽܠܗܶܝܢ: ܡܶܛܽܠ ܕܰܫܒܰܩܢ ܦܽܘܩ̈ܕܳܢܰܝܟ.
11 ܕܦܰܩܶܕܬܳܢ ܒܺܐܝܕܳܐ ܕܥܰܒܕܰܝ̈ܟ ܢܒܺܝ̈ܶܐ. ܘܶܐܡܰܪܬ ܠܰܢ: ܐܰܪܥܳܐ ܕܥܳܐܠܺܝܢ ܐܢ̱ܬܽܘܢ ܠܳܗ̇ ܠܡܺܐܪܬܳܗ̇: ܛܰܡܰܐܐ ܗ̱ܘ ܒܛܰܡܽܐܘܬܳܐ ܕܥܰܡ̈ܡܶܐ ܘܕܰܡܕܺܝ̈ܢܳܬܳܐ: ܒܛܰܡܽܐܘܬܗܽܘܢ ܕܰܡܠܳܐܽܘܗ̇ ܡܶܢ ܣܦܳܐ ܠܰܣܦܳܐ: ܘܰܥܒܳܕܰܝ̈ܗܽܘܢ ܣ̈ܢܰܝܳܐ ܡܠܳܐܽܘܗ̇.
12 ܘܡܶܟܺܝܠ ܒܢ̈ܳܬܟܽܘܢ ܠܳܐ ܬܶܬܠܽܘܢ ܠܰܒܢܰܝ̈ܗܽܘܢ. ܘܰܒܢ̈ܳܬܗܽܘܢ ܠܳܐ ܬܶܣܒܽܘܢ ܠܰܒܢܰܝ̈ܟܽܘܢ ܘܠܳܐ ܬܶܬܪܰܥܽܘܢ ܠܰܫܠܳܡܗܽܘܢ ܘܰܠܛܳܒܰܬܗܽܘܢ ܥܕܰܡܳܐ ܠܥܳܠܰܡ ܡܶܛܽܠ ܕܬܶܬܥܰܫܢܽܘܢ ܘܬܶܐܟܠܽܘܢ ܛܳܒ̈ܳܬܳܗ̇ ܕܰܐܪܥܳܐ: ܘܬܰܘܬܪܽܘܢ ܠܰܒܢܰܝ̈ܟܽܘܢ. ܘܢܺܐܪܬܽܘܢ ܥܕܰܡܳܐ ܠܥܳܠܰܡ.
13 ܘܒܳܬܰܪ ܗܳܠܶܝܢ ܟܽܠܗܶܝܢ ܕܶܐܬܰܝ̈ ܥܠܰܝܢ ܒܰܥܒܳܕܰܝ̈ܢ ܒܺܝ̈ܫܶܐ: ܘܒܰܚ̈ܛܳܗܰܝܢ ܪܰܘܖ̈ܒܶܐ: ܡܶܛܽܠ ܕܰܐܢ̱ܬ ܐܰܠܳܗܰܢ ܐܶܬܚܰܫܰܒܬ ܥܠܰܝܢ ܠܡܶܫܒܰܩ ܚܛܳܗܰܝ̈ܢ: ܘܬܶܬܶܠ ܠܰܢ ܫܰܪܟܳܢܳܐ ܒܥܳܠܡܳܐ.
14 ܚܢܰܢ ܐܶܬܗܰܦܟܢ ܘܰܥܒܰܪܢ ܥܰܠ ܦܽܘ̈ܩܕܳܢܰܝܟ. ܘܶܐܙܰܠܢ ܕܒܶܩܢ ܒܗܳܠܶܝܢ ܥܰܡ̈ܡܶܐ ܛܰܡ̈ܶܐܐ. ܘܰܥܒܰܕܢ ܐܰܝܟ ܥܒܳܕܰܝ̈ܗܽܘܢ ܘܰܐܢ̱ܬ ܪܶܚܡܬܳܢܳܐ ܐܰܢ̱ܬ ܠܳܐ ܬܶܪܓܰܙ ܥܠܰܝܢ. ܫܒܽܘܩ ܠܚܰܘ̈ܒܰܝܢ ܡܶܢ ܩܕܳܡܰܝܢ: ܡܶܛܽܠ ܕܪܶܚܡܬܳܢܳܐ ܐܰܢ̱ܬ ܫܒܽܘܩ ܠܰܢ ܬܰܘܬܳܖ̈ܶܐ ܒܥܳܠܡܳܐ: ܡܶܛܽܠ ܕܠܰܝܬ ܐܰܟܘܳܬܳܟ: ܘܠܳܐ ܢܺܐܒܰܕ.
15 ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ: ܙܰܕܺܝܩ ܐܰܢ̱ܬ. ܡܶܛܽܠ ܕܰܫܒܰܩܬ ܡܶܢܢ ܫܰܪܟܳܢܳܐ ܐܰܝܟ ܕܝܰܘܡܳܢܳܐ ܗܳܐ ܩܳܝܡܺܝܢܰܢ ܘܡܰܘܕܶܝܢܢ ܩܕܳܡܝܟ ܥܰܠ ܚܛܳܗܰܝ̈ܢ. ܡܶܛܽܠ ܕܠܰܝܬ ܠܡܺܐܡܰܪ ܩܕܳܡܝܟ ܡܶܠܳܐ ܥܰܠ ܗܳܕܶܐ.