Micah 5
The Book of Micah
܀ ܡܝܟ̣ܐ ܗ ܀
1 ܡܶܟܺܝܠ ܬܶܦܩܺܝܢ ܒܓܰܝܣܳܐ ܒܰܪܬ ܓܰܝܳܣ̈ܶܐ ܥܰܫܺܝ̈ܢܶܐ: ܕܩܳܡܘ ܥܠܰܝܢ: ܘܰܡܚܰܘ ܒܫܰܒܛܳܐ ܥܰܠ ܦܶܟܶܗ ܠܪܳܥܝܳܐ ܕܺܝܣܪܳܐܶܝܠ.
2 ܐܰܢ̱ܬܝ ܕܶܝܢ ܒܶܝܬ ܠܚܶܡ ܐܳܦܰܪܬܳܐ: ܙܥܽܘܪܝܳܐ ܐܰܢ̱ܬܝ ܕܬܶܗܘܶܝܢ ܒܰܐܠܦ̈ܶܐ ܕܺܝܗܽܘܕܳܐ: ܡܶܢܶܟܝ ܢܶܦܽܘܩ ܫܰܠܺܝܛܳܐ ܕܢܶܗܘܶܐ ܥܰܠ ܝܺܣܪܳܐܶܝܠ. ܘܡܰܦܩܶܗ ܡܶܢ ܪܺܝܫܺܝܬܳܐ: ܡܶܢ ܝܰܘܡܰܝ̈ ܥܳܠܡܳܐ.
3 ܡܶܟܺܝܠ ܢܰܫܠܶܡ ܐܶܢܽܘܢ ܥܕܰܡܳܐ ܠܙܰܒܢܳܐ ܕܝܳܠܕܳܐ ܝܳܠܶܕܬܳܐ: ܘܫܰܪܟܳܐ ܕܰܐܚܰܘ̈ܗܝ ܢܶܬܦܢܽܘܢ ܠܘܳܬ ܒܢܰܝ̈ ܝܺܣܪܳܐܶܝܠ.
4 ܘܰܢܩܽܘܡ ܘܢܶܪܥܶܐ ܒܥܽܘܫܢܶܗ ܕܡܳܪܝܳܐ: ܘܒܺܐܝܩܳܪܳܐ ܕܰܫܡܶܗ ܕܡܳܪܝܳܐ ܐܰܠܶܗܗ ܘܢܶܬܦܢܽܘܢ: ܡܶܛܽܠ ܕܡܶܟܺܝܠ ܢܺܐܪܰܒ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ.
5 ܘܢܶܗܘܶܐ ܫܠܳܡܳܐ: ܘܳܐܬܽܘܪܳܝܳܐ ܡܳܐ ܕܶܐܬܳܐ ܠܰܐܬܪܰܢ ܘܰܕܪܰܟ ܒܣܳܚܖ̈ܳܬܰܢ: ܢܩܺܝܡ ܥܠܰܘܗܝ ܫܰܒܥܳܐ ܖ̈ܳܥܰܘܳܬܳܐ: ܘܰܬܡܳܢܝܳܐ ܪܰܘܖ̈ܒܳܢܶܐ ܕܐ̱ܢܳܫܳܐ.
6 ܘܢܺܐܪܥܽܘܢ ܠܰܐܪܥܳܐ ܕܳܐܬܽܘܪ ܒܚܰܪܒܳܐ: ܘܠܰܐܪܥܳܐ ܕܢܶܡܪܽܘܕ ܒܪܽܘܓܙܶܗ: ܘܰܢܦܰܨܶܝܢ ܡܶܢ ܐܳܬܽܘܪܳܝܳܐ ܕܠܳܐ ܢܺܐܬܶܐ ܠܰܐܬܪܰܝܢ: ܘܠܳܐ ܢܶܕܪܽܘܟ ܒܰܬܚܽܘܡܰܝܢ.
7 ܘܢܶܗܘܶܐ ܫܰܪܟܶܗ ܕܝܰܥܩܽܘܒ ܒܥܰܡܳܐ ܒܰܝܢܳܬ ܥܰܡ̈ܡܶܐ ܣܰܓܺܝ̈ܐܶܐ: ܐܰܝܟ ܛܰܠܳܐ ܡܶܢ ܩܕܳܡ ܡܳܪܝܳܐ: ܘܰܐܝܟ ܖ̈ܣܺܝܣܶܐ ܕܥܰܠ ܥܶܣܒܳܐ: ܕܠܳܐ ܡܩܳܘܶܐ ܠܰܓܒܰܪ: ܘܠܳܐ ܡܟܰܬܰܪ ܠܒܰܪܢܳܫ.
8 ܘܢܶܗܘܶܐ ܫܰܪܟܶܗ ܕܝܰܥܩܽܘܒ ܒܥܰܡܳܐ ܒܰܝܢܳܬ ܥܰܡ̈ܡܶܐ ܣܰܓܺܝ̈ܐܶܐ: ܐܰܝܟ ܐܰܪܝܳܐ ܒܚܰܝܘܬܳܐ ܕܥܳܢ̈ܳܐ: ܘܰܐܝܟ ܓܽܘܪܝܳܐ ܕܰܐܪܝܳܐ ܒܰܓܙܳܪܳܐ ܕܥܳܢ̈ܳܐ: ܕܡܳܐ ܕܰܦ̣ܪܰܫ ܘܰܦ̣ܣܰܩ: ܬܳܒܰܪ: ܘܠܰܝܬ ܕܰܡܦܰܨܶܐ.
9 ܬܶܬܪܺܝܡ ܐܺܝܕܳܟ ܥܰܠ ܣܳܢܐܰܝ̈ܟ: ܘܟܽܠܗܽܘܢ ܒܥܶܠܕܒܳܒܰܝ̈ܟ ܢܺܐܒܕܽܘܢ.
10 ܒܶܗ ܕܶܝܢ ܒܝܰܘܡܳܐ ܗܰܘ ܐܳܡܰܪ ܡܳܪܝܳܐ: ܐܰܘܒܶܕ ܖ̈ܰܟܫܳܟ ܡܶܢ ܓܰܘܳܟ: ܘܰܐܘܒܶܕ ܡܰܖ̈ܟܒܳܬܳܟ.
11 ܘܰܐܘܒܶܕ ܩܽܘܖ̈ܝܳܐ ܕܰܐܪܥܳܟ: ܘܶܐܣܚܽܘܦ ܟܽܠܗܽܘܢ ܟܰܖ̈ܟܰܝܟ.
12 ܘܰܐܘܒܶܕ ܚܰܖ̈ܳܫܶܐ ܡܶܢ ܐܺܝܕܰܝ̈ܟ: ܘܙܰܟܽܘܖ̈ܶܐ ܬܽܘܒ ܠܳܐ ܢܶܗܘܽܘܢ ܠܳܟ.
13 ܘܰܐܘܒܶܕ ܓܠܺܝܦܰܝ̈ܟ ܘܰܥ̈ܠܰܘܳܬܳܟ ܡܶܢ ܓܰܘܳܟ: ܘܬܽܘܒ ܠܳܐ ܬܶܣܓܽܘܕ ܠܰܥܒܳܕ ܐܺܝܕܰܝ̈ܟ.
14 ܘܰܐܘܒܶܕ ܫܶܬܠܳܬܳܟ ܡܶܢ ܓܰܘܳܟ: ܘܰܐܚܪܶܒ ܡܕܺܝ̈ܢܳܬܳܟ.
15 ܘܶܐܥܒܶܕ ܒܪܽܘܓܙܳܐ ܘܰܒܚܶܡܬܳܐ ܦܽܘܪܥܳܢܳܐ ܡܶܢ ܥܰܡ̈ܡܶܐ ܐܰܝܠܶܝܢ ܕܠܳܐ ܫܡܰܥܘ.