Micah 6
The Book of Micah
܀ ܡܝܟ̣ܐ ܘ ܀
1 ܫܡܰܥܘ ܡܶܟܺܝܠ ܡܶܕܶܡ ܕܶܐܡܰܪ ܡܳܪܝܳܐ: ܩܽܘܡ ܕܽܘܢ ܥܰܡ ܛܽܘܖ̈ܶܐ: ܘܢܶܫܡ̈ܥܳܢ ܩܳܠܳܟ ܖ̈ܳܡܳܬܳܐ.
2 ܫܡܰܥܘ ܛܽܘܖ̈ܶܐ ܕܺܝܢܶܗ ܕܡܳܪܝܳܐ: ܘܥܽܘ̈ܡܩܶܐ ܕܫܶܬܶܐܣܶܝ̈ܗ̇ ܕܰܐܪܥܳܐ: ܕܕܳܐܶܢ ܡܳܪܝܳܐ ܥܰܡ ܥܰܡܶܗ. ܘܠܺܝܣܪܳܐܶܝܠ ܡܰܟܶܣ.
3 ܥܰܡܝ ܡܳܢܳܐ ܥܶܒܕܶܬ ܠܳܟ: ܐܰܘ ܒܡܳܢܳܐ ܐܰܟܪܺܝܬ ܠܳܟ: ܐܰܣܗܶܕܰܝܢܝ.
4 ܠܳܐ ܐܰܣܶܩܬܳܟ ܡܶܢ ܐܰܪܥܳܐ ܕܡܶܨܪܶܝܢ: ܘܡܶܢ ܒܶܝܬ ܥܰܒܕܽܘܬܳܐ ܦܪܰܩܬܳܟ: ܘܫܰܕܪܶܬ ܩܕܳܡܰܝܟ ܠܡܽܘܫܶܐ ܘܠܰܐܗܪܽܘܢ ܘܰܠܡܰܪܝܰܡ.
5 ܥܰܡܝ ܐܶܬܕܰܟܪ ܗܳܟܺܝܠ ܡܳܢܳܐ ܐܶܬܪܰܥܺܝ ܥܠܰܝܟ ܒܳܠܳܩ ܡܰܠܟܳܐ ܕܡܽܘܐܳܒ: ܘܡܳܢܳܐ ܥܢܳܝܗܝ ܒܶܠܥܰܡ ܒܰܪ ܒܥܽܘܪ: ܡܶܢ ܣܳܛܺܝܡ ܘܰܥܕܰܡܳܐ ܠܓܰܠܓܳܠ: ܡܶܛܽܠ ܕܺܝܕܰܥ ܙܰܕܺܝܩܽܘܬܶܗ ܕܡܳܪܝܳܐ.
6 ܒܡܳܢܳܐ ܐܶܩܰܕܶܡ ܠܡܳܪܝܳܐ: ܘܶܐܫܦܰܪ ܠܰܐܠܳܗܳܐ ܡܪܰܝܡܳܐ: ܐܶܩܰܕܡܺܝܘܗܝ ܒܝܰܩ̈ܕܶܐ ܫܰܠܡ̈ܶܐ: ܐܰܘ ܒܥܶܓ̈ܠܶܐ ܒܢܰܝ̈ ܫܰܢ̱ܬܳܐ.
7 ܠܳܐ ܡܶܨܛܒܶܐ ܡܳܪܝܳܐ ܒܰܐܠܦ̈ܶܐ ܕܕܶܟܖ̈ܶܐ: ܐܳܦܠܳܐ ܒܖ̈ܶܒܘܳܬܳܐ ܕܚܰܝܠܳܐ ܕܡܽܘܫܚ̈ܶܐ. ܐܶܢ ܐܶܬܶܠ ܒܽܘܟܪܝ ܥܰܘܠܰܐ ܗ̱ܘ ܠܺܝ: ܘܦܺܐܖ̈ܶܐ ܕܟܰܪܣܝ ܚܛܺܝܬܳܐ ܐܶܢܽܘܢ ܕܢܰܦܫܝ.
8 ܚܰܘܺܝܬܳܟ ܒܰܪܢܳܫܳܐ ܡܶܕܶܡ ܕܰܡܥܰܕܰܪ ܕܬܳܒܰܥ ܠܳܟ ܡܳܪܝܳܐ: ܕܬܶܥܒܶܕ ܕܺܝܢܳܐ ܘܬܶܪܚܰܡ ܛܰܝܒܽܘܬܳܐ: ܘܬܶܗܘܶܐ ܥܬܺܝܕ ܠܡܺܐܙܰܠ ܒܳܬܰܪ ܐܰܠܳܗܳܟ.
9 ܩܳܠܶܗ ܕܡܳܪܝܳܐ ܥܰܠ ܡܕܺܝܢ̱ܬܳܐ: ܡܰܟܪܶܙ ܝܽܘܠܦܳܢܳܐ ܠܕܳܚܠܰܝ̈ ܫܡܶܗ: ܫܡܰܥ ܫܰܒ̈ܛܶܐ ܡܰܢ ܢܰܣܗܶܕ.
10 ܕܬܽܘܒ ܢܽܘܪܳܐ ܒܒܰܝܬܶܗ ܕܥܰܘܳܠܳܐ: ܘܰܐܘܨܖ̈ܶܐ ܕܥܰܘܠܳܐ: ܘܰܟܝܳܠܬܳܐ ܙܥܽܘܪܬܳܐ ܕܥܶܬܳܐ.
11 ܐܰܝܟܰܢܳܐ ܢܶܙܕܰܕܩܽܘܢ ܒܡܰܣܰܐܬܳܐ ܕܥܰܘܠܳܐ: ܘܰܒܡܰܪܣܽܘܦܳܐ ܕܡܰܬܩ̈ܳܠܶܐ ܕܢܶܟܠܳܐ.
12 ܕܥܰܬܺܝܖ̈ܶܝܗ̇ ܡܠܶܝܢ ܥܶܬܳܐ: ܘܥܳܡܽܘܖ̈ܶܝܗ̇ ܡܡܰܠܠܺܝܢ ܕܰܓܳܠܽܘܬܳܐ: ܘܠܶܫܳܢܗܽܘܢ ܢܟܺܝܠ ܒܦܽܘܡܗܽܘܢ.
13 ܐܳܦ ܐܶܢܳܐ ܐܶܫܰܪܶܐ ܠܡܶܡܚܝܳܟ: ܘܶܐܚܰܒܠܳܟ ܡܶܛܽܠ ܚܛܳܗܰܝ̈ܟ.
14 ܘܬܶܐܟܽܘܠ ܘܠܳܐ ܬܶܣܒܰܥ: ܘܥܳܒܰܪܬܳܐ ܬܶܗܘܶܐ ܒܓܰܘܟ: ܘܬܰܕܪܶܟ ܘܠܳܐ ܬܦܰܨܶܐ: ܘܡܶܕܶܡ ܕܰܬܦܰܨܶܐ ܠܚܰܪܒܳܐ ܐܰܫܠܶܡ.
15 ܐܰܢ̱ܬ ܬܶܙܪܽܘܥ ܘܠܳܐ ܬܶܚܨܽܘܕ: ܐܰܢ̱ܬ ܬܶܥܨܽܘܪ ܙܰܝ̈ܬܶܐ ܘܠܳܐ ܬܶܡܫܽܘܚ ܡܶܫܚܳܐ: ܘܬܶܥܨܽܘܪ ܚܰܡܪܳܐ ܘܠܳܐ ܬܶܫܬܶܐ.
16 ܥܰܠ ܕܰܢܛܰܪܬ ܦܽܘܩܕܳܢܰܘ̈ܗܝ ܕܥܰܡܪܝ: ܘܟܽܠܗܽܘܢ ܥܒ̈ܳܕܶܐ ܕܒܶܝܬ ܐܳܚܳܒ: ܘܗܰܠܶܟܬܽܘܢ ܒܬܰܖ̈ܥܝܳܬܗܽܘܢ: ܡܶܛܽܠ ܗܳܢܳܐ ܝܰܗܒܬܳܗ̇ ܒܬܶܡܗܳܐ: ܘܥܳܡܽܘܖ̈ܶܝܗ̇ ܒܡܰܫܪܽܘܩܺܝܬܳܐ: ܘܚܶܣܕܶܗ ܕܥܰܡܝ ܬܩܰܒܠܽܘܢ.