Micah 7
The Book of Micah
܀ ܡܝܟ̣ܐ ܙ ܀
1 ܘܳܝܠܺܝ ܕܰܗܘܺܝ݀ܬ ܐܰܝܟ ܠܩܳܛܳܐ ܕܩܰܝܛܳܐ: ܘܰܐܝܟ ܒܽܘܥܳܪܳܐ ܕܰܩܛܳܦܳܐ: ܠܰܝܬ ܣܓܽܘܠܳܐ ܠܡܶܐܟܰܠ: ܘܰܠܒܰܟܳܪܬܳܐ ܪܶܓܰܬ ܢܰܦܫܝ.
2 ܐܶܒܰܕ ܚܰܣܝܳܐ ܡܶܢ ܐܰܪܥܳܐ: ܘܠܰܝܬ ܕܰܬܪܺܝܨ ܒܰܒܢܰܝ̈ܢܳܫܳܐ: ܟܽܠܗܽܘܢ ܟܡܺܐܢ̈ܶܐ ܟܳܡܢܺܝܢ: ܘܰܓܒܰܪ ܠܰܐܚܽܘܗܝ ܨܳܝܕܺܝܢ ܠܰܐܒܕܳܢܳܐ.
3 ܐܺܝܕܰܝ̈ܗܽܘܢ ܡܛܰܝ̈ܒܳܢ ܠܒܺܝܫܬܳܐ ܘܠܳܐ ܡܶܛܐܒܺܝܢ: ܫܰܠܺܝܛܳܐ ܫܳܐܶܠ ܕܗܰܒ: ܘܕܰܝܳܢܳܐ ܐܳܡܰܪ ܫܚܽܘܕ: ܘܪܰܒܳܐ ܡܡܰܠܶܠ ܨܶܒܝܳܢܳܐ ܕܢܰܦܫܶܗ.
4 ܘܰܐܣܠܺܝܘ ܛܳܒܬܗܽܘܢ: ܐܰܝܟ ܐܽܘܪܩܰܥܬܳܐ ܕܶܐܟܰܠ ܣܳܣܳܐ: ܝܰܘܡܳܐ ܕܕܰܘܩܰܝ̈ܟܝ ܘܰܕܦܽܘܪܩܳܢܶܟܝ ܐܶܬܳܐ: ܡܶܟܺܝܠ ܢܶܗܘܶܐ ܒܶܝܬ ܒܳܟܰܝ̈ܗܽܘܢ.
5 ܠܳܐ ܬܗܰܝܡܢܽܘܢ ܠܖ̈ܳܚܡܰܝܟܽܘܢ: ܘܠܳܐ ܬܶܬܰܐܟܠܽܘܢ ܥܰܠ ܩܰܖ̈ܺܝܒܰܝܟܽܘܢ: ܘܡܶܢ ܐܰܢ̱ܬܬܳܟ ܛܰܪ ܡܶܠܰܝ̈ ܦܽܘܡܳܟ.
6 ܡܶܛܽܠ ܕܰܒܪܳܐ ܡܨܰܥܰܪ ܠܰܐܒܽܘܗܝ: ܘܒܰܪܬܳܐ ܩܳܝܡܳܐ ܠܽܘܩܒܰܠ ܐܶܡܳܗ̇: ܘܟܰܠܬܳܐ ܠܽܘܩܒܰܠ ܚܡܳܬܳܗ̇: ܘܰܒܥܶܠܕܒܳܒܰܘ̈ܗܝ ܕܓܰܒܪܳܐ ܒܢܰܝ̈ ܒܰܝܬܶܗ.
7 ܐܶܢܳܐ ܕܶܝܢ ܠܡܳܪܝܳܐ ܐܶܚܽܘܪ: ܘܶܐܣܰܟܶܐ ܠܰܐܠܳܗܳܐ ܦܳܪܽܘܩܝ: ܘܢܶܫܡܥܰܢܝ ܐܰܠܳܗܝ.
8 ܠܳܐ ܬܶܚܕܶܝܢ ܠܺܝ ܒܥܶܠܕܒܳܒܬܝ ܕܢܶܦܠܶܬ: ܬܽܘܒ ܩܳܝܡܳܐ ܐ̱ܢܳܐ: ܘܰܕܝܶܬܒܶܬ ܒܚܶܫܽܘܟܳܐ ܡܳܪܝܳܐ ܡܰܢܗܰܪ ܠܺܝ.
9 ܡܚܽܘܬܶܗ ܕܡܳܪܝܳܐ ܐܶܣܰܝܒܰܪ ܥܰܠ ܕܰܚܛܺܝܬ ܠܶܗ: ܥܕܰܡܳܐ ܕܰܢܕܽܘܢ ܕܺܝܢܝ ܘܢܶܥܒܶܕ ܬܒܰܥܬܝ: ܘܢܰܦܩܰܢܝ ܠܢܽܘܗܪܳܐ ܘܶܐܚܙܶܐ ܒܙܰܕܺܝܩܽܘܬܶܗ.
10 ܘܬܶܚܙܶܐ ܒܥܶܠܕܒܳܒܬܝ ܘܰܬܟܰܣܶܝܗ̇ ܒܶܗܬܬܳܐ: ܕܳܐܡܪܳܐ ܗ̱ܘܳܬ ܠܺܝ ܐܰܝܟܰܐ ܗ̱ܘ ܡܳܪܝܳܐ ܐܰܠܳܗܳܟܝ: ܥܰܝܢܰܝ̈ ܢܶܚܙ̈ܝܳܢ ܒܶܗ: ܡܶܟܺܝܠ ܬܶܗܘܶܐ ܠܰܕܝܳܫܳܐ ܐܰܝܟ ܣܝܳܢܳܐ ܕܫܽܘ̈ܩܶܐ.
11 ܝܰܘܡܰܐ ܗ̱ܘ ܠܡܶܒܢܳܐ ܣܝܳܓܰܝ̈ܟܝ: ܝܰܘܡܰܐ ܗ̱ܘ ܕܬܶܫܬܰܩܠܺܝܢ.
12 ܝܰܘܡܰܐ ܗ̱ܘ ܕܙܰܒܢܶܟܝ ܢܺܐܬܶܐ ܡܶܢ ܐܳܬܽܘܪ: ܘܡܶܢ ܡܕܺܝ̈ܢܳܬܳܐ ܥܰܫܺܝ̈ܢܳܬܳܐ: ܘܡܶܢ ܨܽܘܪ ܘܰܥܕܰܡܳܐ ܠܢܰܗܪܳܐ: ܘܡܶܢ ܝܰܡܳܐ ܘܰܥܕܰܡܳܐ ܠܝܰܡܳܐ: ܘܰܥܕܰܡܳܐ ܠܗܽܘܪ ܛܽܘܪܳܐ.
13 ܘܬܶܗܘܶܐ ܐܰܪܥܳܐ ܠܰܚܒܳܠܳܐ ܠܥܳܡܽܘܖ̈ܶܝܗ̇: ܡܶܛܽܠ ܦܺܐܖ̈ܶܐ ܕܰܥܒܳܕܰܝ̈ܗܽܘܢ.
14 ܪܥܺܝ ܠܥܰܡܳܟ ܒܫܰܒܛܳܟ ܘܰܠܥܳܢ̈ܳܐ ܕܝܳܪܬܽܘܬܳܟ: ܢܶܫܪܽܘܢ ܒܰܠܚܽܘܕܰܝܗܽܘܢ ܐܰܝܟ ܥܳܢ̈ܳܐ ܒܓܰܘ ܟܰܪܡܠܳܐ: ܢܶܪܥܽܘܢ ܒܡܰܬܢܺܝܢ ܘܰܒܓܶܠܥܳܕ ܐܰܝܟ ܝܰܘ̈ܡܳܬܳܐ ܕܡܶܢ ܥܳܠܰܡ.
15 ܘܰܐܝܟ ܝܰܘܡܳܐ ܕܰܢܦܰܩܘ ܒܶܗ ܡܶܢ ܐܰܪܥܳܐ ܕܡܶܨܪܶܝܢ: ܐܶܚܰܘܶܐ ܐܶܢܽܘܢ ܬܶܕܡܖ̈ܳܬܳܐ.
16 ܘܢܶܚܙܽܘܢ ܥܰܡ̈ܡܶܐ ܘܢܶܒܗܬܽܘܢ ܡܶܢ ܟܽܠܶܗ ܓܰܢ̱ܒܳܪܽܘܬܗܽܘܢ: ܢܣܺܝܡܽܘܢ ܐܺܝܕܰܝ̈ܗܽܘܢ ܥܰܠ ܦܽܘܡܗܽܘܢ: ܘܶܐܕܢܰܝ̈ܗܽܘܢ ܢܶܬܚܰܖ̈ܫܳܢ.
17 ܘܢܶܠܚܟܽܘܢ ܥܰܦܪܳܐ ܐܰܝܟ ܚܶܘܝܳܐ: ܘܰܐܝܟ ܚܽܘܠܕܰܝ̈ ܐܰܪܥܳܐ ܢܶܪܓܙܽܘܢ ܡܶܢ ܫܒܺܝܠܰܝ̈ܗܽܘܢ: ܘܡܶܢ ܡܳܪܝܳܐ ܐܰܠܳܗܰܢ ܢܙܽܘܥܽܘܢ ܘܢܶܕܚܠܽܘܢ.
18 ܠܰܝܬ ܐܰܠܳܗܳܐ ܐܰܟܘܳܬܳܟ: ܕܫܳܒܶܩ ܥܰܘܠܳܐ ܘܡܰܥܒܰܪ ܚܛܺܝܬܳܐ ܕܫܰܪܟܳܐ ܕܝܳܪܬܽܘܬܶܗ: ܘܠܳܐ ܐܳܚܶܕ ܐܰܢ̱ܬ ܐܰܟܬܳܐ ܠܥܳܠܰܡ: ܡܶܛܽܠ ܕܰܒܛܰܝܒܽܘܬܳܐ ܨܒܰܝܬ.
19 ܢܶܬܦܢܶܐ ܘܰܢܪܰܚܶܡ ܥܠܰܝܢ: ܘܢܶܟܢܽܘܫ ܟܽܠܶܗ ܥܰܘܠܰܢ: ܘܢܶܫܕܶܐ ܒܥܽܘܡܩܰܘ̈ܗܝ ܕܝܰܡܳܐ ܟܽܠܗܽܘܢ ܚܛܳܗܰܝ̈ܢ.
20 ܬܶܬܶܠ ܩܽܘܫܬܳܐ ܠܝܰܥܩܽܘܒ: ܘܛܰܝܒܽܘܬܳܐ ܠܰܐܒܪܳܗܳܡ: ܕܺܝܡܰܝܬ ܠܰܐܒܳܗܰܝ̈ܢ ܡܶܢ ܝܰܘ̈ܡܳܬܳܐ ܕܡܶܢ ܥܳܠܰܡ.