Obadiah 1
The Book of Obadiah
܀ ܥܘܒܕܝܐ ܐ ܀
1 ܚܶܙܘܳܐ ܕܥܽܘܒܰܕܝܳܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ ܠܰܐܕܽܘܡ: ܛܶܒܳܐ ܫܡܰܥܢ ܡܶܢ ܩܕܳܡ ܡܳܪܝܳܐ: ܘܺܐܝܙܓܰܕܳܐ ܠܥܰܡ̈ܡܶܐ ܐܶܫܬܠܰܚ: ܩܽܘܡ ܘܰܢܩܽܘܡ ܥܠܶܝܗ̇ ܠܰܩܪܳܒܳܐ.
2 ܗܳܐ ܙܥܽܘܪܳܐ ܝܰܗܒܬܳܟ ܒܥܰܡ̈ܡܶܐ: ܘܫܺܝܛ ܐܰܢ̱ܬ ܛܳܒ.
3 ܫܽܘܒܗܳܪܶܗ ܕܠܶܒܳܟ ܐܰܛܥܝܳܟ: ܕܥܳܡܰܪ ܒܥܽܘܫܢܳܐ ܕܰܫܩܺܝܦܳܐ ܘܰܒܪܰܘܡܳܐ ܡܰܘܬܒܶܗ: ܘܳܐܡܰܪ ܒܠܶܒܶܗ ܡܰܢܽܘ ܢܰܚܬܰܢܝ ܠܰܐܪܥܳܐ.
4 ܐܶܢ ܬܶܬܪܺܝܡ ܐܰܝܟ ܢܶܫܪܳܐ: ܘܶܐܢ ܒܶܝܬ ܟܰܘܟ̈ܒܶܐ ܬܣܺܝܡ ܩܶܢܳܟ: ܡܶܢ ܬܰܡܳܢ ܐܰܚܬܳܟ ܐܳܡܰܪ ܡܳܪܝܳܐ.
5 ܐܶܢ ܓܰܢܳܒ̈ܶܐ ܐܶܬܰܘ ܥܠܰܝܟ: ܐܰܘ ܒܳܙܽܘ̈ܙܶܐ ܒܠܺܠܝܳܐ: ܐܰܝܟܰܢܳܐ ܫܬܶܩܬ ܥܕܰܡܳܐ ܕܰܓܢܰܒܘ ܡܶܣܬܗܽܘܢ: ܘܶܐܢ ܩܳܛܽܘ̈ܦܶܐ ܐܶܬܰܘ ܥܠܰܝܟ ܠܳܐ ܫܳܒܩܺܝܢ ܗ̱ܘܰܘ ܒܽܘܥܳܪܳܐ.
6 ܐܰܝܟܰܢܳܐ ܐܶܬܒܨܺܝ ܥܺܣܽܘ ܘܰܢܒܰܥ̈ܝ ܡܰܛܫ̈ܝܳܬܶܗ.
7 ܥܕܰܡܳܐ ܠܰܬܚܽܘܡܳܐ ܫܰܕܪܽܘܟ: ܟܽܠܗܽܘܢ ܓܰܒܖ̈ܶܐ ܕܰܩܝܳܡܳܟ ܐܰܛܥܝܽܘܟ: ܘܶܐܬܡܨܺܝܘ ܚܰܝܠܳܟ: ܓܰܒܖ̈ܶܐ ܕܰܫܠܳܡܳܟ ܘܰܕܠܰܚܡܳܟ ܣܳܡܘ ܟܡܺܐܢ̈ܶܐ ܬܚܽܘܬܰܝܟ: ܕܠܰܝܬ ܒܶܗ ܣܽܘܟܳܠܳܐ.
8 ܒܶܗ ܒܝܰܘܡܳܐ ܗܰܘ ܐܳܡܰܪ ܡܳܪܝܳܐ: ܐܰܘܒܶܕ ܚܰܟܺܝܡܳܐ ܡܶܢ ܐܰܕܽܘܡ: ܘܣܰܟܽܘܠܬܳܢܳܐ ܡܶܢ ܛܽܘܪܳܐ ܕܥܺܣܽܘ.
9 ܘܢܶܬܒܰܙܙܽܘܢ ܓܰܢ̱ܒܳܖ̈ܰܝܟܝ ܬܰܝܡܰܢ: ܘܢܺܐܒܰܕ ܐ̱ܢܳܫܳܐ ܡܶܢ ܛܽܘܪܳܐ ܕܥܺܣܽܘ.
10 ܡܶܢ ܩܶܛܠܳܐ ܘܡܶܢ ܚܛܽܘܦܝܳܐ ܕܰܐܚܽܘܟ ܝܰܥܩܽܘܒ: ܬܟܰܣܶܝܟ ܒܶܗܬܬܳܐ ܘܬܺܐܒܰܕ ܠܥܳܠܰܡ.
11 ܒܝܰܘܡܳܐ ܕܩܳܡܬ ܠܩܽܘܒܠܶܗ: ܒܝܰܘܡܳܐ ܕܰܫܒܰܘ ܢܽܘܟܖ̈ܳܝܶܐ ܚܰܝܠܶܗ: ܘܢܽܘܟܖ̈ܳܝܶܐ ܥܰܠܘ ܒܬܰܖ̈ܥܰܘܗܝ: ܘܥܰܠ ܐܽܘܪܺܫܠܶܡ ܐܰܪܡܺܝܘ ܦܶܨ̈ܶܐ: ܘܳܐܦ ܐܰܢ̱ܬ ܐܰܝܟ ܚܰܕ ܡܶܢܗܽܘܢ ܬܶܗܘܶܐ.
12 ܘܠܳܐ ܬܶܚܙܶܐ ܒܝܰܘܡܳܐ ܕܰܐܚܽܘܟ ܒܝܰܘܡܳܐ ܕܢܽܘܟܖ̈ܳܝܶܐ: ܘܠܳܐ ܬܶܚܕܶܐ ܠܰܒܢܰܝ̈ ܝܺܗܽܘܕܳܐ ܒܝܰܘܡܳܐ ܕܰܐܒܕܳܢܗܽܘܢ: ܘܠܳܐ ܬܰܘܪܶܒ ܦܽܘܡܳܟ ܒܝܰܘܡܳܐ ܕܽܐܘܠܨܳܢܳܐ.
13 ܘܠܳܐ ܬܶܥܽܘܠ ܒܬܰܪܥܶܗ ܕܥܰܡܝ ܒܝܰܘܡܳܐ ܕܥܳܩܰܬܗܽܘܢ: ܘܠܳܐ ܬܶܚܕܶܐ ܐܳܦ ܐܰܢ̱ܬ ܒܒܺܝܫܬܶܗ ܒܝܰܘܡܳܐ ܕܥܳܩܬܶܗ: ܘܠܳܐ ܬܣܰܪܕܺܝܘܗܝ ܒܚܰܝܠܶܗ ܒܝܰܘܡܳܐ ܕܥܳܩܬܶܗ.
14 ܘܠܳܐ ܬܩܽܘܡ ܥܰܠ ܡܰܩܰܒܬܳܐ ܠܡܰܘܒܳܕܽܘ ܠܰܡܫܰܘܙܒܳܘ̈ܗܝ: ܘܠܳܐ ܬܰܫܠܶܡ ܣܖ̈ܺܝܕܰܘܗܝ ܒܝܰܘܡܳܐ ܕܽܐܘܠܨܳܢܳܐ.
15 ܡܶܛܽܠ ܕܩܰܪܺܝܒܽ ܗ̱ܘ ܝܰܘܡܶܗ ܕܡܳܪܝܳܐ ܥܰܠ ܟܽܠܗܽܘܢ ܥܰܡ̈ܡܶܐ: ܐܰܝܟ ܕܰܥܒܰܕܬ ܗܳܟܰܢܳܐ ܢܶܬܥܒܶܕ ܠܳܟ: ܘܦܽܘܪܥܳܢܳܟ ܢܶܗܦܽܘܟ ܥܰܠ ܪܺܝܫܳܟ.
16 ܡܶܛܽܠ ܕܰܐܝܟܰܢܳܐ ܕܶܐܫܬܺܝܬܽܘܢ ܥܰܠ ܛܽܘܪܳܐ ܕܩܽܘܕܫܝ: ܢܶܫܬܽܘܢ ܟܽܠܗܽܘܢ ܥܰܡ̈ܡܶܐ ܐܰܡܺܝܢܳܐܺܝܬ: ܢܶܫܬܽܘܢ ܘܢܶܬܘܪܽܘܢ ܘܢܶܬܛܰܪܦܽܘܢ: ܘܢܶܗܘܽܘܢ ܐܰܝܟ ܕܠܳܐ ܗܘܰܘ.
17 ܘܰܒܛܽܘܪܳܐ ܕܨܶܗܝܽܘܢ ܬܶܗܘܶܐ ܡܫܰܘܙܒܽܘܬܳܐ: ܘܢܶܗܘܶܐ ܩܰܕܺܝܫ: ܘܢܺܐܪܬܽܘܢ ܕܒܶܝܬ ܝܰܥܩܽܘܒ ܠܰܐܝܠܶܝܢ ܕܺܝܪܶܬܘ ܐܶܢܽܘܢ.
18 ܘܢܶܗܘܶܐ ܒܶܝܬ ܝܰܥܩܽܘܒ ܢܽܘܪܳܐ: ܘܒܶܝܬ ܝܰܘܣܶܦ ܫܰܠܶܗܒܺܝܬܳܐ: ܘܒܶܝܬ ܥܺܣܽܘ ܚܰܒܬܳܐ: ܘܢܺܐܩܕܽܘܢ ܒܗܽܘܢ ܘܢܺܐܩܕܽܘܢ ܒܗܽܘܢ ܘܢܶܐܟܠܽܘܢ ܐܶܢܽܘܢ: ܘܠܳܐ ܢܶܗܘܶܐ ܣܪܺܝܕܳܐ ܠܒܰܝܬܳܐ ܕܥܺܣܽܘ: ܡܶܛܽܠ ܕܡܳܪܝܳܐ ܡܰܠܶܠ.
19 ܘܢܺܐܪܬܽܘܢ ܕܬܰܝܡܢܳܐ ܠܛܽܘܪܳܐ ܕܥܺܣܽܘ: ܘܕܰܦܩܰܥܬܳܐ ܠܰܦܠܶܫܬܳܝ̈ܶܐ: ܘܢܺܐܪܬܽܘܢ ܚܰܩܠܳܐ ܕܰܐܦܪܶܝܡ: ܘܚܰܩܠܳܐ ܕܫܳܡܪܺܝܢ: ܘܒܶܢܝܳܡܶܝܢ ܠܓܶܠܥܳܕ.
20 ܘܰܫܒܺܝܬܳܐ ܩܰܕܡܳܝܬܳܐ ܗܳܕܶܐ ܠܰܒܰܢܝ̈ ܝܺܣܪܳܐܶܝܠ: ܕܡܶܢ ܟܢܰܥܢ ܘܰܥܕܰܡܳܐ ܠܨܰܪܦܰܬ: ܘܰܫܒܺܝܬܳܐ ܕܽܐܘܪܺܫܠܶܡ ܕܒܶܐܣܦܳܢܝܳܐ: ܢܺܐܪܬܽܘܢ ܠܰܡܕܺܝ̈ܢܳܬܳܐ ܕܬܰܝܡܢܳܐ.
21 ܘܢܶܣܩܽܘܢ ܦܖ̈ܺܝܩܶܐ ܠܛܽܘܪܳܐ ܕܨܶܗܝܽܘܢ: ܠܰܡܕܳܢ ܠܛܽܘܪܳܐ ܕܥܺܣܽܘ: ܘܬܶܗܘܶܐ ܡܰܠܟܽܘܬܳܐ ܕܡܳܪܝܳܐ.