Amos 9
The Book of Amos
܀ ܥܡܘܣ ܛ ܀
1 ܚܙܺܝܬܶܗ ܠܡܳܪܝܳܐ ܕܩܳܐܶܡ ܥܰܠ ܡܰܕܒܚܳܐ: ܘܳܐܡܰܪ: ܡܚܺܝ ܠܚܰܙܽܘܪܳܐ: ܘܰܢܙܽܘ̈ܥܳܢ ܐܶܣ̈ܟܦܳܬܳܐ ܘܢܶܟܠܗܽܘܢ ܒܪܺܝܫ ܟܽܠܗܽܘܢ: ܘܚܰܪܬܗܽܘܢ ܒܚܰܪܒܳܐ ܐܶܩܰܛܶܠ: ܠܳܐ ܢܰܡܶܕ ܡܶܢܗܽܘܢ ܕܥܳܪܶܩ: ܘܠܳܐ ܢܶܫܬܰܘܙܰܒ ܡܶܢܗܽܘܢ ܕܡܶܬܦܰܨܶܐ.
2 ܐܶܢ ܢܶܚܬܽܘܢ ܠܰܫܝܽܘܠ ܡܶܢ ܬܰܡܳܢ ܬܰܣܶܩ ܐܶܢܽܘܢ ܐܺܝܕܝ: ܘܶܐܢ ܢܶܣܩܽܘܢ ܠܰܫܡܰܝܳܐ ܡܶܢ ܬܰܡܳܢ ܐܰܚܶܬ ܐܶܢܽܘܢ.
3 ܘܶܐܢ ܢܶܛܫܽܘܢ ܒܪܺܝܫܶܗ ܕܟܰܪܡܠܳܐ: ܡܶܢ ܬܰܡܳܢ ܐܶܒܨܶܐ ܘܶܐܣܰܒ ܐܶܢܽܘܢ: ܘܶܐܢ ܢܶܛܫܽܘܢ ܡܶܢ ܩܕܳܡ ܥܰܝܢܰܝ̈ ܒܰܬܗܽܘܡܰܘ̈ܗܝ ܕܝܰܡܳܐ: ܬܰܡܳܢ ܐܶܦܩܽܘܕ ܠܚܶܘܝܳܐ ܘܰܢܢܰܟܶܬ ܐܶܢܽܘܢ.
4 ܘܶܐܢ ܢܺܐܙܽܠܘܢ ܒܫܶܒܝܳܐ ܩܕܳܡ ܒܥܶܠܕܒܳܒܰܝ̈ܗܽܘܢ: ܬܰܡܳܢ ܐܶܦܩܽܘܕ ܠܣܰܝܦܳܐ ܘܰܢܩܰܛܶܠ ܐܶܢܽܘܢ: ܘܶܐܣܺܝܡ ܥܰܝܢܝ ܥܠܰܝܗܽܘܢ ܠܒܺܝܫܬܳܐ ܘܠܳܐ ܠܛܳܒܬܳܐ.
5 ܐܳܡܰܪ ܡܳܪܶܐ ܡܳܖ̈ܰܘܳܬܳܐ ܚܰܝܠܬܳܢܳܐ: ܕܩܳܪܶܒ ܠܰܐܪܥܳܐ ܘܙܳܝܥܳܐ: ܘܝܳܬܒܺܝܢ ܒܶܐܒܠܳܐ ܟܽܠܗܽܘܢ ܥܳܡܽܘܖ̈ܶܝܗ̇: ܘܣܳܠܶܩ ܩܶܨܳܗ̇ ܐܰܝܟ ܢܰܗܪܳܐ: ܘܢܳܚܶܬ ܐܰܝܟ ܢܰܗܪܳܐ ܕܡܶܨܪܶܝܢ.
6 ܕܰܒܢܳܐ ܒܰܫܡܰܝܳܐ ܡܰܣܩܳܢܰܘ̈ܗܝ: ܘܡܽܘܠܟܳܢܶܗ ܒܰܐܪܥܳܐ ܡܰܬܩܰܢ: ܕܩܳܪܶܐ ܠܡܰܝ̈ܳܐ ܕܝܰܡܳܐ: ܘܳܐܫܶܕ ܠܗܽܘܢ ܥܰܠ ܐܰܦܶܝ̈ܗ̇ ܕܰܐܪܥܳܐ ܡܳܪܝܳܐ ܚܰܝܠܬܳܢܳܐ ܫܡܶܗ.
7 ܗܳܐ ܐܰܝܟ ܒܢܰܝ̈ ܟܽܘܫܳܝ̈ܶܐ ܐܰܢ̱ܬܽܘܢ ܠܺܝ ܒܢܰܝ̈ ܝܺܣܪܳܐܶܝܠ ܐܳܡܰܪ ܡܳܪܝܳܐ: ܗܳܐ ܠܺܝܣܪܳܐܶܝܠ ܐܰܣܩܶܬ ܡܶܢ ܐܰܪܥܳܐ ܕܡܶܨܪܶܝܢ: ܘܠܰܦܠܶܫܬܳܝ̈ܶܐ ܡܶܢ ܩܰܦܰܕܽܘܩܺܝ: ܘܠܳܐܪܳܡ ܡܶܢ ܩܺܝܪ.
8 ܗܳܐ ܥܰܝܢܰܘ̈ܗܝ ܕܡܳܪܶܐ ܡܳܖ̈ܰܘܳܬܳܐ ܒܡܰܠܟܽܘܬܳܐ ܚܰܛܳܝܬܳܐ: ܘܰܐܘܒܕܺܝܗ̇ ܡܶܢ ܐܰܦܶܝ̈ܗ̇ ܕܰܐܪܥܳܐ: ܒܪܰܡ ܠܳܐ ܗܳܟܰܢܳܐ ܐܰܘܒܕܺܝܘܗܝ ܠܒܰܝܬܶܗ ܕܝܰܥܩܽܘܒ ܐܳܡܰܪ ܡܳܪܝܳܐ.
9 ܡܶܛܽܠ ܕܗܳܐ ܐܶܢܳܐ ܦܳܩܶܕ ܐ̱ܢܳܐ: ܘܶܐܒܰܕܰܪ ܒܟܽܠܗܽܘܢ ܥܰܡ̈ܡܶܐ ܠܰܕܒܶܝܬ ܝܺܣܪܳܐܶܝܠ: ܐܰܝܟ ܕܥܳܪܒܺܝܢ ܒܥܰܪܒܳܠܳܐ: ܘܠܳܐ ܢܶܦܶܠ ܕܰܩܺܝܩܗܽܘܢ ܥܰܠ ܐܰܪܥܳܐ.
10 ܒܚܰܪܒܳܐ ܢܶܦܠܽܘܢ ܟܽܠ ܚܰܛܳܝܰܘ̈ܗܝ ܕܥܰܡܝ: ܕܳܐܡܪܺܝܢ: ܠܳܐ ܬܶܩܪܽܘܒ ܘܠܳܐ ܬܶܡܛܶܝܢ ܒܺܝܫܬܳܐ.
11 ܒܶܗ ܒܝܰܘܡܳܐ ܗܰܘ: ܐܰܩܺܝܡ ܡܰܫܟܢܶܗ ܕܕܰܘܺܝܕ ܕܰܢܦܰܠ: ܐܶܣܽܘܓ ܬܽܘܖ̈ܥܳܬܗܽܘܢ: ܘܰܡܣܰܚ̈ܦܳܬܗܽܘܢ ܐܰܩܺܝܡ: ܘܶܐܒܢܺܝܗ̇ ܐܰܝܟ ܝܰܘ̈ܡܳܬܳܐ ܕܥܳܠܰܡ: ܘܰܐܝܟ ܫܢܰܝ̈ܳܐ ܕܕܳܪܕܳܖ̈ܺܝܢ.
12 ܡܶܛܽܠ ܕܢܺܐܪܬܽܘܢ ܫܰܪܟܳܐ ܕܰܐܕܽܘܡ: ܘܟܽܠܗܽܘܢ ܥܰܡ̈ܡܶܐ ܕܶܐܬܩܪܺܝ ܫܶܡܝ ܥܠܰܝܗܽܘܢ: ܐܳܡܰܪ ܡܳܪܝܳܐ ܕܥܳܒܶܕ ܗܳܠܶܝܢ.
13 ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܢܰܕܪܶܟ ܐܶܕܪܳܐ ܠܰܩܛܳܦܳܐ: ܘܰܥܨܳܪܳܐ ܕܥܶܢ̈ܒܶܐ ܠܙܰܪܥܳܐ: ܘܢܰܪܕܽܘܢ ܛܽܘܖ̈ܶܐ ܚܰܠܝܽܘܬܳܐ: ܘܟܽܠܗܶܝܢ ܖ̈ܳܡܳܬܳܐ ܢܶܬܒܰܣ̈ܡܳܢ.
14 ܘܰܐܗܦܶܟ ܫܒܺܝܬܳܐ ܕܥܰܡܝ ܝܺܣܪܳܐܶܝܠ: ܘܢܶܒܢܽܘܢ ܡܕܺܝ̈ܢܳܬܳܐ ܚܰܖ̈ܒܳܬܳܐ ܘܢܶܬܒܽܘܢ: ܘܢܶܨܒܽܘܢ ܟܰܖ̈ܡܶܐ ܘܢܶܫܬܽܘܢ ܚܰܡܪܗܽܘܢ: ܘܢܶܫܬܠܽܘܢ ܦܰܖ̈ܕܰܝܣܳܐ ܘܢܶܐܟܠܽܘܢ ܦܺܐܖ̈ܰܝܗܽܘܢ.
15 ܘܶܐܨܽܘܒ ܐܶܢܽܘܢ ܒܰܐܪܥܗܽܘܢ: ܘܠܳܐ ܢܶܬܥܰܩܪܽܘܢ ܬܽܘܒ ܡܶܢ ܐܰܪܥܗܽܘܢ ܕܝܶܗܒܶܬ ܠܗܽܘܢ: ܐܳܡܰܪ ܡܳܪܝܳܐ ܐܰܠܳܗܳܟ.