2 Timothy 4
Second Epistle to Timothy
܀ ܕܛܝܡܬܐܘܣ ܕܬܪ̈ܬܝܢ ܕ ܀
1- ܡܣܰܗܶܕ ܐ̱ܢܳܐ ܠܳܟ ܩܕܳܡ ܐܰܠܳܗܳܐ ܘܡܳܪܰܢ ܝܶܫܽܘܥ ܡܫܺܝܚܳܐ܁ ܗܰܘ ܕܰܥܬܺܝܕ ܠܰܡܕܳܢ ܚܰܝ̈ܶܐ ܘܡܺܝ̈ܬܶܐ ܒܓܶܠܝܳܢܳܐ ܕܡܰܠܟܽܘܬܶܗ܆
2- ܐܰܟܪܶܙ ܡܶܠܬܳܐ܁ ܘܩܽܘܡ ܒܰܚܦܺܝܛܽܘܬܳܐ ܒܙܰܒܢܳܐ ܘܰܕܠܳܐ ܙܰܒܢܳܐ܇ ܐܰܟܶܣ ܘܟܰܘܶܢ܁ ܒܟܽܠܳܗ̇ ܡܰܓܪܰܬ ܪܽܘܚܳܐ ܘܝܽܘܠܦܳܢܳܐ.
3- ܢܶܗܘܶܐ ܓܶܝܪ ܙܰܒܢܳܐ܆ ܕܰܠܝܽܘܠܦܳܢܳܐ ܚܠܺܝܡܳܐ ܠܳܐ ܢܶܫܬܰܡܥܽܘܢ: ܐܶܠܳܐ ܐܰܝܟ ܪ̈ܓܺܝܓܳܬܗܽܘܢ܁ ܢܰܣܓܽܘܢ ܠܢܰܦܫܗܽܘܢ ܡܰܠܦܳܢ̈ܶܐ ܒܚܽܘܬܚܳܬܳܐ ܕܡܰܫܡܰܥܬܗܽܘܢ܇
4- ܘܡܶܢ ܫܪܳܪܳܐ ܢܰܗܦܟܽܘܢ ܐܶܕܢܗܽܘܢ܇ ܠܫܽܘ̈ܥܝܳܬܳܐ ܕܶܝܢ ܢܶܣܛܽܘܢ܀
5- ܐܰܢ̱ܬ ܕܶܝܢ ܗܘܰܝܬ ܥܺܝܪ ܒܟܽܠܡܶܕܶܡ. ܘܣܰܝܒܰܪ ܒܺܝ̈ܫܳܬܳܐ. ܘܰܥܒܳܕܳܐ ܥܒܶܕ ܕܰܡܣܰܒܪܳܢܳܐ. ܘܬܶܫܡܶܫܬܳܟ ܫܰܠܶܡ܀
6- ܐܶܢܳܐ ܓܶܝܪ ܡܶܟܺܝܠ ܡܶܬܢܰܩܶܐ ܐ̱ܢܳܐ܆ ܘܙܰܒܢܳܐ ܕܶܐܫܬܪܶܐ܇ ܡܛܳܐ.
7- ܐܰܓܽܘܢܳܐ ܫܰܦܺܝܪܳܐ ܐܶܬܟܰܬܫܶܬ. ܘܪܶܗܛܝ ܫܰܠܡܶܬ. ܘܗܰܝܡܳܢܽܘܬܝ ܢܶܛܪܶܬ.
8- ܘܡܶܢ ܗܳܫܳܐ ܢܛܺܝܪ ܠܺܝ ܟܠܺܝܠܳܐ ܕܟܺܐܢܽܘܬܳܐ܆ ܕܢܶܦܪܥܺܝܘܗ̱ܝ ܠܺܝ ܡܳܪܝ ܒܝܰܘܡܳܐ ܗܰܘ܁ ܕܗܽܘܝܽܘ ܕܰܝܳܢܳܐ ܟܺܐܢܳܐ܇ ܠܳܐ ܕܶܝܢ ܒܰܠܚܽܘܕ ܠܺܝ܇ ܐܶܠܳܐ ܐܳܦ ܠܰܐܝܠܶܝܢ ܕܰܐܚܶܒܘ ܠܓܶܠܝܳܢܶܗ܀
9- ܢܶܬܒܛܶܠ ܠܳܟ ܕܬܺܐܬܶܐ ܠܘܳܬܝ ܒܰܥܓܰܠ.
10- ܕܺܡܰܐ ܓܶܝܪ ܫܰܒܩܰܢܝ܆ ܘܰܐܚܶܒ ܥܳܠܡܳܐ ܗܳܢܳܐ. ܘܶܐܙܰܠ ܠܶܗ ܠܬܶܣܰܠܳܘܢܺܝܩܺܐ. ܩܪܺܣܩܳܘܣ ܠܓܰܠܰܛܺܝܰܐ. ܛܺܛܳܘܣ ܠܕܰܠܡܰܛܺܝܰܐ.
11- ܠܽܘܩܰܐ ܗ̱ܘ ܒܰܠܚܽܘܕܰܘܗ̱ܝ ܥܰܡܝ. ܠܡܰܪܩܳܘܣ ܕܒܰܪ ܘܰܐܝܬܳܝܗ̱ܝ ܥܰܡܳܟ܆ ܥܳܗܶܢ ܠܺܝ ܓܶܝܪ ܠܬܶܫܡܶܫܬܳܐ.
12- ܠܛܽܘܟܺܝܩܳܘܣ ܕܶܝܢ ܫܰܕܪܶܬ ܠܶܐܦܶܣܳܘܣ.
13- ܒܶܝܬ ܟܬܳܒ̈ܶܐ ܕܶܝܢ ܕܫܶܒܩܶܬ ܒܰܛܪܳܘܰܐܣ ܠܘܳܬ ܩܰܪܦܳܘܣ܆ ܡܳܐ ܕܳܐܬܶܐ ܐܰܢ̱ܬ܁ ܐܰܝܬܳܝܗ̱ܝ܇ ܘܰܟ̈ܬܳܒܶܐ. ܝܰܬܺܝܪܳܐܺܝܬ ܟܶܪ̈ܟܶܐ ܕܰܡܓ̈ܰܠܶܐ.
14- ܐܰܠܶܟܣܰܢܕܪܳܘܣ ܩܰܝܢܳܝܳܐ ܒܺܝ̈ܫܳܬܳܐ ܣܰܓܺܝ̈ܳܐܬܳܐ ܚܰܘܝܰܢܝ܆ ܦܪܰܥ ܠܶܗ ܡܳܪܰܢ ܐܰܝܟ ܥ̈ܒܳܕܰܘܗ̱ܝ܆
15- ܐܳܦ ܐܰܢ̱ܬ ܕܶܝܢ ܐܶܙܕܰܗِܪ ܡܶܢܶܗ܇ ܛܳܒ ܓܶܝܪ ܙܩܺܝܦ ܠܽܘܩܒܰܠ ܡ̈ܶܠܰܝܢ܀
16- ܒܡܰܦܰܩ ܒܪܽܘܚܝ ܩܰܕܡܳܝܳܐ ܠܳܐ ܐ̱ܢܳܫ ܗܘܳܐ ܥܰܡܝ܆ ܐܶܠܳܐ ܟܽܠܗܽܘܢ ܫܰܒܩܽܘܢܝ܇ ܠܳܐ ܬܶܬܚܫܶܒ ܠܗܽܘܢ ܗܳܕܶܐ.
17- ܡܳܪܝ ܕܶܝܢ ܩܳܡ ܠܺܝ ܘܚܰܝܠܰܢܝ܆ ܕܒܺܝ ܟܳܪܽܘܙܽܘܬܳܐ ܬܶܫܬܰܠܰܡ ܘܢܶܫܡܥܽܘܢ ܥܰܡ̱̈ܡܶܐ ܟܽܠܗܽܘܢ܇ ܕܶܐܬܦܰܨܺܝܬ ܡܶܢ ܦܽܘܡܳܐ ܕܰܐܪܝܳܐ.
18- ܘܰܢܦܰܨܶܝܢܝ ܡܳܪܝ ܡܶܢ ܟܽܠ ܥܒܳܕ ܒܺܝܫ܆ ܘܢܰܚܶܝܢܝ ܒܡܰܠܟܽܘܬܶܗ ܕܒܰܫܡܰܝܳܐ܇ ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ. ܐܰܡܺܝܢ܀
19- ܗܰܒ ܫܠܳܡܳܐ ܠܰܦܪܺܝܣܩܺܠܰܐ. ܘܠܰܐܩܶܠܳܘܣ. ܘܰܠܒܰܝܬܳܐ ܕܳܐܢܺܣܺܝܦܳܘܪܳܘܣ.
20- ܐܰܪܺܣܛܳܘܣ ܦܳܫ ܠܶܗ ܒܩܳܘܪܺܢܬܳܘܣ. ܛܪܳܘܦܺܝܡܳܘܣ ܕܶܝܢ ܫܒܰܩܬܶܗ ܟܰܕ ܟܪܺܝܗ܁ ܒܡܺܝܠܺܝܛܳܘܣ ܡܕܺܝܢ̱ܬܳܐ.
21- ܢܶܬܒܛܶܠ ܠܳܟ ܕܰܩܕܳܡ ܣܰܬܘܳܐ ܬܺܐܬܶܐ܀
22- ܡܳܪܰܢ ܝܶܫܽܘܥ ܡܫܺܝܚܳܐ ܥܰܡ ܪܽܘܚܳܟ. ܛܰܝܒܽܘܬܳܐ ܥܰܡܳܟ ܐܰܡܺܝܢ܀