Galatians 4
Epistle to the Galatians
܀ ܕܠܘܬ ܓܠܛܝ̈ܐ ܕ ܀
1- ܐܳܡܰܪ ܐ̱ܢܳܐ ܕܶܝܢ ܕܰܟܡܳܐ ܙܰܒܢܳܐ ܕܝܳܪܬܳܐ ܛܠܶܐ܆ ܠܳܐ ܦܪܺܝܫ ܡܶܢ ܥܰܒ̈ܕܶܐ܇ ܟܰܕ ܡܳܪܶܐ ܗ̱ܘ ܕܟܽܠܗܽܘܢ.
2- ܐܶܠܳܐ ܬܚܶܝܬ ܐܶܦܺܛܪ̈ܳܘܦܶܐ ܐܺܝܬܰܘܗ̱ܝ. ܘܪ̈ܰܒܰܝ ܒ̈ܳܬܶܐ܆ ܥܕܰܡܳܐ ܠܙܰܒܢܳܐ ܕܣܳܡ ܐܰܒܽܘܗ̱ܝ.
3- ܗܳܟܰܢܳܐ ܐܳܦ ܚܢܰܢ. ܟܰܕ ܝܰܠܽܘ̈ܕܶܐ ܗ̱ܘܰܝܢ܆ ܬܚܶܝܬ ܐܶܣܛܽܘ̈ܟܣܰܘܗ̱ܝ ܕܥܳܠܡܳܐ ܡܫܰܥܒܕܺܝܢ ܗ̱ܘܰܝܢ.
4- ܟܰܕ ܡܛܳܐ ܕܶܝܢ ܫܽܘܠܳܡܶܗ ܕܙܰܒܢܳܐ܆ ܫܰܕܰܪ ܐܰܠܳܗܳܐ ܠܰܒܪܶܗ܇ ܘܰܗܘܳܐ ܡܶܢ ܐܰܢ̱ܬܬܳܐ܇ ܘܰܗܘܳܐ ܬܚܶܝܬ ܢܳܡܽܘܣܳܐ܆
5- ܕܠܰܐܝܠܶܝܢ ܕܰܬܚܶܝܬ ܢܳܡܽܘܣܳܐ ܐܶܢܽܘܢ ܢܶܙܒܶܢ ܘܰܢܩܰܒܶܠ ܣܺܝܡܰܬ ܒܢܰܝ̈ܳܐ.
6- ܘܕܺܐܝܬܰܝܟܽܘܢ ܕܶܝܢ ܒܢܰܝ̈ܳܐ܆ ܫܰܕܰܪ ܐܰܠܳܗܳܐ ܪܽܘܚܳܐ ܕܰܒܪܶܗ ܠܠܶܒܰܘ̈ܳܬܟܽܘܢ. ܗܳܝ ܕܩܳܪܝܳܐ ܐܰܒܳܐ ܐܰܒܽܘܢ܀
7- ܡܶܟܺܝܠ ܠܳܐ ܗܘܰܝܬܽܘܢ ܥܰܒ̈ܕܶܐ. ܐܶܠܳܐ ܒܢܰܝ̈ܳܐ. ܘܶܐܢ ܒܢܰܝ̈ܳܐ. ܐܳܦ ܝܳܪ̈ܬܶܐ ܕܰܐܠܳܗܳܐ ܒܝܰܕ ܝܶܫܽܘܥ ܡܫܺܝܚܳܐ܀
8- ܗܳܝܕܶܝܢ ܓܶܝܪ ܟܰܕ ܠܳܐ ܝܳܕܥܺܝܢ ܗ̱ܘܰܝܬܽܘܢ ܠܰܐܠܳܗܳܐ܆ ܦܠܰܚܬܽܘܢ ܠܗܳܢܽܘܢ. ܕܡܶܢ ܟܝܳܢܗܽܘܢ ܠܳܐ ܗ̱ܘܰܘ ܐܰܠܳܗ̈ܶܐ.
9- ܗܳܫܳܐ ܕܶܝܢ ܕܺܝܕܰܥܬܽܘܢ ܠܰܐܠܳܗܳܐ: ܘܝܰܬܺܝܪܳܐܺܝܬ ܕܶܐܬܺܝܕܰܥܬܽܘܢ ܡܶܢ ܐܰܠܳܗܳܐ܆ ܬܽܘܒ ܗܦܰܟܬܽܘܢ ܠܟܽܘܢ ܥܰܠ ܗܳܢܽܘܢ ܐܶܣܛܽܘ̈ܟܣܶܐ ܡܰܪ̈ܥܶܐ ܘܡܶܣ̈ܟܺܢܶܐ܇ ܘܡܶܢ ܕܪܺܝܫ ܨܳܒܶܝܬܽܘܢ ܠܡܶܫܬܰܥܒܳܕܽܘ ܠܗܽܘܢ܆
10- ܝܰܘ̈ܡܶܐ܁ ܘܝܰܪ̈ܚܶܐ܁ ܘܙܰܒ̈ܢܶܐ܁ ܘܰܫܢܰܝ̈ܳܐ. ܢܳܛܪܺܝܬܽܘܢ.
11- ܕܳܚܶܠ ܐ̱ܢܳܐ ܕܰܠܡܳܐ ܣܪܺܝܩܳܐܺܝܬ ܠܺܐܝܬ ܒܟܽܘܢ؟
12- ܗܘܰܘ ܐܰܟܘܳܬܝ܆ ܡܶܛܽܠ ܕܳܐܦ ܐܶܢܳܐ ܐܰܟܘܳܬܟܽܘܢ ܗܘܺܝܬ܀
13- ܝܳܕܥܺܝܢ ܐܢ̱ܬܽܘܢ ܓܶܝܪ ܕܒܰܟܪܺܝܗܽܘܬ ܒܶܣܪܝ ܣܰܒܰܪܬܟܽܘܢ ܗ̱ܘܺܝܬ ܡܶܢ ܩܕܺܝܡ.
14- ܘܢܶܣܝܽܘܢܳܐ ܕܒܶܣܪܝ ܠܳܐ ܫܳܛܬܽܘܢ. ܘܠܳܐ ܢܰܕܬܽܘܢ. ܐܶܠܳܐ ܐܰܝܟ ܕܰܠܡܰܠܰܐܟܳܐ ܕܰܐܠܳܗܳܐ ܩܰܒܶܠܬܽܘܢܳܢܝ܆ ܘܰܐܝܟ ܕܰܠܝܶܫܽܘܥ ܡܫܺܝܚܳܐ.
15- ܐܰܝܟܰܘ ܗܳܟܺܝܠ ܛܽܘܒܟܽܘܢ؟ ܣܳܗܶܕ ܐ̱ܢܳܐ ܓܶܝܪ ܥܠܰܝܟܽܘܢ܁ ܕܶܐܠܽܘ ܡܶܫܟܚܳܐ ܗ̱ܘܳܬ܆ ܥܰܝ̈ܢܰܝܟܽܘܢ ܚܳܨܶܝܢ ܗ̱ܘܰܝܬܽܘܢ. ܘܝܳܗܒܺܝܢ ܠܺܝ.
16- ܕܰܠܡܳܐ ܒܥܶܠܕܒܳܒܳܐ ܗܘܺܝܬ ܠܟܽܘܢ܁ ܕܰܐܟܪܙܶܬ ܠܟܽܘܢ ܫܪܳܪܳܐ؟
17- ܚܳܣܡܺܝܢ ܒܟܽܘܢ ܠܳܐ ܗ̱ܘܳܐ ܠܫܰܦܺܝܪܬܳܐ. ܐܶܠܳܐ ܠܡܶܚܒܰܫܟܽܘܢܽ ܗ̱ܘ ܨܳܒܶܝܢ܆ ܕܰܐܢ̱ܬܽܘܢ ܬܶܗܘܽܘܢ ܚܳܣܡܺܝܢ ܒܗܽܘܢ.
18- ܫܰܦܺܝܪ ܗ̱ܘ ܕܶܝܢ ܕܬܶܬܚܰܣܡܽܘܢ ܒܫܰܦܺܝܪ̈ܳܬܳܐ ܒܟܽܠܙܒܰܢ܆ ܘܠܳܐ ܐܶܡܰܬܝ ܕܰܠܘܳܬܟܽܘܢ ܐ̱ܢܳܐ ܒܰܠܚܽܘܕ܀
19- ܒܢ̈ܰܝ܆ ܐܰܝܠܶܝܢ ܕܡܶܢ ܕܪܺܝܫ ܡܚܰܒܶܠ ܐ̱ܢܳܐ܇ ܥܕܰܡܳܐ ܕܢܶܬܬܨܺܝܪ ܒܟܽܘܢ ܡܫܺܝܚܳܐ܆
20- ܨܳܒܶܐ ܗ̱ܘܺܝܬ ܕܶܝܢ ܕܶܐܗܘܶܐ ܠܘܳܬܟܽܘܢ ܗܳܫܳܐ܆ ܘܶܐܫܰܚܠܶܦ ܒܰܪ̱ܬ ܩܳܠܝ: ܡܶܛܽܠ ܕܬܰܡܺܝܗ ܐ̱ܢܳܐ ܒܟܽܘܢ܀
21- ܐܶܡܰܪܘ ܠܺܝ. ܐܰܢ̱ܬܽܘܢ ܐܰܝܠܶܝܢ ܕܨܳܒܶܝܢ ܕܢܶܗܘܽܘܢ ܬܚܶܝܬ ܢܳܡܽܘܣܳܐ܆ ܠܶܗ ܠܢܳܡܽܘܣܳܐ ܠܳܐ ܫܳܡܥܺܝܢ ܐܢ̱ܬܽܘܢ܆
22- ܟܬܺܝܒ ܓܶܝܪ ܕܠܰܐܒܪܳܗܳܡ ܬܪܶܝܢ ܒܢܺܝ̈ܢ ܗܘܰܘ ܠܶܗ. ܚܰܕ ܡܶܢ ܐܰܡܬܳܐ. ܘܚܰܕ ܡܶܢ ܚܺܐܪܬܳܐ.
23- ܐܶܠܳܐ ܗܰܘ ܕܡܶܢ ܐܰܡܬܳܐ ܒܰܒܣܰܪ ܐܶܬܺܝܠܶܕ. ܗܰܘ ܕܶܝܢ ܕܡܶܢ ܚܺܐܪܬܳܐ ܒܡܽܘܠܟܳܢܳܐ ܗܘܳܐ.
24- ܗܳܠܶܝܢ ܕܶܝܢ ܐܺܝܬܰܝܗܶܝܢ ܦ̈ܶܠܳܐܬܳܐ ܕܬܰܪܬܶܝܢ ܕܺܝܰܬܺܩ̈ܰܣ. ܚܕܳܐ ܕܡܶܢ ܛܽܘܪ ܣܺܝܢܰܝ. ܝܳܠܕܳܐ ܠܥܰܒܕܽܘܬܳܐ. ܕܺܐܝܬܶܝܗ̇ ܗܳܓܳܪ.
25- ܗܳܓܳܪ ܓܶܝܪ ܛܽܘܪܰܐ ܗ̱ܘ ܕܣܺܝܢܰܝ܇ ܕܒܰܐܪܰܒܺܝܰܐ܆ ܘܫܳܠܡܳܐ ܠܗܳܕܶܐ ܐܽܘܪܺܫܠܶܡ܇ ܘܦܳܠܚܳܐ ܥܰܒܕܽܘܬܳܐ ܗܺܝ ܘܰܒܢܶܝ̈ܗ̇.
26- ܗܳܝ ܕܶܝܢ ܐܽܘܪܺܫܠܶܡ ܥܶܠܳܝܬܳܐ. ܚܺܐܪܬܳܐ ܗ̱ܝ܆ ܕܺܐܝܬܶܝܗ̇ ܐܶܡܰܢ.
27- ܟܬܺܝܒ ܓܶܝܪ܆ ܕܶܐܬܒܰܣܰܡܝ ܥܩܰܪܬܳܐ. ܗܳܝ ܕܠܳܐ ܝܳܠܕܳܐ! ܘܶܐܬܦܰܨܰܚܝ ܘܰܓܥܳܝ. ܗܳܝ ܕܠܳܐ ܡܚܰܒܠܳܐ. ܡܶܛܽܠ ܕܰܐܣܓܺܝܘ ܒܢܶܝ̈ܗ̇ ܕܨܳܕܺܝܬܳܐ. ܝܰܬܺܝܪ ܡܶܢ ܒܢܶܝ̈ܗ̇ ܕܰܒܥܺܝܠܬܳܐ܀
28- ܚܢܰܢ ܕܶܝܢ ܐܰܚܰܝ̈܆ ܐܰܝܟ ܐܺܝܣܚܳܩ ܒܢ̈ܰܝ ܡܽܘܠܟܳܢܳܐ ܚܢܰܢ.
29- ܘܰܐܝܟ ܕܗܳܝܕܶܝܢ ܗܰܘ ܕܺܝܠܺܝܕ ܗ̱ܘܳܐ ܒܒܶܣܪܳܐ ܪܳܕܶܦ ܗ̱ܘܳܐ ܠܗܰܘ ܕܰܒܪܽܘܚܳܐ܆ ܗܳܟܰܢܳܐ ܐܳܦ ܗܳܫܳܐ.
30- ܐܶܠܳܐ ܡܳܢܳܐ ܐܶܡܰܪ ܟܬܳܒܳܐ؟ ܐܰܦܶܩܶܝܗ̇ ܠܰܐܡܬܳܐ ܘܠܰܒܪܳܗ̇܆ ܡܶܛܽܠ ܕܠܳܐ ܢܺܐܪܰܬ ܒܪܳܗ̇ ܕܰܐܡܬܳܐ ܥܰܡ ܒܪܳܗ̇ ܕܚܺܐܪܬܳܐ.
31- ܚܢܰܢ ܗܳܟܺܝܠ ܐܰܚܰܝ̈܆ ܠܳܐ ܗ̱ܘܰܝܢ ܒܢ̈ܰܝ ܐܰܡܬܳܐ ܐܶܠܳܐ ܚܺܐܪܬܳܐ܀