Lamentations 2
The Book of Lamentations
܀ ܐܘܠܝ̈ܬܐ ܒ ܀
1 ܐܰܝܟܰܢܳܐ ܐܰܥܺܝܒ ܡܳܪܝܳܐ ܒܪܽܘܓܙܶܗ ܠܒܰܪܬ ܨܶܗܝܽܘܢ: ܐܰܪܡܺܝ ܡܶܢ ܫܡܰܝܳܐ ܠܰܐܪܥܳܐ ܬܶܫܒܽܘܚܬܶܗ ܕܺܝܣܪܳܐܶܝܠ: ܘܠܳܐ ܐܶܬܕܟܰܪ ܟܽܘܒܫܳܐ ܕܖ̈ܶܓܠܰܘܗܝ ܒܝܰܘܡܳܐ ܕܚܶܡܬܳܐ ܕܪܽܘܓܙܶܗ.
2 ܛܰܒܰܥ ܡܳܪܝܳܐ ܘܠܳܐ ܚܳܣ ܠܟܽܠܳܗ̇ ܕܰܝܪܶܗ ܕܝܰܥܩܽܘ ܣ̣ܚܰܦ ܒܚܶܡܬܶܗ ܠܟܰܪܟܳܐ ܕܒܰܪܬ ܝܺܗܽܘܕܳܐ: ܐܰܪܡܺܝ ܥܰܠ ܐܰܪܥܳܐ ܩܛܺܝ̈ܠܶܝܗ̇ ܡܰܠܟܶܝ̈ܗ̇ ܘܪܰܘܖ̈ܒܳܢܶܝܗ̇.
3 ܓܕܰܡ ܒܚܶܡܬܳܐ ܕܪܽܘܓܙܶܗ ܟܽܠܳܗ̇ ܩܰܪܢܶܗ ܕܺܝܣܪܳܐܶܝܠ: ܐܰܗܦܶܟ ܝܰܡܺܝܢܶܗ ܠܒܶܣܬܪܶܗ ܡܶܢ ܩܕܳܡ ܒܥܶܠܕܒܳܒܳܐ: ܘܰܫ̣ܒܰܩ ܢܽܘܪܳܐ ܒܝܰܥܩܽܘ ܘܫܰܠܗܶܒܺܝܬܳܐ ܐܶܟܠܰܬ ܐܺܝܕܰܘ̈ܗܝ.
4 ܡ̣ܠܳܐ ܩܶܫܬܶܗ ܐܰܝܟ ܐܳܠܽܘܨܳܐ: ܐܰܩܺܝܡ ܝܰܡܺܝܢܶܗ ܐܰܝܟ ܒܥܶܠܕܒܳܒܳܐ: ܘܩܰܛܶܠ ܟܽܠ ܪܶܓܰܬ ܥܰܝ̈ܢܶܐ ܒܡܰܫܟܢܳܐ ܕܒܰܪܬ ܨܶܗܝܽܘܢ: ܘܶܐܫܰܕ ܐܰܝܟ ܢܽܘܪܳܐ ܪܽܘܓܙܶܗ.
5 ܗܘܳܐ ܡܳܪܝܳܐ ܒܥܶܠܕܒܳܒܳܐ ܘܛܰܒܥܶܗ ܠܺܝܣܪܳܐܶܝܠ: ܘܛܰܒܰܥ ܟܽܠܗܶܝܢ ܣܳܚܖ̈ܳܬܶܗ ܘܚܰܒܶܠ ܟܰܖ̈ܟܰܘ̈ܗܝ. ܘܰܐܣܓܺܝ ܒܒܰܪܬ ܝܺܗܽܘܕܳܐ ܬܽܘܢܳܝܳܐ ܐܘܠ̈ܝܳܬܳܐ.
6 ܘܰܥ̣ܩܰܪ ܐܰܝܟ ܓܰܢܬܳܐ ܡܛܰܠܬܳܗ̇: ܘܚܰܒܶܠ ܥܰܕܥܺܐܕܶܝ̈ܗ̇: ܘܰܐܛܥܺܝ ܡܳܪܝܳܐ ܡܶܢ ܨܶܗܝܽܘܢ ܥܰܕܥܺܐܕ̈ܶܐ ܘܫܰܒܬܳܐ: ܘܰܐܣܠܺܝ ܒܚܶܡܬܳܐ ܕܪܽܘܓܙܶܗ ܡܰܠ̈ܟܶܐ ܘܟܳܗ̈ܢܶܐ.
7 ܛ̣ܥܳܐ ܡܳܪܝܳܐ ܡܰܩܕܫܶܗ: ܘܰܐܣܠܺܝ ܡܰܕܒܚܶܗ: ܘܰܐܫܠܶܡ ܒܺܐܝܕܳܐ ܕܰܒܥܶܠܕܒܳܒ̈ܶܐ ܫܽܘܖ̈ܶܐ ܕܣܳܚܖ̈ܳܬܳܗ̇: ܩܳܠܳܐ ܝ̣ܰܗܒܘ ܒܒܰܝܬܶܗ ܕܡܳܪܝܳܐ ܐܰܝܟ ܕܰܒܝܰܘܡܳܐ ܕܥܰܕܥܺܐܕܳܐ.
8 ܐܶܬܚܰܫܰܒ ܡܳܪܝܳܐ ܠܰܡܚܰܒܳܠܽܘ ܫܽܘܖ̈ܶܐ ܕܒܰܪܬ ܨܶܗܝܽܘܢ: ܐܰܪܡܺܝ ܚܽܘܛܳܐ ܘܠܳܐ ܐܰܗܦܶܟ ܐܺܝܕܶܗ ܡܶܢ ܛܽܘܒܳܥܳܗ̇: ܘܰܐܘܬܶܒ ܒܶܐܒܠܳܐ ܚܰܝܠܳܗ̇: ܘܫܽܘܖ̈ܶܝܗ̇ ܐܰܟܚܕܳܐ ܨܕܺܝܘ.
9 ܛܰܒܰܥܘ ܒܰܐܪܥܳܐ ܬܰܖ̈ܥܶܝܗ̇: ܐܰܘܒܶܕܘ ܘܬܰܒܰܪܘ ܣܽܘܟܖ̈ܶܝܗ̇: ܡܰܠ̈ܟܶܝܗ̇ ܘܪܰܘܖ̈ܒܳܢܶܝܗ̇ ܒܥܰܡ̈ܡܶܐ: ܠܰܝܬ ܢܳܡܽܘܣܳܐ: ܘܳܐܦ ܢܒܺܝܶܝ̈ܗ̇ ܠܳܐ ܐܶܫ̣ܟܰܚܘ ܚܶܙܘܳܐ ܡܶܢ ܡܳܪܝܳܐ.
10 ܝܺܬܶܒܘ ܒܰܐܪܥܳܐ ܘܰܫܬܶܩܘ ܩܰܫܺܝ̈ܫܶܐ ܕܒܰܪܬ ܨܶܗܝܽܘܢ: ܐܰܪܡܺܝܘ ܥܰܦܪܳܐ ܒܖ̈ܺܝܫܰܝܗܽܘܢ ܘܶܐܬܟܒܶܢܘ ܣܰܩ̈ܶܐ: ܣ̣ܡܰܟ̈ܝ ܠܰܐܪܥܳܐ ܖ̈ܺܝܫܰܝܗܶܝܢ ܒܬܽܘ̈ܠܳܬܳܐ ܕܽܐܘܪܺܫܠܶܡ.
11 ܚ̣ܫܶܟ̈ܝ ܒܕܶܡ̈ܥܶܐ ܥܰܝ̈ܢܰܝ ܘܶܐܬܕܰܠܰܚܘ ܡܥܰܝ̈: ܐܶܬܗܦܶܟ ܠܰܐܪܥܳܐ ܐܺܝܩܳܪܝ ܥܰܠ ܬܒܳܪܳܗ̇ ܕܒܰܪܬ ܥܰܡܝ: ܟܰܕ ܐܶܬܛܰܪܰܦܘ ܛܠܳܝ̈ܶܐ ܘܝܰܠܽܘ̈ܕܶܐ ܒܫܽܘܩܶܝ̈ܗ̇ ܕܰܩܪܺܝܬܳܐ.
12 ܠܶܐܡ̈ܗܳܬܗܽܘܢ ܐܳܡܪܺܝܢ: ܐܰܝܟܰܘ ܥܒܽܘܪܳܐ ܘܚܰܡܪܳܐ ܘܡܶܫܚܳܐ: ܟܰܕ ܐܶܬܛܰܪܰܦܘ ܐܰܝܟ ܩܛܺܝ̈ܠܶܐ ܒܫܽܘܩܶܝ̈ܗ̇ ܕܰܩܪܺܝܬܳܐ: ܟܰܕ ܐܶܬܐܫܶܕ̈ܝ ܢܰܦ̈ܫܳܬܗܽܘܢ ܒܥܽܘܒܳܐ ܕܶܐܡ̈ܗܳܬܗܽܘܢ.
13 ܡܳܢܳܐ ܐܶܣܗܕܶܟܝ ܘܰܠܡܰܢ ܐܶܕܰܡܶܐ ܠܶܟܝ ܒܰܪܬ ܐܽܘܪܺܫܠܶܡ: ܡܰܢ ܐܶܦܰܚܶܡ ܠܶܟܝ ܘܶܐܒܰܝܐܶܟܝ ܒܬܽܘܠܬܳܐ ܒܰܪܬ ܨܶܗܝܽܘܢ: ܕܰܣܓܺܝ ܐܰܝܟ ܝܰܡܳܐ ܬܒܳܪܶܟܝ ܡܰܢܽܘ ܢܶܣܟܽܘܪ.
14 ܢܒܺܝܰܝ̈ܟܝ ܚ̣ܙܰܘ ܠܶܟܝ ܕܰܓܳܠܽܘܬܳܐ ܘܡܰܛܥܝܳܢܽܘܬܳܐ: ܘܠܳܐ ܓܠܰܘ ܠܶܟܝ ܥܰܠ ܚܛܳܗܰܝ̈ܟܝ ܕܰܬܬܽܘܒܺܝܢ. ܘܰܐܗܦܶܟ ܫܒܺܝܬܶܟܝ: ܘܰܚܙܰܘ ܠܶܟܝ ܢܒܺܝܰܘ̈ܳܬܳܐ ܕܰܓܳܠ̈ܳܬܳܐ ܘܡܰܛܥܝܳܢ̈ܝܳܬܳܐ.
15 ܛܰܪܶܦܘ ܥܠܰܝܟܝ ܐܺܝܕܰܝ̈ܗܽܘܢ ܟܽܠ ܥܳܒܖ̈ܰܝ ܐܽܘܪܚܳܐ: ܐܰܫܪܶܩܘ ܘܰܐܢܺܝܕܘ ܖ̈ܺܝܫܰܝܗܽܘܢ ܥܰܠ ܒܰܪܬ ܐܽܘܪܺܫܠܶܡ: ܘܶܐܡܰܪܘ: ܗܳܕܳܐ ܗ̱ܝ ܩܪܺܝܬܳܐ ܕܳܐܡܪܺܝܢ ܗܘܰܘ ܓܡܺܝܪܰܬ ܫܽܘܦܪܳܐ ܘܚܰܕܽܘܬܳܐ ܕܟܽܠܳܗ̇ ܐܰܪܥܳܐ.
16 ܥ:ܥ̣ܒܰܕ ܡܳܪܝܳܐ ܡܶܕܶܡ ܕܶܐܬܚܰܫܰ ܘܫܰܡ̣ܠܺܝ ܡܶܠܬܶܗ: ܐܰܝܟ ܕܰܦ̣ܩܰܕ ܡܶܢ ܝܰܘ̈ܡܳܬܳܐ ܩܰܕܡܳܝ̈ܶܐ: ܣܰܚܦܳܗ̇ ܘܠܳܐ ܚܳܣ: ܘܰܐܚܕܺܝ ܥܠܰܝܟܝ ܒܥܶܠܕܒܳܒ̈ܶܐ: ܘܰܐܪܺܝܡ ܩܰܪܢܳܐ ܕܳܐܠܽܘܨܰܝ̈ܟܝ.
17 ܦܬܰܚܘ ܥܠܰܝܟܝ ܦܽܘܡܗܽܘܢ ܟܽܠܗܽܘܢ ܒܥܶܠܕܒܳܒܰܝ̈ܟܝ: ܐܰܫܪܶܩܘ ܘܚܰܪܶܩܘ ܫܶܢܰܝ̈ܗܽܘܢ: ܘܳܐܡܪܺܝܢ ܒܠܰܥܢܳܗ̇: ܒܪܰܡ ܗܳܢܰܘ ܝܰܘܡܳܐ ܕܣܰܟܺܝܢ: ܐܶܫܟܰܚܢ ܘܰܚܙܰܝܢ.
18 ܓܥܳܐ ܠܶܒܗܽܘܢ ܠܘܳܬ ܡܳܪܝܳܐ ܕܫܽܘܖ̈ܶܐ ܕܒܰܪܬ ܨܶܗܝܽܘܢ: ܐܰܪܕܳܝ ܐܰܝܟ ܢܰܚܠܳܐ ܕܶܡܥܬܳܐ ܒܺܐܝܡܳܡܳܐ ܘܰܒܠܺܠܝܳܐ: ܠܳܐ ܬܶܬܠܺܝܢ ܠܶܟܝ ܦܽܘܝܳܓܳܐ: ܘܠܳܐ ܬܶܫܠܶܐ ܒܳܒܰܬ ܥܰܝܢܶܟܝ.
19 ܩܽܘܡܝ ܫܰܒܰܚܝ ܒܠܺܠܝܳܐ ܒܪܺܝܫ ܡܰܛܰܪܬܳܐ: ܐܰܫܽܘܕܝ ܐܰܝܟ ܡܰܝ̈ܳܐ ܠܶܒܟܝ ܠܽܘܩܒܰܠ ܐܰܦܰܝ̈ ܡܳܪܝܳܐ: ܐܰܪܺܝܡܝ ܠܘܳܬܶܗ ܐܺܝܕܰܝ̈ܟܝ ܥܰܠ ܢܰܦ̈ܫܳܬܳܐ ܕܝܰܠܽܘܕܰܝ̈ܟܝ: ܕܡܶܬܛܰܪܦܺܝܢ ܠܟܰܦܢܳܐ ܒܪܺܝܫ ܟܽܠܗܽܘܢ ܫܽܘ̈ܩܶܐ:
20 ܪ: ܚܙܺܝ ܡܳܪܝܳܐ ܘܚܽܘܪ ܠܡܳܢ ܥ̣ܒܰܕܬ ܗܳܟܰܢܳܐ: ܐܺܝܢ ܢܶܐܟ̈ܠܳܢ ܢܶܫ̈ܶܐ ܦܺܐܖ̈ܰܝܗܶܝܢ ܘܝܰܠܽܘ̈ܕܶܐ ܕܡܶܫܬܰܩܦܺܝܢ: ܐܺܝܢ ܢܶܬܩܛܶܠ ܒܡܰܫܟܢܶܗ ܕܡܳܪܝܳܐ ܟܳܗܢܳܐ ܘܰܢܒܺܝܳܐ.
21 ܫܟܶܒܘ ܥܰܠ ܐܰܪܥܳܐ ܒܫܽܘ̈ܩܶܐ ܛܠܳܝ̈ܶܐ ܘܣܳܒ̈ܶܐ: ܒܬܽܘ̈ܠܳܬܝ ܘܓܰܕܽܘ̈ܕܰܝ ܢ̣ܦܰܠܘ ܒܚܰܪܒܳܐ: ܩ̣ܰܛܶܠܬ ܒܝܰܘܡܳܐ ܕܪܽܘܓܙܳܟ: ܛܰܒܰܚܬ ܘܠܳܐ ܚܳܣܬ.
22 ܩܪܰܝܬ ܐܰܝܟ ܝܰܘܡܳܐ ܕܥܰܕܥܺܐܕܳܐ ܒܥܶܠܕܒܳܒܰܝ̈ ܡܶܢ ܚܕܳܪܰܝ: ܘܠܳܐ ܗܘܳܐ ܒܝܰܘܡܳܐ ܕܪܽܘܓܙܶܗ ܕܡܳܪܝܳܐ ܦܠܺܝܛܳܐ ܘܰܣܪܺܝܕܳܐ: ܕܫܶܩܠܶܬ ܘܪܰܒܺܝܬ ܒܥܶܠܕܒܳܒܰܝ̈ ܓܰܡܰܪܘ ܐܶܢܽܘܢ.