Lamentations 1
The Book of Lamentations
܀ ܐܘܠܝ̈ܬܐ ܐ ܀
1 ܐܰܝܟܰܢܳܐ ܝܶܬܒܰܬ ܒܰܠܚܽܘ̈ܕܶܝܗ̇ ܡܕܺܝܢ̱ܬܳܐ ܣܰܓܝܐܰܬ ܒܥܰܡܳܐ: ܗܘܳܬ ܐܰܝܟ ܐܰܪܡܰܠܬܳܐ ܣܰܓܺܝܐܰܬ ܒܥܰܡ̈ܡܶܐ: ܪܺܝܫܳܐ ܕܰܡܕܺܝ̈ܢܳܬܳܐ ܗܘܳܬ ܠܡܰܕܰܐܬܳܐ.
2 ܒܟܳܬ ܒܠܺܠܝܳܐ ܘܕܶܡ̈ܥܶܝܗ̇ ܫ̣ܚܶܠ̈ܝ ܥܰܠ ܦܰܟܶܝ̈ܗ̇: ܘܠܰܝܬ ܠܳܗ̇ ܡܒܰܝܐܳܢܳܐ ܡܶܢ ܟܽܠܗܽܘܢ ܖ̈ܳܚܡܶܝܗ̇. ܟܽܠܗܽܘܢ ܖ̈ܳܚܡܶܝܗ̇ ܕܰܓܶܠܘ ܒܳܗ̇ ܘܰܗܘܰܘ ܠܳܗ̇ ܒܥܶܠܕܒܳܒ̈ܶܐ.
3 ܓܰܠܝܰܬ ܝܺܗܽܘܕܳܐ ܡܶܢ ܫܽܘܥܒܳܕܳܐ ܘܡܶܢ ܣܽܘܓܰܐܬ ܥܰܒܕܽܘܬܳܐ: ܗܺܝ ܝܶܬܒܰܬ ܒܶܝܬ ܥܰܡ̈ܡܶܐ: ܘܠܳܐ ܐܶܫܟܚܰܬ ܠܳܗ̇ ܢܝܳܚܳܐ: ܟܽܠܗܽܘܢ ܖ̈ܳܕܽܘܦܶܝܗ̇ ܐܰܕܪܟܽܘܗ̇ ܒܶܝܬ ܐܽܘܠܨܳܢܳܐ.
4 ܐܽܘܖ̈ܚܳܬܳܗ̇ ܕܨܶܗܝܽܘܢ ܒܶܐܒܠܳܐ: ܡܶܢ ܒܠܰܝ ܕܳܐܬܶܝܢ ܠܥܰܕܥܺܐܕܳܐ: ܟܽܠܗܽܘܢ ܬܰܖ̈ܥܶܝܗ̇ ܨܕܶܝܢ: ܘܟܳܗܢܶܝ̈ܗ̇ ܡܶܬܬܰܢܚܺܝܢ: ܘܰܒܬܽܘ̈ܠܳܬܳܗ̇ ܡܡܰܟܟܳܢ: ܘܗܺܝ ܡܰܪܺܝܪ ܠܳܗ̇.
5 ܗܘܰܘ ܐܳܠܽܘܨܶܝ̈ܗ̇ ܠܪܺܝܫ: ܘܰܒܥܶܠܕܒܳܒܶܝ̈ܗ̇ ܫܠܺܝܘ: ܡܶܛܽܠ ܕܡܳܪܝܳܐ ܡܰܟܟܳܗ̇ ܥܰܠ ܣܽܘܓܰܐܬ ܚܛܳܗܶܝ̈ܗ̇: ܘܝܰܠܽܘܕܶܝ̈ܗ̇ ܐܶܙܰܠܘ ܒܫܶܒܝܳܐ ܩܕܳܡ ܐܳܠܽܘܨܳܐ.
6 ܘܰܢ̣ܦܰܩ ܡܶܢ ܒܰܪܬ ܨܶܗܝܽܘܢ ܟܽܠܶܗ ܗܶܕܪܳܗ̇: ܗܘܰܘ ܪܰܘܖ̈ܒܳܢܶܝܗ̇ ܐܰܝܟ ܐܰܝ̈ܠܶܐ: ܘܠܳܐ ܐܶܫܟܰܚܘ ܡܰܪܥܺܝܬܳܐ: ܘܶܐܙܰܠܘ ܕܠܳܐ ܚܰܝܠܳܐ ܩܕܳܡ ܪܳܕܽܘܦܳܐ.
7 ܐܶܬܕܰܟܪܰܬ ܐܽܘܪܺܫܠܶܡ ܝܰܘ̈ܡܰܝ ܫܽܘܥܒܳܕܳܗ̇ ܘܡܰܪܕܽܘܬܳܗ̇: ܘܟܽܠܗܶܝܢ ܖ̈ܓܺܝܓܳܬܳܗ̇ ܕܰܗܘܰܝ̈ ܡܶܢ ܝܰܘ̈ܡܳܬܳܐ ܩܰܕܡܳܝ̈ܶܐ: ܟܰܕ ܢܦܰܠ ܥܰܡܳܗ̇ ܒܝܰܕ ܐܳܠܽܘܨܳܐ ܘܠܰܝܬ ܠܳܗ̇ ܡܥܰܕܪܳܢܳܐ: ܚܙܰܐܗ̇ ܐܳܠܽܘ̈ܨܶܝܗ̇ ܘܰܓܚܶܟܘ ܥܰܠ ܬܒܳܪܳܗ̇.
8 ܚܛܳܗܳܐ ܚܛܳܬ ܐܽܘܪܺܫܠܶܡ: ܡܶܛܽܠ ܗܳܢܳܐ ܗܘܳܬ ܢܶܕܬܳܐ: ܟܽܠܗܽܘܢ ܡܝܰܩܖ̈ܳܢܶܝܗ̇ ܨܰܥܪܽܘܗ̇ ܡܶܛܽܠ ܕܰܚܙܰܘ ܦܽܘܪܣܳܝܳܗ̇: ܐܳܦ ܗܺܝ ܐܶܬܬܰܢܚܰܬ: ܘܗܶܦܟܰܬ ܠܒܶܣܬܪܳܗ̇.
9 ܛܰܡܽܐܘܬܳܗ̇ ܒܰܫܦܽܘ̈ܠܶܝܗ̇ ܘܠܳܐ ܐܶܬܕܰܟܪܰܬ ܚܰܪܬܳܗ̇: ܘܢܶܚܬܰܬ ܬܶܫܒܽܘܚܬܳܗ̇ ܘܠܰܝܬ ܠܳܗ̇ ܡܒܰܝܐܢܳܐ. ܚܙܺܝ ܡܳܪܝܳܐ ܫܽܘܥܒܳܕܝ ܕܶܐܬܬܪܺܝܡ ܒܥܶܠܕܒܳܒܳܐ.
10 ܐܺܝ̈ܕܰܘܗܝ ܦܪܰܣ ܐܳܠܽܘܨܳܐ ܥܰܠ ܟܽܠܗܶܝܢ ܖ̈ܓܺܝܓܳܬܳܗ̇: ܘܰܚܙܺܝ݀ܬ ܥܰܡ̈ܡܶܐ ܕܥܰܠܘ ܠܡܰܩܕܫܳܟ: ܕܦ̣ܰܩܶܕܬ ܕܠܳܐ ܢܶܥܠܽܘܢ ܒܰܟܢܽܘܫܬܳܟ.
11 ܟܽܠܶܗ ܥܰܡܳܐ ܡܶܬܬܰܢܚܺܝܢ ܘܒܳܥܶܝܢ ܠܰܚܡܳܐ: ܝܰܗܒܘ ܪܶܓܰܬܗܽܘܢ ܒܡܶܐܟܽܘܠܬܳܐ ܠܡܰܦܢܳܝܽܘ ܢܰܦܫܳܐ: ܚܙܺܝ ܡܳܪܝܳܐ ܘܚܽܘܪ ܕܰܗܘܺܝܬ ܙܰܠܺܝܠܬܳܐ.
12 ܠܳܐ ܠܟܽܘܢ ܟܽܠ ܥܳܒܖ̈ܰܝ ܐܽܘܪܚܳܐ: ܐܶܣܬܰܟܰܠܘ ܘܰܚܙܰܘ: ܐܶܢ ܐܺܝܬ ܟܺܐܒܳܐ ܐܰܝܟ ܟܺܐܒܝ ܕܰܥ̣ܒܰܕ ܠܺܝ ܡܳܪܝܳܐ: ܘܡܰܟܟܰܢܝ ܡܳܪܝܳܐ ܒܝܰܘܡܳܐ ܕܚܶܡܬܳܐ ܕܪܽܘܓܙܶܗ.
13 ܡܶܢ ܡܪܰܘܡܳܐ ܫܰܕܰܪ ܢܽܘܪܳܐ ܒܓܰܖ̈ܡܰܝ ܘܰܐܚܬܰܢܝ: ܦ̣ܪܰܣ ܡܨܺܝܕܬܳܐ ܠܖ̈ܶܓܠܰܝ ܘܰܐܗܦܟܰܢܝ ܠܒܶܣܬܰܪܝ: ܘܝܰܗܒܰܢܝ ܠܚܰܪܒܳܐ ܘܟܽܠܝܽܘܡ ܕܳܘܝܳܐ ܐ̱ܢܳܐ.
14 ܐܶܬܬܥܺܝܪܘ ܥܠܰܝ ܚܛܳܗܰܝ̈: ܘܒܺܐܝ̈ܕܰܘܗܝ ܐܶܣܬܪܶܓܘ ܢܺܝܖ̈ܰܘܗܝ ܥܰܠ ܨܰܘܪܝ: ܘܶܐܬܟܪܰܗ ܚܰܝܠܝ ܘܰܐܫܠܡܰܢܝ ܡܳܪܝܳܐ ܒܺܐܝܕܳܐ ܕܡܶܢ ܕܠܳܐ ܡܰܨܝܳܐ ܐ̱ܢܳܐ ܚܰܝܠܶܗ.
15 ܟܒܰܫ ܟܽܠܗܽܘܢ ܥܰܫܺܝ̈ܢܰܝ ܡܳܪܝܳܐ ܒܓܰܘܝ: ܩ̣ܪܳܐ ܥܠܰܝ ܥܰܕܥܺܐܕܳܐ ܠܡܰܘܒܳܕܽܘ ܓܰܕܽܘ̈ܕܰܝ: ܡܰܥܨܰܪܬܳܐ ܕܳܫ̣ ܡܳܪܝܳܐ ܠܰܒܬܽܘܠܬܳܐ ܒܰܪܬ ܝܺܗܽܘܕܳܐ.
16 ܥܰܠ ܗܳܠܶܝܢ ܒܳܟܝܳܐ ܐ̱ܢܳܐ ܘܥܰܝ̈ܢܰܝ ܡܰܖ̈ܕܝܳܢ ܡܰܝ̈ܳܐ: ܕܰܐܪܚܶܩ ܡܶܢܝ ܡܒܰܝܐܳܢܳܐ ܡܰܦܢܶܐ ܢܰܦܫܝ. ܗܘܰܘ ܒܢܰܝ̈ ܫܰܩܡܺܝܢ: ܡܶܛܽܠ ܕܰܥܫܶܢ ܒܥܶܠܕܒܳܒܳܐ.
17 ܦܶܪܣܰܬ ܨܶܗܝܽܘܢ ܐܺܝ̈ܕܶܝܗ̇ ܘܠܰܝܬ ܠܳܗ̇ ܡܒܰܝܰܐܢܳܐ: ܦ̣ܩܰܕ ܡܳܪܝܳܐ ܥܰܠ ܝܰܥܩܽܘܒ ܘܚܰܕܪܽܘܗܝ ܐܳܠܽܘܨܰܘ̈ܗܝ: ܗܘܳܬ ܐܽܘܪܺܫܠܶܡ ܢܶܕܬܳܐ ܒܰܝܢܳܬܗܽܘܢ.
18 ܙܰܕܺܝܩ ܗ̱ܘ ܡܳܪܝܳܐ ܕܠܶܗ ܡܰܪܡܪܶܬ: ܫܡܰܥܘ ܟܽܠܟܽܘܢ ܥܰܡ̈ܡܶܐ ܘܰܚܙܰܘ ܟܺܐܒܝ: ܒܬܽܘ̈ܠܳܬܝ ܘܓܰܕܽܘ̈ܕܰܝ ܐܶܙܰܠܘ ܒܫܶܒܝܳܐ.
19 ܩܪܺܝ݀ܬ ܠܖ̈ܳܚܡܰܝ ܘܗܶܢܽܘܢ ܢܰܟܠܽܘܢܝ: ܟܳܗ̈ܢܰܝ ܘܩܰܫܺܝ̈ܫܰܝ ܣܳܦ̣ܘ ܒܓܰܘ: ܕܰܒ̣ܥܰܘ ܠܗܽܘܢ ܡܶܐܟܽܘܠܬܳܐ ܕܢܰܦܢܽܘܢ ܢܰܦܫܗܽܘܢ ܘܠܳܐ ܐܶܫܟܰܚܘ.
20 ܚܙܺܝ ܡܳܪܝܳܐ: ܕܥܳܩܰܬ ܠܺܝ: ܘܰܡܥܰܝ̈ ܐܶܬܕܰܠܰܚܘ ܐܶܬܗܦܶܟ ܠܶܒܝ ܒܓܰܘܝ: ܡܶܛܽܠ ܕܰܡܡܰܪܡܳܪܽܘ ܡܰܪܡܪܶܬ ܡܶܢ ܠܒܰܪ ܐܰܘܒܕܰܬ ܚܰܪܒܳܐ: ܘܕܰܒܒܰܝܬܳܐ ܡܰܘܬܳܐ.
21 ܫ̣ܡܰܥ ܕܡܶܬܬܰܢܚܳܐ ܐ̱ܢܳܐ: ܘܠܰܝܬ ܠܺܝ ܡܒܰܝܐܳܢܳܐ. ܟܽܠܗܽܘܢ ܒܥܶܠܕܒܳܒܰܝ̈ ܫܡ̣ܰܥܘ ܒܒܺܝܫܬܝ: ܘܰܚܕܺܝܘ ܕܰܐܢܬ ܥ̣ܒܰܕܬ ܠܺܝ: ܐܰܝܬܳܐ ܝܰܘܡܳܐ ܕܰܩ̣ܪܰܝܬ ܘܢܶܗܘܽܘܢ ܐܰܟܘܳܬܝ.
22 ܬܶܥܽܘܠ ܟܽܠܳܗ̇ ܒܺܝܫܽܘܬܗܽܘܢ ܩܕܳܡܰܝܟ: ܛܰܪܶܦ ܐܶܢܽܘܢ ܐܰܝܟܰܢܳܐ ܕܛܰܪܶܦܬܳܢܝ ܥܰܠ ܟܽܠܗܽܘܢ ܚܛܳܗܰܝ̈: ܡܶܛܽܠ ܕܰܣ̈ܓܺܝ ܬܶܢ̈ܚܳܬܝ ܘܠܶܒܝ ܕܳܘܶܐ.