Lamentations 4
The Book of Lamentations
܀ ܐܘܠܝ̈ܬܐ ܕ ܀
1 ܐܰܝܟܰܢܳܐ ܡܶܣܬܠܶܐ ܕܰܗܒܳܐ ܛܳܒܳܐ: ܘܫܳܢܶܐ ܨܽܘܒܳܥܳܐ ܫܰܦܺܝܪܳܐ: ܡܶܫ̈ܬܰܕܝܳܢ ܟܺܐܦ̈ܶܐ ܕܩܽܘܕܫܳܐ ܒܪܺܝܫ ܟܽܠܗܽܘܢ ܫܽܘ̈ܩܶܐ.
2 ܒܢܰܝ̈ ܨܶܗܝܽܘܢ ܝܰܩܺܝܖ̈ܶܐ ܕܰܡܝܰܬܪܺܝܢ ܗܘܰܘ ܡܶܢ ܟܺܐܦ̈ܶܐ ܛܳܒ̈ܳܬܳܐ: ܐܰܝܟܰܢܳܐ ܐܶܬܚܫܶܒܘ ܐܰܝܟ ܡܳܐܢ̈ܶܐ ܕܚܶܨܦܳܐ: ܥܒܳܕ ܐܺܝ̈ܕܰܝܳܐ ܕܦܰܚܳܪܳܐ.
3 ܓܠܰܝ̈ ܐܰܝܟ ܝܳܪܽܘܖ̈ܶܐ ܬܕܰܝ̈ܗܶܝܢ: ܘܰܐܝܢܶܩ̈ܝ ܓܖ̈ܰܝܗܶܝܢ. ܗܘܳܬ ܥܰܡܝ ܠܰܡܚܽܘܬܳܐ ܕܠܰܝܬ ܠܳܗ̇ ܐܳܣܝܽܘܬܳܐ: ܘܰܐܝܟ ܢܰܥܡܳܐ ܒܡܰܕܒܪܳܐ.
4 ܕܒܶܩ ܠܶܫܳܢܶܗ ܕܝܰܠܽܘܕܳܐ ܠܰܫܡܰܝ̈ ܚܶܟܶܗ ܒܨܶܗܝܳܐ: ܛܠܳܝ̈ܶܐ ܫܐܶܠܘ ܠܰܚܡܳܐ: ܘܠܰܝܬ ܕܩܳܨܶܐ ܘܝܳܗܶܒ ܠܗܽܘܢ.
5 ܗܳܢܽܘܢ ܕܳܐܟܠܺܝܢ ܗܘܰܘ ܦܽܘܢܳܩ̈ܶܐ: ܗܳܐ ܣܺܝܡܺܝܢ ܒܫܽܘ̈ܩܶܐ. ܕܶܐܬܪܰܒܺܝܘ ܥܰܠ ܙܚܽܘܖ̈ܝܳܬܳܐ: ܗܳܐ ܕܳܡܟܺܝܢ ܒܩܺܩ̈ܠܳܬܳܐ.
6 ܘܰܣܓܺܝ ܥܰܘܠܳܗ̇ ܕܒܰܪܬ ܥܰܡܝ ܡܶܢ ܚܛܺܝܬܳܗ̇ ܕܰܣܕܽܘܡ: ܕܶܐܬܗܰܦܟܰܬ ܡܶܢ ܫܶܠܝܳܐ ܘܠܳܐ ܠܺܐܝ̈ ܒܳܗ̇ ܐܺܝ̈ܕܰܝܳܐ.
7 ܕܟܺܝܘ ܢܙܺܝܖ̈ܶܝܗ̇ ܡܶܢ ܬܰܠܓܳܐ: ܘܰܚܘܰܪܘ ܡܶܢ ܚܰܠܒܳܐ ܒܡܰܖ̈ܥܝܳܬܗܽܘܢ: ܣ̣ܡܰܩܘ ܓܰܖ̈ܡܰܝܗܽܘܢ ܡܶܢ ܣܰܪܕܽܘܢ ܘܡܶܢ ܣܰܦܺܝܠܳܐ ܓܽܘܫܡܗܽܘܢ.
8 ܚܫܶܟ ܡܶܢ ܫܽܘܚܳܖ̈ܶܐ ܚܶܙܘܗܽܘܢ: ܘܠܳܐ ܐܶܬܺܝܕܰܥܘ ܒܫܽܘ̈ܩܶܐ: ܩܦܽܘܕ ܡܶܫܟܗܽܘܢ ܥܰܠ ܓܰܖ̈ܡܰܝܗܽܘܢ: ܝܺܒܶܫ ܘܰܗܘܳܐ ܐܰܝܟ ܩܰܝܣܳܐ.
9 ܛܳܒܺܝܢ ܗܘܰܘ ܩܛܺܝ̈ܠܰܝ ܚܰܪܒܳܐ ܡܶܢ ܩܛܺܝܠܰܝ̈ ܟܰܦܢܳܐ: ܕܕܳܒܘ ܐܰܝܟ ܗܳܢܽܘܢ ܕܰܡܡܰܚܶܝܢ ܘܰܫܕܶܝܢ ܒܚܰܩܠܳܐ.
10 ܐܺܝܕܰܝ̈ ܢܶܫ̈ܶܐ ܡܖ̈ܰܚܡܳܢܝܳܬܳܐ ܒܰܫܶܠ̈ܝ ܒܢܰܝ̈ܗܶܝܢ: ܘܰܗܘܰܘ ܠܗܶܝܢ ܠܡܶܐܟܽܘܠܬܳܐ ܒܰܬܒܳܪܳܗ̇ ܕܒܰܪܬ ܥܰܡܝ.
11 ܫܰܡܠܺܝ ܡܳܪܝܳܐ ܚܶܡܬܶܗ: ܘܶܐܫܰܕ ܚܶܡܬܳܐ ܕܪܽܘܓܙܶܗ: ܘܰܫܒܰܩ ܢܽܘܪܳܐ ܒܨܶܗܝܽܘܢ: ܘܫܰܠܗܶܒܺܝܬܳܐ ܐܶܟܠܰܬ ܫܶܬܶܐܣܶܝ̈ܗ̇.
12 ܠܳܐ ܗܰܝܡܶܢܘ ܡܰܠ̈ܟܶܐ ܕܰܐܪܥܳܐ: ܘܟܽܠܗܽܘܢ ܥܳܡܽܘܖ̈ܶܝܗ̇ ܕܬܺܒܶܝܠ: ܕܳܐܬܶܐ ܘܥܳܐܶܠ ܒܥܶܠܕܒܳܒܳܐ ܘܳܐܠܽܘܨܳܐ ܒܬܰܖ̈ܥܶܝܗ̇ ܕܽܐܘܪܺܫܠܶܡ.
13 ܡܶܛܽܠ ܚܛܳܗ̈ܶܐ ܕܰܢܒ̈ܝܶܝܗ̇: ܘܥܰܘܠܳܐ ܕܟܳܗ̈ܢܶܝܗ̇: ܕܶܐܫܰܕܘ ܒܓܰܘܳܗ̇ ܕܡܳܐ ܕܙܰܕܺܝ̈ܩܶܐ.
14 ܢܰܕܘ ܪܰܘܖ̈ܒܳܢܶܝܗ̇ ܒܫܽܘ̈ܩܶܝܗ̇: ܘܶܐܬܦܰܠܦܰܠܘ ܒܰܕܡܳܐ: ܘܠܳܐ ܐܶܫܟܰܚܘ ܕܢܶܩܪܒܽܘܢ ܠܰܠܒܽܘܫܰܝ̈ܗܽܘܢ.
15 ܦܪܽܘܩܘ ܡܶܢܗܽܘܢ: ܘܛܰܡ̈ܶܐܐ ܩܪܰܘ ܐܶܢܽܘܢ. ܥܒܰܪܘ ܥܒܰܪܘ ܘܠܳܐ ܬܶܬܩܰܪܒܽܘܢ ܠܗܽܘܢ: ܡܶܛܽܠ ܕܰܐܪܓܶܙܘ ܐܳܦ ܐܶܬܛܰܪܰܦܘ: ܐܶܡܰܪܘ ܒܶܝܬ ܥܰܡ̈ܡܶܐ ܕܬܽܘܒ ܠܳܐ ܢܰܘܣܦܽܘܢ ܠܡܶܥܡܰܪ.
16 ܥܰܕ ܩܳܝܡܺܝܢ ܚܢܰܢ ܚ̣ܫܶܟ̈ܝ ܥܰܝܢܰܝ̈ܢ ܡܶܢ ܥܽܘܕܪܳܢܰܢ: ܣܪܺܝܩܳܐܺܝܬ ܕܳܩܘ ܕܰܘ̈ܩܰܝܢ ܠܘܳܬ ܥܰܡܳܐ ܕܠܳܐ ܦܳܪܶܩ.
17 ܦܰܪܨܽܘܦܶܗ ܕܡܳܪܝܳܐ ܦܰܠܶܓ ܐܶܢܽܘܢ: ܘܠܳܐ ܢܰܘܣܶܦ ܠܰܡܚܳܪ ܒܗܽܘܢ: ܒܰܐܦܰܝ̈ ܟܳܗ̈ܢܶܐ ܠܳܐ ܢܣܰܒܘ: ܘܥܰܠ ܣܳܒ̈ܶܐ ܠܳܐ ܪܰܚܶܡܘ.
18 ܨܳܕܘ ܠܰܕܕܰܩܕܩܺܝܢ ܠܕܰܡܗܰܠܟܺܝܢ ܒܫܽܘ̈ܩܶܐ. ܩ̣ܪܶܒ ܩܶܨܰܢ: ܡܠܰܘ ܝܰܘ̈ܡܰܝܢ: ܡܶܛܽܠ ܕܶܐܬܳܐ ܥܶܕܳܢܰܢ.
19 ܩܰܠܺܝܠܺܝܢ ܗܘܰܘ ܖ̈ܳܕܽܘܦܰܝܢ ܡܶܢ ܢܶܫܖ̈ܰܝ ܫܡܰܝܳܐ: ܥܰܠ ܛܽܘܖ̈ܶܐ ܪܰܕܦܽܘܢ: ܘܰܒܡܰܕܒܪܳܐ ܐܶܬܟܰܡܶܢܘ ܠܰܢ.
20 ܪܽܘܚܳܐ ܕܰܐܦܰܝ̈ܢ ܡܫܺܝܚܶܗ ܕܡܳܪܝܳܐ: ܐܶܬܬܚܶܕ ܒܓܽܘܡܳܨܗܽܘܢ: ܗܰܘ ܕܶܐܡܰܪܢ ܕܰܒܛܶܠܳܠܶܗ ܢܺܚܶܐ ܒܶܝܬ ܥܰܡ̈ܡܶܐ.
21 ܕܽܘܨܝ ܘܰܚܕܳܝ ܒܰܪܬ ܐܰܕܽܘܡ ܕܝܳܬܒܳܐ ܒܰܐܪܥܳܐ ܕܥܽܘܨ: ܐܳܦ ܠܶܟܝ ܢܶܡܛܶܐ ܟܳܣܳܐ: ܬܶܪܘܶܝܢ ܘܬܶܬܛܰܪܦܺܝܢ.
22 ܓܡܰܪܘ ܚܛܳܗܰܝ̈ܟܝ ܒܰܪܬ ܨܶܗܝܽܘܢ: ܬܽܘܒ ܠܳܐ ܢܰܘܣܶܦ ܠܰܡܓܰܠܳܝܽܘܬܶܟܝ ܐܶܬܦܩܶܕܘ ܚܰܘܒܰܝ̈ܟܝ ܒܰܪܬ ܐܰܕܽܘܡ: ܘܶܐܬܓܠܺܝܘ ܚܛܳܗܰܝ̈ܟܝ.