Lamentations 3
The Book of Lamentations
܀ ܐܘܠܝ̈ܬܐ ܓ ܀
1 ܐܺܝܠ ܓܰܢ̱ܒܳܪܳܐ ܚܙܺܝ ܫܽܘܥܒܳܕܝ: ܒܫܰܒܛܳܐ ܕܪܽܘܓܙܶܗ.
2 ܠܺܝ ܕܒܰܪ: ܘܗܰܠܟܰܢܝ ܒܚܶܫܽܘܟܳܐ ܘܠܳܐ ܒܢܰܗܺܝܪܳܐ.
3 ܒܪܰܡ ܒܺܝ ܢܬܽܘ ܘܢܰܗܦܶܟ ܐܺܝܕܶܗ ܟܽܠܶܗ ܝܰܘܡܳܐ.
4 ܒܰܠܺܝ ܡܶܫܟܝ ܘܒܶܣܪܝ: ܘܬܰܒܰܪ ܓܰܖ̈ܡܰܝ.
5 ܒܢܳܐ ܥܠܰܝ: ܘܰܐܟܪܟܰܢܝ ܡܶܪܕܳܐ ܘܚܽܘܪܒܳܐ.
6 ܒܚܶܫܽܘܟܳܐ ܐܰܘܬܒܰܢܝ ܐܰܝܟ ܡܺܝܬܳܐ ܠܥܳܠܰܡ.
7 ܣܳܓ ܒܰܐܦܰܝ̈ ܕܠܳܐ ܐܶܦܽܘܩ: ܘܰܐܥܫܶܢ ܐܰܣܽܘܖ̈ܰܝ.
8 ܘܳܐܦܶܢ ܐܶܒܥܶܐ ܘܶܐܨܰܠܶܐ ܠܳܐ ܫܳܡܰܥ ܨܠܽܘܬܝ.
9 ܣܳܓ ܐܽܘܖ̈ܚܳܬܝ ܒܟܽܘ̈ܒܶܐ: ܘܰܫܒܺܝ̈ܠܰܝ ܥܰܩܶܡ.
10 ܕܺܐܒܳܐ ܟܰܡܳܢܳܐ ܗܘܳܐ ܠܺܝ: ܘܰܐܪܝܳܐ ܒܛܽܘܫܝܳܐ.
11 ܐܽܘܖ̈ܚܳܬܝ ܥܰܩܶܡ: ܦܰܫܚܰܢܝ ܘܣܳܡܰܢܝ ܠܰܚܒܳܠܳܐ.
12 ܡ̣ܠܳܐ ܩܶܫܬܶܗ ܘܰܐܩܺܝܡܰܢܝ ܐܰܝܟ ܢܺܝܫܳܐ ܠܓܶܐܖ̈ܶܐ.
13 ܗܳܐ ܐܰܥܶܠ ܒܟܽܘܠ̈ܝܳܬܝ ܓܶܐܖ̈ܰܘܗܝ.
14 ܗܘܺܝ݀ܬ ܓܽܘܚܟܳܐ ܒܟܽܠܗܽܘܢ ܥܰܡ̈ܡܶܐ: ܘܰܙܡܺܝܖ̈ܳܬܗܽܘܢ ܟܽܠܶܗ ܝܰܘܡܳܐ.
15 ܐܰܣܒܥܰܢܝ ܡܪܳܖ̈ܶܐ: ܘܰܐܪܘܝܰܢܝ ܓܶܕܕ̈ܶܐ.
16 ܘܬܰܒܰܪ ܒܟܺܐܦܳܐ ܫܶܢܰܝ̈: ܘܦܳܠܰܢܝ ܒܩܶܛܡܳܐ.
17 ܘܶܐܬܛܰܥܝܰܬ ܡܶܢ ܫܠܳܡܳܐ ܢܰܦܫܝ: ܘܰܛܥܺܝ݀ܬ ܛܳܒܬܳܐ.
18 ܘܶܐܡܪܶܬ ܕܶܐܒܰܕܘ ܢܶܨܚܳܢܰܝ̈: ܘܣܰܒܪܝ ܡܶܢ ܡܳܪܝܳܐ.
19 ܐܶܬܕܰܟܪ ܫܽܘܥܒܳܕܝ ܘܡܰܪܕܽܘܬܝ: ܕܰܡܪܳܖ̈ܶܐ ܘܰܕܓܶܕܕ̈ܶܐ.
20 ܐܶܬܕܰܟܪ ܘܰܐܦܢܳܐ ܢܰܦܫܝ ܥܠܰܝ.
21 ܗܳܕܶܐ ܐܰܬܺܝܒ ܥܰܠ ܠܶܒܝ: ܡܶܛܽܠ ܗܳܢܳܐ ܐܶܣܰܟܶܐ ܠܶܗ.
22 ܚܶܣܕܰܘ̈ܗܝ ܕܡܳܪܝܳܐ ܕܠܳܐ ܛܳܠܩܺܝܢ: ܘܠܳܐ ܓܳܡܪܺܝܢ ܖ̈ܰܚܡܰܘܗܝ.
23 ܒܚܽܘܕܳܬܳܐ ܕܨܰܦܪܳܐ ܣܰܓܺܝܐܳܐ ܗܰܝܡܢܽܘܬܳܟ ܡܳܪܝܳܐ.
24 ܐܶܡܪܰܬ ܢܰܦܫܝ ܡܢܳܬܝ ܗ̱ܘ. ܡܶܛܽܠ ܗܳܢܳܐ ܐܶܣܰܟܶܐ ܠܶܗ.
25 ܛܳܒ ܡܳܪܝܳܐ ܠܡܰܢ ܕܰܡܣܰܟܶܐ ܠܶܗ ܘܰܠܢܰܦܫܳܐ ܕܒܳܥܝܳܐ ܠܶܗ.
26 ܛܳܒ ܠܡܰܢ ܕܰܡܣܰܒܰܪ ܒܩܽܘܫܬܳܐ ܠܦܽܘܪܩܳܢܶܗ ܕܡܳܪܝܳܐ.
27 ܛܳܒ ܠܓܰܒܪܳܐ ܟܰܕ ܢܶܫܩܽܘܠ ܢܺܝܪܳܟ ܒܛܰܠܝܽܘܬܶܗ.
28 ܘܢܶܬܶܒ ܒܰܠܚܽܘܕܰܘܗܝ ܘܢܶܫܬܽܘܩ: ܡܶܛܽܠ ܕܩܰܒܶܠ ܥܠܰܘܗܝ ܢܺܝܪܳܟ.
29 ܢܶܬܶܠ ܒܥܰܦܪܳܐ ܦܽܘܡܶܗ ܡܶܛܽܠ ܕܺܐܝܬ ܣܰܒܪܳܐ.
30 ܢܶܬܶܠ ܦܰܟܶܗ ܠܡܰܢ ܕܡܳܚܶܐ ܠܶܗ: ܘܢܶܣܒܰܥ ܚܶܣܕܳܐ.
31 ܡܶܛܽܠ ܕܠܳܐ ܛܳܥܶܐ ܡܳܪܝܳܐ ܠܥܳܠܰܡ.
32 ܐܶܠܳܐ ܡܡܰܟܶܟ ܘܰܡܪܰܚܶܡ: ܐܰܝܟ ܣܽܘܓܰܐܬ ܖ̈ܰܚܡܰܘܗܝ.
33 ܡܶܛܽܠ ܕܠܳܐ ܥܳܢܶܐ ܡܶܢ ܠܶܒܶܗ: ܘܰܡܡܰܟܶܟ ܒܢܰܝ̈ ܓܰܢ̱ܒܳܖ̈ܶܐ.
34 ܠܰܡܟܰܒܳܫܽܘ ܬܚܶܝܬ ܖ̈ܶܓܠܰܘܗܝ ܟܽܠܗܽܘܢ ܐܰܣܺܝܖ̈ܶܐ ܕܰܐܪܥܳܐ.
35 ܠܡܶܨܠܳܐ ܕܺܝܢܳܐ ܕܓܰܒܪܳܐ ܠܽܘܩܒܰܠ ܐܰܦܰܝ̈ ܥܶܠܳܝܳܐ.
36 ܠܰܡܚܰܝܳܒܽܘ ܒܰܪܢܳܫܳܐ ܒܕܺܝܢܶܗ ܡܳܪܝܳܐ ܠܳܐ ܚܳܙܶܐ.
37 ܡܰܢܽܘ ܗܳܢܳܐ ܕܶܐܡܰܪ ܘܰܗܘܳܐ: ܕܡܳܪܝܳܐ ܠܳܐ ܦܩܰܕ.
38 ܡܶܢ ܦܽܘܡܶܗ ܕܥܶܠܳܝܳܐ ܠܳܐ ܢܳܦ̈ܩܳܢ ܒܺܝ̈ܫܳܬܳܐ ܘܛܳܒ̈ܳܬܳܐ.
39 ܡܳܢܳܐ ܡܶܬܚܰܫܰܒ ܒܰܪܢܳܫܳܐ ܕܚܰܝ: ܘܓܰܒܪܳܐ ܥܰܠ ܚܛܳܗܰܘ̈ܗܝ.
40 ܢܶܒܨܶܐ ܐܽܘܖ̈ܚܳܬܰܢ ܘܢܶܒܕܽܘܩ: ܘܢܶܬܦܢܶܐ ܠܘܳܬ ܡܳܪܝܳܐ.
41 ܢܶܫܩܽܘܠ ܠܶܒܰܝ̈ܢ ܥܰܠ ܐܺܝܕܰܝ̈ܢ ܠܘܳܬ ܐܰܠܳܗܳܐ ܠܰܫܡܰܝܳܐ.
42 ܚܢܰܢ ܐܰܥܠܺܝܢ ܘܡܰܪܡܰܪܢܳܟ: ܘܰܐܢ̱ܬ ܠܳܐ ܫܒܰܩܬ.
43 ܛܰܠܶܠܬ ܒܪܽܘܓܙܳܟ ܘܰܪܕܰܦܬܳܢ: ܘܩܰܛܶܠܬ ܘܠܳܐ ܚܳܣܬ.
44 ܛܰܠܶܠܬ ܒܰܥܢܳܢܳܟ: ܘܰܐܥ̣ܒܰܪܬ ܨܠܽܘܬܰܢ.
45 ܥܩܺܝܖ̈ܶܐ ܘܡܰܣ̈ܠܰܝܳܐ ܥ̣ܒܰܕܬܳܢ ܒܶܝܬ ܥܰܡ̈ܡܶܐ.
46 ܥܰܝܢܝ ܕܳܡܥܳܐ ܘܠܳܐ ܫܳܠܝܳܐ: ܡܶܢ ܕܠܰܝܬ ܦܽܘܝܳܓܳܐ.
47 ܥܕܰܡܳܐ ܕܰܢܕܺܝܩ ܘܢܶܚܙܶܐ ܡܳܪܝܳܐ ܡܶܢ ܫܡܰܝܳܐ.
48 ܥܰܝܢܝ ܐܶܬܛܰܪܦܰܬ ܥܰܠ ܢܰܦܫܝ: ܡܶܢ ܟܽܠܗܶܝܢ ܒ̈ܢܳܬ ܩܽܘܖ̈ܝܳܐ ܕܺܝܠܝ.
49 ܦܬܰܚܘ ܥܠܰܝܢ ܦܽܘܡܗܽܘܢ ܟܽܠܗܽܘܢ ܒܥܶܠܕܒܳܒܰܝ̈ܢ.
50 ܕܶܚܠܬܳܐ ܘܙܰܘܥܬܳܐ ܗܘܳܬ ܠܰܢ ܓܽܘܡܳܨܳܐ ܘܰܬܒܳܪܳܐ.
51 ܬܰܦ̈ܶܐ ܕܡܰܝ̈ܳܐ ܐܰܖ̈ܕܺܝ ܥܰܝ̈ܢܰܝ ܥܰܠ ܬܒܳܪܳܗ̇ ܕܒܰܪܬ ܥܰܡܝ.
52 ܡܨܳܕ ܨܳܕܽܘܢܝ ܐܰܝܟ ܨܶܦܪܳܐ ܒܥܶܠܕܒܳܒܰܝ̈ ܡܰܓܳܢ.
53 ܫܰܬܶܩܘ ܒܓܽܘܒܳܐ ܚܰܝܰܝ̈: ܫܕܰܘ ܒܺܝ ܟܺܐܦ̈ܶܐ.
54 ܛܳܦܘ ܡܰܝ̈ܳܐ ܠܥܶܠ ܡܶܢ ܪܺܝܫܝ: ܐܶܡܪܶܬ ܐܶܬܪܰܚܩܶ݀ܬ.
55 ܩܪܺܝ݀ܬ ܫܡܳܟ ܡܳܪܝܳܐ: ܡܶܢ ܓܽܘܒܳܐ ܬܰܚܬܳܝܳܐ.
56 ܩܳܠܝ ܫ̣ܡܰܥܬ: ܠܳܐ ܬܰܪܟܶܢ ܐܶܕܢܳܟ. ܐܶܠܳܐ ܐܰܪܘܰܚ ܠܺܝ ܘܰܦܪܽܘܩܰܝܢܝ.
57 ܩ̣ܪܶܒܬ ܒܝܰܘܡܳܐ ܕܰܩܪܺܝܬܳܟ: ܘܶܐܡܰܪܬ ܠܺܝ ܠܳܐ ܬܶܕܚܰܠ.
58 ܕܳܢ̣ܬ ܡܳܪܝܳܐ ܕܺܝܢܳܐ ܕܢܰܦܫܝ ܘܰܦܪܰܩ̣ܬ ܚܰܝܰܝ̈.
59 ܚ̣ܙܰܝܬ ܡܳܪܝܳܐ ܡܽܘܟܳܟܝ ܘܕܳܢ̣ܬ ܕܺܝܢܝ.
60 ܚ̣ܙܰܝܬ ܟܽܠܳܗ̇ ܢܩܰܡܬܗܽܘܢ: ܘܟܽܠ ܕܶܐܬܚܰܫܰܒܘ ܥܠܰܝ.
61 ܫ̣ܡܰܥܬ ܚܶܣܕܗܽܘܢ ܡܳܪܝܳܐ: ܘܟܽܠ ܕܶܐܬܚܰܫܰܒܘ ܥܠܰܝ.
62 ܣܶܦ̈ܘܳܬܳܐ ܕܩܳܝ̈ܡܳܢ: ܘܖ̈ܳܢܝܳܢ ܥܠܰܝ ܟܽܠܶܗ ܝܰܘܡܳܐ.
63 ܡܰܘܬܰܒܗܽܘܢ ܘܰܡܩܳܡܗܽܘܢ: ܐܶܣܬܰܟܠܶܬ ܐܶܢܳܐ ܡܶܢ ܪܶܢܝܗܽܘܢ.
64 ܬܰܗܦܶܟ ܠܗܽܘܢ ܦܽܘܪܥܳܢܗܽܘܢ ܡܳܪܝܳܐ: ܐܰܝܟ ܡܰܥܒܰܕ ܐܺܝܕܰܝ̈ܗܽܘܢ.
65 ܬܶܬܶܠ ܠܗܽܘܢ ܟܰܪܝܽܘܬܳܐ ܕܠܶܒܳܐ: ܘܰܡܚܽܘܬܳܟ ܠܗܽܘܢ ܬܶܪܕܽܘܦ.
66 ܘܰܒܪܽܘܓܙܳܟ ܬܰܘܒܶܕ ܐܶܢܽܘܢ ܡܶܢ ܬܚܶܝܬ ܫܡܰܝ̈ܟ ܡܳܪܝܳܐ.