2 Esther 2
The additions to Esther (Esther 11)
܀ ܒ ܐܣܬܝܪ ܒ ܀
1 ܒܫܰܢܬܳܐ ܕܰܐܪܒܰܥ ܕܡܰܠܟܽܘܬܳܐ ܕܦܛܽܘܠܡܶܐܘܳܣ ܘܰܩܠܶܐܘܦܰܛܪܰܐ ܕܽܘܣܺܝܬܳܐܘܣ ܗܰܘ ܕܳܐܡܰܪ ܗܘܳܐ ܥܰܠ ܢܰܦܫܶܗ ܕܟܳܗܢܳܐ ܗܽܘ ܡܶܢ ܫܰܪܒܬܳܐ ܕܠܶܘܺܝ ܘܰܒܪܶܗ ܦܛܽܘܠܡܶܐܘܳܣ ܐܺܝܬܺܝܘ ܠܶܐܓܰܪܬܳܐ ܗܳܕܶܐ ܕܦܽܘܪ̈ܝܶܐ ܕܶܐܡܰܪܘ ܕܬܪܰܓܡܳܗ̇ ܒܽܐܘܪܺܫܠܶܡ ܠܽܘܣܺܝܡܰܟܳܘܣ ܒܰܪ ܦܛܽܘܠܡܶܐܘܳܣ.
2 ܒܰܫܢܰܬ ܬܶܪܬܶܝܢ ܕܡܰܠܟܽܘܬܳܐ ܕܰܐܪܛܶܚܫܶܫܬ ܡܰܠܟܳܐ ܪܰܒܳܐ ܒܰܝܘܡܳܐ ܩܰܕܡܳܝܳܐ ܕܺܝܪܰܚ ܢܺܝܣܳܢ ܚܙܳܐ ܚܶܠܡܳܐ ܡܽܘܪܕܟܰܝ ܒܰܪ ܝܰܐܝܳܪ ܒܰܪ ܫܶܡܥܺܝ ܒܰܪ ܩܺܝܫ ܕܡܶܢ ܫܰܒܛܳܐ ܕܒܶܢܝܳܡܶܢ. ܓܰܒܪܳܐ ܝܽܗ̱ܘܕܳܝܳܐ ܕܥܳܡܰܪ ܗܘܳܐ ܒܫܽܘܫܰܢ ܒܺܝܪܬܳܐ.
3 ܘܓܰܒܪܳܐ ܗܘܳܐ ܡܝܰܩܪܳܐ ܒܶܝܬ ܪܰܘܪ̈ܒܳܢܶܐ ܕܒܰܝܬܳܐ ܕܡܰܠܟܳܐ. ܘܺܐܝܬܰܘܗܝ ܗܘܳܐ ܡܶܢ ܫܒܺܝܬܳܐ ܕܓܰܠܺܝ ܢܒܽܘܟܰܕܢܳܨܰܪ ܡܰܠܟܳܐ ܕܒܳܒܶܝܠ ܡܶܢ ܐܽܘܪܺܫܠܶܡ ܥܰܡ ܝܽܘܟܰܢܝܳܐ ܡܰܠܟܳܐ ܕܺܝܗܽܘܕܳܐ. ܘܗܳܢܳܐ ܗܽܘ ܚܶܠܡܶܗ:
4 ܗܘܰܘ ܩ̈ܳܠܶܐ ܘܰܪܓܽܘܫܝܳܐ ܘܪ̈ܶܥܡܶܐ ܘܙܰܘ̈ܥܶܐ ܕܰܐܪܥܳܐ ܘܰܓܫܽܘܫܝܳܐ ܥܰܠ ܐܰܪܥܳܐ. ܘܗܳܐ ܬܪܶܝܢ ܬܰܢܺܝܢ̈ܶܐ ܪܰܘܪ̈ܒܶܐ ܕܰܙܩܺܝܦܺܝܢ ܠܡܰܩܪܳܒܽܘ ܥܰܡ ܚܕܳܕ̈ܶܐ.
5 ܘܡܶܢ ܩܳܠܰܝ̈ܗܽܘܢ ܪܓܶܫܘ ܟܽܠܗܽܘܢ ܥܰܡ̈ܡܶܐ ܠܡܰܩܪܳܒܽܘ ܥܰܡ ܥܰܡܳܐ ܕܙܰܕܺܝ̈ܩܶܐ.
6 ܘܰܗܘܳܐ ܝܰܘܡܳܐ ܗܰܘ ܝܰܘܡܳܐ ܕܚܶܫܽܘܟܳܐ ܘܰܕܢܶܣܝܽܘܢܳܐ ܘܰܕܥܳܩܬܳܐ ܘܕܽܐܘܠܨܳܢܳܐ ܘܙܰܘܥܬܳܐ ܪܰܒܬܳܐ ܥܰܠ ܐܰܪܥܳܐ.
7 ܘܙܳܥ ܘܰܕܚܶܠ ܥܰܡܳܐ ܕܙܰܕܺܝ̈ܩܶܐ ܥܰܠ ܢܰܦܫܗܽܘܢ ܡܶܢ ܒܺܝ̈ܫܳܬܳܐ ܘܶܐܬܛܰܝܰܒܘ ܠܡܰܘܬܳܐ.
8 ܘܰܓܥܰܘ ܠܘܳܬ ܐܰܠܳܗܳܐ ܘܟܰܕ ܗܶܢܽܘܢ ܓܳܥܶܝܢ ܗܳܐ ܢܶܒܥܳܐ ܙܥܽܘܪܳܐ ܕܰܗܘܳܐ ܢܰܗܪܳܐ ܪܰܒܳܐ ܘܰܫܦܰܥܘ ܡܶܢܶܗ ܡܰܝ̈ܳܐ ܣܰܓܺܝ̈ܐܶܐ.
9 ܘܰܕܢܰܚ ܢܽܘܗܪܳܐ ܘܫܶܡܫܳܐ ܘܶܐܬܬܪܺܝܡܘ ܡܰܟܺܝ̈ܟܶܐ ܘܰܒܠܰܥܘ ܠܪ̈ܳܡܶܐ.
10 ܘܟܰܕ ܚܙܳܐ ܗܳܠܶܝܢ ܡܽܘܪܕܟܰܝ ܘܶܐܬܬܥܺܝܪ ܡܶܢ ܫܶܢܬܶܗ: ܡܶܬܪܰܥܶܐ ܗܘܳܐ ܡܳܢܳܐ ܟܰܝ ܨܳܒܶܐ ܐܰܠܳܗܳܐ ܠܡܶܥܒܰܕ ܘܡܶܬܚܰܫܰܒ ܗܘܳܐ ܒܟܽܠܙܒܰܢ ܘܡܶܬܪܰܓܪܰܓ ܠܡܶܕܰܥ ܡܳܢܳܐ ܗܽܘ ܣܽܘܟܳܠܳܐ ܕܚܶܠܡܳܐ.