Jeremiah 52
The Book of Jeremiah
܀ ܐܪܡܝܐ ܢܒ ܀
1 ܒܰܪ ܥܶܣܪܺܝܢ ܗ̱ܘܳܐ ܘܰܚܕܳܐ ܫܢܺܝ̈ܢ ܨܶܕܰܩܝܳܐ ܟܰܕ ܐܰܡܠܶܟ: ܘܰܚܕܰܥܶܣܖ̈ܶܐ ܫܢܺܝ̈ܢ ܐܰܡܠܶܟ ܒܽܐܘܪܺܫܠܶܡ: ܘܰܫܡܳܐ ܕܶܐܡܶܗ: ܚܰܡܛܽܘܠ ܒܰܪܬ ܐܶܪܰܡܝܳܐ ܡܶܢ ܠܶܒܢܳܐ.
2 ܘܰܥܒܰܕ ܕܒܺܝܫ ܩܕܳܡ ܡܳܪܝܳܐ: ܐܰܝܟ ܕܰܥܒܰܕ ܝܽܘܝܰܩܺܝܡ.
3 ܡܶܛܽܠ ܗܳܠܶܝܢ ܗܘܳܐ ܪܽܘܓܙܳܐ ܕܡܳܪܝܳܐ ܥܰܠ ܐܽܘܪܺܫܠܶܡ: ܘܥܰܠ ܝܺܗܽܘܕܳܐ: ܥܕܰܡܳܐ ܕܰܫܕܳܐ ܐܶܢܽܘܢ ܡܶܢ ܩܕܳܡ ܐܰܦܰܘ̈ܗܝ: ܘܰܡܪܰܕ ܨܶܕܰܩܝܳܐ ܡܰܠܟܳܐ ܥܰܠ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ.
4 ܘܰܒܫܰܢ̱ܬܳܐ ܕܰܬܫܰܥ ܠܡܰܠܟܽܘܬܶܗ ܒܝܰܪܚܳܐ ܕܥܶܣܪܳܐ: ܒܶܗ ܒܝܰܪܚܳܐ ܗܳܢܳܐ: ܐܶܬܳܐ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ ܗܽܘ ܘܟܽܠܶܗ ܚܰܝܠܶܗ ܥܰܠ ܐܽܘܪܺܫܠܶܡ: ܘܰܫܪܰܘ ܥܠܶܝܗ̇: ܘܰܒ̣ܢܰܘ ܥܠܶܝܗ̇ ܩܰܠܩܽܘܡ̈ܶܐ ܟܰܕ ܚܳܕܪܳܐ.
5 ܘܥܶܠܰܬ ܩܪܺܝܬܳܐ ܒܽܐܘܠܨܳܢܳܐ: ܥܕܰܡܳܐ ܠܰܫܢܰܬ ܚܕܰܥܶܣܖ̈ܶܐ ܠܡܰܠܟܳܐ ܨܶܕܰܩܝܳܐ.
6 ܘܰܒܝܰܪܚܳܐ ܕܚܰܡܫܳܐ ܒܰܬܫܰܥܬܳܐ ܒܶܗ ܒܝܰܪܚܳܐ: ܥܫܶܢ ܟܰܦܢܳܐ ܒܰܩܪܺܝܬܳܐ: ܘܠܰܝܬ ܗ̱ܘܳܐ ܠܰܚܡܳܐ ܠܥܰܡܳܐ ܕܰܐܪܥܳܐ.
7 ܘܶܐܬܬܰܪܥܰܬ ܩܪܺܝܬܳܐ. ܘܟܽܠܗܽܘܢ ܓܰܒܖ̈ܶܐ ܩܖ̈ܰܒܬܳܢܶܐ: ܥ̣ܪܰܩܘ ܘܰܢ̣ܦܰܩܘ ܡܶܢ ܩܪܺܝܬܳܐ ܒܠܺܠܝܳܐ: ܒܽܐܘܪܚܳܐ ܕܬܰܪܥܳܐ ܕܒܶܝܬ ܫܽܘܖ̈ܶܐ ܕܥܰܠ ܓܶܢ̱ܒ ܓܰܢܬܳܐ ܕܡܰܠܟܳܐ: ܘܟܰܠܕܳܝ̈ܶܐ ܟܪܺܝܟܺܝܢ ܥܰܠ ܩܪܺܝܬܳܐ: ܘܶܐܙܰܠܘ ܒܽܐܘܪܚܳܐ ܕܰܦܩܰܥܬܳܐ.
8 ܘܰܪܕܰܦܘ ܚܰܝܠܳܐ ܕܟܰܠܕܳܝ̈ܶܐ ܒܳܬܰܪ ܡܰܠܟܳܐ: ܘܰܐܕܪܟܽܘܗܝ ܠܨܶܕܰܩܝܳܐ ܒܰܦܩܰܥܬܳܐ ܕܺܐܝܪܺܝܚܽܘ: ܘܟܽܠܶܗ ܚܰܝܠܶܗ ܐܶܬܒܰܕܰܪ ܡܶܢܗ.
9 ܘܰܐܚܕܽܘܗܝ ܠܡܰܠܟܳܐ: ܘܰܐܣܩܽܘܗܝ ܠܘܳܬ ܡܰܠܟܳܐ ܕܒܳܒܶܠ ܠܕܶܒܠܰܬ ܒܰܐܪܥܳܐ ܕܰܚܡܳܬ: ܘܡܰܠܶܠ ܥܰܡܶܗ ܕܺܝܢܳܐ.
10 ܘܢܰܟܶܣ ܡܰܠܟܳܐ ܕܒܳܒܶܠ ܠܰܒܢܰܘ̈ܗܝ ܕܨܶܕܰܩܝܳܐ ܠܥܺܢܰܘ̈ܗܝ: ܘܰܠܟܽܠܗܽܘܢ ܚܺܐܖ̈ܶܐ ܕܺܝܗܽܘܕܳܐ ܚܪܰܒ ܒܕܶܒܠܰܬ.
11 ܘܥܰܝܢܰܘ̈ܗܝ ܕܨܶܕܰܩܝܳܐ ܥܰܘܰܪ: ܘܰܐܣܪܶܗ ܒܫܺܫ̈ܠܳܬܳܐ: ܘܰܐܘܒܠܶܗ ܡܰܠܟܳܐ ܕܒܳܒܶܠ ܠܒܳܒܶܠ ܘܰܐܫܠܡܶܗ ܠܒܶܝܬ ܢܛܽܘܪܬܳܐ ܥܕܰܡܳܐ ܠܝܰܘܡܳܐ ܕܡܺܝܬ.
12 ܘܰܒܝܰܪܚܳܐ ܕܚܰܡܫܳܐ ܒܰܥܣܰܪܬܳܐ ܒܶܗ ܒܝܰܪܚܳܐ: ܗܺܝ ܗܺܝ ܫܢܰܬ ܬܫܰܥܶܣܖ̈ܶܐ ܕܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܐܶܬܳܐ ܢܰܒܽܘܙܰܪܕܳܢ ܪܰܒ ܕܰܚ̈ܫܶܐ: ܘܩܳܡ ܩܕܳܡ ܡܰܠܟܳܐ ܕܒܳܒܶܠ ܒܽܐܘܪܺܫܠܶܡ.
13 ܘܰܐܘܩܶܕ ܠܒܰܝܬܶܗ ܕܡܳܪܝܳܐ ܘܰܠܒܶܝܬ ܡܰܠܟܳܐ ܕܺܝܗܽܘܕܳܐ: ܘܰܠܟܽܠܗܽܘܢ ܒ̈ܳܬܶܐ ܕܽܐܘܪܺܫܠܶܡ: ܘܰܠܟܽܠܗܽܘܢ ܒ̈ܳܬܶܐ ܕܪܰܘܖ̈ܒܳܢܶܐ ܐܰܘܩܶܕ ܒܢܽܘܪܳܐ.
14 ܘܰܠܟܽܠܗܽܘܢ ܫܽܘܖ̈ܶܝܗ̇ ܕܽܐܘܪܺܫܠܶܡ ܟܰܕ ܚܳܕܪܳܐ: ܥܩܰܪܘ ܟܽܠܶܗ ܚܰܝܠܳܐ ܕܟܰܠܕܳܝ̈ܶܐ ܕܥܰܡ ܪܰܒ ܕܰܚ̈ܫܶܐ.
15 ܘܡܶܢ ܡܶܣܟܺܢ̈ܶܐ ܕܥܰܡܳܐ: ܘܫܰܪܟܳܐ ܕܥܰܡܳܐ ܕܶܐܫܬܚܰܪܘ ܒܰܩܪܺܝܬܳܐ. ܘܗܳܢܽܘܢ ܕܰܥܪܰܩܘ ܠܘܳܬ ܡܰܠܟܳܐ ܕܒܳܒܶܠ: ܘܫܰܪܟܳܐ ܕܥܰܡܳܐ ܫܒܳܐ ܢܰܒܽܘܙܰܪܕܳܢ.
16 ܘܡܶܢ ܡܶܣܟܺܢ̈ܶܐ ܕܰܐܪܥܳܐ: ܫܒܰܩ ܢܰܒܽܘܙܰܪܕܳܢ ܪܰܒ ܕܰܚܫ̈ܶܐ ܠܟܰܖ̈ܡܶܐ ܘܰܠܦܽܘܠܚܳܢܳܐ.
17 ܘܥܰܡܽܘ̈ܕܶܐ ܕܰܢܚܳܫܳܐ ܘܰܐܓܳܢ̈ܶܐ: ܘܝܰܡܳܐ ܕܰܢܚܳܫܳܐ ܕܰܒܒܰܝܬܶܗ ܕܡܳܪܝܳܐ ܬܰܒܰܪܘ ܟܰܠܕܳܝ̈ܶܐ: ܘܰܫܩܰܠܘ ܟܽܠܶܗ ܢܚܳܫܗܽܘܢ ܘܰܐܘܒܠܽܘܗܝ ܠܒܳܒܶܠ.
18 ܘܩܰܕܣ̈ܶܐ: ܘܺܐܝܖ̈ܶܐ: ܘܩܰܖ̈ܕܳܠܶܐ: ܘܫܳܚ̈ܠܶܐ: ܘܟܰܦ̈ܶܐ: ܘܟܽܠܗܽܘܢ ܡܳܐܢ̈ܶܐ ܕܰܢܚܳܫܳܐ ܕܰܡܫܰܡܫܺܝܢ ܒܗܽܘܢ ܢ̣ܣܰܒܘ.
19 ܘܩܰܛܖ̈ܽܘܩܶܐ: ܘܦܺܝܖ̈ܡܶܐ: ܘܡܰܫ̈ܠܘܳܬܳܐ: ܘܩܰܕܣ̈ܶܐ: ܘܡܰܙܡܟ̈ܶܐ: ܘܰܡܢܳܖ̈ܳܬܳܐ: ܘܟܰܦ̈ܶܐ: ܘܰܡܢܶܩ̈ܝܳܬܳܐ: ܕܕܰܗܒܳܐ: ܘܰܕܣܺܐܡܳܐ. ܘܰܢ̣ܣܰܒ ܪܰܒ ܕܰܚ̈ܫܶܐ.
20 ܥܰܡܽܘ̈ܕܶܐ ܬܪܶܝܢ ܕܰܢܚܳܫܳܐ: ܘܝܰܡܳܐ ܚܰܕ: ܘܬܰܘܖ̈ܶܐ ܬܪܶܥܣܰܪ ܕܰܢܚܳܫܳܐ ܕܰܬܚܶܝܬ ܓܶܣܰܘ̈ܗܝ ܕܝܰܡܳܐ: ܕܰܥܒܰܕ ܡܰܠܟܳܐ ܫܠܶܝܡܽܘܢ ܠܒܰܝܬܶܗ ܕܡܳܪܝܳܐ: ܘܠܰܝܬ ܗ̱ܘܳܐ ܡܰܬܩܳܠܳܐ ܠܰܢܚܳܫܗܽܘܢ ܕܡܳܐܢ̈ܶܐ ܗܳܠܶܝܢ.
21 ܘܥܰܡܽܘ̈ܕܶܐ ܗܳܢܽܘܢ ܬܪܶܝܢ: ܬܡܳܢܰܥܶܣܖ̈ܶܐ ܐܰܡܺܝ̈ܢ ܪܰܘܡܶܗ ܕܥܰܡܽܘܕܳܐ ܚܰܕ ܡܶܢܗܽܘܢ: ܘܚܽܘܛܳܐ ܕܬܰܪܬܰܥܶܣܖ̈ܶܐ ܐܰܡܺܝ̈ܢ ܟܳܪܶܟ ܠܶܗ: ܟܰܕ ܚܳܕܰܪ: ܘܰܥܒܳܝܶܗ ܐܰܪܒܰܥ ܨܶܒܥܺܝ̈ܢ ܘܰܚܠܺܝܠ ܓܰܘܶܗ.
22 ܘܰܐܓܳܢܳܐ ܥܠܰܘܗܝ ܕܰܢܚܳܫܳܐ: ܘܪܰܘܡܳܗ̇ ܕܰܐܓܳܢܳܐ ܚܕܳܐ ܚܰܡܶܫ ܐܰܡܺܝ̈ܢ: ܘܰܡܨܺܝܕܬܳܐ ܘܖ̈ܽܘܡܳܢܶܐ ܥܰܠ ܐܰܓܳܢܳܐ ܟܰܕ ܚܳܕܪܳܐ: ܘܟܽܠܳܗ̇ ܕܰܢܚܳܫܳܐ: ܘܰܐܝܟ ܗܳܠܶܝܢ ܠܥܰܡܽܘܕܳܐ ܐ̱ܚܪܺܢܳܐ ܘܖ̈ܽܘܡܳܢܶܐ.
23 ܘܰܗܘܰܘ ܖ̈ܽܘܡܳܢܶܐ ܬܶܫܥܺܝܢ ܘܶܫܬܳܐ: ܘܟܽܠܗܽܘܢ ܖ̈ܽܘܡܳܢܶܐ ܡܳܐܐ ܥܰܠ ܡܨܺܝܕܬܳܐ ܟܰܕ ܚܳܕܪܳܐ.
24 ܘܰܕܒܰܪ ܪܰܒ ܕܰܚ̈ܫܶܐ ܠܫܶܪܝܳܐ ܟܳܗܢܳܐ ܪܰܒܳܐ: ܘܠܰܨܦܰܢܝܳܐ ܟܳܗܢܳܐ ܕܒܳܬܪܶܗ: ܘܠܰܬܠܳܬܳܐ ܢܳܛܖ̈ܰܝ ܬܰܖ̈ܥܶܐ.
25 ܘܡܶܢ ܩܪܺܝܬܳܐ ܕܒܰܪ ܡܗܰܝܡܳܢܳܐ ܚܰܕ: ܕܗܽܘ ܡܫܰܠܰܛ ܗ̱ܘܳܐ ܥܰܠ ܓܰܒܖ̈ܶܐ ܩܖ̈ܰܒܬܳܢܶܐ: ܘܫܰܒܥܳܐ ܓܰܒܖ̈ܺܝܢ ܝܺܕܺܝܥ̈ܶܐ ܕܡܶܬܚܙܶܝܢ ܗܘܰܘ ܩܕܳܡ ܡܰܠܟܳܐ ܕܶܐܫܬܚܰܪܘ ܒܰܩܪܺܝܬܳܐ: ܘܣܳܦܪܳܐ ܘܪܰܒ ܚܰܝܠܳܐ ܕܥܰܡܳܐ ܕܰܐܪܥܳܐ. ܘܶܫܬܺܝܢ ܓܰܒܖ̈ܺܝܢ ܡܶܢ ܥܰܡܳܐ ܕܰܐܪܥܳܐ: ܕܶܐܫܬܟܰܚܘ ܒܓܰܘ ܩܪܺܝܬܳܐ.
26 ܕܒܰܪ ܐܶܢܽܘܢ ܢܰܒܽܘܙܰܪܕܳܢ ܪܰܒ ܕܰܚ̈ܫܶܐ: ܘܰܐܘܒܶܠ ܐܶܢܽܘܢ ܠܘܳܬ ܡܰܠܟܳܐ ܕܒܳܒܶܠ ܠܕܶܒܠܰܬ ܒܰܐܪܥܳܐ ܕܰܚܡܳܬ.
27 ܘܰܡܚܳܐ ܐܶܢܽܘܢ ܡܰܠܟܳܐ ܕܒܳܒܶܠ: ܘܩ̣ܰܛܶܠ ܐܶܢܽܘܢ ܒܕܶܒܠܰܬ ܒܰܐܪܥܳܐ ܕܰܚܡܳܬ: ܘܶܐܫܬܒܺܝ ܝܺܗܽܘܕܳܐ ܡܶܢ ܐܰܪܥܶܗ.
28 ܗܳܢܰܘ ܥܰܡܳܐ ܕܰܫܒܳܐ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܒܰܫܢܰܬ ܫܒܰܥ ܕܡܰܠܟܽܘܬܶܗ: ܝܽܘ̈ܕܳܝܶܐ ܬܠܳܬܳܐ ܐܰܠܦܺܝ̈ܢ ܘܥܶܣܪܺܝܢ ܘܰܬܠܳܬܳܐ.
29 ܘܒܰܫܢܰܬ ܬܡܳܢܰܥܶܣܖ̈ܶܐ ܕܡܰܠܟܽܘܬܶܗ ܕܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܫܒܳܐ ܡܶܢ ܐܽܘܪܺܫܠܶܡ ܢܰܦ̈ܫܳܬܳܐ ܬܡܳܢܶܡܳܐܐ: ܘܰܬܠܳܬܝܢ ܘܬܰܪܬܶܝܢ.
30 ܘܒܰܫܢܰܬ ܥܶܣܪܺܝܢ ܘܰܬܠܳܬ ܫܢܺܝ̈ܢ ܕܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܫܒܳܐ ܢܰܒܽܘܙܰܪܕܳܢ ܪܰܒ ܕܰܚ̈ܫܶܐ: ܝܽܘ̈ܕܳܝܶܐ ܢܰܦ̈ܫܳܬܳܐ ܫܒܰܥܡܳܐܐ ܘܰܐܪܒܥܺܝܢ ܘܚܰܡܶܫ: ܟܽܠܗܶܝܢ ܢܰܦ̈ܫܳܬܳܐ ܐܰܪܒܥܳܐ ܐܰܠܦܺܝ̈ܢ ܘܫܶܬܡܳܐܐ.
31 ܒܰܫܢܰܬ ܬܠܳܬܺܝܢ ܘܰܫܒܰܥ ܕܰܫܒܺܝܬܶܗ ܕܝܽܘܝܳܟܺܝܢ ܡܰܠܟܳܐ ܕܺܝܗܽܘܕܳܐ: ܒܝܰܪܚܳܐ ܕܰܬܪܶܥܣܰܪ ܒܚܰܡܫܳܐ ܘܥܶܣܪܺܝܢ ܒܶܗ ܒܝܰܪܚܳܐ: ܐܰܪܺܝܡ ܐܽܘܠ ܡܪܽܘܕܳܟ ܡܰܠܟܳܐ ܕܒܳܒܶܠ ܒܫܰܢ̱ܬܳܐ ܕܡܰܠܟܽܘܬܶܗ: ܒܪܺܝܫܶܗ ܕܝܽܘܝܳܟܺܝܢ ܡܰܠܟܳܐ ܕܺܝܗܽܘܕܳܐ: ܘܰܐܦܩܶܗ ܡܶܢ ܒܶܝܬ ܐܰܣܺܝܖ̈ܶܐ.
32 ܘܡܰܠܶܠ ܥܰܡܶܗ ܫܰܦܺܝܖ̈ܳܬܳܐ ܘܰܐܪܡܺܝ ܟܽܘܪܣܝܶܗ ܠܥܶܠ ܡܶܢ ܟܽܘܖ̈ܣܰܘܳܬܳܐ ܕܡܰܠ̈ܟܶܐ ܕܺܐܝܬ ܥܰܡܶܗ ܒܒܳܒܶܠ.
33 ܘܚܰܠܶܦ ܠܒܽܘܫ̈ܶܐ ܕܰܐܣܽܘܪܶܗ: ܘܶܐܟܰܠ ܠܰܚܡܳܐ ܩܕܳܡܰܘܗܝ: ܐܰܡܺܝܢܳܐܺܝܬ ܟܽܠ ܝܰܘ̈ܡܰܝ ܚܰܝܰܘ̈ܗܝ.
34 ܘܰܫܩܳܠܶܗ ܢܳܦܶܩ ܗ̱ܘܳܐ ܡܶܢ ܩܕܳܡ ܡܰܠܟܳܐ ܕܒܳܒܶܠ ܟܠܽܝܽܘܡ ܐܰܡܺܝܢܳܐܺܝܬ: ܥܕܰܡܳܐ ܠܝܰܘܡܳܐ ܕܡܺܝܬ: ܟܽܠܗܽܘܢ ܝܰܘ̈ܡܰܝ ܚܰܝܰܘ̈ܗܝ.