2 Corinthians 5
Second Epistle to the Corinthians
܀ ܕܩܘܪ̈ܢܬܝܐ ܕܬܪ̈ܬܝܢ ܗ ܀
1- ܝܳܕܥܺܝܢܰܢ ܓܶܝܪ ܕܶܐܢ ܒܰܝܬܰܢ ܕܒܰܐܪܥܳܐ ܗܳܢܳܐ ܕܦܰܓܪܳܐ ܢܶܫܬܪܶܐ܆ ܐܶܠܳܐ ܐܺܝܬ ܠܰܢ ܒܶܢܝܳܢܳܐ ܕܡܶܢ ܐܰܠܳܗܳܐ܇ ܒܰܝܬܳܐ ܕܠܳܐ ܒܰܥܒܳܕ ܐܺܝ̈ܕܰܝܳܐ ܒܰܫܡܰܝܳܐ ܠܥܳܠܰܡ.
2- ܐܳܦ ܥܰܠ ܗܳܕܶܐ ܓܶܝܪ ܡܶܬܬܰܢܚܺܝܢܰܢ܇ ܘܰܣܘܶܝܢܰܢ ܕܢܶܠܒܰܫ ܒܰܝܬܰܢ ܕܡܶܢ ܫܡܰܝܳܐ܆
3- ܐܶܢ ܠܳܐ ܐܳܦ ܡܳܐ ܕܰܠܒܶܫܢ܁ ܢܶܫܬܟܰܚ ܠܰܢ ܥܰܪܛܶܠ.
4- ܟܰܕ ܐܺܝܬܰܝܢ ܓܶܝܪ ܗܳܫܳܐ ܒܗܳܢܳܐ ܒܰܝܬܳܐ܆ ܡܶܬܬܰܢܚܺܝܢܰܢ ܡܶܢ ܝܽܘܩܪܶܗ. ܘܠܳܐ ܨܳܒܶܝܢܰܢ ܠܡܶܫܠܚܶܗ܆ ܐܶܠܳܐ ܕܢܶܠܒܰܫ ܠܥܶܠ ܡܶܢܶܗ܇ ܕܬܶܬܒܠܰܥ ܡܺܝܬܽܘܬܶܗ ܒܚܰܝ̈ܶܐ.
5- ܘܕܰܡܥܰܬܶܕ ܠܰܢ ܠܳܗ̇ ܠܗܳܕܶܐ. ܐܰܠܳܗܰܐ ܗ̱ܘ. ܗܰܘ ܕܝܰܗ̱ܒ ܠܰܢ ܪܰܗܒܽܘܢܳܐ ܕܪܽܘܚܶܗ܀
6- ܡܶܛܽܠ ܕܝܳܕܥܺܝܢܰܢ ܗܳܟܺܝܠ ܘܰܡܦܳܣܺܝܢܰܢ: ܕܰܟܡܳܐ ܕܰܒܦܰܓܪܳܐ ܫܪܶܝܢܰܢ܁ ܥܰܢܺܝܕܺܝܢܰܢ ܡܶܢ ܡܳܪܰܢ܆
7- ܒܗܰܝܡܳܢܽܘܬܰܐ ܗ̱ܘ ܓܶܝܪ ܡܗܰܠܟܺܝܢܰܢ ܘܠܳܐ ܒܰܚܙܳܝܳܐ܆
8- ܡܶܛܽܠ ܗܳܢܳܐ ܬܟܺܝܠܺܝܢܰܢ ܘܰܡܣܰܘܚܺܝܢܰܢ܇ ܕܢܶܥܢܰܕ ܡܶܢ ܦܰܓܪܳܐ. ܘܢܶܗܘܶܐ ܠܘܳܬ ܡܳܪܰܢ.
9- ܘܡܶܬܚܰܦܛܺܝܢ ܚ̱ܢܰܢ܁ ܕܶܐܢ ܥܳܢܽܘ̈ܕܶܐ ܚܢܰܢ܁ ܘܶܐܢ ܥܳܡܽܘܪ̈ܶܐ܆ ܠܶܗ ܗܘܰܝܢ ܫܳܦܪܺܝܢ.
10- ܟܽܠܰܢ ܓܶܝܪ ܥܬܺܝܕܺܝܢܰܢ ܠܰܡܩܳܡ ܩܕܳܡ ܒܺܝܡ ܕܰܡܫܺܝܚܳܐ܆ ܕܢܶܬܦܪܰܥ ܐ̱ܢܳܫ ܐ̱ܢܳܫ ܒܦܰܓܪܶܗ ܡܶܕܶܡ ܕܰܥܒܺܝܕ ܠܶܗ܇ ܐܶܢ ܕܛܳܒ ܘܶܐܢ ܕܒܺܝܫ܀
11- ܡܶܛܽܠ ܕܝܳܕܥܺܝܢܰܢ ܗܳܟܺܝܠ ܕܶܚܠܬܶܗ ܕܡܳܪܰܢ܆ ܠܰܒܢܰܝ̈ܢܳܫܰܐ ܗ̱ܘ ܡܦܺܝܣܺܝܢܰܢ. ܠܰܐܠܳܗܳܐ ܕܶܝܢ ܓܠܶܝܢܰܢ. ܣܳܒܰܪ ܐ̱ܢܳܐ ܕܶܝܢ ܕܳܐܦ ܠܡܰܕ̈ܥܰܝܟܽܘܢ ܕܺܝܠܟܽܘܢ ܓܠܶܝܢܰܢ.
12- ܠܳܐ ܗ̱ܘܳܐ ܬܽܘܒ ܢܰܦܫܰܢ ܡܫܰܒܚܺܝܢܰܢ ܠܟܽܘܢ. ܐܶܠܳܐ ܥܶܠܬܰܐ ܗ̱ܘ ܝܳܗܒܺܝܢܰܢ ܠܟܽܘܢ܆ ܕܰܗܘܰܝܬܽܘܢ ܡܶܫܬܰܒܗܪܺܝܢ ܒܰܢ܇ ܠܘܳܬ ܗܳܢܽܘܢ ܕܒܰܐܦ̈ܐ ܗ̱ܽܘ ܡܶܫܬܰܒܗܪܺܝܢ ܘܠܳܐ ܒܠܶܒܳܐ.
13- ܐܶܢ ܓܶܝܪ ܫܳܛܶܝܢܰܢ. ܠܰܐܠܳܗܳܐ. ܘܶܐܢ ܬܰܩܢܺܝܢ ܚ̱ܢܰܢ. ܠܟܽܘܢ.
14- ܚܘܒܶܗ ܓܶܝܪ ܕܰܡܫܺܝܚܳܐ ܐܳܠܶܨ ܠܰܢ܆ ܕܪܳܢܶܝܢܰܢ ܗܳܕܶܐ. ܕܚܰܕ ܚܠܳܦ ܟܽܠܢܳܫ ܡܺܝܬ. ܡܳܕܶܝܢ ܟܽܠܢܳܫ ܡܺܝܬ ܠܶܗ.
15- ܘܰܚܠܳܦ ܟܽܠܢܳܫ ܗܽܘ ܡܺܝܬ܆ ܕܰܐܝܠܶܝܢ ܕܚܰܝܺܝܢ ܠܳܐ ܠܢܰܦܫܗܽܘܢ ܢܺܚܽܘܢ܇ ܐܶܠܳܐ ܠܗܰܘ ܐܰܝܢܳܐ ܕܥܰܠ ܐܰܦܰܝ̈ܗܽܘܢ ܡܺܝܬ ܘܩܳܡ.
16- ܘܡܶܟܺܝܠ ܚܢܰܢ ܠܐ̱ܢܳܫ ܒܰܦܓܰܪ ܠܳܐ ܝܳܕܥܺܝܢܰܢ. ܘܶܐܢ ܝܺܕܰܥܢ ܒܰܦܓܰܪ ܠܰܡܫܺܝܚܳܐ܆ ܐܶܠܳܐ ܡܶܢ ܗܳܫܳܐ ܠܳܐ ܝܳܕܥܺܝܢܰܢ.
17- ܟܽܠ ܡܰܢ ܕܒܰܡܫܺܝܚܰܐ ܗ̱ܘ ܗܳܟܺܝܠ܆ ܒܪܺܝܬܰܐ ܗ̱ܘ ܚܕܰܬܳܐ. ܥܰܬܺܝ̈ܩܳܬܳܐ ܥܒܰܪ̈ܝ ܠܗܶܝܢ܆
18- ܘܟܽܠ ܡܶܕܶܡ ܗܘܳܐ ܚܰܕ̱ܬܳܐ ܡܶܢ ܐܰܠܳܗܳܐ܇ ܗܰܘ ܕܪܰܥܝܰܢ ܠܶܗ ܒܰܡܫܺܝܚܳܐ܇ ܘܝܰܗ̱ܒ ܠܰܢ ܬܶܫܡܶܫܬܳܐ ܕܬܰܪܥܽܘܬܳܐ.
19- ܐܰܠܳܗܳܐ ܗ̱ܘܳܐ ܓܶܝܪ ܒܰܡܫܺܝܚܳܐ܇ ܗܰܘ ܕܪܰܥܺܝ ܠܥܳܠܡܳܐ ܥܰܡ ܪܰܒܽܘܬܶܗ. ܘܠܳܐ ܚܫܰܒ ܠܗܽܘܢ ܚܛܳܗܰܝ̈ܗܽܘܢ܇ ܘܣܳܡ ܒܰܢ ܕܺܝܠܰܢ ܡܶܠܬܳܐ ܕܬܰܪܥܽܘܬܳܐ.
20- ܐܺܝܙ̈ܓܰܕܶܐ ܚܢܰܢ ܗܳܟܺܝܠ ܚܠܳܦ ܡܫܺܝܚܳܐ. ܘܰܐܝܟ ܗܰܘ ܕܰܐܠܳܗܳܐ ܒܳܥܶܐ ܡܶܢܟܽܘܢ ܒܺܐܝܕܰܢ܆ ܚܠܳܦ ܡܫܺܝܚܳܐ ܗܳܟܺܝܠ ܒܳܥܶܝܢܰܢ. ܐܶܬܪܰܥܰܘ ܠܰܐܠܳܗܳܐ.
21- ܗܰܘ ܓܶܝܪ ܕܠܳܐ ܝܳܕܰܥ ܗ̱ܘܳܐ ܚܛܺܝܬܳܐ܆ ܡܶܛܽܠܳܬܟܽܘܢ ܚܛܺܝܬܳܐ ܥܰܒܕܶܗ܇ ܕܰܚܢܰܢ ܢܶܗܘܶܐ ܒܶܗ ܙܰܕܺܝܩܽܘܬܳܐ ܕܰܐܠܳܗܳܐ܀