2 Corinthians 13
Second Epistle to the Corinthians
܀ ܕܩܘܪ̈ܢܬܝܐ ܕܬܪ̈ܬܝܢ ܝܓ ܀
1- ܗܳܕܶܐ ܕܰܬܠܳܬ ܗ̱ܝ ܙܰܒܢܺܝ̈ܢ ܕܰܡܛܰܝܰܒ ܐ̱ܢܳܐ ܕܺܐܬܶܐ ܠܘܳܬܟܽܘܢ܆ ܕܥܰܠ ܦܽܘܡ ܬܪܶܝܢ ܘܰܬܠܳܬܳܐ ܣܳܗ̈ܕܺܝܢ ܬܩܽܘܡ ܟܽܠ ܡܶܠܳܐ.
2- ܡܶܢ ܩܕܺܝܡ ܐܶܡܪܶܬ ܗ̱ܘܺܝܬ ܠܟܽܘܢ܆ ܘܬܽܘܒ ܡܩܰܕܶܡ ܐ̱ܢܳܐ ܐܳܡܰܪ ܐ̱ܢܳܐ ܠܟܽܘܢ܇ ܐܰܝܟ ܕܳܐܦ ܬܰܪܬܶܝܢ ܙܰܒܢܺܝ̈ܢ ܕܰܗܘܺܝܬ ܠܘܳܬܟܽܘܢ ܐܶܡܪܶܬ ܠܟܽܘܢ܇ ܘܳܐܦ ܗܳܫܳܐ ܟܰܕ ܪܰܚܺܝܩ ܐ̱ܢܳܐ ܟܳܬܶܒ ܐ̱ܢܳܐ܇ ܠܗܳܠܶܝܢ ܕܰܚܛܰܘ܆ ܘܰܠܫܰܪܟܳܐ ܕܰܐ̱ܚܪ̈ܳܢܶܐ܆ ܕܶܐܢ ܐܺܬܶܐ ܬܽܘܒ. ܠܳܐ ܐܶܚܽܘܣ.
3- ܡܶܛܽܠ ܕܒܽܘܩܝܳܐ ܒܳܥܶܝܬܽܘܢ ܕܰܡܫܺܝܚܳܐ ܕܰܡܡܰܠܶܠ ܒܺܝ. ܗܰܘ ܕܠܳܐ ܗܘܳܐ ܡܚܺܝܠ ܒܟܽܘܢ܇ ܐܶܠܳܐ ܚܰܝܠܬܳܢܽ ܗ̱ܘ ܒܟܽܘܢ.
4- ܐܳܦܶܢ ܐܶܙܕܩܶܦ ܓܶܝܪ ܒܰܡܚܺܝܠܽܘܬܳܐ܆ ܐܶܠܳܐ ܚܰܝ ܗ̱ܘ ܒܚܰܝܠܳܐ ܕܰܐܠܳܗܳܐ. ܘܳܐܦ ܚܢܰܢ ܡܚܺܝܠܺܝܢܰܢ ܥܰܡܶܗ܆ ܐܶܠܳܐ ܚܰܝܺܝܢ ܚ̱ܢܰܢ ܥܰܡܶܗ ܒܚܰܝܠܳܐ ܕܰܐܠܳܗܳܐ ܕܰܒܟܽܘܢ.
5- ܢܰܦܫܟܽܘܢ ܒܩܰܘ܆ ܐܶܢ ܒܳܗ̇ ܒܗܰܝܡܳܢܽܘܬܳܐ ܩܳܝܡܺܝܢ ܐܢ̱ܬܽܘܢ. ܢܰܦܫܟܽܘܢ ܐܰܣܰܘ. ܐܰܘ ܠܳܐ ܡܶܫܬܰܘܕܥܺܝܬܽܘܢ ܕܝܶܫܽܘܥ ܡܫܺܝܚܳܐ ܒܟܽܘܢܽ ܗ̱ܘ؟ ܘܶܐܢ ܠܳܐ ܡܰܣ̈ܠܰܝܳܐ ܐܰܢ̱ܬܽܘܢ.
6- ܡܣܰܒܰܪ ܐ̱ܢܳܐ ܕܶܝܢ ܕܬܶܕܥܽܘܢ܆ ܕܰܚܢܰܢ ܠܳܐ ܗ̱ܘܰܝܢ ܡܰܣܠܶܝܢ.
7- ܒܳܥܶܐ ܐ̱ܢܳܐ ܕܶܝܢ ܡܶܢ ܐܰܠܳܗܳܐ܇ ܕܠܳܐ ܢܶܗܘܶܐ ܒܟܽܘܢ ܡܶܕܶܡ ܕܒܺܝܫ܇ ܐܰܝܟ ܕܒܽܘܩܝܰܢ ܕܺܝܠܰܢ ܢܶܬܚܙܶܐ܆ ܐܶܠܳܐ ܕܰܐܢ̱ܬܽܘܢ ܬܶܗܘܽܘܢ ܣܳܥܪܺܝܢ ܛܳܒ̈ܳܬܳܐ܇ ܘܰܚܢܰܢ ܢܶܗܘܶܐ ܐܰܝܟ ܡܰܣ̈ܠܰܝܳܐ.
8- ܠܳܐ ܓܶܝܪ ܡܶܫܟܚܺܝܢܰܢ ܕܢܶܥܒܶܕ ܡܶܕܶܡ ܠܽܘܩܒܰܠ ܩܽܘܫܬܳܐ܆ ܐܶܠܳܐ ܚܠܳܦ ܩܽܘܫܬܳܐ.
9- ܚܳܕܶܝܢܰܢ ܕܶܝܢ ܡܳܐ ܕܰܚܢܰܢ ܟܪܺܝܗܺܝܢ܆ ܘܰܐܢ̱ܬܽܘܢ ܚܰܝܠܬܳܢܺܝܢ. ܗܳܕܶܐ ܓܶܝܪ ܐܳܦ ܡܨܰܠܶܝܢܰܢ ܕܰܐܢ̱ܬܽܘܢ ܬܶܬܓܰܡܪܽܘܢ.
10- ܡܶܛܽܠ ܗܳܢܳܐ ܟܰܕ ܪܰܚܺܝܩ ܐ̱ܢܳܐ ܗܳܠܶܝܢ ܟܳܬܶܒ ܐ̱ܢܳܐ܆ ܕܠܳܐ ܡܳܐ ܕܶܐܬܺܝܬ ܩܰܫܝܳܐܺܝܬ ܐܶܣܥܽܘܪ ܐܰܝܟ ܫܽܘܠܛܳܢܳܐ ܕܝܰܗ̱ܒ ܠܺܝ ܡܳܪܝ܇ ܠܒܶܢܝܳܢܟܽܘܢ ܘܠܳܐ ܠܣܽܘܚܳܦܟܽܘܢ܀
11- ܡܶܟܺܝܠ ܐܰܚܰܝ̈܆ ܚܕܰܘ܁ ܘܶܐܬܓܰܡ̱ܪܘ. ܘܶܐܬܒܰܝܰܐܘ܇ ܘܰܐܘܝܽܘܬܳܐ ܘܫܰܝܢܳܐ ܢܶܗܘܶܐ ܒܟܽܘܢ. ܘܰܐܠܳܗܳܐ ܕܚܽܘܒܳܐ ܘܰܕܫܰܠܡܽܘܬܳܐ ܢܶܗܘܶܐ ܥܰܡܟܽܘܢ܀
12- ܫܰܐܠܘ ܒܰܫܠܳܡܳܐ ܚܰܕ ܕܚܰܕ ܒܢܽܘܫܰܩܬܳܐ ܩܰܕܺܝܫܬܳܐ.
13- ܫܳܐܠܺܝܢ ܒܰܫܠܳܡܟܽܘܢ ܟܽܠܗܽܘܢ ܩܰܕܺܝ̈ܫܶܐ.
14- ܫܠܳܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ. ܘܚܽܘܒܶܗ ܕܰܐܠܳܗܳܐ. ܘܫܰܘܬܳܦܽܘܬܳܐ ܕܪܽܘܚܳܐ ܕܩܽܘܕܫܳܐ. ܥܰܡ ܟܽܠܟܽܘܢ. ܐܰܡܺܝܢ܀