Songs of Solomon 1
The Book of Songs of Solomon
܀ ܬܫܒܚܬ ܬܫܒܚ̈ܬܐ ܐ ܀
1 ܢܢܰܫܩܰܢܝ ܡܶܢ ܢܽܘܫ̈ܩܳܬܳܐ ܕܦܽܘܡܶܗ. ܡܶܛܽܠ ܕܛܳܒܺܝܢ ܖ̈ܰܚܡܰܝܟ ܡܶܢ ܚܰܡܪܳܐ.
2 ܠܪܺܝܚ ܒܶܣܡܳܢܰܝ̈ܟ ܛܳܒ̈ܶܐ. ܡܶܫܚܳܐ ܕܡܽܘܪܳܐ ܫܡܳܟ: ܡܶܛܽܠ ܗܳܢܳܐ ܥܠܰܝ̈ܡܳܬܳܐ ܖ̈ܰܚܡܳܟ.
3 ܓܶܕܰܝܢܝ ܒܳܬܪܳܟ: ܢܶܪܗܰܛ ܐܰܥܶܠܰܝܢܝ ܡܰܠܟܳܐ ܠܩܰܝܛܽܘܢܳܟ. ܢܶܚܕܶܐ ܘܰܢܕܽܘܨ ܒܳܟ. ܢܶܬܕܟܰܪ ܚܽܘܒܳܟ ܡܶܢ ܚܰܡܪܳܐ. ܘܡܶܢ ܬܖ̈ܺܝܨܶܐ ܪܶܚܡܬܳܐ.
4 ܐܽܘܟܳܡܳܐ ܐ̱ܢܳܐ: ܘܝܳܐܝܳܐ ܐ̱ܢܳܐ: ܒ̈ܢܳܬ ܐܽܘܪܺܫܠܶܡ. ܐܰܝܟ ܡܰܫܟܢܰܝ̈ ܩܶܕܳܪ: ܘܰܐܝܟ ܝܳܖ̈ܺܝܥܳܬ ܫܠܶܝܡܽܘܢ.
5 ܠܳܐ ܬܶܚܙܽܘܢܳܢܝ ܕܽܐܘܟܳܡܳܐ ܐ̱ܢܳܐ: ܕܰܐܘܟܡܰܢܝ ܫܶܡܫܳܐ. ܒܢܰܝ̈ ܐܶܡܝ ܐܶܬܟܰܬܰܫܘ ܒܺܝ. ܣܳܡܽܘܢܝ ܢܳܛܪܰܬ ܟܰܖ̈ܡܶܐ. ܘܟܰܪܡܝ ܕܺܝܠܝ ܠܳܐ ܢܶܛܪܶܬ.
6 ܚܰܘܰܐܽܘܢܝ ܡܰܢ ܕܪܶܚܡܰܬ ܢܰܦܫܝ. ܐܰܝܟܰܢܳܐ ܪܥܺܝܬ: ܘܰܐܝܟܰܢܳܐ ܪܶܒܥܶܬ ܒܛܰܗܪܳܐ ܕܰܠܡܳܐ ܐܶܗܘܶܐ ܐܰܝܟ ܛܳܥܺܝܬܳܐ ܒܰܓܙܳܪܳܐ ܕܥܶܖ̈ܒܰܝܟ.
7 ܐܶܠܳܐ ܬܶܕܥܶܝܢ ܝܳܬܶܟܝ ܫܰܦܺܝܪܰܬ ܒܢܶܫ̈ܶܐ. ܬܳܝ ܐܰܢ̱ܬܝ ܒܥܶܩܒܳܐ ܕܥܳܢ̈ܳܐ ܘܰܪܥܳܝ ܓܕܰܝ̈ܟܝ ܒܡܰܫܟܢ̈ܶܐ ܕܖ̈ܳܥܰܘܳܬܳܐ.
8 ܠܣܽܘܣܬܝ ܒܡܰܪܟܰܒܬܶܗ ܕܦܶܪܥܽܘܢ ܕܰܡܺܝܬܶܟܝ ܩܰܪܺܝܒܰܬܝ.
9 ܝܳܐܝ̈ܳܢ ܦܰܟܰܝ̈ܟܝ ܒܰܓܕܽܘ̈ܠܶܐ. ܘܨܰܘܪܶܟܝ ܒܥܶܩ̈ܶܐ.
10 ܓܕܽܘ̈ܠܶܐ ܕܕܰܗܒܳܐ ܢܶܥܒܶܕ ܠܶܟܝ. ܥܰܡ ܙܠܺܝܚ̈ܶܐ ܕܣܺܐܡܳܐ.
11 ܥܰܡ ܡܰܠܟܳܐ ܒܰܣܡܳܟܶܗ. ܢܰܪܕܺܝܢ ܝܰܗܒ ܪܪܝܚܶܗ.
12 ܨܪܳܪܳܐ ܕܡܽܘܪܳܐ ܕܰܪܚܶܡ ܠܺܝ ܒܶܝܬ ܬܕܰܝ̈ ܢܒܽܘܬ.
13 ܣܓܽܘܠܳܐ ܕܟܽܘܦܪܳܐ ܕܳܕܝ ܒܟܰܪܡܳܐ ܕܥܺܝܢ ܓܳܕ.
14 ܗܳܐ ܫܰܦܺܝܪܰܬܝ ܩܰܪܺܝܒܰܬܝ ܗܳܐ ܫܰܦܺܝܪܰܬܝ. ܥܰܝܢܰܝ̈ܟܝ ܕܝܰܘܢܳܐ.
15 ܗܳܐ ܫܰܦܺܝܪ ܐܰܢ̱ܬ ܕܳܕܝ: ܐܳܦ ܒܰܣܺܝܡ ܐܰܢ̱ܬ ܐܳܦ ܥܰܪܣܰܢ ܪܨܺܝܦ.
16 ܩܳܖ̈ܝܰܬ ܒܰܝܬܰܢ ܐܰܖ̈ܙܶܐ: ܥܰܖ̈ܩܶܐ ܕܰܩܛܰܪܩܳܐ.