Songs of Solomon 2
The Book of Songs of Solomon
܀ ܬܫܒܚܬ ܬܫܒܚ̈ܬܐ ܒ ܀
1 ܐܰܝܟ ܫܽܘܫܰܢܰܬ ܫܰܪܘܰܝܢܳܐ: ܫܽܘܫܰܢܰܬ ܥܽܘܡܩܳܐ.
2 ܐܰܝܟ ܫܽܘܫܰܢ̈ܶܐ ܒܰܝܢܳܬ ܟܽܘ̈ܒܶܐ: ܗܳܟܰܢܳܐ ܩܰܪܺܝܒܰܬܝ ܒܰܝܢܳܬ ܒ̈ܢܳܬܳܐ.
3 ܐܰܝܟ ܚܰܙܽܘܪܳܐ ܒܩܰܝ̈ܣܶܐ ܕܥܳܒܳܐ: ܗܳܟܰܢܳܐ ܕܳܕܝ ܒܰܝܢܳܬ ܒ̈ܢܰܝܳܐ. ܒܛܶܠܳܠܶܗ ܐܶܬܪܰܓܪܓܶ݀ܬ ܘܝܶܬܒܶܬ ܘܶܐܒܶܗ ܚܠܶܐ ܠܶܟܝ.
4 ܐܰܥܠܽܘܢܝ ܠܒܶܝܬ ܚܰܡܪܳܐ. ܛܰܟܶܣܘ ܥܠܰܝ ܪܶܚܡܬܳܐ.
5 ܣܳܡܽܘܢܝ ܒܦܽܘܢܳܩ̈ܶܐ. ܐܰܟܪܟܽܘܢܝ ܒܚܰܙܽܘܖ̈ܶܐ. ܡܶܛܽܠ ܕܰܟܪܺܝܗܰܬ ܪܶܚܡܬܳܐ ܐ̱ܢܳܐ.
6 ܣܶܡܳܠܶܗ ܬܚܶܝܬ ܪܺܝܫܝ ܘܝܰܡܺܝܢܶܗ ܬܥܰܦܩܰܢܝ.
7 ܐܰܘܡܺܝܬܟܶܝܢ ܐܳܘ ܒ̈ܢܳܬ ܐܽܘܪܺܫܠܶܡ: ܒܰܛ̈ܒܰܝܳܐ ܐܰܘ ܒܥܽܘܙܰܝ̈ܠܶܐ ܕܚܰܩܠܳܐ. ܐܶܢ ܬܥܺܝܖ̈ܳܢ ܘܶܐܢ ܬܥܰܝܖ̈ܳܢ ܝܳܬ ܪܶܚܡܬܳܐ: ܥܕܰܡܳܐ ܕܬܶܨܒܶܐ.
8 ܩܳܠܶܗ ܕܕܳܕܝ ܗܳܐ ܗܳܢܳܐ ܕܳܐܬܶܐ. ܡܫܰܘܰܪ ܥܰܠ ܛܽܘܖ̈ܶܐ. ܡܩܰܝܶܙ ܥܰܠ ܖ̈ܳܡܳܬܳܐ.
9 ܕܳܡܶܐ ܕܳܕܝ ܠܛܰܒܝܳܐ: ܐܰܘ ܠܥܽܘܙܰܝܠܳܐ ܕܰܐܝ̈ܠܶܐ. ܗܳܐ ܗܽܘ ܩܳܐܶܡ ܒܶܣܬܰܪ ܐܶܣܬܰܢ: ܡܕܺܝܩ ܡܶܢ ܟܰܘ̈ܶܐ: ܡܰܪܟܶܢ ܡܶܢ ܨܳܝܖ̈ܳܬܳܐ.
10 ܥܢܳܐ ܕܳܕܝ ܘܶܐܡܰܪ ܠܺܝ: ܩܽܘܡܝ ܠܶܟܝ ܫܰܦܺܝܪܰܬܝ: ܩܰܪܺܝܒܰܬܝ: ܘܙܶܠܝ ܠܶܟܝ.
11 ܡܶܛܽܠ ܕܗܳܐ ܣܰܬܘܳܐ ܥ̣ܒܰܪ. ܘܡܶܛܪܳܐ ܥ̣ܒܰܪ ܘܶܐܙܰܠ ܠܶܗ.
12 ܗܰܒܳܒ̈ܶܐ ܐܶܬܚܙܺܝܘ ܒܰܐܪܥܳܐ. ܙܰܒܢܳܐ ܕܰܟܣܳܚܳܐ ܡܛܳܐ. ܘܩܳܠܳܐ ܕܫܽܘܦܢܺܝܢܳܐ ܐܶܫܬܡܰܥ ܒܰܐܪܥܰܢ.
13 ܬܺܬܳܐ ܝܶܗܒܰܬ ܦܰܩܽܘ̈ܥܶܝܗ̇ ܓܽܘܦ̈ܢܶܐ ܘܰܣܡܳܕܖ̈ܶܐ ܝܰܗܒܘ ܪܺܝܚܳܐ. ܩܽܘܡܝ ܠܶܟܝ ܫܰܦܺܝܪܰܬܝ ܩܰܪܺܝܒܽܘܬܝ: ܘܬܳܝ ܠܶܟܝ.
14 ܝܰܘܢܝ ܒܚܽܘܠܰܢܳܐ ܕܫܽܘܥܳܐ: ܒܣܶܬܪܳܐ ܕܰܣܝܳܓܳܐ: ܚܰܘܰܐܺܝܢܝ ܚܶܙܘܶܟܝ: ܘܰܐܫܡܰܥܺܝܢܝ ܩܳܠܶܟܝ. ܡܶܛܽܠ ܕܩܳܠܶܟܝ ܒܰܣܺܝܡ: ܘܚܶܙܘܶܟܝ ܝܳܐܶܐ.
15 ܐܰܚܽܘܕܘ ܠܰܢ ܬܰܥ̈ܠܶܐ: ܬܰܥ̈ܠܶܐ ܕܰܩܕܩ̈ܶܐ ܡܚܰܒܠܰܝ̈ ܟܰܖ̈ܡܶܐ. ܘܟܰܖ̈ܡܺܝܢ ܕܰܣܡܳܕܖ̈ܺܝܢ.
16 ܕܳܕܝ ܠܺܝ ܘܶܐܢܳܐ ܠܶܗ: ܕܪܳܥܶܐ ܒܫܽܘܫܰܢ̈ܶܐ.
17 ܥܰܕ ܢܦܽܘܓ ܝܰܘܡܳܐ: ܘܢܶܪܟܢܽܘܢ ܛܶܠ̈ܳܠܶܐ. ܐܶܬܗܰܦܟ ܕܡܺܝ ܠܳܟ ܕܳܕܝ: ܠܛܰܒܝܳܐ ܐܰܘ ܠܥܽܘܙܰܝܠܳܐ ܕܰܐܝ̈ܠܶܐ: ܥܰܠ ܛܽܘܖ̈ܰܝ ܒܶܣܡܳܢ̈ܶܐ.