Songs of Solomon 4
The Book of Songs of Solomon
܀ ܬܫܒܚܬ ܬܫܒܚ̈ܬܐ ܕ ܀
1 ܗܳܐ ܫܰܦܺܝܪܰܬܝ ܩܰܪܺܝܒܬܝ܆ ܗܳܐ ܫܰܦܺܝܪܰܬܝ. ܥܰܝܢܰܝ̈ܟܝ ܕܝܰܘܢܳܐ. ܥܒܰܪ ܫܶܬܩܶܟܝ. ܣܰܥܪܶܟܝ. ܐܰܝܟ ܓܙܳܪܳܐ ܕܥܶܙ̈ܶܐ ܕܣܳܠܶܩ ܡܶܢ ܛܽܘܪܳܐ ܕܓܶܠܥܳܕ.
2 ܫܶܢܰܝ̈ܟܝ. ܐܰܝܟ ܓܙܳܪܳܐ ܕܰܓܙܺܝ̈ܙܳܬܳܐ ܕܰܣܠܶܩ̈ܝ ܡܶܢ ܡܰܣܚܽܘܬܳܐ. ܕܟܶܠܗܶܝܢ ܡܶܬܰܐܡ̈ܳܢ: ܘܕܰܡܓܰܙܝܳܐ ܠܰܝܬ ܒܶܗܝܢ.
3 ܐܰܝܟ ܚܽܘܛܳܐ ܕܰܣܚܽܘܪܺܝܬܳܐ.ܣܶܦ̈ܘܳܬܶܟܝ ܡܡܰܠܠܶܟܝ. ܝܳܐܝܳܐ ܐܰܝܟ ܨܶܠ̈ܦܶܐ ܕܪܽܘܡܳܢܳܐ.
4 ܩܕܳܠܳܟܝ ܡܶܛܽܠ ܫܶܬܩܶܟܝ: ܐܰܝܟ ܡܰܓܕܠܶܗ ܕܕܰܘܺܝܕ. ܨܰܘܪܶܟܝ ܒܢܳܐ ܟܬܳܒ̈ܶܐ ܐܳܠܶܦ ܣܰܟܖ̈ܺܝܢ ܬܰܠ̈ܝܳܢ ܥܠܰܘܗܝ. ܟܽܠ ܫܶܠ̈ܛܶܐ ܕܓܰܢ̱ܒܳܖ̈ܶܐ.
5 ܬܪܶܝܢ ܬܕܰܝ̈ܟܝ ܐܰܝܟ ܬܪܶܝܢ ܥܽܘܙܰܝ̈ܠܶܐ ܬܳܐܡ̈ܶܐ ܕܰܛܒ̈ܰܝܳܐ ܕܪܳܥܶܝܢ ܒܫܽܘܫܰܢ̈ܶܐ.
6 ܥܰܕ ܢܦܽܘܓ ܝܰܘܡܳܐ: ܘܢܶܪܟܢܽܘܢ ܛܶܠܳܠܰܝ̈ ܪܰܡܫܳܐ: ܙܶܠܝ ܠܛܽܘܪܳܐ ܕܡܽܘܪܳܐ: ܘܰܠܖ̈ܳܡܳܬܳܐ ܕܰܠܒܽܘܢܬܳܐ.
7 ܟܽܠܶܟܝ ܫܰܦܺܝܪܰܬܝ ܩܰܪܺܝܒܬܝ ܘܡܽܘܡܳܐ ܠܰܝܬ ܒܶܟܝ.
8 ܬܳܝ ܡܶܢ ܠܶܒܢܳܢ ܚܳܬܝ ܟܰܠܬܳܐ: ܬܳܝ ܡܶܢ ܠܶܒܢܳܢ. ܬܳܐܬܶܝܢ ܘܬܶܥܒܪܺܝܢ ܡܶܢ ܪܺܝܫ ܐܰܡܢ̈ܶܐ: ܘܡܶܢ ܪܺܝܫܝ ܣܳܢܺܝܪ ܘܚܶܪܡܽܘܢ: ܘܡܶܢ ܡܰܪܒܽܘܥܺܝܬܳܐ ܕܰܐܖ̈ܝܰܘܳܬܳܐ: ܘܡܶܢ ܛܽܘܖ̈ܰܝ ܢܶܡܖ̈ܶܐ.
9 ܠܰܒܶܒܬܺܝܢܝ ܚܳܬܝ ܟܰܠܬܳܐ ܠܰܒܶܒܬܺܝܢܝ: ܒܰܚܕܳܐ ܡܶܢ ܥܰܝܢܰܝ̈ܟܝ: ܒܚܰܕ ܥܶܩܳܐ ܡܶܢ ܨܰܘܪܶܟܝ.
10 ܡܳܐ ܫܰܦܺܝܪܝܺܢ ܬܕܰܝ̈ܟܝ ܚܳܬܝ ܟܰܠܬܳܐ. ܡܳܐ ܫܰܦܺܝܪܺܝܢ ܬܕܰܝ̈ܟܝ ܡܶܢ ܚܰܡܪܳܐ. ܘܪܺܝܚ ܒܶܣܡܳܢܰܝ̈ܟܝ ܡܶܢ ܟܽܠ ܒܶܣ̈ܡܳܢܺܝܢ.
11 ܟܰܟܳܪܺܝܬܳܐ ܡܰܛ̈ܦܳܢ ܣܶܦ̈ܘܳܬܶܟܝ ܟܽܠ ܕܶܒܫܳܐ ܘܚܰܠܒܳܐ ܬܚܶܝܬ ܣܶܦ̈ܘܳܬܶܟܝ. ܘܪܺܝܚ ܬܰܟܣܺܝܬܶܟܝ ܐܰܝܟ ܪܺܝܚ ܠܶܒܢܳܢ.
12 ܓܰܢܬܳܐ ܕܰܐܚܺܝܕܳܐ ܚܳܬܝ ܟܰܠܬܳܐ: ܓܰܢܬܳܐ ܕܰܐܚܺܝܕܳܐ: ܡܥܺܝܢܳܐ ܕܰܚܬܺܝܡܳܐ.
13 ܫܠܺܝܚܽܘܬܶܟܝ ܦܰܪܕܰܝܣܳܐ ܕܖ̈ܽܘܡܳܢܶܐ: ܥܰܡ ܦܺܐܖ̈ܶܐ ܕܰܐܒܒܳܢ̈ܶܐ: ܟܽܘܡܪܳܐ ܥܰܡ ܢܳܪܕܽܘܢ.
14 ܘܟܽܘܪܟܡܳܐ: ܩܰܢܝܳܐ ܘܩܽܘܢܳܡܽܘܢ: ܥܰܡ ܩܰܝܣܳܐ ܕܰܠܒܽܘܢܬܳܐ: ܡܽܘܪܳܐ ܘܥܰܠܘܰܝ: ܥܰܡ ܟܽܠ ܪܺܝܫ ܒܶܣܡܳܢ̈ܶܐ.
15 ܡܥܺܝܢܳܐ ܕܓܰܢ̈ܶܐ: ܒܺܪܳܐ ܕܡܰܝ̈ܳܐ ܚܰܝ̈ܶܐ ܕܪܳܕܶܝܢ ܡܶܢ ܠܶܒܢܳܢ.
16 ܐܶܬܬܥܺܝܪܝ ܓܰܪܒܝܳܐ: ܘܬܳܝ ܬܰܝܡܢܳܐ. ܫܰܒܝ ܒܓܰܢܰܬܝ ܢܳܪܕܽܘܢ ܒܶܣܡܳܢܰܝ̈ ܢܺܐܬܶܐ ܕܳܕܝ ܠܓܰܢܬܶܗ: ܘܢܶܐܟܽܘܠ ܡܶܢ ܦܺܐܖ̈ܶܐ ܕܶܐܒܒܳܢܰܘܗܝ.