Songs of Solomon 6
The Book of Songs of Solomon
܀ ܬܫܒܚܬ ܬܫܒܚ̈ܬܐ ܘ ܀
1 ܕܳܕܝ ܢܚܶܬ ܠܓܰܢܬܶܗ: ܘܰܠܡܰܫ̈ܟܒܳܬܳܐ ܕܒܶܣܡܳܢ̈ܶܐ: ܕܢܶܪܥܶܐ ܒܓܰܢ̈ܳܬܶܐ: ܘܢܶܠܩܽܘܛ ܫܽܘܫܰܢ̈ܶܐ.
2 ܐܶܢܳܐ ܠܕܳܕܝ: ܘܕܳܕܝ ܠܺܝ: ܕܪܳܥܳܐ ܒܫܽܘܫܰܢ̈ܶܐ.
3 ܫܰܦܺܝܪܰܬܝ ܩܰܪܺܝܒܰܬܝ ܐܰܝܟ ܨܶܒܝܳܢܳܐ. ܝܳܐܝܰܬ݁ܝ ܐܰܝܟ ܐܽܘܪܺܫܠܶܡ. ܘܰܕܚܺܝܠܰܬ݁ܝ ܐܰܝܟ ܓܒܺܝܬܳܐ.
4 ܐܰܗܦܶܟܝ ܥܰܝܢܰܝ̈ܟܝ ܡܶܢ ܠܽܘܩܒܰܠܝ: ܡܶܛܽܠ ܕܗܶܢܶܝܢ ܐܰܦܖ̈ܕܶܢܝ. ܣܰܥܪܶܟܝ ܐܰܝܟ ܓܙܳܪܳܐ ܕܥܶܙ̈ܶܐ: ܕܣܳܠܶܩ ܡܶܢ ܛܽܘܪܳܐ ܕܓܶܠܥܳܕ.
5 ܫܶܢܰܝ̈ܟܝ ܐܰܝܟ ܓܙܳܪܳܐ ܕܰܓܙܺܝ̈ܙܳܬܳܐ: ܕܣܳܠܶܩ ܡܶܢ ܡܰܣܚܽܘܬܳܐ. ܕܟܽܠܗܶܝܢ ܡܰܬܰܐܡ̈ܳܢ: ܘܕܰܡܓܰܙܝܳܐ ܠܰܝܬ ܒܗܶܝܢ.
6 ܘܰܐܝܟ ܨܠܳܦܳܐ ܕܪܽܘܡܳܢܳܐ ܩܕܳܠܶܟܝ ܠܒܰܪ ܡܶܢ ܫܶܬܩܶܟܝ.
7 ܫܬܺܝܢ ܐܶܢܶܝܢ ܡܰܠ̈ܟܳܢ: ܘܰܬܡܳܢܺܝܢ ܕܖ̈ܽܘܟܳܢ. ܘܰܥܠܰܝ̈ܡܳܬܳܐ ܕܠܰܝܬ ܠܗܶܝܢ ܡܶܢܝܳܢ.
8 ܚܕܳܐ ܗ̱ܝ ܝܰܘܢܝ ܬܰܡܺܝܡܬܳܐ: ܚܕܳܐ ܗ̱ܝ ܠܶܐܡܳܗ̇. ܘܓܰܒܝܳܐ ܗ̱ܝ ܠܝܳܠܶܕܬܳܗ̇ ܚ̈ܙܰܝܳܗ̇ ܒ̈ܢܳܬܳܐ. ܘܫܰܒ̈ܚܳܗ̇ ܡܰܠ̈ܟܳܬܳܐ. ܘܰܕܖ̈ܽܘܟܳܬܳܐ ܘܫܰܒ̈ܚܳܗ̇.
9 ܡܰܢ ܗ̱ܝ ܗܳܕܶܐ ܕܰܡܕܺܝܩܳܐ ܐܰܝܟ ܨܰܦܪܳܐ. ܫܰܦܺܝܪܳܐ ܐܰܝܟ ܣܰܗܪܳܐ. ܕܰܟܝܳܐ ܐܰܝܟ ܫܶܡܫܳܐ. ܕܚܺܝܠܳܐ ܐܰܝܟ ܪܰܘܖ̈ܒܳܬܳܐ.
10 ܠܓܰܢܰܬ ܓܰܘ̈ܙܶܐ ܢܶܚܬܶܬ ܕܶܐܚܙܶܐ ܒܶܐܒܳܐ ܕܢܰܚ̈ܠܶܐ. ܠܡܶܚܙܳܐ ܐܶܢ ܦܶܪܥܰܬ ܓܦܶܬܳܐ: ܘܶܐܢ ܒܠܰܨܘ ܖ̈ܽܘܡܳܢܶܐ.
11 ܘܠܳܐ ܝܶܕܥܰܬ ܢܰܦܫܝ ܣܳܡܬܰܢܝ ܒܡܰܪܟܰܒܬܳܐ ܕܥܰܡܳܐ ܕܰܡܛܰܝܰܒ.
12 ܬܽܘܒܝ ܬܽܘܒܝ ܫܺܝܠܽܘܡܳܝܬܳܐ. ܬܽܘܒܝ ܬܽܘܒܝ: ܘܰܢܚܽܘܪ ܒܶܟܝ.