Songs of Solomon 8
The Book of Songs of Solomon
܀ ܬܫܒܚܬ ܬܫܒܚ̈ܬܐ ܚ ܀
1 ܡܰܢ ܢܶܬܠܳܟ ܐܰܝܟ ܐܰܚܳܐ ܠܺܝ: ܐܰܝܢܶܩܘ ܬܕܰܝ̈ ܐܶܡܖ̈ܰܝ. ܐܶܫܟܚܳܟ ܒܫܽܘܩܳܐ. ܐܰܫܩܳܟ: ܘܠܳܐ ܢܶܒܣܪܽܘܢܳܢܝ.
2 ܐܶܕܒܪܳܟ: ܘܰܐܥܠܳܟ ܠܒܶܝܬ ܐܶܡܝ: ܘܰܠܩܰܝܛܽܘܢܳܗ̇ ܕܝܳܠܶܕܬܝ ܐܰܫܩܶܝܟ ܡܶܢ ܚܰܡܪܝ ܒܰܣܺܝܡܳܐ: ܘܡܶܢ ܚܰܠܝܽܘܬܳܐ ܕܖ̈ܽܘܡܳܢܰܝ.
3 ܣܶܡܳܠܶܗ ܬܚܶܝܬ ܪܺܝܫܝ: ܘܝܰܡܺܝܢܶܗ ܬܥܰܦܩܰܢܝ.
4 ܐܰܘܡܺܝܬܟܶܝܢ ܒ̈ܢܳܬ ܐܽܘܪܺܫܠܶܡ ܐܶܢ ܬܥܺܝܖ̈ܳܢ ܘܶܐܢ ܬܥܰܝܖ̈ܳܢ ܝܳܬ ܪܶܚܡܬܳܐ ܥܕܰܡܳܐ ܕܬܶܨܒܶܐ.
5 ܡܰܢ ܗ̱ܝ ܗܳܕܶܐ ܕܣܳܠܩܳܐ ܡܶܢ ܡܰܕܒܪܳܐ: ܘܡܶܣܬܰܡܟܳܐ ܥܰܠ ܕܳܕܳܗ̇ ܬܚܶܝܬ ܚܰܙܽܘܪܳܐ ܥܰܝܰܪܬܶܟܝ: ܘܬܰܡܳܢ ܚܰܒܶܠܬܶܟܝ ܐܶܡܶܟܝ ܬܰܡܳܢ ܚܰܒܠܰܬ ܝܳܠܶܕܬܶܟܝ.
6 ܣܺܝܡܰܝܢܝ ܚܳܬܡܳܐ ܥܰܠ ܠܶܒܳܟ: ܘܰܐܝܟ ܚܳܬܡܳܐ ܥܰܠ ܕܪܳܥܳܟ ܡܶܛܽܠ ܕܬܰܩܺܝܦܳܐ ܐܰܝܟ ܡܰܘܬܳܐ ܪܶܚܡܬܳܐ. ܘܰܩܫܶܐ ܐܰܝܟ ܫܝܽܘܠ ܛܢܳܢܳܐ. ܙܰܠܺܝ̈ܩܶܝܗ̇ ܙܰܠܺܝܩܰܝ̈ ܢܽܘܪܳܐ ܘܫܰܠܗܶܒܺܝܬܳܐ.
7 ܡܰܝ̈ܳܐ ܣܰܓܺܝ̈ܐܶܐ ܠܳܐ ܡܶܫܟܚܺܝܢ ܠܰܡܕܰܥܳܟܽܘ ܠܪܶܚܡܬܳܐ. ܘܢܰܗܖ̈ܰܘܳܬܳܐ ܠܳܐ ܓܳܪܦܺܝܢ ܠܳܗ̇ ܐܶܢ ܢܶܬܶܠ ܓܰܒܪܳܐ ܟܽܠ ܥܽܘܬܪܳܐ ܕܒܰܝܬܶܗ ܒܪܶܚܡܬܳܐ: ܡܡܰܝܳܩܽܘ ܢܡܰܝܩܽܘܢ ܒܶܗ.
8 ܚܳܬܳܐ ܐܺܝܬ ܠܰܢ ܙܥܽܘܪܬܳܐ ܘܰܬܕܰܝ̈ܳܐ ܠܰܝܬ ܠܳܗ̇ ܡܳܢܳܐ ܢܶܥܒܶܕ ܠܚܳܬܰܢ ܒܝܰܘܡܳܐ ܕܡܶܬܡܰܠܰܠ ܒܳܗ̇.
9 ܐܶܢ ܫܽܘܪܳܐ ܗ̱ܝ: ܢܶܒܢܶܐ ܥܠܶܝܗ̇ ܥܶܠ̈ܝܳܢ ܕܰܟܣܶܦ ܘܶܐܢ ܬܰܪܥܳܐ ܗ̱ܝ: ܢܨܽܘܪ ܥܠܶܝܗ̇ ܠܽܘܚ̈ܶܐ ܕܰܐܪܙܳܐ.
10 ܐܶܢܳܐ ܫܽܘܪܳܐ: ܘܰܬܕܰܝ̈ ܡܰܓ̈ܕܠܶܐ. ܗܳܝܕܶܝܢ ܐܺܝܬܰܝ ܗ̱ܘܺܝ݀ܬ ܒܥܰܝܢܰܘ̈ܗܝ ܐܰܝܟ ܡܶܫܟܚܰܬ ܫܠܳܡܳܐ.
11 ܟܰܪܡܳܐ ܐܺܝܬ ܗ̱ܘܳܐ ܠܰܫܠܶܝܡܽܘܢ: ܘܶܐܒܶܗ ܣܰܓܺܝ ܝܶܗ̱ܒܰܬ ܟܰܪܡܳܐ ܠܢܳܛܽܘܖ̈ܶܐ ܓܰܒܪܳܐ ܝܰܗܒ ܒܦܺܐܖ̈ܰܘܗܝ ܐܳܠܶܦ ܕܰܟܣܶܦ.
12 ܟܰܪܡܳܐ ܕܺܝܠܝ ܩܕܳܡܰܝ ܐܳܠܶܦ ܠܳܟ ܫܠܶܝܡܽܘܢ: ܘܡܰܐܬܶܝܢ ܠܢܳܛܖ̈ܰܝ ܦܺܐܖ̈ܶܐ.
13 ܐܰܝܠܶܝܢ ܕܝܳܬܒܺܝܢ ܒܓܰܢ̈ܶܐ: ܘܨܳܝܬܺܝܢ ܠܩܳܠܳܟ: ܐܰܫܡܰܥܰܝܢܝ.
14 ܐܶܬܗܰܦܰܟ ܕܳܕܝ ܕܡܺܝ ܠܳܟ ܠܛܰܒܝܳܐ ܘܰܠܥܽܘܙܰܝܠܳܐ ܕܰܐܝ̈ܠܶܐ ܥܰܠ ܛܽܘܖ̈ܰܝ ܒܶܣܡܳܢ̈ܶܐ.