Songs of Solomon 5
The Book of Songs of Solomon
܀ ܬܫܒܚܬ ܬܫܒܚ̈ܬܐ ܗ ܀
1 ܐܶܬܺܝܬ ܠܓܰܢܰܬܝ ܚܳܬܝ ܟܰܠܬܳܐ: ܐܶܬܺܝܬ ܠܓܰܢܰܬܝ. ܩܶܛܦܶܬ ܡܽܘܪܝ ܥܰܡ ܒܶܣܡܳܢܰܝ̈ ܘܶܐܟܠܶܬ ܒܰܣܺܝܡܽܘܬܝ ܥܰܡ ܕܶܒܫܝ ܐܶܫܬܺܝܬ݁ ܚܰܡܪܝ ܥܰܡ ܚܰܠܒܝ ܐܰܟܽܘܠܘ ܚܰܒܖ̈ܰܝ: ܘܶܐܫܬܰܘ. ܘܰܪܘܰܘ ܕܳܕܰܝ̈.
2 ܐܶܢܳܐ ܕܰܡܟܳܐ: ܘܠܶܒܝ ܥܺܝܪ ܩܳܠܶܗ ܕܕܳܕܝ ܕܢܳܩܶܫ ܦܬܰܚܝ ܠܺܝ ܚܳܬܝ ܩܰܪܺܝܒܬܝ: ܝܰܘܢܝ ܬܰܡܺܝܡܬܳܐ. ܡܶܛܽܠ ܕܪܺܝܫܝ ܐܶܬܡܠܺܝ ܛܰܠܳܐ: ܘܩܽܘ̈ܨܳܬܝ ܡܶܢ ܖ̈ܣܺܝܣܰܝ ܠܺܠܝܳܐ.
3 ܫܶܠܚܶܬ ܟܽܘܬܺܝܢܝ: ܐܰܝܟܰܢܳܐ ܐܶܠܒܫܺܝܗ̇ ܐܰܫܺܝܓܶܬ ܖ̈ܶܓܠܰܝ: ܐܰܝܟܰܢܳܐ ܐܶܛܰܢܶܦ ܐܶܢܶܝܢ.
4 ܕܳܕܝ ܐܰܘܫܶܛ ܐܺܝܕܶܗ ܡܶܢ ܢܶܩܒܳܐ. ܘܰܡܥܰܝ̈ ܓܳܠܘ ܥܠܰܘܗܝ.
5 ܩܳܡܶܬ ܐܶܢܳܐ ܕܶܐܦܬܰܚ ܠܕܳܕܝ ܘܺܐܝܕܝ ܢܶܛܦܰܬ ܡܽܘܪܳܐ. ܘܨܶܒ̈ܥܳܬܝ ܡܽܘܪܳܐ ܢܛܰܦ ܥܰܠ ܝܰܕ ܣܽܘܟܪܳܐ.
6 ܦܶܬܚܶܬ ܐܶܢܳܐ ܠܕܳܕܝ. ܘܕܳܕܝ ܐܰܪܟܶܢ ܥܒܰܪ. ܢܰܦܫܝ ܢܶܦܩܰܬ ܒܡܰܡܠܠܶܗ. ܒܥܺܝܬܶܗ: ܘܠܳܐ ܐܶܫܟܰܚܬܶܗ. ܩܪܺܝܬܶܗ: ܘܠܳܐ ܥܢܳܢܝ.
7 ܐܶܫܟܚܽܘܢܝ ܢܳܛܽܘܖ̈ܶܐ ܕܡܶܬܟܰܪܟܺܝܢ ܒܰܡܕܺܝܢܬܳܐ. ܡܚܰܐܽܘܢܝ: ܘܨܰܠܦܽܘܢܝ. ܢܣܰܒܘ ܡܶܢܝ ܪܕܺܝܕܝ ܢܳܛܖ̈ܰܝ ܫܽܘܪܳܐ.
8 ܐܰܘܡܺܝܬܟܶܝܢ ܒ̈ܢܳܬ ܐܽܘܪܺܫܠܶܡ ܐܶܢ ܬܶܫ̈ܟܚܳܢ ܠܕܳܕܝ: ܐܶܫܬܰܥܺܝܢ ܠܶܗ: ܕܰܟܪܺܝܗܰܬ ܪܶܚܡܬܳܐ ܐ̱ܢܳܐ.
9 ܡܰܢܽܘ ܕܳܕܶܟܝ ܡܶܢ ܕܳܕ̈ܶܐ: ܫܰܦܺܝܪܰܬ ܒܢܶܫ̈ܶܐ. ܡܰܢܽܘ ܕܳܕܶܟܝ ܡܶܢ ܕܳܕ̈ܶܐ: ܕܗܳܟܰܢܳܐ ܐܰܘܡܺܝܬܺܝܢ.
10 ܕܳܕܝ ܚܶܘܳܪ ܘܣܽܘܡܳܩ: ܘܰܓܒܶܐ ܡܶܢ ܖ̈ܶܒܘܳܬܳܐ.
11 ܪܺܝܫܶܗ ܐܰܝܟ ܟܺܐܦܳܐ ܕܕܰܗܒܳܐ. ܩܽܘ̈ܨܳܬܶܗ ܡܦܰܫ̈ܛܳܢ: ܐܘ̈ܟܳܡܳܢ ܐܰܝܟ ܥܽܘܪܒܳܐ.
12 ܥܰܝܢܰܘ̈ܗܝ ܐܰܝܟ ܕܝܰܘ̈ܢܶܐ: ܥܰܠ ܫܳܒ̈ܩܶܐ ܕܡܰܝ̈ܳܐ ܕܣܳܚ̈ܝܳܢ ܒܚܰܠܒܳܐ: ܘܝܳܬܒ̈ܳܢ ܥܰܠ ܫܰܠܡܽܘܬܳܐ.
13 ܦܰܟܰܘ̈ܗܝ ܐܰܝܟ ܡܰܫ̈ܟܒܳܬܳܐ ܕܒܶܣܡ̈ܶܐ. ܣܶܦ̈ܘܳܬܶܗ ܐܰܝܟ ܫܽܘܫܰܢ̈ܶܐ ܕܢܳܛ̈ܦܳܢ ܡܽܘܪܳܐ ܘܢܰܪܕܺܝܢ.
14 ܐܺܝܕܰܘ̈ܗܝ ܐܰܝܟ ܟܶܪܟܳܐ ܕܕܰܗܒܳܐ ܕܰܡܠܶܐ ܟܺܐܦܰܝ̈ ܕܰܗܒܳܐ ܟܰܪܣܶܗ ܥܒܳܕܳܐ ܕܫܶܢܳܐ ܥܰܠ ܡܰܦܚܳܐ ܕܣܰܦܺܝܠܳܐ.
15 ܫܳܩܰܘ̈ܗܝ ܥܰܡܽܘ̈ܕܶܐ ܕܫܺܝܫܳܐ: ܕܡܰܬܩܢܺܝܢ ܥܰܠ ܚܽܘܡܖ̈ܶܐ ܕܕܰܗܒܳܐ ܚܰܕܝܶܗ ܐܰܝܟ ܕܠܶܒܢܳܢ: ܘܰܓܒܶܐ ܐܰܝܟ ܐܰܖ̈ܙܶܐ.
16 ܚܶܟܶܗ ܐܰܝܟ ܟܰܟܳܖ̈ܝܳܬܳܐ ܕܚܰܠ̈ܝܳܢ ܪܓܺܝܓܺܝܢ ܗܳܢܰܘ ܕܳܕܝ: ܘܗܳܢܰܘ ܚܰܒܪܝ: ܒ̈ܢܳܬ ܐܽܘܪܺܫܠܶܡ.
17 ܠܰܐܝܟܳܐ ܐܶܙܰܠ ܕܳܕܶܟܝ ܫܰܦܺܝܪܰܬ ܒܢܶܫ̈ܶܐ. ܠܰܐܝܟܳܐ ܦܢܳܐ ܕܳܕܶܟܝ: ܕܢܶܒܥܺܝܘܗܝ ܥܰܡܶܟܝ.