Amos 1
The Book of Amos
܀ ܥܡܘܣ ܐ ܀
1 ܦܶܬܓܳܡܰܘ̈ܗܝ ܕܥܰܡܽܘܣ ܕܰܗܘܳܐ ܡܶܢ ܢܳܩ̈ܕܶܐ ܕܰܒܢܰܝ̈ ܬܩܽܘܥ: ܕܰܚܙܳܐ ܥܰܠ ܒܢܰܝ̈ ܝܺܣܪܳܐܶܝܠ: ܒܝܰܘܡܰܘ̈ܗܝ ܕܥܽܘܙܺܝܳܐ ܡܰܠܟܳܐ ܕܺܝܗܽܘܕܳܐ: ܘܰܒܝܰܘܡܰܘ̈ܗܝ ܕܝܽܘܪܰܒܥܰܡ ܒܰܪ ܝܽܘܐܳܫ ܡܰܠܟܳܐ ܕܺܝܣܪܳܐܶܝܠ: ܬܰܪܬܶܝܢ ܫܢܺܝ̈ܢ ܡܶܢ ܩܕܳܡ ܙܰܘܥܳܐ.
2 ܘܶܐܡܰܪ ܡܳܪܝܳܐ ܡܶܢ ܨܶܗܝܽܘܢ ܢܶܢܗܰܡ: ܘܡܶܢ ܐܽܘܪܺܫܠܶܡ ܢܶܬܶܠ ܩܳܠܶܗ: ܘܢܶܬܒ̈ܳܢ ܒܶܐܒܠܳܐ ܕܰܝܖ̈ܶܐ ܕܖ̈ܳܥܰܘܳܬܳܐ: ܘܢܺܐܒܰܫ ܪܺܝܫܶܗ ܕܟܰܪܡܠܳܐ.
3 ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܬܠܳܬܳܐ ܚܰܘ̈ܒܶܝܗ̇ ܕܕܰܪܡܣܽܘܩ: ܘܕܰܐܪܒܥܳܐ ܠܳܐ ܐܰܗܦܶܟ ܡܶܢܗܽܘܢ: ܥܰܠ ܕܕܳܫܘ ܒܣܶܟ̈ܶܐ ܕܦܰܪܙܠܳܐ ܠܓܶܠܥܳܕ.
4 ܐܶܫܰܕܰܪ ܢܽܘܪܳܐ ܠܒܰܝܬܶܗ ܕܰܚܙܳܐܶܝܠ: ܘܬܶܐܟܽܘܠ ܣܳܚܖ̈ܳܬܶܗ ܕܒܰܪ ܗܕܳܕ.
5 ܘܶܐܬܰܒܰܪ ܡܽܘ̈ܟܠܶܐ ܕܕܰܪܡܣܽܘܩ: ܘܰܐܘܒܶܕ ܥܳܡܽܘܪܳܐ ܡܶܢ ܦܩܰܥܬܳܐ ܕܽܐܘܢ: ܘܣܳܡܶܟ ܫܰܒܛܳܐ ܡܶܢ ܒܶܝܬ ܥܰܕܳܢ: ܘܢܶܫܬܒܽܘܢ ܥܰܡܳܐ ܕܳܐܪܳܡ ܠܩܺܝܪ ܐܳܡܰܪ ܡܳܪܝܳܐ.
6 ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܬܠܳܬܳܐ ܚܰܘ̈ܒܶܝܗ̇ ܕܥܳܐܙܳܐ: ܘܕܰܐܪܒܥܳܐ ܠܳܐ ܐܰܗܦܶܟ ܡܶܢܗܽܘܢ: ܥܰܠ ܕܰܫܒܰܘ ܫܒܺܝܬܳܐ ܫܰܠܡܬܳܐ ܕܢܰܫܠܡܽܘܢ ܠܰܐܕܽܘܡ.
7 ܐܶܫܰܕܰܪ ܢܽܘܪܳܐ ܒܫܽܘܖ̈ܶܝܗ̇ ܕܥܳܐܙܳܐ: ܘܬܶܐܟܽܘܠ ܣܳܚܖ̈ܳܬܳܗ̇.
8 ܘܰܐܘܒܶܕ ܥܳܡܽܘܪܳܐ ܡܶܢ ܐܰܫܕܽܘܕ: ܘܣܳܡܳܟ ܫܰܒܛܳܐ ܡܶܢ ܐܰܫܩܳܠܽܘܢ: ܘܰܐܗܦܶܟ ܐܺܝܕܝ ܥܰܠ ܥܶܩܪܽܘܢ: ܘܢܺܐܒܕܽܘܢ ܫܰܪܟܳܐ ܕܰܦܠܶܫ̈ܬܳܝܶܐ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
9 ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܬܠܳܬܳܐ ܚܰܘ̈ܒܶܝܗ̇ ܕܨܽܘܪ: ܘܕܰܐܪܒܥܳܐ ܠܳܐ ܐܰܗܦܶܟ ܡܶܢܗܽܘܢ: ܥܰܠ ܕܶܐܫܠܶܡܘ ܫܒܺܝܬܳܐ ܫܰܠܡܬܳܐ ܠܰܐܕܽܘܡ: ܘܠܳܐ ܥܗܰܕܘ ܩܝܳܡܳܐ ܕܰܐܚܽܘܬܳܐ.
10 ܐܶܫܰܕܰܪ ܢܽܘܪܳܐ ܒܫܽܘܖ̈ܶܝܗ̇ ܕܨܽܘܪ: ܘܬܶܐܟܽܘܠ ܣܳܚܖ̈ܳܬܳܗ̇.
11 ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܬܠܳܬܳܐ ܚܰܘܒܰܘ̈ܗܝ ܕܰܐܕܽܘܡ: ܘܕܰܐܪܒܥܳܐ ܠܳܐ ܐܰܗܦܶܟ ܡܶܢܗܽܘܢ: ܥܰܠ ܕܰܪܕܰܦ ܒܚܰܪܒܳܐ ܠܰܐܚܽܘܗܝ: ܘܚܰܒܶܠ ܖ̈ܰܚܡܰܘܗܝ: ܘܰܢܛܰܪ ܠܥܳܠܰܡ ܪܽܘܓܙܶܗ: ܘܰܐܟܬܶܗ ܢܛܰܪ ܠܥܳܠܡܺܝܢ.
12 ܐܶܫܰܕܰܪ ܢܽܘܪܳܐ ܠܬܰܝܡܰܢ: ܘܬܶܐܟܽܘܠ ܣܳܚܖ̈ܳܬܳܗ̇ ܕܒܽܘܨܪ.
13 ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܬܠܳܬܳܐ ܚܰܘ̈ܒܰܝܗܽܘܢ ܕܰܒܢܰܝ̈ ܥܰܡܽܘܢ: ܘܕܰܐܪܒܥܳܐ ܠܳܐ ܐܰܗܦܶܟ ܡܶܢܗܽܘܢ: ܥܰܠ ܕܦܰܪܶܬܘ ܒܰܛ̈ܢܳܬܳܐ ܕܓܶܠܥܳܕ: ܕܢܰܪܘܚܽܘܢ ܬܚܽܘܡܗܽܘܢ.
14 ܐܶܫܒܽܘܩ ܢܽܘܪܳܐ ܒܫܽܘ̈ܩܶܝܗ̇ ܕܪܰܒܰܬ: ܘܬܶܐܟܽܘܠ ܣܳܚܖ̈ܳܬܳܗ̇: ܒܰܩܥܳܬܳܐ ܒܝܰܘܡܳܐ ܕܰܩܪܳܒܳܐ: ܒܥܰܠܥܳܠܳܐ ܒܝܰܘܡܳܐ ܕܰܥܪܽܘܪܳܐ.
15 ܘܢܺܐܙܰܠ ܡܰܠܟܽܘܡ ܒܰܫܒܺܝܬܳܐ: ܘܟܽܘܡܖ̈ܰܘܗܝ ܘܪܰܘܖ̈ܒܳܢܰܘܗܝ ܐܰܟܚܕܳܐ ܐܳܡܰܪ ܡܳܪܝܳܐ.