Amos 2
The Book of Amos
܀ ܥܡܘܣ ܒ ܀
1 ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܬܠܳܬܳܐ ܚܰܘ̈ܒܰܘܗܝ ܕܡܽܘܐܳܒ: ܘܕܰܐܪܒܥܳܐ ܠܳܐ ܐܰܗܦܶܟ ܡܶܢܗܽܘܢ: ܥܰܠ ܕܰܐܘܩܶܕܘ ܓܰܖ̈ܡܰܘܗܝ ܕܡܰܠܟܳܐ ܕܰܐܕܽܘܡ ܠܣܰܝܕܳܐ.
2 ܐܶܫܰܕܰܪ ܢܽܘܪܳܐ ܥܰܠ ܡܽܘܐܳܒ: ܘܬܶܐܟܽܘܠ ܣܳܚܖ̈ܳܬܳܗ̇ ܕܩܶܪܝܽܘܬ: ܘܰܢܡܽܘܬ ܡܽܘܐܳܒ ܒܰܕܠܽܘܚܝܳܐ: ܒܰܩܥܳܬܳܐ ܘܰܒܩܳܠܳܐ ܕܫܺܝܦܽܘܪܳܐ.
3 ܘܰܐܘܒܶܕ ܕܰܝܳܢܳܐ ܡܶܢ ܓܰܘܶܗ: ܘܟܽܠܗܽܘܢ ܪܰܘܖ̈ܒܳܢܰܘܗܝ ܐܶܚܪܽܘܒ ܥܰܡܶܗ ܐܳܡܰܪ ܡܳܪܝܳܐ.
4 ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܬܠܳܬܳܐ ܚܰܘܒܰܘ̈ܗܝ ܕܺܝܗܽܘܕܳܐ: ܘܕܰܐܪܒܥܳܐ ܠܳܐ ܐܰܗܦܶܟ ܡܶܢܗܽܘܢ: ܥܰܠ ܕܰܐܣܠܺܝܘ ܢܳܡܽܘܣܶܗ ܕܡܳܪܝܳܐ: ܘܦܽܘܩܕܳܢܰܘ̈ܗܝ ܠܳܐ ܢܛܰܪܘ: ܘܰܐܛܥܺܝ ܐܶܢܽܘܢ ܣܖ̈ܺܝܩܳܬܳܐ ܕܶܐܙܰܠܘ ܐܰܒܳܗܰܝ̈ܗܽܘܢ ܒܳܬܰܪܗܶܝܢ.
5 ܐܶܫܰܕܰܪ ܢܽܘܪܳܐ ܒܰܝܗܽܘܕܳܐ: ܘܬܶܐܟܽܘܠ ܣܳܚܖ̈ܳܬܳܗ̇ ܕܽܐܘܪܺܫܠܶܡ.
6 ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܬܠܳܬܳܐ ܚܰܘܒܰܘ̈ܗܝ ܕܺܝܣܪܳܐܶܝܠ: ܘܕܰܐܪܒܥܳܐ ܠܳܐ ܐܰܗܦܶܟ ܡܶܢܗܽܘܢ: ܥܰܠ ܕܙܰܒܶܢܘ ܠܙܰܕܺܝܩܳܐ ܒܟܶܣܦܳܐ: ܘܰܠܡܶܣܟܺܢܳܐ ܡܶܛܽܠ ܡܣܳܢ̈ܶܐ ܕܕܳܝܫܺܝܢ ܥܰܠ ܥܰܦܪܳܐ ܕܰܐܪܥܳܐ.
7 ܘܰܡܩܰܦܚܺܝܢ ܠܡܶܣ̈ܟܺܢܶܐ: ܐܘܪܚܳܐ ܕܒܳܝ̈ܫܶܐ ܨܠܰܘ: ܘܓܰܒܪܳܐ ܘܰܐܒܽܘܗܝ ܐܳܙܺܠܝܢ ܠܘܳܬ ܐܰܢ̱ܬܬܳܐ: ܡܶܛܽܠ ܕܰܢܛܰܢܦܽܘܢ ܫܡܳܐ ܕܩܽܘܕܫܝ.
8 ܘܥܰܠ ܠܒܽܘ̈ܫܶܐ ܚܰܒ̈ܠܶܐ ܚܳܙܩܺܝܢ ܗ̱ܘܰܘ ܥܰܠ ܓܶܢ̱ܒ ܟܽܠ ܡܰܕܒܰܚ: ܘܚܰܡܪܳܐ ܥܰܬܺܝܩܳܐ ܫܳܬܶܝܢ ܗ̱ܘܰܘ ܒܶܝܬ ܐܰܠܳܗܰܝ̈ܗܽܘܢ.
9 ܘܶܐܢܳܐ ܐܰܘܒܕܶܬ ܠܰܐܡܽܘܪܳܝܳܐ ܡܶܢ ܩܕܳܡܝܗܽܘܢ: ܕܪܳܘܡܶܗ ܐܰܝܟ ܪܰܘܡܳܐ ܕܰܐܪܙܳܐ: ܘܚܰܣܺܝܢ ܗ̱ܘܳܐ ܐܰܝܟ ܒܰܠܽܘܛܳܐ: ܐܰܘܒܕܶܬ ܦܺܐܖ̈ܰܘܗܝ ܡܶܢ ܠܥܶܠ: ܘܥܶܩܳܖ̈ܰܘܗܝ ܡܶܢ ܠܬܰܚܬ.
10 ܘܶܐܢܳܐ ܐܰܣܶܩܬܟܽܘܢ ܡܶܢ ܐܰܪܥܳܐ ܕܡܶܨܪܶܝܢ: ܘܕܰܒܰܪܬܟܽܘܢ ܒܡܰܕܒܪܳܐ ܐܰܪܒܥܺܝܢ ܫܢܺܝ̈ܢ: ܘܰܐܝܬܺܝܬܟܽܘܢ ܠܰܐܬܪܳܐ ܗܳܢܳܐ: ܠܡܺܐܪܰܬ ܐܰܪܥܳܐ ܕܰܐܡܽܘܖ̈ܳܝܶܐ.
11 ܘܰܐܩܺܝܡܶܬ ܡܶܢ ܒܢܰܝ̈ܟܽܘܢ ܢܒܺܝ̈ܶܐ: ܘܡܶܢ ܥܠܰܝܡܰܝ̈ܟܽܘܢ ܢܙܺܝܖ̈ܶܐ: ܕܰܠܡܳܐ ܐܺܝܬܰܝܗܽܘܢ ܗܳܠܶܝܢ ܒܢܰܝ̈ ܝܺܣܪܳܐܶܝܠ: ܐܳܡܰܪ ܡܳܪܝܳܐ.
12 ܘܰܐܫܩܺܝܬܽܘܢ ܠܰܢܙܺܝܖ̈ܶܐ ܚܰܡܪܳܐ ܘܠܰܢܒܺܝ̈ܶܐ ܦܰܩܶܕܬܽܘܢ ܕܠܳܐ ܢܶܬܢܰܒܽܘܢ.
13 ܗܳܐ ܐܶܢܳܐ ܡܥܺܝܩ ܐ̱ܢܳܐ ܬܚܽܘܬܰܝܟܽܘܢ: ܐܰܝܟ ܕܰܡܥܺܝܩܳܐ ܥܳܓܶܠܬܳܐ ܕܡܰܠܝܳܐ ܫܶܒ̈ܠܶܐ.
14 ܘܢܺܐܒܰܕ ܪܰܗܛܳܐ ܡܶܢ ܩܰܠܺܝܠܳܐ: ܘܰܕܥܰܫܺܝܢ ܠܳܐ ܢܚܰܡܣܺܝܢ ܚܰܝܠܶܗ: ܘܰܕܓܰܢ̱ܒܳܪ ܠܳܐ ܢܦܰܨܶܐ ܢܰܦܫܶܗ.
15 ܘܩܶܫܬܳܐ ܠܳܐ ܢܩܽܘܡ: ܘܰܕܩܰܠܺܝܠ ܒܪܰܗܛܶܗ ܠܳܐ ܢܶܬܦܰܨܶܐ: ܘܦܰܪܳܫܳܐ ܠܳܐ ܢܫܽܘܙܶܒ ܢܰܦܫܶܗ.
16 ܘܰܕܥܰܫܺܝܢ ܠܶܒܶܗ ܐܰܝܟ ܕܓܰܢ̱ܒܳܪܳܐ: ܥܰܪܛܶܠ ܢܶܥܪܽܘܩ ܒܝܰܘܡܳܐ ܗܰܘ ܐܳܡܰܪ ܡܳܪܝܳܐ.