Amos 6
The Book of Amos
܀ ܥܡܘܣ ܘ ܀
1 ܘܳܝ ܠܰܕܫܳܝܛܺܝܢ ܠܨܶܗܝܽܘܢ: ܘܰܬܟܺܝܠܺܝܢ ܒܛܽܘܪܳܐ ܕܫܳܡܪܺܝܢ: ܦܳܖ̈ܫܰܝ ܠܪܺܝܫܳܐ ܕܥܰܡ̈ܡܶܐ: ܘܓܰܠܺܝܘ ܠܗܽܘܢ ܒܢܰܝ̈ ܝܺܣܪܳܐܶܝܠ.
2 ܥܒܰܪܘ ܠܟܽܠܝܳܐ ܘܰܚܙܰܘ: ܘܙܶܠܘ ܡܶܢ ܬܰܡܳܢ ܠܰܚܡܳܬ ܪܰܒܳܐ: ܘܚܽܘܬܘ ܠܓܳܬ ܕܰܦܠܶܫ̈ܬܳܝܶܐ: ܕܛܳܒܳܐ ܗ̱ܝ ܡܶܢ ܟܽܠܗܶܝܢ ܡܰܠ̈ܟܘܳܬܳܐ ܗܳܠܶܝܢ: ܐܶܢ ܣܰܓܺܝ ܬܚܽܘܡܗܽܘܢ ܡܶܢ ܬܚܽܘܡܟܽܘܢ.
3 ܕܰܡܣܰܟܶܝܢ ܠܝܰܘܡܳܐ ܒܺܝܫܳܐ: ܘܰܡܩܰܪܒܺܝܢ ܠܫܰܒܬܳܐ ܕܰܚܛܽܘܦܝܳܐ.
4 ܘܫܳܟܒܺܝܢ ܥܰܠ ܥܰܖ̈ܣܳܬܳܐ ܕܫܶܢܳܐ: ܘܡܶܬܠܰܥܒܺܝܢ ܥܰܠ ܬܶܫܘ̈ܝܳܬܗܽܘܢ: ܕܳܐܟܠܺܝܢ ܡܦܰܛܡ̈ܶܐ ܡܶܢ ܥܳܢ̈ܳܐ: ܘܥܶܓ̈ܠܶܐ ܡܶܢ ܓܰܘ ܒܰܩܖ̈ܶܐ.
5 ܕܢܳܩܫܺܝܢ ܥܰܠ ܦܽܘܡܳܐ ܕܟܶܢܳܖ̈ܶܐ: ܘܰܐܝܟ ܕܰܘܺܝܕ ܚܫܺܝܒܺܝܢ ܠܗܽܘܢ ܡܳܐܢܰܝ̈ ܙܡܳܪܳܐ.
6 ܕܫܳܬܶܝܢ ܚܰܡܪܳܐ ܡܨܰܠܠܳܐ: ܘܡܶܫܚܳܢ̈ܶܐ ܖ̈ܺܝܫܳܝܶܐ ܡܳܫܚܺܝܢ: ܘܠܳܐ ܒܛܺܝܠ ܠܗܽܘܢ ܥܰܠ ܬܒܳܪܶܗ ܕܝܰܘܣܶܦ.
7 ܡܶܛܽܠܶܗܳܢܳܐ ܢܶܫܬܒܽܘܢ ܒܪܺܝܫ ܫܒܺܝܬܳܐ: ܘܢܶܫܬܩܶܠ ܪܘܳܙܳܐ ܡܶܢ ܫܰܠܺܝܛܳܢܰܝ̈ܗܽܘܢ.
8 ܝܺܡܳܐ ܡܳܪܶܐ ܡܳܖ̈ܰܘܳܬܳܐ ܒܢܰܦܫܶܗ: ܘܶܐܡܰܪ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ: ܕܡܰܣܠܶܐ ܐ̱ܢܳܐ ܠܺܐܝܩܳܪܶܗ ܕܝܰܥܩܽܘܒ: ܘܰܠܣܳܚܖ̈ܳܬܶܗ ܣܢܺܝܬ: ܘܰܐܫܠܶܡ ܡܕܺܝܢ̱ܬܳܐ ܒܰܡܠܳܐܳܗ̇.
9 ܘܶܐܢ ܢܶܫܬܰܚܪܽܘܢ ܥܶܣܪܳܐ ܓܰܒܖ̈ܺܝܢ ܒܒܰܝܬܳܐ ܚܰܕ ܢܡܽܘܬܽܘܢ.
10 ܘܢܶܫܩܠܺܝܘܗܝ ܕܳܕܶܗ ܐܰܘ ܡܰܢ ܕܩܰܪܺܝܒ ܠܶܗ ܕܢܰܦܶܩ ܓܰܖ̈ܡܶܐ ܡܶܢ ܒܰܝܬܳܐ: ܘܢܺܐܡܰܪ ܠܡܰܢ ܕܺܐܝܬ ܒܶܗ ܒܒܰܝܬܳܐ: ܐܺܝܬ ܐ̱ܢܳܫ ܬܽܘܒ ܥܰܡܳܟ ܒܒܰܝܬܳܐ: ܘܢܺܐܡܰܪ ܠܶܗ ܠܰܝܬ: ܡܶܛܽܠ ܕܣܳܦܘ ܠܗܽܘܢ: ܥܰܠ ܕܠܳܐ ܡܰܕܟܪܺܝܢ ܗ̱ܘܰܘ ܒܰܫܡܶܗ ܕܡܳܪܝܳܐ.
11 ܡܶܛܽܠ ܕܗܳܐ ܡܳܪܝܳܐ ܢܳܦܶܩ: ܘܢܶܡܚܶܐ ܠܒܰܝܬܳܐ ܪܳܡܳܐ ܘܢܰܪܥܠܺܝܘܗܝ: ܘܰܠܒܰܝܬܳܐ ܙܥܽܘܪܳܐ ܘܢܰܨܕܺܝܘܗܝ.
12 ܕܰܠܡܳܐ ܪܳܗܛܺܝܢ ܥܰܠ ܫܽܘܥܳܐ ܖ̈ܰܟܫܳܐ: ܐܰܘ ܕܳܒܪܺܝܢ ܒܗܽܘܢ ܦܰܕܳܢܳܐ: ܡܶܛܽܠ ܕܰܗܦܰܟܬܽܘܢ ܕܺܝܢܳܐ ܠܰܡܪܳܖ̈ܶܐ: ܘܦܺܐܖ̈ܶܐ ܕܙܰܕܺܝܩܽܘܬܳܐ ܠܓ̈ܶܕܕܶܐ.
13 ܕܚܳܕܶܝܢ ܥܰܠ ܠܳܐ ܡܶܕܶܡ: ܘܳܐܡܪܺܝܢ: ܕܰܠܡܳܐ ܠܳܐ ܗ̱ܘܳܐ ܒܚܰܝܠܰܢ ܢܣܰܒܢ ܠܰܢ ܩܪܺܝܬܳܐ.
14 ܡܶܛܽܠ ܕܗܳܐ ܐܶܢܳܐ ܡܩܺܝܡ ܐ̱ܢܳܐ ܥܠܰܝܟܽܘܢ ܒܶܝܬ ܝܺܣܪܳܐܶܝܠ: ܥܰܡܳܐ ܐܳܡܰܪ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ: ܘܢܶܕܚܩܽܘܢܳܟܽܘܢ ܡܶܢ ܡܰܥܠܳܢܳܐ ܕܰܚܡܳܬ: ܘܰܥܕܰܡܳܐ ܠܢܰܚܠܳܐ ܕܥܰܪܳܒܳܐ.