Amos 4
The Book of Amos
܀ ܥܡܘܣ ܕ ܀
1 ܫܡܰܥܶܝ̈ܢ ܦܶܬܓܳܡܳܐ ܗܳܢܳܐ ܡܽܘܫܚ̈ܶܐ ܕܒܰܝܫܳܢ: ܕܰܒܛܽܘܪܳܐ ܕܫܳܡܪܺܝܢ: ܕܛܳܠ̈ܡܳܢ ܠܡܶܣܟܺܢ̈ܶܐ ܘܐܳܠ̈ܨܳܢ ܠܒܳܝ̈ܫܶܐ: ܘܳܐܡܖ̈ܳܢ ܠܡܳܖ̈ܰܝܗܶܝܢ ܐܰܝܬܰܘ ܠܰܢ ܢܶܫܬܶܐ.
2 ܝܺܡܳܐ ܡܳܪܶܐ ܡܳܖ̈ܰܘܳܬܳܐ ܒܩܰܕܺܝܫܽܘܬܶܗ: ܕܗܳܐ ܝܰܘ̈ܡܳܬܳܐ ܐܳܬܶܝܢ ܥܠܰܝܟܶܝܢ: ܘܢܶܫܩܠܽܘܢܳܟܶܝܢ ܒܙܰܝܢܳܐ: ܘܚܰܪܬܟܶܝܢ ܒܩܰܕܣܳܐ ܕܨܰܝ̈ܳܕܶܐ.
3 ܘܰܠܬܽܘܪܥܬܳܐ ܬܶܪܗܰܛ ܐܰܢ̱ܬܬܳܐ ܠܩܽܘܒܠܶܗ: ܘܢܶܫ̈ܬܰܕܝܳܢ ܠܛܽܘܪܳܐ ܕܰܐܪܡܶܢ ܐܳܡܰܪ ܡܳܪܝܳܐ.
4 ܥܽܘܠܘ ܠܒܶܝܬ ܐܶܝܠ ܘܰܐܥܶܠܘ: ܘܰܒܓܰܠܓܳܠܳܐ ܐܰܣܓܰܘ ܠܡܰܥܳܠܽܘ: ܐܰܝܬܰܘ ܠܨܰܦܪܳܐ ܕܶܒܚܰܝ̈ܟܽܘܢ: ܘܠܰܬܠܳܬܳܐ ܝܰܘ̈ܡܺܝܢ ܡܰܥܣܳܖ̈ܰܝܟܽܘܢ.
5 ܘܰܐܣܶܩܘ ܡܶܢ ܚܰܡܺܝܥܳܐ ܬܰܘܕܺܝܬܳܐ: ܘܰܢܕܽܘܪܘ ܢܶܕܖ̈ܶܐ ܘܫܰܠܶܡܘ: ܡܶܛܽܠ ܕܗܳܟܰܢܳܐ ܪܚܶܡܬܽܘܢ ܒܢܰܝ̈ ܝܺܣܪܳܐܶܝܠ ܐܳܡܰܪ ܡܳܪܝܳܐ.
6 ܘܳܐܦ ܐܶܢܳܐ ܝܶܗܒܶܬ ܠܟܽܘܢ ܩܰܗܝܽܘܬ ܫܶܢ̈ܶܐ: ܒܟܽܠܗܶܝܢ ܡܕܺܝ̈ܢܳܬܟܽܘܢ: ܘܚܰܣܺܝܪܽܘܬ ܠܰܚܡܳܐ ܒܟܽܠܗܽܘܢ ܐܰܬܖ̈ܰܘܳܬܟܽܘܢ: ܘܠܳܐ ܐܶܬܦܢܺܝܬܽܘܢ ܠܘܳܬܝ ܐܳܡܰܪ ܡܳܪܝܳܐ.
7 ܐܳܦ ܐܶܢܳܐ ܟܠܺܝܬ ܡܶܢܟܽܘܢ ܡܶܛܪܳܐ: ܩܕܳܡ ܬܠܳܬܳܐ ܝܰܖ̈ܚܺܝܢ ܕܰܚܨܳܕܳܐ: ܘܰܐܚܶܬ ܡܶܛܪܳܐ ܥܰܠ ܡܕܺܝܢ̱ܬܳܐ ܚܕܳܐ ܘܥܰܠ ܚܕܳܐ ܠܳܐ: ܘܥܰܠ ܦܳܠܓܽܘܬܳܐ ܚܕܳܐ ܢܶܚܽܘܬ ܥܠܶܝܗ̇ ܡܶܛܪܳܐ: ܘܰܡܢܳܬܳܐ ܕܠܳܐ ܢܶܚܽܘܬ ܥܠܶܝܗ̇ ܡܶܛܪܳܐ ܬܺܐܒܰܫ.
8 ܘܢܶܬܟܰܢ̈ܫܳܢ ܬܰܪܬܶܝܢ ܬܠܳܬ ܡܕܺܝ̈ܢܳܢ ܠܰܡܕܺܝܢ̱ܬܳܐ ܚܕܳܐ: ܕܢܶܫ̈ܬܝܳܢ ܡܰܝ̈ܳܐ ܘܠܳܐ ܢܶܣ̈ܒܥܳܢ: ܘܠܳܐ ܐܶܬܦܢܺܝܬܽܘܢ ܠܘܳܬܝ ܐܳܡܰܪ ܡܳܪܝܳܐ.
9 ܡܚܺܝܬܟܽܘܢ ܒܫܰܘܒܳܐ ܘܰܒܝܰܪܩܳܢܳܐ ܘܰܒܒܰܪܕܳܐ. ܘܣܽܘܓܳܐܐ ܕܦܰܖ̈ܕܰܝܣܰܝܟܽܘܢ ܘܰܕܟܰܖ̈ܡܰܝܟܽܘܢ: ܘܰܕܬܺܐܢܰܝ̈ܟܽܘܢ: ܘܰܕܙܰܝ̈ܬܰܝܟܽܘܢ: ܐܶܟܰܠ ܡܳܫܽܘܛܳܐ: ܘܠܳܐ ܐܶܬܦܢܺܝܬܽܘܢ ܠܘܳܬܝ ܐܳܡܰܪ ܡܳܪܝܳܐ.
10 ܫܰܕܪܶܬ ܒܟܽܘܢ ܡܰܘܬܳܢܳܐ ܒܽܐܘܪܚܳܐ ܕܡܶܨܪܶܝܢ: ܘܩܰܛܠܶܬ ܒܚܰܪܒܳܐ ܥܠܰܝܡܰܝ̈ܟܽܘܢ ܥܰܡ ܫܒܺܝܬܳܐ ܕܖ̈ܰܟܫܟܽܘܢ: ܘܰܐܡܚܺܝܬ ܪܺܝܚ ܣܰܪܝܽܘܬܟܽܘܢ ܒܰܐܦܰܝ̈ܟܽܘܢ: ܘܠܳܐ ܐܶܬܦܢܺܝܬܽܘܢ ܠܘܳܬܝ ܐܳܡܰܪ ܡܳܪܝܳܐ.
11 ܗܶܦܟܶܬ ܒܟܽܘܢ ܐܰܝܟ ܕܰܗܦܶܟ ܐܰܠܳܗܳܐ ܠܰܣܕܽܘܡ ܘܰܠܥܳܡܽܘܪܳܐ: ܘܰܗܽܘܝܬܽܘܢ ܐܰܝܟ ܐܽܘܕܳܐ ܕܶܐܬܦܰܨܺܝ ܡܶܢ ܫܰܠܶܗܒܺܝܬܳܐ: ܘܠܳܐ ܐܶܬܦܢܺܝܬܽܘܢ ܠܘܳܬܝ ܐܳܡܰܪ ܡܳܪܝܳܐ.
12 ܡܶܛܽܠ ܗܳܠܶܝܢ ܗܳܟܰܢܳܐ ܐܶܥܒܶܕ ܠܳܟ ܝܺܣܪܳܐܶܝܠ ܒܚܰܪܬܳܐ: ܡܶܛܽܠ ܕܗܳܕܶܐ ܥܳܒܶܕ ܐ̱ܢܳܐ ܠܳܟ: ܐܶܬܛܰܝܰܒ ܝܺܣܪܳܐܶܝܠ ܕܬܶܩܪܶܐ ܠܰܐܠܳܗܳܟ.
13 ܡܶܛܽܠ ܕܡܰܢ ܕܰܒܪܳܐ ܖ̈ܽܘܚܶܐ ܘܰܒܪܳܐ ܛܽܘܖ̈ܶܐ: ܘܰܡܚܰܘܶܐ ܠܰܒܢܰܝ̈ܢܳܫܳܐ ܡܳܢܳܐ ܗ̱ܝ ܬܶܫܒܽܘܚܬܶܗ: ܥܳܒܶܕ ܫܰܦܪܳܐ ܥܰܡܛܳܢܳܐ: ܘܕܳܪܶܟ ܥܰܠ ܪܰܘܡܳܗ̇ ܕܰܐܪܥܳܐ: ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܫܡܶܗ.