Amos 8
The Book of Amos
܀ ܥܡܘܣ ܚ ܀
1 ܗܳܟܰܢܳܐ ܚܰܘܝܰܢܝ ܡܳܪܶܐ ܡܳܖ̈ܰܘܳܬܳܐ: ܘܗܳܐ ܢܺܝܫܳܐ ܕܩܶܨܳܐ.
2 ܘܶܐܡܰܪ ܠܺܝ ܡܳܪܝܳܐ: ܡܳܢܳܐ ܚܙܰܝܬ ܥܰܡܽܘܣ: ܘܶܐܡܪܶܬ ܢܺܝܫܳܐ ܕܩܶܨܳܐ: ܘܶܐܡܰܪ ܠܺܝ ܡܳܪܝܳܐ: ܡܰܛܺܝ ܩܶܨܳܐ ܥܰܠ ܥܰܡܝ ܝܺܣܪܳܐܶܝܠ: ܘܠܳܐ ܐܰܘܣܶܦ ܬܽܘܒ ܠܡܰܥܒܳܪܽܘܬܶܗ ܡܶܢܗܽܘܢ.
3 ܘܢܶܦ̈ܠܳܢ ܬܶܫܒ̈ܚܳܬܶܗ ܕܗܰܝܟܠܳܐ ܒܝܰܘܡܳܐ ܗܰܘ: ܒܶܗ ܒܝܰܘܡܳܐ ܗܰܘ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܢܶܣ̈ܓܝܳܢ ܫ̈ܠܰܕܶܐ ܒܟܽܠ ܐܰܬܰܪ: ܘܢܶܫ̈ܬܰܕܝܳܢ ܠܰܐܒܕܳܢܳܐ.
4 ܫܡܰܥܘ ܗܳܠܶܝܢ ܕܫܳܝܛܺܝܢ ܠܡܶܣܟܺܢ̈ܶܐ: ܘܰܡܒܰܛܠܺܝܢ ܠܒܳܝ̈ܫܶܐ ܕܰܐܪܥܳܐ.
5 ܘܳܐܡܪܺܝܢ ܕܶܐܡܰܬܝ ܢܶܥܒܰܪ ܝܰܪܚܳܐ ܘܰܢܙܰܒܶܢ ܥܒܽܘܪܳܐ: ܘܬܶܥܒܰܪ ܫܰܒܬܳܐ ܘܢܶܦܬܰܚ ܐܰܘܨܖ̈ܶܐ: ܘܢܰܙܥܰܪ ܟܝ̈ܳܠܳܬܳܐ: ܘܢܰܘܪܶܒ ܡܰܬܩ̈ܳܠܶܐ: ܘܢܶܥܒܶܕ ܡܰܣܰܐܬܳܐ ܕܢܶܟܠܳܐ.
6 ܘܰܢܙܰܒܶܢ ܒܟܶܣܦܳܐ ܠܡܶܣܟܺܢ̈ܶܐ ܘܒܳܝ̈ܫܶܐ ܚܠܳܦ ܡܫܳܝ̈ܶܐ: ܘܫܶܬ ܐܰܘܨܖ̈ܶܐ ܢܙܰܒܶܢ.
7 ܘܺܝܡܳܐ ܡܳܪܝܳܐ ܬܰܩܺܝܦܶܗ ܕܝܰܥܩܽܘܒ: ܕܠܳܐ ܐܶܛܥܶܐ ܠܥܳܠܰܡ ܟܽܠܗܽܘܢ ܥܒܳܕܰܝ̈ܗܽܘܢ.
8 ܡܶܛܽܠ ܗܳܠܶܝܢ ܠܳܐ ܬܙܽܘܥ ܐܰܪܥܳܐ: ܘܢܶܫܬܒܽܘܢ ܒܶܐܒܠܳܐ ܟܽܠܗܽܘܢ ܥܳܡܽܘܖ̈ܶܝܗ̇: ܘܢܶܣܰܩ ܩܶܨܳܗ̇ ܐܰܝܟ ܢܰܗܪܳܐ: ܘܢܶܕܚܽܘܩ ܘܢܶܚܽܘܬ ܐܰܝܟ ܢܰܗܪܳܐ ܕܡܶܨܪܶܝܢ.
9 ܘܢܶܗܘܶܐ ܒܝܰܘܡܳܐ ܗܰܘ ܐܳܡܰܪ ܡܳܪܝܳܐ: ܐܰܥܪܶܒ ܫܶܡܫܳܐ ܒܛܰܗܪܳܐ: ܘܰܐܚܫܶܟ ܠܰܐܪܥܳܐ ܒܝܰܘܡܳܐ ܢܰܗܺܝܪܳܐ.
10 ܘܰܐܗܦܶܟ ܥܰܕܺܥܕܰܝ̈ܟܽܘܢ ܠܶܐܒܠܳܐ: ܘܟܽܠܗܶܝܢ ܙܡܺܝܖ̈ܳܬܟܽܘܢ ܠܺܐܘܠ̈ܝܳܬܳܐ: ܘܶܐܚܙܽܘܩ ܣܰܩ̈ܶܐ ܒܟܽܠܗܽܘܢ ܚܰܨܰܝ̈ܟܽܘܢ: ܘܥܰܠ ܟܽܠܗܽܘܢ ܖ̈ܺܝܫܰܝܟܽܘܢ ܩܽܘܕܚ̈ܳܬܳܐ: ܘܶܐܥܒܕܺܝܗ̇ ܐܰܝܟ ܐܶܒܠܳܐ ܕܺܝܚܺܝܕܳܝܳܐ: ܘܚܰܪܬܳܗ̇ ܐܰܝܟ ܝܰܘܡܳܐ ܡܰܪܺܝܪܳܐ.
11 ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܶܐܫܰܕܰܪ ܟܰܦܢܳܐ ܒܰܐܪܥܳܐ: ܠܳܐ ܕܰܟܦܶܢ ܠܠܰܚܡܳܐ: ܘܠܳܐ ܕܰܨܗܶܐ ܠܡܰܝ̈ܳܐ: ܐܶܠܳܐ ܠܡܶܫܡܰܥ ܦܶܬܓܳܡܶܗ ܕܡܳܪܝܳܐ.
12 ܘܢܶܬܟܰܢܫܽܘܢ ܡܶܢ ܝܰܡܳܐ ܘܰܥܕܰܡܳܐ ܠܝܰܡܳܐ: ܘܡܶܢ ܓܰܪܒܝܳܐ ܘܰܥܕܰܡܳܐ ܠܡܰܕܢܚܳܐ: ܘܢܶܪܗܛܽܘܢ ܠܡܶܒܥܳܐ ܦܶܬܓܳܡܶܗ ܕܡܳܪܝܳܐ ܘܠܳܐ ܢܶܫܟܚܽܘܢ.
13 ܒܶܗ ܒܝܰܘܡܳܐ ܗܰܘ: ܢܶܬܛܰܖ̈ܦܳܢ ܒܬܽܘ̈ܠܳܬܳܐ ܫܰܦܺܝܖ̈ܳܬܳܐ: ܘܓܰܕܽܘ̈ܕܶܐ ܒܨܶܗܝܳܐ.
14 ܕܝܳܡܶܝܢ ܗ̱ܘܰܘ ܒܰܦܬܰܟܖ̈ܶܐ ܕܫܳܡܪܺܝܢ ܘܳܐܡܪܺܝܢ: ܚܰܝ ܐܰܠܳܗܳܟ ܕܳܢ: ܘܰܚܝܳܐ ܐܽܘܪܚܳܐ ܕܒܺܪܫܒܰܥ: ܘܢܶܦܠܽܘܢ ܘܠܳܐ ܢܩܽܘܡܽܘܢ.