Amos 7
The Book of Amos
܀ ܥܡܘܣ ܙ ܀
1 ܗܳܟܰܢܳܐ ܚܰܘܝܰܢܝ ܡܳܪܶܐ ܡܳܖ̈ܰܘܳܬܳܐ ܒܪܺܝܬܳܐ ܕܩܰܡܨܳܐ ܒܪܺܝܫ ܡܰܘܥܺܝܬܳܐ ܕܰܠܩܶܫܳܐ: ܘܗܽܘ ܠܶܩܫܳܐ ܒܳܬܰܪ ܓܰܙܳܐ ܗ̱ܘܳܐ ܕܡܰܠܟܳܐ.
2 ܘܟܰܕ ܓܰܡܰܪ ܠܡܶܐܟܠܶܗ ܠܥܶܣܒܳܐ ܕܰܐܪܥܳܐ ܐܶܡܪܶܬ: ܡܳܪܶܐ ܡܳܖ̈ܰܘܳܬܳܐ ܚܰܣܳܢ. ܡܰܢܽܘ ܢܩܺܝܡܺܝܘܗܝ ܠܝܰܥܩܽܘܒ: ܡܶܛܽܠ ܕܰܙܥܽܘܪܽ ܗ̱ܘ.
3 ܐܰܗܦܶܟܶܝܗ̇ ܡܳܪܝܳܐ ܠܗܳܕܶܐ ܘܠܳܐ ܬܶܗܘܶܐ.
4 ܗܳܟܰܢܳܐ ܚܰܘܝܰܢܝ ܡܳܪܶܐ ܡܳܖ̈ܰܘܳܬܳܐ: ܘܗܳܐ ܩ̣ܪܳܐ ܠܰܡܕܳܢ ܒܢܽܘܪܳܐ ܡܳܪܶܐ ܡܳܖ̈ܰܘܳܬܳܐ: ܘܶܐܟܠܰܬ ܠܰܬܗܽܘܡܳܐ ܪܰܒܳܐ: ܘܶܐܟܠܰܬ ܠܦܳܠܓܽܘܬܳܐ.
5 ܘܶܐܡܪܶܬ ܡܳܪܶܐ ܡܳܖ̈ܰܘܳܬܳܐ ܚܰܣܳܢ: ܡܰܢܽܘ ܢܩܺܝܡܺܝܘܗܝ ܠܝܰܥܩܽܘܒ: ܡܶܛܽܠ ܕܰܙܥܽܘܪܽ ܗ̱ܘ.
6 ܐܰܗܦܶܟܶܝܗ̇ ܡܳܪܝܳܐ ܠܗܳܕܶܐ: ܘܳܐܦ ܗܺܝ ܠܳܐ ܬܶܗܘܶܐ.
7 ܗܳܟܰܢܳܐ ܚܰܘܝܰܢܝ: ܘܗܳܐ ܡܳܪܝܳܐ ܩܳܐܶܡ ܥܰܠ ܫܽܘܪܳܐ ܕܰܐܕܰܡܽܘܣ: ܘܺܐܝܕܶܗ ܐܰܕܰܡܽܘܣ.
8 ܘܶܐܡܰܪ ܠܺܝ ܡܳܪܝܳܐ: ܡܳܢܳܐ ܚܙܰܝܬ ܥܰܡܽܘܣ: ܘܶܐܡܪܶܬ ܐܰܕܰܡܽܘܣ: ܘܶܐܡܰܪ ܠܺܝ ܡܳܪܝܳܐ: ܗܳܐ ܐܶܢܳܐ ܣܳܐܶܡ ܐ̱ܢܳܐ ܐܰܕܰܡܽܘܣ ܒܓܰܘ ܥܰܡܝ ܝܺܣܪܳܐܶܝܠ: ܘܠܳܐ ܐܰܘܣܶܦ ܬܽܘܒ ܕܰܐܥܒܰܪ ܐܶܢܽܘܢ.
9 ܘܢܶܚܖ̈ܒܳܢ ܦܖ̈ܰܟܶܐ ܕܓܽܘܚܟܳܐ: ܘܡܰܩܕܫ̈ܶܐ ܕܺܝܣܪܳܐܶܝܠ ܢܶܚܪܒܽܘܢ: ܘܶܐܩܽܘܡ ܥܰܠ ܒܶܝܬ ܝܽܘܪܰܒܥܰܡ ܒܚܰܪܒܳܐ.
10 ܘܰܫܠܰܚ ܐܰܡܽܘܨܳܝܳܐ ܟܽܘܡܪܳܐ ܕܒܶܝܬ ܐܶܝܠ: ܠܘܳܬ ܝܽܘܪܰܒܥܰܡ ܡܰܠܟܳܐ ܕܺܝܣܪܳܐܶܝܠ: ܘܶܐܡܰܪ ܠܶܗ: ܡܪܰܕ ܥܠܰܝܟ ܥܰܡܽܘܣ ܒܓܰܘ ܒܶܝܬ ܝܺܣܪܳܐܶܝܠ: ܘܠܳܐ ܡܶܫܟܚܳܐ ܐܰܪܥܳܐ ܠܰܡܣܰܝܒܳܪܽܘ ܡܶܠܰܘ̈ܗܝ.
11 ܡܶܛܽܠ ܕܗܳܟܰܢܳܐ ܐܳܡܰܪ ܥܰܡܽܘܣ: ܕܰܒܚܰܪܒܳܐ ܢܶܬܩܛܶܠ ܝܽܘܪܰܒܥܰܡ: ܘܺܝܣܪܳܐܶܝܠ ܒܫܶܒܝܳܐ ܢܶܫܬܒܶܐ ܡܶܢ ܐܰܪܥܶܗ.
12 ܘܶܐܡܰܪ ܐܰܡܽܘܨܳܝܳܐ ܠܥܰܡܽܘܣ ܚܰܙܳܝܳܐ: ܥܪܽܘܩ ܙܶܠ ܠܳܟ ܠܰܐܪܥܳܐ ܕܺܝܗܽܘܕܳܐ: ܘܰܐܟܽܘܠ ܬܰܡܳܢ ܠܰܚܡܳܐ: ܘܬܰܡܳܢ ܬܶܬܢܰܒܶܐ.
13 ܘܒܶܝܬ ܐܶܝܠ ܠܳܐ ܬܰܘܣܶܦ ܬܽܘܒ ܠܡܶܬܢܰܒܳܝܽܘ: ܡܶܛܽܠ ܕܡܰܩܕܫܰܐ ܗ̱ܘ ܕܡܰܠܟܳܐ ܘܒܶܝܬ ܡܰܠܟܽܘܬܰܐ ܗ̱ܘ.
14 ܘܰܥܢܳܐ ܥܰܡܽܘܣ ܘܶܐܡܰܪ ܠܰܐܡܽܘܨܳܝܳܐ: ܐܶܠܳܐ ܠܳܐ ܗܘܺܝܬ ܢܒܺܝܳܐ: ܐܳܦܠܳܐ ܒܰܪ ܢܒܺܝ̈ܶܐ: ܐܶܠܳܐ ܪܳܥܝܳܐ ܐ̱ܢܳܐ ܘܠܳܩܶܛ ܫܰܩܡ̈ܶܐ.
15 ܘܕܰܒܪܰܢܝ ܡܳܪܝܳܐ ܡܶܢ ܒܶܣܬܰܪ ܥܳܢ̈ܳܐ: ܘܶܐܡܰܪ ܠܺܝ ܡܳܪܝܳܐ: ܙܶܠ ܐܶܬܢܰܒܳܐ ܥܰܠ ܥܰܡܝ ܝܺܣܪܳܐܶܝܠ.
16 ܡܶܟܺܝܠ ܫܡܰܥ ܡܶܠܬܶܗ ܕܡܳܪܝܳܐ: ܐܰܢ̱ܬ ܐܶܡܰܪܬ ܕܠܳܐ ܬܶܬܢܰܒܶܐ ܥܰܠ ܕܒܶܝܬ ܝܺܣܪܳܐܶܝܠ: ܘܠܳܐ ܬܰܠܶܦ ܠܰܕܒܶܝܬ ܐܺܝܣܚܳܩ.
17 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ: ܐܰܢ̱ܬܬܳܟ ܒܰܡܕܺܝܢ̱ܬܳܟ ܬܙܰܢܶܐ: ܘܰܒܢܰܝ̈ܟ ܘܰܒ̈ܢܳܬܳܟ ܒܚܰܪܒܳܐ ܢܶܦܠܽܘܢ: ܘܰܐܪܥܳܟ ܒܰܫܘܳܝܬܳܐ ܬܶܬܦܰܠܰܓ: ܘܰܐܢ̱ܬ ܒܰܐܪܥܳܐ ܛܰܡܐܬܳܐ ܬܡܽܘܬ: ܘܺܝܣܪܳܐܶܝܠ ܒܫܶܒܝܳܐ ܢܶܫܬܒܶܐ ܡܶܢ ܐܰܪܥܶܗ.