Isaiah 1
The Book of Isaiah
܀ ܐܫܥܝܐ ܐ ܀
1 ܚܶܙܘܳܐ ܕܶܐܫܰܥܝܳܐ ܒܰܪ ܐܰܡܽܘܨ: ܕܰܚ̣ܙܳܐ ܥܰܠ ܝܺܗܽܘܕܳܐ ܘܥܰܠ ܐܽܘܪܺܫܠܶܡ: ܒܝܰܘ̈ܡܰܝ ܥܽܘܙܺܝܳܐ: ܘܝܽܘܬܳܡ: ܘܳܐܚܳܙ: ܘܚܶܙܰܩܝܳܐ: ܡܰܠ̈ܟܶܐ ܕܺܝܗܽܘܕܳܐ.
2 ܫܡܰܥܘ ܫܡܰܝܳܐ: ܘܨܽܘܬܝ ܐܰܪܥܳܐ: ܡܶܛܽܠ ܕܡܳܪܝܳܐ ܡܰܠܶܠ: ܒܢܰܝ̈ܳܐ ܪܰܒܺܝܬ ܘܪܰܡܪܡܶܬ: ܘܗܶܢܽܘܢ ܐܰܥܠܺܝܘ ܒܺܝ.
3 ܝܺܕܰܥ ܬܰܘܪܳܐ ܩܰܢܝܶܗ: ܘܰܚܡܳܪܳܐ ܐܽܘܪܝܳܐ ܕܡܳܪܶܗ. ܘܺܝܣܪܳܐܶܝܠ ܠܳܐ ܝܺܕܰܥ: ܘܥܰܡܝ ܠܳܐ ܐܶܣܬܰܟܰܠ.
4 ܘܳܝ ܠܥܰܡܳܐ ܚܰܛܳܝܳܐ: ܥܰܡܳܐ ܥܰܫܺܝܢ ܥܰܘܳܠܳܐ: ܙܰܪܥܳܐ ܡܰܒܐܫܳܢܳܐ. ܒܢܰܝ̈ܳܐ ܡܚܰܒ̈ܠܶܐ: ܫܒܰܩܬܽܘܢ ܠܡܳܪܝܳܐ: ܘܰܐܪܓܶܙܬܽܘܢ ܠܩܰܕܺܝܫܳܐ ܕܺܝܣܪܳܐܶܝܠ: ܘܰܗܦܰܟܬܽܘܢ ܠܒܶܣܬܰܪܟܽܘܢ.
5 ܠܡܳܢܳܐ ܬܽܘܒ ܬܶܒܠܥܽܘܢ: ܘܬܰܘܣܦܽܘܢ ܠܡܶܬܪܕܳܝܽܘ ܟܽܠ ܪܺܝܫ ܠܟܺܐܒܳܐ: ܘܟܽܠ ܠܶܒܳܐ ܠܟܰܪܝܽܘܬܳܐ.
6 ܡ̣ܶܢ ܦܰܣܬܳܐ ܕܪܶܓܠܳܐ ܘܰܥܕܰܡܳܐ ܠܡܽܘܚܳܐ: ܠܰܝܬ ܒܶܗ ܕܽܘܟܬܳܐ ܕܫܰܪܺܝܪܳܐ. ܨܽܘ̈ܠܦܳܬܳܐ: ܘܫܽܘ̈ܡܳܬܳܐ: ܘܡܰܚ̈ܘܳܬܳܐ: ܕܰܥܒܰܝ̈ܳܐ. ܠܳܐ ܠܡܶܨܡܰܕ: ܘܠܳܐ ܠܡܶܥܨܰܒ: ܘܳܐܦ ܠܳܐ ܠܰܡܪܰܟܳܟܽܘ ܒܡܶܫܚܳܐ.
7 ܐܰܪܥܟܽܘܢ ܚܰܪܒܳܐ: ܘܩܽܘܖ̈ܝܰܟܽܘܢ ܝܳܩ̈ܕܳܢ ܒܢܽܘܪܳܐ. ܐܰܪܥܟܽܘܢ ܠܽܘܩܒܰܠܟܽܘܢ ܐܳܟܠܺܝܢ ܠܳܗ̇ ܢܽܘܟܖ̈ܳܝܶܐ. ܘܨܳܕܝܳܐ ܐܰܝܟ ܗܦܺܝܟܬܳܐ ܕܢܽܘܟܖ̈ܳܝܶܐ.
8 ܘܶܐܫܬܰܚܪܰܬ ܒܰܪܬ ܨܶܗܝܽܘܢ: ܐܰܝܟ ܡܛܰܠܬܳܐ ܒܟܰܪܡܳܐ: ܘܰܐܝܟ ܥܰܪܙܶܠܳܐ ܒܡܰܩܛܝܳܐ: ܘܰܐܝܟ ܡܕܺܝܢ̱ܬܳܐ ܚܒܺܝܫܬܳܐ.
9 ܘܶܐܠܽܘܠܳܐ ܡܳܪܝܳܐ ܨܒܰܐܬ ܐܰܘܬܰܪ ܠܰܢ ܣܪܺܝܕܳܐ: ܐܰܝܟ ܣܕܽܘܡ ܗܳܘܶܝܢ ܗ̱ܘܰܝܢ: ܘܰܠܥܳܡܽܘܪܳܐ ܡܶܬܕܰܡܶܝܢ ܗ̱ܘܰܝܢ.
10 ܫܡܰܥܘ ܦܶܬܓܳܡܶܗ ܕܡܳܪܝܳܐ: ܫܰܠܺܝ̈ܛܶܐ ܕܰܣܕܽܘܡ. ܘܨܽܘܬܘ ܢܳܡܽܘܣܶܗ ܕܰܐܠܳܗܰܢ ܥܰܡܳܐ ܕܥܳܡܽܘܪܳܐ.
11 ܠܡܳܢܳܐ ܗܳܘܶܝܢ ܠܺܝ ܣܽܘܓܳܐܐ ܕܕܶܒܚܰܝ̈ܟܽܘܢ: ܐܳܡܰܪ ܡܳܪܝܳܐ. ܣܶܒܥܶ݀ܬ ܥܠ̈ܰܘܳܬܳܐ ܕܕܶܟܖ̈ܶܐ: ܘܬܰܪܒܳܐ ܕܰܡܦܰܛܡ̈ܶܐ. ܘܰܕܡܳܐ ܕܬܰܘܖ̈ܶܐ: ܘܕܶܐܡܖ̈ܶܐ: ܘܕܰܓ̈ܕܰܝܳܐ: ܠܳܐ ܨܒܺܝ݀ܬ.
12 ܟܰܕ ܬܺܐܬܽܘܢ ܠܡܶܚܙܳܐ ܐܰܦܰܝ̈: ܡܰܢܽܘ ܒܥ̣ܳܐ ܗܳܠܶܝܢ ܡ̣ܶܢ ܐܺܝܕܰܝ̈ܟܽܘܢ ܠܰܡܕܳܫ ܕܳܖ̈ܰܝ.
13 ܠܳܐ ܬܰܘܣܦܽܘܢ ܠܡܰܝܬܳܝܽܘ ܠܺܝ ܩܽܘܪܒܳܢܳܐ ܣܖ̈ܺܝܩܶܐ: ܣܘܳܬܳܐ ܕܡܰܣܠܝܳܐ ܗ̱ܝ̣ ܠܺܝ: ܒܪܺܝܫ ܝܰܖ̈ܚܶܐ ܘܰܒܫܰܒܬܳܐ: ܟܳܢܫܺܝܢ ܐܢ̱ܬܽܘܢ ܟܢܽܘܫܝܳܐ. ܠܳܐ ܐܳܟܠ ܐ̱ܢܳܐ ܕܥܶܬܳܐ ܘܕܰܚܒܽܘܫܝܳܐ.
14 ܪܺܝܫ ܝܰܖ̈ܚܰܝܟܽܘܢ ܘܥܰܕܥܺܕܰܝ̈ܟܽܘܢ: ܣܢܳܬ ܢܰܦܫܝ. ܗ̱ܘܰܘ ܥܠܰܝ ܠܺܝܩܰܪܬܳܐ. ܠܺܐܝܬ ܠܡܶܫܩܰܠ.
15 ܟܰܕ ܬܶܦܪܣܽܘܢ ܐܺܝܕܰܝ̈ܟܘܢ: ܐܰܗܡܶܐ ܥܰܝܢܰܝ̈ ܡܶܢܟܽܘܢ. ܘܳܐܦܶܢ ܬܰܣܓܽܘܢ ܨܠܽܘܬܳܐ: ܠܳܐ ܫܳܡܰܥ ܐ̱ܢܳܐ. ܐܺܝܕܰܝ̈ܟܽܘܢ ܡܰܠ̈ܝܳܢ ܕܡܳܐ.
16 ܣܚܰܘ ܘܶܐܬܕܰܟܰܘ. ܘܰܐܥܒܰܪܘ ܒܺܝ̈ܫܳܬܳܐ ܕܰܥܒܕܰܝ̈ܟܽܘܢ ܡ̣ܶܢ ܩܕܳܡ ܥܰܝ̈ܢܰܝ.
17 ܫܠܰܘ ܡ̣ܶܢ ܒܺܝ̈ܫܳܬܳܐ: ܘܺܝܠܰܦܘ ܠܡܰܛܐܳܒܽܘ ܥܰܩܶܒܘ ܕܺܝܢܳܐ: ܘܰܐܛܐܶܒܘ ܠܰܛܠܺܝ̈ܡܶܐ. ܕܽܘܢܘ ܝܰܬܡ̈ܶܐ: ܘܕܽܘܢܘ ܐܰܖ̈ܡܠܳܬܳܐ.
18 ܘܬܰܘ ܢܡܰܠܶܠ ܥܰܡ ܚ̈ܕܳܕܶܐ: ܐܳܡܰܪ ܡܳܪܝܳܐ. ܘܶܐܢ ܢܶܗܘܽܘܢ ܚܛܳܗܰܝ̈ܟܽܘܢ ܐܰܝܟ ܙܚܽܘܪܺܝܬܳܐ: ܐܰܝܟ ܬܰܠܓܳܐ ܢܶܬܚܰܘܪܽܘܢ. ܘܶܐܢ ܢܶܣܡܩܽܘܢ ܐܰܝܟ ܬܰܘܠܰܥܬܳܐ: ܐܰܝܟ ܥܰܡܪܳܐ ܢܶܗܘܽܘܢ.
19 ܘܶܐܢ ܬܶܬܛܦܺܝܣܽܘܢ ܘܶܬܫܡܥܽܘܢܳܢܝ: ܛܽܘܒܳܗ̇ ܕܰܐܪܥܳܐ ܬܶܐܟܠܽܘܢ.
20 ܘܶܐܢ ܠܳܐ ܬܶܬܛܦܺܝܣܽܘܢ ܘܬܶܬܚܪܽܘܢ: ܒܚܰܪܒܳܐ ܬܶܬܐܰܟܠܽܘܢ. ܦܽܘܡܶܗ ܕܡܳܪܝܳܐ ܡܰܠܶܠ.
21 ܐܰܝܟܰܢܳܐ ܗܘܳܬ ܙܳܢܺܝܬܳܐ ܡܕܺܝܢ̱ܬܳܐ ܡܗܰܝܡܰܢܬܳܐ: ܕܡܰܠܝܳܐ ܗ̱ܘܳܬ ܕܺܝܢܳܐ. ܘܙܰܕܺܝܩܽܘܬܳܐ ܒܳܬܰܬ ܒܳܗ̇: ܘܗܳܫܳܐ ܩܳܛܽܘ̈ܠܶܐ.
22 ܟܶܣܦܶܟܝ ܐܶܣܬܠܺܝ. ܚܳܢ̈ܘܳܬܶܟܝ ܚܳܠܳܛܺܝܢ ܡܰܝ̈ܳܐ.
23 ܪܰܘܖ̈ܒܳܢܰܝܟܝ ܡܳܪܽܘܕܺܝܢ. ܘܫܰܘ̈ܬܳܦܶܐ ܐܶܢܽܘܢ ܕܓܰܢܳܒ̈ܶܐ. ܟܽܠܗܽܘܢ ܪܳܚܡܺܝܢ ܫܽܘܚܕܳܐ. ܘܡܶܣܬܰܪܗܒܺܝܢ ܠܡܶܦܪܰܥ ܚܽܘ̈ܒܠܶܐ. ܠܝܬܰܡ̈ܶܐ ܠܳܐ ܕܳܝܢܺܝܢ: ܘܕܺܝܢܳܐ ܕܰܐܖ̈ܡܠܳܬܳܐ ܠܳܐ ܥܳܐܶܠ ܠܘܳܬܗܽܘܢ.
24 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ ܚܰܝܠܬܳܢܳܐ: ܥܰܫܺܝܢܳܐ ܕܺܝܣܪܳܐܶܝܠ: ܘܳܝ ܡܶܬܦܪܰܥ ܐ̱ܢܳܐ ܡ̣ܶܢ ܣܳܢ̈ܰܐܝ: ܘܡܶܬܢܰܩܰܡ ܐ̱ܢܳܐ ܡ̣ܶܢ ܒܥܶܠܕܒܳܒܰܝ̈.
25 ܘܰܐܦܢܶܐ ܐܺܝܕܝ ܥܠܝܟܝ ܘܶܐܨܪܽܘܦ ܡܳܖ̈ܽܘܕܰܝܟܝ ܠܕܰܟܝܽܘ ܘܰܐܥܒܰܪ ܥܰܘ̈ܠܰܝܟܝ ܟܽܠܗܽܘܢ.
26 ܘܰܐܩܺܝܡ ܕܰܝܳܢܰܝ̈ܟܝ ܐܰܝܟ ܕܡ̣ܶܢ ܩܕܺܝܡ: ܘܡܳܠܽܘܟܰܝ̈ܟܝ ܐܰܝܟ ܕܡ̣ܶܢ ܠܩܽܘܕܡܺܝܢ. ܘܒܳܬܰܪܟܶܢ ܬܶܬܩܪܶܝܢ ܡܕܺܝܢ̱ܬܳܐ ܕܙܰܕܺܝܩܽܘܬܳܐ: ܘܰܡܕܺܝܢ̱ܬܳܐ ܕܗܰܝܡܳܢܽܘܬܳܐ.
27 ܨܶܗܝܽܘܢ ܒܕܺܝܢܳܐ ܬܶܬܦܪܶܩ: ܘܰܫܒܺܝܬܳܗ̇ ܒܙܰܕܺܝܩܽܘܬܳܐ.
28 ܘܰܬܒܳܪܳܐ ܕܥܰܘ̈ܳܠܶܐ ܘܰܕܚܰܛܳܝ̈ܶܐ ܐܰܟܚܕܳܐ. ܘܰܐܝܠܶܝܢ ܕܰܫܒܰܩܘ ܠܡܳܪܝܳܐ ܢܣܽܘܦܽܘܢ.
29 ܡܶܛܽܠ ܕܢܶܒܗܬܽܘܢ ܡ̣ܶܢ ܦܬܰܟܖ̈ܶܐ ܕܪܰܓܘ ܘܢܰܚܦܪܽܘܢ ܡ̣ܶܢ ܓܶܢ̈ܝܳܬܳܐ ܕܰܓܒܰܘ.
30 ܡܶܛܽܠ ܕܢܶܗܘܽܘܢ ܐܰܝܟ ܒܶܛܡܬܳܐ ܕܰܢܬܰܪܘ ܛܰܖ̈ܦܶܝܗ̇. ܘܰܐܝܟ ܓܰܢܬܳܐ ܕܡܰܝ̈ܳܐ ܠܰܝܬ ܠܳܗ̇.
31 ܘܢܶܗܘܶܐ ܥܽܘܫܢܗܽܘܢ ܠܰܣܪܳܩܬܳܐ: ܘܰܥܒܳܕܰܝ̈ܗܽܘܢ ܠܒܰܠܨܽܘܨ̈ܝܳܬܳܐ ܘܢܺܐܩܕܽܘܢ ܬܖ̈ܰܝܗܽܘܢ ܐܰܟܚܕܳܐ. ܘܠܰܝܬ ܕܰܡܕܰܥܶܟ.