Zechariah 11
The Book of Zechariah
܀ ܙܟ̣ܪܝܐ ܝܐ ܀
1 ܦܬܰܚ ܠܶܒܢܳܢ ܬܰܖ̈ܥܰܝܟ ܘܬܶܐܟܽܘܠ ܢܽܘܪܳܐ ܠܰܐܖ̈ܙܰܝܟ.
2 ܢܰܝܠܶܠ ܫܰܪܘܰܝܢܳܐ ܡܶܛܽܠ ܕܰܢܦܰܠ ܐܰܪܙܳܐ: ܘܥܰܫܺܝ̈ܢܶܐ ܐܶܬܒܰܙܰܙܘ: ܢܰܝܠܠܽܘܢ ܒܰܠܽܘ̈ܛܶܐ ܕܒܰܝܫܳܢ: ܕܰܢܦܰܠ ܥܳܒܳܐ ܥܰܫܺܝܢܳܐ.
3 ܩܳܠܳܐ ܕܺܝܠܰܠܬܳܐ ܕܖ̈ܳܥܰܘܳܬܳܐ ܕܶܐܬܒܰܙܙܰܬ ܪܰܒܽܘܬܗܽܘܢ: ܩܳܠܳܐ ܕܰܐܖ̈ܝܰܘܳܬܳܐ ܕܢܳܗܡܺܝܢ: ܕܶܐܬܒܰܙܰܙ ܥܽܘܫܢܶܗ ܕܝܽܘܪܕ̇ܢܳܢ.
4 ܗܳܟܰܢܳܐ ܐܶܡܰܪ ܠܺܝ ܡܳܪܝܳܐ ܐܰܠܳܗܝ: ܪܥܺܝ ܠܥܳܢ̈ܳܐ ܩܰܛܺܝܢܬܳܐ.
5 ܕܙܳܒܽܘܢܰܝ̈ܗܶܝܢ ܩܳܛܠܺܝܢ ܠܗܶܝܢ: ܘܠܳܐ ܡܶܬܚܰܝܒܺܝܢ: ܘܰܡܙܰܒܢܳܢܰܝ̈ܗܶܝܢ ܐܳܡܪܺܝܢ: ܒܪܺܝܟ ܡܳܪܝܳܐ ܕܰܐܥܬܪܰܢ: ܘܖ̈ܳܥܰܘܳܬܗܶܝܢ ܠܳܐ ܚܳܝܣܺܝܢ ܥܠܰܝܗܶܝܢ.
6 ܡܶܛܽܠ ܕܠܳܐ ܚܳܐܶܣ ܐ̱ܢܳܐ ܬܽܘܒ ܥܰܠ ܥܳܡܽܘܖ̈ܶܝܗ̇ ܕܰܐܪܥܳܐ ܐܳܡܰܪ ܡܳܪܝܳܐ: ܘܗܳܐ ܡܰܫܠܶܡ ܐ̱ܢܳܐ ܠܗܽܘܢ ܠܰܒܢܰܝ̈ ܐ̱ܢܳܫܳܐ: ܐ̱ܢܳܫ ܒܝܰܕ ܚܰܒܪܶܗ ܘܰܒܝܰܕ ܡܰܠܟܶܗ: ܘܰܢܦܰܠܓܽܘܢܳܗ̇ ܠܰܐܪܥܳܐ: ܘܠܳܐ ܐܶܦܰܨܶܝܗ̇ ܡܶܢ ܐܺܝܕܰܝ̈ܗܽܘܢ.
7 ܘܰܪܥܺܝܬ ܠܥܳܢ̈ܳܐ ܩܰܛܺܝ̈ܢܳܬܳܐ ܡܶܛܽܠ ܟܶܢܫܳܐ ܕܥܳܢ̈ܳܐ: ܘܢܶܣܒܶܬ ܠܺܝ ܬܪܶܝܢ ܚܽܘܛܖ̈ܺܝܢ: ܠܚܰܕ ܩܪܺܝܬ ܒܰܣܺܝܡܐ: ܘܠܰܐ̱ܚܪܺܢܳܐ ܚܰܒܠܳܐ: ܘܰܪܥܺܝ݀ܬ ܠܥܳܢ̈ܳܐ.
8 ܘܰܐܘܒܕܶܬ ܬܠܳܬܳܐ ܖ̈ܳܥܰܘܳܬܳܐ ܒܝܰܪܚܳܐ ܚܰܕ: ܘܡܶܐܢܰܬ ܢܰܦܫܝ ܒܗܽܘܢ: ܘܳܐܦ ܢܰܦ̈ܫܳܬܗܽܘܢ ܥܘܰܝ̈ ܥܠܰܝ.
9 ܘܶܐܡܪܶܬ ܕܠܳܐ ܐܶܪܥܶܝܟܽܘܢ: ܕܡܳܝܬܳܐ ܬܡܽܘܬ: ܘܕܳܐܒܕܳܐ ܬܺܐܒܰܕ: ܘܰܐܝܕܳܐ ܕܡܶܫܬܰܚܪܳܐ ܬܶܐܟܽܘܠ ܒܶܣܪܳܐ ܕܚܰܒܖ̈ܳܬܳܗ̇.
10 ܘܢܶܣܒܶܬ ܚܽܘܛܪܝ ܒܰܣܺܝܡܐ ܘܰܬܒܰܪܬܶܗ: ܕܢܶܒܛܰܠ ܩܳܝܡܳܐ ܕܰܐܩܺܝܡܶܬ ܥܰܡ ܟܽܠܗܽܘܢ ܥܰܡ̈ܡܶܐ.
11 ܘܰܒܛܶܠ ܒܶܗ ܒܝܰܘܡܳܐ ܗܰܘ: ܘܺܝܕܰܥܘ ܡܰܟܺܝ̈ܟܶܐ ܕܥܳܢ̈ܳܐ ܕܢܳܛܪܺܝܢ ܗ̱ܘܰܘ ܠܺܝ: ܕܦܶܬܓܳܡܶܗ ܗ̱ܘ ܕܡܳܪܝܳܐ.
12 ܘܶܐܡܪܶܬ ܠܗܽܘܢ: ܐܶܢ ܫܰܦܺܝܪ ܒܥܰܝ̈ܢܰܝܟܽܘܢ ܗܰܒܘ ܠܺܝ ܐܰܓܪܝ: ܐܰܘ ܛܳܠܡܺܝܢ ܐܢ̱ܬܽܘܢ ܠܺܝ: ܘܬܰܩܠܽܘܗܝ ܠܰܐܓܪܝ ܬܠܳܬܺܝܢ ܕܟܶܣܦܳܐ.
13 ܘܶܐܡܰܪ ܠܺܝ ܡܳܪܝܳܐ ܐܰܪܡܳܝܗܝ ܒܶܝܬ ܓܰܙܳܐ: ܫܽܘܒܚܳܐ ܕܺܐܝܩܳܪܳܐ ܕܰܐܘܩܪܶܬ ܡܶܢܗܽܘܢ: ܘܢܶܣܒܶܬ ܬܠܳܬܺܝܢ ܕܟܶܣܦܳܐ ܘܰܐܪܡܺܝܬ ܐܶܢܽܘܢ ܒܶܝܬ ܓܰܙܳܐ ܒܒܰܝܬܶܗ ܕܡܳܪܝܳܐ.
14 ܘܬܶܒܪܶܬ ܠܚܰܒܠܳܐ ܚܽܘܛܪܝ ܐ̱ܚܪܺܢܳܐ: ܕܶܐܒܰܛܶܠ ܐܰܘܝܽܘܬܳܐ ܕܺܐܝܬ ܗ̱ܘܳܬ ܒܶܝܬ ܝܺܗܽܘܕܳܐ ܠܺܝܣܪܳܐܶܝܠ.
15 ܘܶܐܡܰܪ ܠܺܝ ܡܳܪܝܳܐ: ܬܽܘܒ ܣܰܒ ܠܳܟ ܡܳܐܢ̈ܶܐ ܕܪܳܥܝܳܐ ܒܽܘܪܳܐ.
16 ܡܶܛܽܠ ܕܗܳܐ ܐܶܢܳܐ ܡܩܺܝܡ ܐ̱ܢܳܐ ܪܳܥܝܳܐ ܒܰܐܪܥܳܐ: ܕܳܐܒ̈ܕܳܢ ܠܳܐ ܢܶܦܩܽܘܕ: ܘܰܕܛܳܥ̈ܝܳܢ ܠܳܐ ܢܶܒܥܶܐ: ܘܕܰܬܒܺܝܖ̈ܳܢ ܠܳܐ ܢܶܥܨܽܘܒ: ܘܕܰܟܖ̈ܺܝܗܳܢ ܠܳܐ ܢܰܐܣܶܐ: ܘܰܕܩܳܝ̈ܡܳܢ ܠܳܐ ܢܬܰܪܣܶܐ: ܘܒܶܣܪܳܐ ܕܫܰܡܺܝ̈ܢܳܬܳܐ ܢܶܐܟܽܘܠ: ܘܰܟܖ̈ܳܥܰܝܗܶܝܢ ܢܥܰܪܶܩ.
17 ܐܳܘ ܪܳܥܝܳܐ ܒܽܘܪܳܐ: ܕܫܶܒܩܶܬ ܥܳܢ̈ܳܐ ܥܰܠ ܕܪܳܥܳܟ: ܘܥܰܠ ܥܰܝܢܳܟ ܕܝܰܡܺܝܢܳܐ: ܕܪܳܥܳܟ ܕܝܰܡܺܝܢܳܐ ܢܺܐܒܰܫ: ܘܥܰܝܢܳܟ ܕܝܰܡܺܝܢܳܐ ܬܶܣܡܶܐ.