Zechariah 9
The Book of Zechariah
܀ ܙܟ̣ܪܝܐ ܛ ܀
1 ܦܶܬܓܳܡܶܗ ܕܡܳܪܝܳܐ ܥܰܠ ܐܰܪܥܳܐ ܕܚܶܕܪܳܟ. ܘܰܕܕܰܪܡܣܽܘܩ ܩܽܘܪܒܳܢܶܗ: ܡܶܛܽܠ ܕܰܠܡܳܪܝܳܐ ܓܠܶܝܢ ܒܢܰܝ̈ܢܳܫܳܐ: ܘܟܽܠܗܽܘܢ ܫܰܒ̈ܛܶܐ ܕܺܝܣܪܳܐܶܝܠ.
2 ܐܳܦ ܚܡܳܬ ܬܶܬܰܚܰܡ ܒܳܗ̇: ܘܨܽܘܪ ܘܨܰܝܕܳܢ ܕܛܳܒ ܐܶܬܚܰܟܰܡ.
3 ܘܰܒܢܳܬ ܠܶܗ ܨܽܘܪ ܚܶܣܢܳܐ: ܘܟܰܢܫܰܬ ܣܺܐܡܳܐ ܐܰܝܟ ܥܰܦܪܳܐ: ܘܕܰܗܒܳܐ ܐܰܝܟ ܣܝܳܢܳܐ ܕܫܽܘ̈ܩܶܐ.
4 ܡܶܛܽܠ ܗܳܢܳܐ ܡܳܪܝܳܐ ܢܰܘܒܕܺܝܗ̇: ܘܢܰܪܡܶܐ ܒܝܰܡܳܐ ܥܽܘܬܪܳܗ̇: ܘܗܺܝ ܒܢܽܘܪܳܐ ܬܶܬܶܐܟܶܠ.
5 ܘܬܶܚܙܶܐ ܐܰܫܩܳܠܽܘܢ ܘܬܶܕܚܰܠ: ܘܥܳܐܙܳܐ ܬܶܬܟܪܰܗ ܛܳܒ: ܘܥܶܩܪܽܘܢ ܕܰܒܗܶܬ ܠܶܗ ܣܰܒܪܳܗ̇: ܘܢܺܐܒܰܕ ܡܰܠܟܳܐ ܡܶܢ ܥܳܐܙܳܐ: ܘܰܐܫܩܳܠܽܘܢ ܠܳܐ ܬܶܬܶܒ.
6 ܘܢܶܬܒܽܘܢ ܢܽܘܟܖ̈ܳܝܶܐ ܒܰܐܫܕܽܘܕ: ܘܰܐܘܒܶܕ ܓܰܐܝܽܘܬܗܽܘܢ ܕܰܦܠܶܫܬܳܝ̈ܶܐ.
7 ܘܰܐܥܒܰܪ ܕܶܡܗܽܘܢ ܡܶܢ ܦܽܘܡܗܽܘܢ: ܘܛܰܢܦܽܘܬܗܽܘܢ ܡܶܢ ܒܶܝܬ ܫܶܢܰܝ̈ܗܽܘܢ: ܘܢܶܫܬܰܚܪܽܘܢ ܐܳܦ ܗܶܢܽܘܢ ܠܰܐܠܳܗܳܐ: ܘܢܶܗܘܽܘܢ ܐܰܝܟ ܪܰܘܖ̈ܒܳܢܶܐ ܕܺܝܗܽܘܕܳܐ: ܘܥܶܩܪܽܘܢ ܬܶܗܘܶܐ ܐܰܝܟ ܥܶܒܪܽܘܢ.
8 ܘܶܐܫܪܶܐ ܥܰܠ ܒܰܝܬܝ ܩܳܝܽܘܡܳܐ ܡܶܢ ܡܰܢ ܕܥܳܒܰܪ: ܘܡܶܢ ܕܬܳܐܶܒ: ܘܠܳܐ ܢܶܥܒܰܪ ܬܽܘܒ ܥܠܰܝܗܽܘܢ ܡܫܰܥܒܕܳܢܳܐ: ܡܶܛܽܠ ܕܗܳܫܳܐ ܚܙܺܝ݀ܬ ܒܥܰܝܢܰܝ̈.
9 ܕܽܘܨܝ ܛܳܒ ܒܰܪܬ ܨܶܗܝܽܘܢ: ܘܰܩܥܳܝ ܒܰܪܬ ܐܽܘܪܺܫܠܶܡ: ܗܳܐ ܡܰܠܟܶܟܝ ܐܳܬܶܐ ܠܶܟܝ: ܙܰܕܺܝܩܳܐ: ܘܦܳܪܽܘܩܳܐ: ܘܡܰܟܺܝܟܳܐ: ܘܰܪܟܺܝܒ ܥܰܠ ܚܡܳܪܳܐ: ܘܥܰܠ ܥܺܝܠܳܐ ܒܰܪ ܐܰܬܳܢܳܐ.
10 ܘܢܰܘܒܶܕ ܡܰܪܟܰܒܬܳܐ ܡܶܢ ܐܰܦܪܶܝܡ: ܘܣܽܘܣܝܳܐ ܡܶܢ ܐܽܘܪܺܫܠܶܡ: ܢܶܬܒܰܪ ܩܶܫܬܳܐ ܒܰܩܪܳܒܳܐ: ܘܰܢܡܰܠܶܠ ܫܠܳܡܳܐ ܥܰܡ ܥܰܡ̈ܡܶܐ: ܘܢܶܫܠܰܛ ܡܶܢ ܝܰܡܳܐ ܠܝܰܡܳܐ: ܘܡܶܢ ܢܰܗܪܳܐ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ.
11 ܘܳܐܦ ܐܰܢ̱ܬ ܒܰܕܡܳܐ ܕܰܕܝܰܬܺܩܺܐ ܕܺܝܠܳܟ: ܫܪܰܝܬ ܐܰܣܺܝܖ̈ܶܐ ܡܶܢ ܓܽܘܒܳܐ ܕܠܰܝܬ ܒܶܗ ܡܰܝ̈ܳܐ.
12 ܬܶܒܘ ܒܚܶܣܢܳܐ ܐܰܣܺܝܖ̈ܶܐ ܕܰܟܢܽܘܫܬܳܐ: ܘܰܚܠܳܦ ܚܰܕ ܢܽܘܡ ܬܪܶܝܢ ܦܳܪܰܥ ܐ̱ܢܳܐ ܠܟܽܘܢ.
13 ܡܶܛܽܠ ܕܡܶܬܚܶܬ ܩܶܫܬܝ ܥܰܠ ܝܺܗܽܘܕܳܐ: ܘܰܡܠܺܝܬ ܥܰܠ ܐܰܦܪܶܝܡ: ܘܰܫܕܺܝ̇ܬ ܒܢܰܝ̈ܟܝ ܨܶܗܝܽܘܢ ܥܰܠ ܒܢܰܝ̈ܟܝ ܝܰܘܳܢ: ܘܰܥܒܰܕܬܳܟ ܐܰܝܟ ܣܰܝܦܳܐ ܕܓܰܢ̱ܒܳܪܳܐ.
14 ܘܡܳܪܝܳܐ ܥܠܰܝܗܽܘܢ ܢܶܬܓܠܶܐ: ܘܢܶܦܽܘܩ ܓܶܐܪܶܗ ܐܰܝܟ ܒܰܪܩܳܐ: ܘܡܳܪܶܐ ܡܳܖ̈ܰܘܳܬܳܐ ܢܶܩܪܶܐ ܒܩܰܪܢܳܐ: ܘܢܺܐܙܰܠ ܒܥܰܠܥܳܠܳܐ ܠܬܰܝܡܢܳܐ.
15 ܘܡܳܪܝܳܐ ܚܰܝܠܬܳܢܳܐ ܢܰܓܶܢ ܥܠܰܝܗܽܘܢ: ܘܢܶܐܟܠܽܘܢ ܘܢܶܟܒܫܽܘܢ ܟܺܐܦ̈ܶܐ ܒܩܶܠܥܳܐ: ܘܢܶܫܬܽܘܢ ܕܠܽܘܚܝܳܐ ܐܰܝܟ ܚܰܡܪܳܐ: ܘܢܶܬܡܠܽܘܢ ܐܰܝܟ ܡܙܳܓܳܐ ܘܰܐܝܟ ܙܳܘܺܝܬܳܐ ܕܡܰܕܒܚܳܐ.
16 ܘܢܶܦܪܽܘܩ ܐܶܢܽܘܢ ܡܰܪܝܳܐ ܐܰܠܳܗܗܽܘܢ ܒܝܰܘܡܳܐ ܗܰܘ ܠܥܰܡܶܗ ܐܰܝܟ ܥܳܢ̈ܳܐ: ܡܶܛܽܠ ܕܟܺܐܦ̈ܶܐ ܗ̄ܘܰܝ̈ ܩܰܕܺܝ̈ܫܳܬܳܐ ܕܫܰܕ̈ܝܳܢ ܗ̱ܘܰܝ̈ ܒܰܐܪܥܶܗ.
17 ܡܳܐ ܛܳܒ ܘܡܳܐ ܫܰܦܺܝܪ ܥܒܽܘܪܳܐ ܠܓܰܕܽܘ̈ܕܶܐ ܘܚܰܡܪܳܐ ܡܒܰܣܶܡ ܒܬܽܘ̈ܠܳܬܳܐ.