Zechariah 4
The Book of Zechariah
܀ ܙܟ̣ܪܝܐ ܕ ܀
1 ܘܰܗܦܰܟ ܡܰܠܰܐܟܳܐ ܕܰܡܡܰܠܶܠ ܒܺܝ: ܘܰܐܥܺܝܪܰܢܝ ܐܰܝܟ ܓܰܒܪܳܐ ܕܡܶܬܬܥܺܝܪ ܡܶܢ ܫܶܢܬܶܗ.
2 ܘܶܐܡܰܪ ܠܺܝ ܡܳܢܳܐ ܚܙܰܝܬ: ܘܶܐܡܪܶܬ ܚܙܺܝ݀ܬ ܡܢܳܪܬܳܐ ܕܕܰܗܒܳܐ: ܘܟܰܦܬܳܐ ܥܰܠ ܪܺܝܫܳܗ̇: ܘܫܰܒܥܳܐ ܫܖ̈ܳܓܺܝܢ ܥܠܶܝܗ̇: ܘܫܰܒܥܳܐ ܫܰܒܥܳܐ ܦܽܘ̈ܡܺܝܢ ܠܰܫܪܳܓܳܐ ܕܺܐܝܬ ܒܪܺܝܫܳܗ̇.
3 ܘܰܬܪܶܝܢ ܙܰܝܬܺܝ̈ܢ ܐܺܝܬ ܥܠܶܝܗ̇: ܚܰܕ ܡܶܢ ܝܰܡܺܝܢܳܗ̇ ܕܟܰܦܬܳܐ ܘܚܰܕ ܡܶܢ ܣܶܡܳܠܶܗ.
4 ܘܰܥܢܺܝܬ ܘܶܐܡܪܶܬ ܠܡܰܠܰܐܟܳܐ ܕܰܡܡܰܠܶܠ ܒܺܝ: ܡܳܢܳܐ ܐܶܢܽܘܢ ܗܳܠܶܝܢ ܡܳܪܝ.
5 ܥܢܳܐ ܡܰܠܰܐܟܳܐ ܕܰܡܡܰܠܶܠ ܒܺܝ ܘܶܐܡܰܪ ܠܺܝ: ܠܳܐ ܝܳܕܰܥ ܐܰܢ̱ܬ ܡܳܢܳܐ ܐܶܢܽܘܢ ܗܳܠܶܝܢ: ܘܶܐܡܪܶܬ ܠܳܐ ܝܳܕܰܥ ܐ̱ܢܳܐ ܡܳܪܝ.
6 ܘܶܐܡܰܪ ܠܺܝ: ܗܳܢܰܘ ܦܶܬܓܳܡܶܗ ܕܡܳܪܝܳܐ ܥܰܠ ܙܽܘܪܒܳܒܶܠ: ܠܳܐ ܒܚܰܝܠܳܐ ܘܠܳܐ ܒܥܽܘܫܢܳܐ: ܐܶܠܳܐ ܐܶܢ ܒܪܽܘܚ ܐܳܡܰܪ ܡܳܪܝܳܐ ܚܰܝܠܬܳܢܳܐ.
7 ܡܳܢܳܐ ܐܰܢ̱ܬ ܛܽܘܪܳܐ ܪܰܒܳܐ ܩܕܳܡ ܙܽܘܪܒܳܒܶܠ: ܐܶܠܳܐ ܐܰܝܟ ܦܩܰܥܬܳܐ: ܘܰܐܦܶܩ ܠܟܺܐܦܳܐ ܪܺܝܫܝܬܳܐ ܕܫܰܘܝܽܘܬܳܐ ܘܰܕܖ̈ܰܚܡܶܐ.
8 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
9 ܐܺܝܕܰܘ̈ܗܝ ܕܙܽܘܪܒܳܒܶܠ ܣܳܡ ܫܰܬܐܣܰܘ̈ܗܝ ܕܒܰܝܬܳܐ ܗܳܢܳܐ: ܘܺܐܝܕܰܘ̈ܗܝ ܡܫܰܠ̈ܡܳܢ ܠܶܗ: ܘܬܶܕܥܽܘܢ ܕܡܳܪܝܳܐ ܚܰܝܠܬܳܢܳܐ ܫܰܕܪܰܢܝ ܠܘܳܬܟܽܘܢ.
10 ܡܶܛܽܠ ܕܡܰܢܽܘ ܫܳܐܶܛ ܠܝܰܘ̈ܡܳܬܳܐ ܙܥܽܘܖ̈ܶܐ: ܘܰܢܚܽܘܪܽܘܢ ܘܢܶܚܙܽܘܢ ܠܟܺܐܦܳܐ ܕܦܽܘܪܫܳܢܳܐ ܒܺܐܝܕܰܘ̈ܗܝ: ܕܙܽܘܪܒܳܒܶܠ: ܗܳܠܶܝܢ ܐܶܢܶܝܢ ܫܒܰܥ ܥܰܝܢܰܘ̈ܗܝ ܕܡܳܪܝܳܐ ܕܚܳܝܖ̈ܳܢ ܒܟܽܠܳܗ̇ ܐܰܪܥܳܐ.
11 ܥܢܺܝܬ ܘܶܐܡܪܶܬ ܠܶܗ: ܘܡܳܢܳܐ ܐܶܢܽܘܢ ܗܳܠܶܝܢ ܬܪܶܝܢ ܙܰܝܬܺܝ̈ܢ: ܕܡܶܢ ܝܰܡܺܝܢܳܗ̇ ܕܟܰܦܬܳܐ ܘܡܶܢ ܣܶܡܳܠܳܗ̇.
12 ܥܢܺܝܬ ܕܬܰܪܬܶܝܢ ܙܰܒ̈ܢܺܝܢ ܘܶܐܡܪܶܬ ܠܶܗ: ܘܡܳܢܳܐ ܐܶܢܶܝܢ ܗܳܠܶܝܢ ܬܰܪܬܶܝܢ ܣܰܘ̈ܟܶܐ ܕܙܰܝܬܳܐ: ܕܒܰܝܢܳܬ ܬܪܶܝܢ ܢܚܺܝܖ̈ܺܝܢ ܕܕܰܗܒܳܐ: ܕܢܳܣܟܺܝܢ ܡܶܢܗܽܘܢ ܕܰܗܒܳܐ.
13 ܘܶܐܡܰܪ ܠܺܝ: ܝܳܕܰܥ ܐܰܢ̱ܬ ܡܳܢܳܐ ܐܶܢܽܘܢ ܗܳܠܶܝܢ: ܘܶܐܡܪܶܬ ܠܳܐ ܡܳܪܝ.
14 ܘܶܐܡܰܪ ܠܺܝ ܗܳܠܶܝܢ ܐܶܢܽܘܢ ܬܪܶܝܢ ܒܢܰܝ̈ ܕܽܘܗܳܢܳܐ: ܕܩܳܝܡܺܝܢ ܩܕܳܡ ܡܪܳܐ ܕܟܽܠܳܗ̇ ܐܰܪܥܳܐ.