Zechariah 6
The Book of Zechariah
܀ ܙܟ̣ܪܝܐ ܘ ܀
1 ܘܗܶܦܟܶܬ ܐܰܪܺܝܡܶܬ ܥܰܝܢܰܝ̈ ܘܰܚܙܺܝܬ: ܘܗܳܐ ܐܰܪܒܰܥ ܡܰܖ̈ܟܒܳܢ ܢܳܦ̈ܩܳܢ ܡܶܢ ܒܰܝܢܳܬ ܬܪܶܝܢ ܛܽܘܖ̈ܺܝܢ: ܘܛܽܘܖ̈ܶܐ ܗܳܢܽܘܢ ܛܽܘܖ̈ܶܐ ܐܶܢܽܘܢ ܕܰܢܚܳܫܳܐ.
2 ܒܡܰܪܟܰܒܬܳܐ ܩܰܕܡܳܝܬܳܐ ܖ̈ܰܟܫܳܐ ܣܽܘ̈ܡܳܩܶܐ: ܘܰܒܡܰܪܟܰܒܬܳܐ ܕܬܰܪܬܶܝܢ ܖ̈ܰܟܫܳܐ ܐܽܘ̈ܟܳܡܶܐ.
3 ܘܰܒܡܰܪܟܰܒܬܳܐ ܕܰܬܠܳܬ ܖ̈ܰܟܫܳܐ ܚܶܘܳܖ̈ܶܐ: ܘܰܒܡܰܪܟܰܒܬܳܐ ܕܰܐܪܒܰܥ ܖ̈ܰܟܫܳܐ ܐܽܘܖ̈ܳܓܶܐ.
4 ܘܰܥܢܺܝܬ ܘܶܐܡܪܶܬ ܠܡܰܠܰܐܟܳܐ ܕܰܡܡܰܠܶܠ ܒܺܝ: ܡܳܢܳܐ ܐܶܢܽܘܢ ܗܳܠܶܝܢ ܡܳܪܝ.
5 ܥܢܳܐ ܡܰܠܰܐܟܳܐ ܘܶܐܡܰܪ ܠܺܝ: ܗܳܠܶܝܢ ܐܶܢܶܝܢ ܐܰܪܒܰܥ ܖ̈ܽܘܚܰܝ ܫܡܰܝܳܐ: ܕܩܳܝ̈ܡܳܢ ܗ̱ܘܰܝ̈ ܩܕܳܡ ܡܳܪܳܐ ܕܟܽܠܳܗ̇ ܐܰܪܥܳܐ.
6 ܕܺܐܝܬ ܒܳܗ̇ ܖ̈ܰܟܫܳܐ ܐܽܘܟܳܡ̈ܶܐ: ܢܳܦܩܺܝܢ ܠܰܐܪܥܳܐ ܕܓܰܪܒܝܳܐ: ܘܚܶܘܳܖ̈ܶܐ ܢܳܦܩܺܝܢ ܒܳܬܰܪܗܽܘܢ: ܐܘܖ̈ܳܓܶܐ ܢܳܦܩܺܝܢ ܠܰܐܪܥܳܐ ܕܬܰܝܡܢܳܐ.
7 ܘܣܽܘ̈ܡܳܩܶܐ ܢܦܰܩܘ: ܘܰܒܥܰܘ ܠܡܺܐܙܰܠ ܠܰܡܗܰܠܳܟܽܘ ܒܰܐܪܥܳܐ: ܘܶܐܡܰܪ ܠܗܽܘܢ ܙܶܠܘ ܗܰܠܶܟܘ ܒܰܐܪܥܳܐ: ܘܗܰܠܶܟܘ ܒܰܐܪܥܳܐ.
8 ܘܰܩܥܳܐ ܘܶܐܡܰܪ ܠܺܝ: ܚܙܺܝ ܗܳܠܶܝܢ ܕܢܳܦܩܺܝܢ ܠܰܐܪܥܳܐ ܕܓܰܪܒܝܳܐ: ܘܰܡܢܺܝܚܺܝܢ ܪܽܘܚܝ ܒܰܐܪܥܳܐ ܕܓܰܪܒܝܳܐ.
9 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
10 ܣܰܒ ܡܶܢ ܫܒܺܝܬܳܐ: ܡܶܢ ܚܽܘܠܕܺܝ: ܘܡܶܢ ܛܽܘܒܝܳܐ: ܘܡܶܢ ܝܺܕܰܥܝܳܐ: ܘܬܳܐ ܒܝܰܘܡܳܐ ܗܰܘ: ܘܥܽܘܠ ܠܒܶܝܬ ܝܽܘܫܺܝܳܐ ܒܰܪ ܨܦܰܢܝܳܐ ܕܶܐܬܳܐ ܡܶܢ ܒܳܒܶܠ.
11 ܣܰܒ ܣܺܐܡܶܗ ܘܕܰܗܒܶܗ: ܘܰܥܒܶܕ ܟܠܺܝܠܳܐ: ܘܣܺܝܡ ܒܪܺܝܫܶܗ ܕܝܶܫܽܘܥ ܒܰܪ ܝܽܘܙܳܕܳܩ ܟܳܗܢܳܐ ܪܰܒܳܐ.
12 ܘܶܐܡܰܪ ܠܶܗ: ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܗܳܐ ܓܰܒܪܳܐ ܘܰܫܡܶܗ ܕܶܢܚܳܐ: ܘܡܶܢ ܠܬܰܚܬ ܢܶܕܢܰܚ.
13 ܘܗܽܘ ܢܶܒܢܶܐ ܗܰܝܟܠܶܗ ܕܡܳܪܝܳܐ: ܘܗܽܘ ܢܩܰܒܶܠ ܫܽܘܒܚܳܐ: ܘܢܶܬܶܒ ܘܢܶܫܬܰܠܰܛ ܥܰܠ ܟܽܘܪܣܝܶܗ: ܘܢܶܗܘܶܐ ܟܳܗܢܳܐ ܥܰܠ ܟܽܘܪܣܝܶܗ: ܘܡܶܠܟܳܐ ܕܰܫܠܳܡܳܐ ܢܶܗܘܶܐ ܒܶܝܬ ܬܖ̈ܰܝܗܽܘܢ.
14 ܘܰܟܠܺܝܠܳܐ ܢܶܗܘܶܐ ܠܚܽܘܠܕܺܝ ܘܰܠܛܽܘܒܝܳܐ ܘܠܺܝܕܰܥܝܳܐ: ܘܰܠܝܽܘܫܺܝܳܐ ܒܰܪ ܨܦܰܢܝܳܐ ܠܕܽܘܟܪܳܢܳܐ ܒܗܰܝܟܠܶܗ ܕܡܳܪܝܳܐ.
15 ܘܢܺܐܬܽܘܢ ܖ̈ܰܚܺܝܩܶܐ ܘܢܶܒܢܽܘܢ ܗܰܝܟܠܶܗ ܕܡܳܪܝܳܐ: ܘܬܶܕܥܽܘܢ ܕܡܳܪܝܳܐ ܚܰܝܠܬܳܢܳܐ ܫܰܕܪܰܢܝ ܠܘܳܬܟܽܘܢ: ܐܶܢ ܬܶܫܡܥܽܘܢ ܒܩܳܠܶܗ ܕܡܳܪܝܳܐ ܐܰܠܳܗܟܽܘܢ.